(ພາບປະກອບ)
ວັນທີ 24/12, ຊາວຄຼິດຫວຽດນາມກວ່າ 6 ລ້ານຄົນມີຄວາມເບີິກບານມ່ວນຊື່ນຕ້ອນຮັບວັນບຸນຄຣິດສະມາດ ຢູ່ໂບດ, ສະຖານທີ່ທຳພິທີສາສະໜາ 6500 ແຫ່ງໃນທົ່ວປະເທດ. ບັນຍາກາດຕ້ອນຮັບ ວັນບຸນຄຣິດສະມາດທີ່ຟົດຟື້ນມ່ວນຊື່ນໄດ້ປົກຄຸມໄປທົ່ວເຂດຊາວຄຼິດ ແລະ ແຕ່ລະຄອບຄົວຊາວຄຼິດໃນຫຼາຍມື້ມໍ່ໆມານີ້.
ໂບດ, ສະຖານທີ່ທຳພິທີສາສະໜາທຸກໆແຫ່ງລ້ວນແຕ່ໄດ້ຖືກປະດັບປະດາດ້ວຍລະບົບດອກໄຟ, ດອກໄມ້ສົດທີ່ມີສີສັນຫຼາກຫຼາຍເພື່ອເປີດປະຕູຕ້ອນຮັບຊາວຄຼິດເຂົ້າຂັບຮ້ອງ ແລະ ສວດມົນພາວະນາ. ຈົດໝາຍອວຍພອນວັນບຸນຄຣິດສະມາດຂອງສະພາສັງຄະລາດຫວຽດນາມ ແລະ ຄະນະກຳມະການສາມັກຄີຊາວຄຼິດຫວຽດນາມໄດ້ຖືກສົ່ງໄປເຖິງຊາວຄຼິດໃນທົ່ວປະເທດ. ບັນດາຄຸນພໍ່ຢູ່ຕາມເຂດ ຊາວຄຼິດກໍຂ້ອງຄ່າກັບວຽກງານທຳພິທີສາສະໜານັບແຕ່ເຊົ້າຮອດແລງ. ພໍ່ແມ່ພີນ້ອງຊາວຄຼິດໄດ້ໄປໂບດແຕ່ຫຼາຍມື້ມານີ້ ເພື່ອກະກຽມ ແລະ ເຊື່ອມຕົວເຂົ້າກັບບັນຍາກາດຂອງ ວັນບຸນຄຣິດສະມາດ. ເຂົົາເຈົ້າໄດ້ຢື້ຢາມຖາມຂ່າວ ແລະ ອວຍພອນກັນດ້ວຍຄວາມຮັກແພງທີ່ສຸດ.
ວັນບຸນແຫ່ງຄວາມຜາສຸກ
ຊາວຄຼິດຫວຽດນາມພວມຕ້ອນຮັບວັນບຸນຄຣິດສະມາດໃນທ່າມກາງຄວາມເບີກບານມ່ວນຊື່ນ ແລະ ຜາສຸກໃນສະພາບທີ່ປະເທດຊາດ ແລະ ປະຊາຄົມຊາວຄຼິດພວມມີການພັດທະນາຢ່າງກ້າວກະໂດດຂັ້ນ. ໂດຍໄດ້ຮັບຄວາມເອົາໃຈໃສ່ພັດທະນາຊີວິດດ້ານວັດຖຸ ແລະ ຈິດໃຈຈາກພັກ ແລະ ລັດ. ພໍ່ແມ່ພີນ້ອງຊາວຄຼິດຢູ່ຕາມເຂດຊາວຄຼິດ ກໍລ້ວນແຕ່ປະຕິບັດແນວທາງ, ນະໂຍບາຍຂອງພັກ ແລະ ລັດຢ່າງເຂັ້ມງວດ, ເອົາໃຈໃສ່ເຖິງການພັດທະນາເສດຖະກິດ, ຍົກສູງຊີວິດຄອບຄົວ. ດ້ວຍທິດນຳ “ ເຄົາລົບນັບຖືພະເຈົ້າ, ຮັກຊາດ”, “ຢູ່ໃນສິນ ກິນໃນທຳ” ຊາວຄຼິດຍັງຕັ້ງໜ້າເຂົ້າຮ່ວມບັນດາການເຄື່ອນໄຫວມະນຸດສະທຳສັງຄົມ, ສ້າງຊີວິດວັດທະນະທຳຢູ່ເຂດຊຸມຊົນ, ເຂົ້າຮ່ວມຂະບວນການກໍ່ສ້າງຊົນນະບົດໃໝ່, ພັດທະນາເສດຖະກິດຄອບຄົວ… ເພາະສະນັ້ນ, ຊີວິດຂອງເຂົາເຈົ້ານັບມື້ນັບໄດ້ຮັບການປົວແປງ, ຫຼາຍຄົນໄດ້ຫຼຸດພົ້ນອອກຈາກຄວາມທຸກຍາກອຶດຫິວ, ບືນຕົວຂຶ້ນສ້າງຄວາມຮັ່ງມີດ້ວຍເຫື່ອແຮງຂອງຕົນ. ວັນບຸນຄຣິດສະມາດປີນີ້, ຊາວຄຼິດຢູ່ທົ່ວທຸກແຫ່ງຍິ່ງມີຄວາມເບີກບານມ່ວນຊື່ນ ແລະ ເອກອ້າງທະນົງໃຈເພາະໄດ້ປະກອບສ່ວນຢ່າງຕັ້ງໜ້າເຂົ້າໃນບັນດາຂະບວນການແຂ່ງຂັນຮັກຊາດໂດຍແນວໂຮມປະເທດຊາດຫວຽດນາມຂັ້ນຕ່າງໆປຸກລະດົມແນໃສ່ເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນທັງຊາດ ແລະ ກໍ່ສ້າງປະເທດຊາດໃຫ້ນັບມື້ນັບພັດທະນາ.
ວັນບຸນຄຣິດສະມາດໃນທ່າມກາງຄວາມຮັກແພງ
ຊາວຄຼິດຫວຽດນາມພວມຕ້ອນຮັບວັນບຸນຄຣິດສະມາດໃນທ່າມກາງຄວາມຮັກແພງຂອງທັງຊາດ. ໃນວັນບຸນຄຣິດສະມາດປີນີ້, ອຳນາດການປົກຄອງ ແລະ ປະຊາຊົນໃນທົ່ວປະເທດໄດ້ອວຍພອນ ແລະ ແບ່ງປັນຄວາມມ່ວນຊື່ນກັບເຂົາເຈົ້າ. ຊຸມມື້ກ່ອນວັນບຸນຄຣິດສະມາດ, ການນຳຄະນະກຳມະການສູນກາງແນວໂຮມປະເທດຊາດຫວຽດນາມ ແລະ ຄະນະກຳມະການແນວໂຮມປະເທດຊາດຫວຽດນາມຂັ້ນຕ່າງໆ ໄດ້ຈັດບັນດາການເຄື່ອນໄຫວຢື້ຢາມຖາມຂ່າວ, ອວນພອນບັນດາຜູ້ມີຍົດສັກຕຳແໜ່ງ ແລະ ຊາວຄຼິດຢູ່ທ້ອງຖິ່ນຕ່າງໆ. ທີ່່ເຂດຊາວຄຼິດ ບຸຍຈູ ແຂວງ ນາມດິ້ງ, ທ່ານເລບ້າຈິງ ຮອງປະທານ ຄະນະກຳມະການສູນກາງແນວໂຮມປະເທດຊາດຫວຽດນາມໄດ້ສົ່ງຄຳອວຍພອນ ວັນບຸນຄຣິດສະມາດເຖິງບັນດາຜູ້ມີຍົດສັກຕຳແໜ່ງ, ນັກບວດ ແລະ ຊາວຄຼິດໃນທົ່ວປະເທດ, ພ້ອມທັງຢືນຢັນວ່າ ພໍ່ແມ່ພີນ້ອງຊາວຄຼິດແມ່ນພາກສ່ວນໜຶ່ງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ. ຄະນະຜູ້ແທນຂອງຄະນະກຳມະການສູນກາງແນວໂຮມປະເທດຊາດຫວຽດນາມ ໂດຍທ່ານວູ້ຈ້ອງກິມ ຮອງປະທານທັງເປັນເລຂາທິການໃຫຍ່ຄະນະກຳມະການສູນກາງແນວໂຮມປະເທດຊາດຫວຽດນາມ ເປັນຫົວໜ້າຄະນະ, ເມື່ອຢ້ຽມຢາມ ແລະ ອວຍພອນສະມາຄົມສາສະໜາໂປແຕັສຕັງພາກເໜືອຫວຽດນາມ ກໍໄດ້ສົ່ງຄຳອວຍພອນເຖິງບັນດາຜູ້ມີຍົດສັກຕຳແໜ່ງ ແລະ ສາສະນິກກະຊົນໃນສະມາຄົມສາສະໜາໂປແຕັສຕັງຈົ່ງຕ້ອນຮັບ ວັນບຸນຄຣິດສະມາດດ້ວຍຄວາມເບີກບານມ່ວນຊື່ນ ແລະ ຜາສຸກ.
ວັນບຸນຄຣິດສະມາດ ບໍ່ພຽງແຕ່ແມ່ນວັນບຸນຂອງ ຊາວຄຼິດເທົ່ານັ້ນ, ຫາກຍັງໄດ້ກາຍເປັນວັນບຸນຂອງຊາວຫວຽດນາມຫຼາຍຄົນອີກດ້ວຍ. ໃນຊຸມມື້ນີ້, ພົນລະເມືອງຫວຽດນາມເຖິງວ່າເຊື່ອຖືຫຼືບໍ່ເຊື່ອຖືສາສະໜາ ກໍລ້ວນແຕ່ໄປໂບດ. ຊາວຄຼິດອາດຈະໄປໂບດເພື່ອສາສະໜາ, ສ່ວນຜູ້ບໍ່ເຊື່ອຖືສາສະໜາ ກໍອາດຈະໄປໂບດເພື່ອອວຍພອນ ແລະ ແບ່ງປັນຄວາມຮັກແພງກັບ ຊາວຄຼິດ ແລະ ເຊື່ອມຕົວເຂົ້າກັບບັນຍາກາດຂອງວັນບຸນ.
ນີ້ແມ່ນເສລີພາບໃນການເຫຼື້ອມໃສ
ແບ່ງປັນກ່ຽວກັບສິດເສລີໃນການເຫຼື້ອມໃສ, ສາສະໜາເນື່ອງໃນໂອກາດ ວັນບຸນຄຣິດສະມາດປີນີ້, ທ່ານຝ້າມຢຸງ ລັດຖະມົນຕີຊ່ວຍວ່າການກະຊວງພາຍໃນ, ຫົວໜ້າຄະນະສາສະໜາລັດຖະບານ ໄດ້ຢືນຢັນອີກເທື່ອໜຶ່ງກ່ຽວກັບນະໂຍບາຍຂອງພັກ ແລະ ລັດຫວຽດນາມວ່າ : ຍາມໃດກໍເຄົາລົບ ແລະ ຮັບປະກັນ ສິດເສລີໃນການເຫຼື້ອມໃສ, ສາສະໜາຂອງພົນລະເມືອງ. ສິດນີ້ໄດ້ລະບຸໄວ້ໃນລັດຖະທຳມະນູນ, ລະບົບເອກະສານນິຕິກຳກ່ຽວກັບການເຫຼື້ອມໃສ, ສາສະໜາ ແລະ ໄດ້ຮັບການປະຕິບັດໃນການດຳລົງຊີວິດ. ມາຮອດປະຈຸບັັນ, ທົ່ວປະເທດມີ 14 ສາສະໜາ, 38 ອົງການສາສະໜາ, ມີສາສະນິກກະຊົນ 24 ລ້ານຄົນ, ຜູ້ມີຍົດສັກຕຳແໜ່ງທາງສາສະໜາ 78.000 ຄົນ ແລະ ສະຖານທີ່ທຳພິທີສາສະໜາ 23.000 ກວ່າແຫ່ງ. ການດຳເນີນຊີວິດໃນການເຫຼື້ອມໃສ, ສາສະໜາຢູ່ຫວຽດນາມໄດ້ດຳເນີນຢ່າງຟົດຟື້ນມ່ວນຊື່ນ ແລະ ພວມມີແນວໂນ້ມເພີ່ມຂຶ້ນ, ຄວາມຕ້ອງການດ້ານວັດທະນະທຳການເຫຼື້ອມໃສ, ສາສະໜາອັນຊອບທຳຂອງປະຊາຊົນຍາມໃດກໍຖືກລັດສ້າງເງື່ອນໄຂເພື່ອຕອບສະໜອງ.
ສາສະໜາພ້ອມກັບການເຫຼື້ອມໃສໄດ້ເຊື່ອມໂຍງເຂົ້າກັບພື້ນຖານວັດທະນະທຳຫວຽດນາມ, ເຮັດໃຫ້ຈຸດວັດທະນະທຳຂອງຊາວຫວຽດນາມເພີ່ມຄວາມອຸດົມສົມບູນ. ວັນບຸນຄຣິດສະມາດທີ່ສະຫງົບສຸກໃນທ່າມກາງຄວາມຮັກແພງຂອງທົ່ວທັງຊາດ ໄດ້ສະແດງໃຫ້ເຫັນຈຸດວັດທະນະທຳຫວຽດນາມ, ທັງນີ້ກໍເປັນພະຍານຫຼັກຖານກ່ຽວກັບເສລີພາບໃນການເຫຼື້ອມໃສ, ສາສະໜາຢູ່ຫວຽດນາມ.