(vovworld)- 70 ປີຜ່ານມາ, ວິທະຍຸກະຈາຍສຽງຫວຽດນາມ ຍາມໃດກໍຮ່ວມເດີນທາງພ້ອມກັບປະເທດຊາດ, ເຊື່ອມຕໍ່ຊາວຫວຽດນາມນັບລ້ານໆຄົນໃນການຕໍ່ຕ້ານຕ້ານລ່າເມືອງຂຶ້ນຝລັ່ງ ແລະຈັກກະພັດອາເມລິກາກູ້ຊາດ ກໍຄືໃນກິດຈະການປ່ຽນແປງໃຫມ່, ພັດທະນາປະເທດຊາດປະຈຸບັນ. ໃນຕະຫລອດໄລຍະທາງດັ່ງກ່າວ, ວິທະຍຸກະຈາຍສຽງຫວຽດນາມ ໄດ້ເຕີບໃຫຍ່ຂຶ້ນ ແລະ ແມ່ນອົງການກະບອກສຽງຢ່າງເປັນທາງການ, ມີການປະກອບສ່ວນສຳຄັນຫລາຍຢ່າງເຂົ້າໃນການປະຕິບັດຫນ້າທີ່ການເມືອງ ຊື່ງພັກ, ລັດ ແລະ ປະຊາຊົນມອບໝາຍໃຫ້.
ສຳນັກງານຂອງVOV
|
ເນື່ອງໃນໂອກາດສະເຫລີມສະຫລອງ 70 ປີແຫ່ງວັນສ້າງຕັ້ງວິທະຍຸກະຈາຍສຽງຫວຽດນາມ (VOV), ຫ້ອງມູນເຊື້ອຫ້ອງຫນຶ່ງກ່ຽວກັບປະຫວັດຄວາມເປັນມາຂອງ VOV ໄດ້ເປີດສະຫລອງເມື່ອວັນທີ 26/8/2015. ຫ້ອງມູນເຊືື້ອນີ້ໄດ້ປະກອບສ່ວນວາດພາບເຖິງປະຫວັດແຫ່ງການພັດທະນາຂອງ VOV. ມີຮູບພາບ, ວັດຖຸພັນຫລາຍຢ່າງທີ່ນຳວາງສະແດງຢູ່ທີ່ນີ້ ແມ່ນການພິສູດໃຫ້ເຫັນບັນດາຜົນງານ, ການປະກອບສ່ວນຂອງ VOV ພ້ອມກັບປະຫວັດສາດຂອງຊາດ.
ອົງການສື່ມວນຊົນທີ່ສຳຄັນ, ນຳຫນ້າໃນແນວຮົບດ້ານແນວຄິດ
ກ່ອນນີ້ 70 ປີເຕັມ, ເວລາ 11 ໂມງ 30 ນາທີ ຂອງວັນທີ 7/9/1945, VOV ໄດ້ອອກອາກາດລາຍການທຳອິດ ຊື່ງເນື້ອໃນຕົ້ນຕໍແມ່ນບົດຖະແຫລງປະກາດເອກະລາດ ໂດຍປະທານໂຮ່ຈິມີນ ອ່ານ ຢູ່ສະຫນາມຫລວງ ບາດີງ, ປະກາດຕໍ່ຫນ້າພໍ່ແມ່ປະຊາຊົນຫວຽດນາມ ແລະ ປະຊາຊົນໂລກ ກ່ຽວກັບການສະຖາປະນາ ປະເທດ ສາທາລະນະລັດ ປະຊາທິປະໄຕ ຫວຽດນາມ, ປະຈຸບັນແມ່ນປະເທດ ສສ ຫວຽດນາມ. ນັບແຕ່ໄລຍະນັ້ນມາຮອດປະຈຸບັນ, ພ້ອມກັບໄລຍະປະຫວັດສາດອັນສະຫງ່າລາສີຂອງປະເທດຊາດ, VOV ໄດ້ເຕີບໃຫຍ່ເທື່ອລະກ້າວ, ຍາມໃດກໍສຳເລັດຫນ້າທີ່ຊື່ງພັກ ແລະ ປະຊາຊົນມີຄວາມເຊື່ອໝັ້ນມອບໝາຍໃຫ້ຢ່າງດີເດັ່ນ. ໃນໄລຍະຕໍ່ຕ້ານຕ້ານລ່າເມືອງຂຶ້ນ ຝລັ່ງ, ບັນດາລາຍການຂອງ VOV ໄດ້ເຜີຍແຜ່ແຜນນະໂຍບາຍ, ຄຳສັ່ງຂອງພັກ,ລັດ, ລະດົມກຳລັງໃຈຕໍ່ສູ້, ກໍຄືນ້ຳໃຈຫ້າວຫັນເຂົ້າຮ່ວມການຕໍ່ຕ້ານຕ້ານລ່າເມືອງຂຶ້ນຝລັ່ງ ຂອງກອງທັບ ແລະ ປະຊາຊົນໃນທົ່ວປະເທດ, ສິ້ນສຸດດ້ວຍໄຊຊະນະດຽນບຽນຝູຄັ້ງປະຫວັດສາດເມື່ອປີ 1954, ເຮັດໃຫ້ລ່າເມືອງຂຶ້ນຝລັ່ງຕ້ອງຖອນກຳລັງທັງໝົດອອກຈາກຫວຽດນາມ, ຮັບຮູ້ພື້ນຖານເອກະລາດຂອງລັດຫວຽດນາມ. ໃນໄລຍະຕໍ່ຕ້ານຕ້ານຈັກກະພັດ ອາເມລິກາກູ້ຊາດ, VOV ແມ່ນອົງການສື່ມວນຊົນ ສົ່ງຂ່າວເຖິງປະຊາຊົນຢູ່ທຸກແຖບຖິ່ນໃນທົ່ວປະເທດ, ລະດົມກຳລັງໃຈທົ່ວກອງທັບທົ່ວປວງຊົນ ຫວຽດນາມ ພາຍໃຕ້ການຊີ້ນຳນຳພາຂອງພັກກອມມູນິດຫວຽດນາມ ດຳເນີນການຕໍ່ຕ້ານຕ້ານຈັກກະພັດອາເມລິກາ ກູ້ຊາດ, ສິ້ນສຸດດ້ວຍບັ້ນຮົບ ໂຮ່ຈິມີນ ຄັ້ງປະຫວັດສາດ, ປົດປ່ອຍພາກໃຕ້ຢ່າງສົມບູນ, ທ້ອນໂຮມປະເທດຊາດເປັນເອກະພາບເມື່ອປີ 1975. ໃນປະຫວັດແຫ່ງການພັດທະນາ, ຍາມໃດ VOV ກໍຢັ້ງຢືນແມ່ນອົງການສື່ມວນຊົນສຳຄັນ, ນຳຫນ້າ ໃນແນວຮົບດ້ານແນວຄິດ, ທັງເຜີຍແຜ່ທັດສະນະ ແນວທາງຂອງພັກ, ບັນດາແຜນນະໂຍບາຍຂອງລັດ, ທັງສ່ອງແສງຄວາມມຸ້ງມາດປາດຖະຫນາຂອງມະຫາຊົນ. ທ່ານ ສາດສະດາຈານ, ດຣ ຫວູນວັນຮ່ຽນ, ຮອງປະທານ ສະພາທິດສະດີສູນກາງ, ອະດີດ ຜູ້ອຳນວຍການໃຫຍ່ VOV ໃຫ້ຮູ້ວ່າ:
“ໃນໄລຍະຕ້ານຈັກກະພັດອາເມລິກາ, VOV ໄດ້ມີການອຸທິດສ່ວນຢ່າງດີເດັ່ນພິເສດ. ບໍ່ພຽງແຕ່ແມ່ນແຫລ່ງລະດົມກຳລັງໃຈໃຫ້ນັກຮົບຢູ່ສະຫນາມຮົບເທົ່ານັ້ນ ຫາກນັບທັງປະຊາຊົນຢູ່ແນວຫລັງອີກດ້ວຍ. ມີສິ່ງພິເສດມາເຖິງປະຈຸບັນ ຈຶ່ງປະກາດ, ນັ້ນແມ່ນ ໃນບັນດາລາຍການຂອງ VOV ໃນຄາວນັ້ນ, ບາງເທື່ອອອກອາກາດບົດເພງຫນຶ່ງ ຫລື ລາຍການຂ່າວຫນຶ່ງ ແຕ່ນັ້ນພັດແມ່ນຄຳສັ່ງລັບ ຫລື ກົດລັບຈາກ ກອງເສນາທິການໃຫຍ່ກອງທັບຢູ່ ຮ່າໂນ້ຍ ເພື່ອອອກຄຳສັ່ງຕໍ່ສູ້ຢູ່ບັນດາແນວຮົບພາກໃຕ້.”
ໃນ 70 ປີຜ່ານມາ, ຜ່ານບັນດາລາຍການກະຈາຍສຽງພາກພາສາຕ່າງປະເທດ ກໍໄດ້ຊ່ວຍໃຫ້ປະຊາຊົນທົ່ວໂລກ ມີຄວາມເຂົ້າໃຈ ແລະ ສະຫນັບສະຫນູນການຕ່ໍ່ສູ້ເປັນທຳຂອງປະຊາຊົນຫວຽດນາມ, ເຂົ້າໃຈກ່ຽວກັບປະເທດຊາດ, ຊາວຫວຽດນາມ, ປະຫວັດສາດ, ວັດທະນະທຳ, ຊົນເຜົ່າ ແລະບັນດາຜົນງານໃນກິດຈະການປ່ຽນໃຫມ່ຢູ່ຫວຽດນາມ. ທ່ານ ຫງວຽນດັງຕຽນ, ຜູ້ອຳນວຍການໃຫຍ່ VOV ເນັ້ນຫນັກວ່າ:
“ໃນຊຸມປີແຫ່ງການຕໍ່ຕ້ານຕ້ານລ່າເມືອງຂຶ້ນ ຝລັ່ງ ແລະ ຈັກກະພັດອາເມລິກາ, ການສະຫນັບສະຫນູນຂອງປະຊາຊົນໂລກ ໄດ້ປະກອບສ່ວນເຮັດໃຫ້ການຕໍ່ຕ້ານຂອງພວກເຮົາສຳເລັດຜົນ, ໃນນັ້ນ ມີບົດບາດສຳຄັນຂອງກະຈາຍສຽງພາກພາສາຕ່າງປະເທດ ກໍຄືໂຄສະນາສື່ສານຕໍ່ຕ່າງປະເທດ. ສິ່ງດັ່ງກ່າວແມ່ນສະແດງໃຫ້ເຫັນການຮັບຮູ້ຂອງພັກ,ລັດຖະບານ, ຂອງປະທານໂຮ່ຈິມີນ ສຳລັບການໂຄສະນາສື່ສານຕໍ່ຕ່າງປະເທດ ເວົ້າລວມ ແລະ ກະຈາຍສຽງພາກພາສາຕ່າງປະເທດເວົ້າສະເພາະ. ການນຳ VOV ຕີລາຄາສູງບົດບາດຂອງກະຈາຍສຽງພາກພາສາຕ່າງປະເທດໃນຫລາຍລາຍການ ໄດ້ນຳມາ ຂ່າວຄາວຢ່າງທັນການ ໃຫ້ຜູ້ຟັງຢູ່ພາຍໃນ ແລະ ຕ່າງປະເທດ.”
ໂດຍຮັບຮູ້ຄຸນງາມຄວາມດີອັນໃຫຍ່ຫລວງຂອງ VOV ໃນໄລຍະ 70 ປີຜ່ານມາ, ພັກ ແລະ ລັດຫວຽດນາມ ໄດ້ມອບຫລາຍຫລຽນໄຊ, ຫລຽນກາ ແລະ ນາມະຍົດອັນສູງສົ່ງ, ຫລຽນໄຊໂຮ່ຈິມີນ, ຫລຽນໄຊດາວຄຳ ນາມະຍົດວິລະຊົນແຮງງານໄລຍະປ່ຽນແປງໃຫມ່, ນາມມະຍົດວິລະຊົນປະກອບອາວຸດປະຊາຊົນ ໃຫ້ແກ່ VOV.
ບືນຕົວຂຶ້ນເພື່ອກ້າວເຂົ້າສູ່ໄລຍະພັດທະນາກະໂດດຂັ້ນ
ປະຈຸບັນ, ໃນກິດຈະການປ່ຽນແປງໃຫມ່ຂອງປະເທດຊາດ ແລະ ເຊື່ອມໂຍງເຂົ້າກັບສາກົນ, VOV ພັດທະນາຄົບ 4 ຮູບການສື່ມວນຊົນ ນັ້ນແມ່ນ: ກະຈາຍສຽງ, ສື່ສິ່ງພິມ, ໂທລະພາບ ແລະ ສື່ເອເລັກໂຕນິກ. VOV ມີ 5 ລະບົບກະຈາຍສຽງ ນັ້ນແມ່ນ: VOV 1( ລະບົບສະຖານະການການເມືອງສັງລວມ), VOV 2 (ລະບົບວັດທະນະທຳຊີວິດວິທະຍາສາດສຶກສາ), VOV 3 (ລະບົບດົນຕີ ແລະ ຂ່າວບັນເທິງ), VOV 4 (ລະບົບກະຈາຍສຽງພາກພາສາຊົນເຜົ່າ) ແລະ VOV 5(ລະບົບກະຈາຍສຽງພາກພາພາສາຕ່າງປະເທດ). ນອກນັ້ນ VOV ຍັງມີຊ່ອງ VOV ຄົມມະນາຄົມແຫ່ງຊາດ ແລະ 17ຊ່ອງໂທລະພາບ. ປະຈຸບັນ VOV ມີພະນັກງານ, ນັກຂ່າວ, ພະນັກງານເຕັກນິກ, ໂຄສົກ ແລະ ນັກສິລະປິນ ກວ່າ 3.400 ຄົນ ແລະ ມີ 6 ສຳນັກງານປະຈຳ ຢູ່ ພາຍໃນປະເທດ ແລະ 10 ສຳນັກງານປະຈຳ ຢູ່ ຕ່າງປະເທດ. ໃນທ່າອ່ຽງພັດທະນາ, VOV ພວມກ້າວເດີນບົນເສັ້ນທາງມຸ່ງໄປເຖິງຈຸດໝາຍກາຍເປັນກຸ່ມບໍລິສັດສື່ສານ ຫລາຍຮູບການ, ຊຳນານງານ ແລະ ທັນສະໄຫມ ສ້າງເປັນກຳລັງແຮງສັງລວມ ເພື່ອສົ່ງຂໍ້ມູນຂ່າວຢ່າງຄົບຖ້ວນ, ຊັດເຈນ, ຊີວິດຊີວາ ແລະ ມີປະສິດທິຜົນ ຮັບໃຊ້ປະຊາຊົນຢູ່ພາຍໃນ ກໍຄືຊາວຫວຽດນາມ ອາໄສຢູ່ຕ່າງປະເທດ ແລະເພື່ອນມິດສາກົນ.