(vovworld)- ມີຊາວຫວຽດນາມ ອາໄສຢູ່ຕ່າງປະເທດກວ່າ 4,5 ລ້ານຄົນ ພວມດຳລົງຊີວິດ ແລະ ເຮັດວຽກ,ຮ່ຳຮຽນຢູ່ 109 ປະເທດ ແລະ ເຂດແຄ້ວນໃນທົ່ວໂລກ ແມ່ນແຫລ່ງກຳລັງສຳຄັນໃນພາລະກິດສ້າງສາ ແລະ ພັດທະນາປະເທດຊາດ. “ເວທີປາໄສປັນຍາຊົນ ຊາວຫວຽດນາມ ອາໄສຢູ່ຕ່າງປະເທດ ກັບການພັດທະນາເສດຖະກິດ ແລະ ເຊື່ອມໂຍງຂອງຫວຽດນາມ ໄລຍະ 2016-2020” ແລະ ການພົບປະຄັ້ງຕ່າງໆລະຫວ່າງບັນດາອົງການກ່ຽວຂ້ອງກັບຜູ້ຕາງຫນ້າຊາວຫວຽດນາມ ອາໄສຢູ່ຕ່າງປະເທດ ຫາກໍດຳເນີນໄປໃນວັນທີ 7/6 ຢູ່ ຮ່າໂນ້ຍ ແມ່ນບັນດາການເຄື່ອນໄຫວແທດຈິງ ເພື່ອໃຫ້ຊາວຫວຽດນາມ ອາໄສຢູ່ຕ່າງປະເທດ ປະກອບຄຳເຫັນໃສ່ວິວັດການສ້າງສາບ້ານເກີດເມືອງນອນ.
“ເວທີປາໄສປັນຍາຊົນ ຊາວຫວຽດນາມ ອາໄສຢູ່ຕ່າງປະເທດ ກັບການພັດທະນາເສດຖະກິດ ແລະ ເຊື່ອມໂຍງຂອງຫວຽດນາມ ໄລຍະ 2016-2020” ໂດຍຄະນະເສດຖະກິດສູນກາງ ສົມທົບກັບຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດ, ສັງກັດກະຊວງການຕ່າງປະເທດຫວຽດນາມ ຈັດຕັ້ງຂຶ້ນ. ແລະກໍໃນວັນທີ 7/6, ຄະນະກຳມະການສູນກາງແນວໂຮມປະເທດຊາດຫວຽດນາມ ສົມທົບກັບຄະນະເສດຖະກິດສູນກາງ, ຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດ ໄດ້ຈັດຕັ້ງການພົບປະສັງສັນກັບຜູ້ຊ່ຽວຊານ, ປັນຍາຊົນ ຊາວຫວຽດນາມ ອາໄສຢູູ່ຕ່າງປະເທດ ເພື່ອປຶກສາຫາລື ກ່ຽວກັບນະໂຍບາຍ ແລະ ບັນດາບັນຫາໃຫຍ່ ມຸ່ງໄປເຖິງຈຸດໝາຍສ້າງສາ ແລະ ພັດທະນາປະເທດຊາດແບບຍືນຍົງ ແມ່ນສະແດງໃຫ້ເຫັນຄວາມເອົາໃຈໃສ່ຂອງພັກ ແລະ ລັດຕໍ່ຖັນແຖວ ປັນຍາຊົນ ຊາວຫວຽດນາມ ອາໄສຢູູ່ຕ່າງປະເທດ.
ບັນດາຜູ້ແທນເຂົ້າຮ່ວມເວທີປາໄສ
ພາບ:dantri.com
|
ຊາວຫວຽດນາມອາໄສຢູູ່ຕ່າງປະເທດສຸດຈິດສຸດໃຈກັບບັນດາບັນຫາຂອງປະເທດຊາດ
ເປັນຄັ້ງທຳອິດ, ບັນດານັກວິທະຍາສາດ, ປັນຍາຊົນ ຊາວຫວຽດນາມ ອາໄສຢູູ່ຕ່າງປະເທດທີ່ ມີອິດທິພົນຊື່ສຽງ ໃນບັນດາຂົງເຂດຄື: ການສຶກສາບຳລຸງສ້າງ, ການເງິນ ທະນາຄານ, ເຕັກໂນໂລຊີຊີວະສາດ, ເຕັກໂນໂລຊີຂໍ້ມູນຂ່າວສານ, ການອອກແບບເຮືອບິນ, ສົ່ງເສີມສຸຂະພາບ… ປະຈຸບັນ ພວມເຮັດວຽກຢູ່ບັນດາສູນຄົ້ນຄ້ວາ, ມະຫາວິທະຍາໄລຊັ້ນນຳໃນໂລກຄື: Havard, Indiana, ເສດຖະກິດ ປາຣີ ມີຫນ້າໃນພົບປະສັງສັນ ໄດ້ຍົກອອກບັນດາຂໍ້ສະເຫນີແນະຢ່າງເລິກເຊິ່ງຕໍ່ພັກ ແລະ ລັດ ກ່ຽວກັບວິວັດການສ້າງສາ ແລະ ພັດທະນາປະເທດຊາດໃນໄລຍະໃຫມ່. ບັນດານັກວິທະຍາສາດ, ປັນຍາຊົນ ຊາວຫວຽດນາມ ອາໄສຢູູ່ຕ່າງປະເທດ ຖືວ່າ: ລັດຄວນເອົາໃຈໃສ່ ແລະ ລົງທຶນໃຫ້ຂົງເຂດກະສິກຳ ຊື່ງແມ່ນຫນຶ່ງໃນບັນດາເສົາຄ້ຳພັດທະນາກະສິກຳ ນັ້ນແມ່ນການກໍ່ສ້າງ ແລະ ຮັກສາແຫລ່ງ gen ຢູ່ ຫວຽດນາມ. ສາດສະດາຈານ ເຈີນງອກແອງ, ຜູ້ອຳນວຍການກຸ່ມຂໍ້ລິເລີ່ມ ຫວຽດນາມ ຖືວ່າ: ກະສິກຳ ແມ່ນພື້ນຖານໃຫ້ແກ່ການພັດທະນາຂອງປະເທດຊາດ ເຖິງຢ່າງໃດກໍຕາມ ເພື່ອພັດທະນາຕ້ອງຫັນເປັນອຸດສາຫະກຳກໍຄືຕ້ອງແກ້ໄຂບັນຫາມະນຸດ, ບຳລຸງສ້າງແຫລ່ງຊັບພະຍາກອນມະນຸດເປັນຢ່າງດີ.
“ກະສິກຳແມ່ນຈຸດເລີ່ມຕົ້ນຂອງທຸກການປະຕິຮູບສຳເລັດຜົນ. ພວກເຮົາໄດ້ປະຕິຮູບກະສິກຳສຳເລັດຜົນ ແລະ ພວກເຮົາຍັງມີຄວາມສາມາດບົ່ມຊ້ອນຫລາຍຢ່າງ. ເລື່ອງຍູ້ແຮງ ເພື່ອໃຫ້ຫວຽດນາມກາຍເປັນປະເທດມະຫາອຳນາດດ້ານກະສິກຳແມ່ນຄວາມເຫັນດີເລີດ. ນອກນັ້ນ ໃນສັດຕະວັດທີ 21, ບໍ່ມີແຫລ່ງກຳລັງໃດສຳຄັນກວ່າແຫລ່ງຊັບພະຍາກອນມະນຸດ. ແຜນການຍົກສູງລະດັບຄວາມຮູ້, ການສຶກສາທັກສະ ແມ່ນສຳຄັນທີ່ສຸດ.”
ບັນດາປັນຍາຊົນຊາວຫວຽດນາມອາໄສຢູ່ຕ່າງປະເທດ ກໍຖືວ່າ ລັດຖະບານ ຄວນຍາດແຍ່ງການສະຫນັບສະຫນູນຈາກສາກົນໃນວິວັດການປະເທດຊາດພັດທະນາຢ່າງບຸກທະລຸ, ສ້າງເງື່ອນໄຂ ແລະ ຕັ້ງຄວາມໄວ້ເນື້ອເຊື່ອໃຈເພື່ອມອບບັນດາຫນ້າທີ່ລະອຽດໃຫ້ປັນຍາຊົນ ໃນຫນ້າທີ່ຟື້ນຟູເສດຖະກິດ ແລະ ພັດທະນາປະເທດຊາດ. ບັນດາປັນຍາຊົນ ຊາວຫວຽດນາມອາໄສຢູ່ຕ່າງປະເທດ ກໍປະກອບຄຳເຫັນເພື່ອໃຫ້ຫວຽດນາມ ມີບາດກ້າວບຸກທະລຸໃນການຄຸ້ມຄອງປະເທດຊາດ ຜ່ານເຕັກໂນໂລຊີຂໍ້ມູນຂ່າວສານ. ປັນຍາຊົນຊາວຫວຽດນາມ ອາໄສຢູ່ຕ່າງປະເທດຫລາຍຄົນ ກໍຢືນຢັນ: ຈະສະຫງວນເວລາ, ພູມປັນຍາ, ບົດຮຽນ ແລະ ບັນດາການພົວພັນເພື່ອ ພ້ອມກັບພັກ, ລັດຖະບານ ແລະ ແນວໂຮມປະເທດຊາດຫວຽດນາມ ພັດທະນາປະເທດຊາດ.
ເອົາໃຈໃສ່ເຖິງການເສີມຂະຫຍາຍແຫລ່ງກຳລັງຂອງຊາວຫວຽດນາມອາໄສຢູ່ຕ່າງປະເທດກວ່າອີກ
ຖັນແຖວປັນຍາຊົນ ຊາວຫວຽດນາມອາໄສຢູ່ຕ່າງປະເທດ ຍາມໃດກໍໄດ້ຮັບການຕີລາຄາວ່າແມ່ນທ່າແຮງຂອງປະຊາຄົມ, ແມ່ນແຫຼ່ງກຳລັງສາມາດປະກອບສ່ວນຢ່າງຕັ້ງຫນ້າໃຫ້ແກ່ພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມ. ໃນຊຸມປີມໍ່ໆມານີ້ ພັກ ແລະ ລັດ ໄດ້ປະກາດໃຊ້ຫລາຍນະໂຍບາບດຶງດູດຖັນແຖວ ປັນຍາຊົນ ຊາວຫວຽດນາມອາໄສຢູ່ຕ່າງປະເທດ ປະກອບສ່ວນກໍ່ສ້າງເສດຖະກິດ, ພັດທະນາວິທະຍາສາດເຕັກໂລໂລຊີຂອງປະເທດຊາດ. ສິ່ງດັ່ງກ່າວໄດ້ນຳມາເຊິ່ງໝາກຜົນຕັ້ງຫນ້າ, ຈຳນວນ ປັນຍາຊົນ ຊາວຫວຽດນາມອາໄສຢູ່ຕ່າງປະເທດ ກັບຄືນເມືອເຄື່ອນໄຫວຢູ່ພາຍໃນປະເທດ ນັບມື້ນັບຫລາຍ. ທີ່ເວທີປາໄສ, ຜູ້ຊ່ຽວຊານ, ປັນຍາຊົນ ຊາວຫວຽດນາມອາໄສຢູ່ຕ່າງປະເທດ ກັບການພັດທະນາເສດຖະກິດ ແລະ ເຊື່ອມໂຍງຂອງຫວຽດນາມ ໄລຍະ 2016-2020, ທ່ານນາງຮອງປະທານປະເທດຫວຽດນາມ ຫງວຽນທິຢວານ ອີກຄັ້ງຫນຶ່ງໄດ້ຢືນຢັນວ່າ: ປະຊາຄົມ ຊາວຫວຽດນາມອາໄສຢູ່ຕ່າງປະເທດ, ໃນນັ້ນ ມີຜູ້ຊ່ຽວຊານ, ນັກວິທະຍາສາດ, ປັນຍາຊົນຫລາຍຄົນນແມ່ນພາກສ່ວນຫນຶ່ງທີ່ສຳຄັນບໍ່ອາດຕັດແຍກອອກຈາກປະເທດຊາດໄດ້, ແມ່ນທ່າແຮງຂອງປະຊາຄົມຊາວຫວຽດນາມອາໄສຢູ່ຕ່າງປະເທດ. ຄວາມຮູ້, ບົດຮຽນຄຸ້ມຄອງ, ທັກສະ, ພູມປັນຍາ, ເຕັກໂນໂລຊີ ຂອງ ຊາວຫວຽດນາມ ອາໄສຢູ່ຕ່າງປະເທດ ຈະປະກອບກຳລັງຫນູນຕື່ມອີກເພື່ອຍົກສູງຄຸນນະພາບການພັດທະນາ, ເຊື່ອມໂຍງຢ່າງວ່ອງໄວ, ໝັ້ນຄົງຂອງປະເທດຊາດ. ພັກ ແລະ ລັດ ຍາມໃດກໍເຄົາລົບ, ສ້າງເງື່ອນໄຂ ແລະຕີລາຄາສູງບັນດາການປະກອບສ່ວນອັນລ້ຳຄ່າຂອງເຂົາເຈົ້າ.
“ບັນດາອົງການກ່ຽວຂ້ອງຄວນຮັບຟັງ, ລວບລວມບັນດາຄຳເຫັນຢ່າງຄົບຖ້ວນເພື່ອຄົ້ນຄ້ວາ, ໄຈ້ແຍກໃນວິວັດການສະເຫນີເພື່ອສ້າງກົນໄກນະໂຍບາຍໃຫມ່. ພ້ອມກັນນັ້ນ, ຜ່ານເວທີປາໄສຄັ້ງນີ້, ຂ້າພະເຈົ້າຫວັງວ່າ ການຮ່ວມມືລະຫວ່າງບັນດາຜູ້ຊ່ຽວຊານ, ປັນຍາຊົນຢູ່ພາຍໃນ ແລະ ຕ່າງປະເທດ ພ້ອມກັບເພື່ອນມິດສາກົນ ໄດ້ຮັບການເພີ່ມທະວີ ເພື່ອຄົ້ນຄ້ວາ ແລະ ສະເຫນີບັນດາມາດຕະການເໝາະສົມໃນຫລາຍຂົງເຂດຕ່າງກັນຂອງຫວຽດນາມ ໃນວິວັດການເຊື່ອມໂຍງ, ພັດທະນາ.”
ບັນດາຄຳເຫັນປະກອບຂອງຖັນແຖວປັນຍາຊົນຊາວຫວຽດນາມ ອາໄສຢູ່ຕ່າງປະເທດ ຈາກພຶດຕິກຳຕົວຈິງໃນຊີວິດ ແມ່ນພື້ນຖານເພື່ອໃຫ້ພັກ ແລະ ລັດ ຫວຽດນາມ ສ້າງກົນໄກ, ນະໂຍບາຍຊຸກຍູ້ການພັດທະນາເສດຖະກິດ ສັງຄົມໃນໄລຍະເຊື່ອມໂຍງເຂົ້າກັບສາກົນ.