(vovworld)- ການສ້າງບັນດາເງື່ອນໄຂເພື່ອໃຫ້ແກ່ຊາວຕ່າງປະເທດໄດ້ຊື້, ກຳມະສິດເຮືອນຢູ່ການຄ້າ ຢູ່ ຫວຽດນາມ ແມ່ນຫນຶ່ງໃນບັນດາເນື້ອໃນທີ່ເປັນຫນ້າສົນໃຈຂອງກົດໝາຍວ່າດ້ວຍເຮືອນຢູ່(ສະບັບປັບປຸງ) ໂດຍຫ້ອງວ່າການປະທານປະເທດຫາກໍໄດ້ປະກາດ ເມື່ອວັນທີ 11/12/2014. ຂໍ້ກຳນົດນີ້ໄດ້ຊ່ວຍດຶງດູດແຫລ່ງເງິນຕາຕ່າງປະເທດ, ກະຕຸກຊຸກຍູ້ຕະຫລາດອະສັງຫາລິມະຊັບ, ຜ່ານນັ້ນ ຊຸກຍູ້ເສດຖະກິດພັດທະນາ.
ພາບປະກອບ:kinhdoanhnet.vn
|
ຕາມກົດໝາຍວ່າດ້ວຍເຮືອນຢູ່(ສະບັບປັບປຸງ)ແລ້ວ, ອົງການ, ສ່ວນບຸກຄົນຕ່າງປະເທດກຳມະສິດເຮືອນຢູ່ ຢູ່ ຫວຽດນາມ ລວມມີ 3 ໝວດຄື: ອົງການ, ສ່ວນບຸກຄົນຊາວຕ່າງປະເທດລົງທຶນກໍ່ສ້າງເຮືອນຢູ່ ຕາມໂຄງການຢູ່ຫວຽດນາມ; ວິສາຫະກິດມີເງິນລົງທຶນຂອງຕ່າງປະເທດ, ສາຂາ, ຫ້ອງການຜູ້ຕາງຫນ້າຂອງວິສາຫະກິດຕ່າງປະເທດ, ກອງທຶນ ຂອງຕ່າງປະເທດ ແລະ ສາຂາທະນາຄານຕ່າງປະເທດ ພວມເຄື່ອນໄຫວຢູ່ຫວຽດນາມ; ສ່ວນບຸກຄົນຊາວຕ່າງປະເທດໄດ້ຮັບອະນຸຍາດໃຫ້ເຂົ້າເມືອງເຂົ້າ ຫວຽດນາມ.
ກົດໝາຍສະບັບດັ່ງກ່າວກໍໄດ້ກຳນົດຕື່ມອີກ ກ່ຽວກັບອົງການ, ສ່ວນບຸກຄົນຊາວຕ່າງປະເທດ ໄດ້ກຳມະສິດເຮືອນຢູ່ ຢູ່ຫວຽດນາມ ຜ່ານບັນດາຮູບການລົງທຶນກໍ່ສ້າງເຮືອນຢູ່ ຕາມໂຄງການຢູ່ຫວຽດນາມ; ຊື້, ເຊົ່າ, ຮັບ, ມອບ, ຮັບສືບມູນເຮືອນຢູ່ການຄ້າ.
ກະຕຸກຊຸກຍູ້ ຕະຫລາດອະສັງຫາລິມະຊັບ
ຄວາມຈິງແລ້ວ, ຂໍ້ກຳນົດກ່ຽວກັບການອະນຸຍາດໃຫ້ຊາວຕ່າງປະເທດໄດ້ຊື້ເຮືອນຢູ່ ຢູ່ຫວຽດນາມ ໄດ້ປະຕິບັດທົດລອງໃນ 5 ປີຜ່ານມາ, ເຖິງຢ່າງໃດກໍຕາມ, ດ້ວຍບັນດາເງື່ອນໄຂເຂັ້ມງວດທີ່ສຸດໄດ້ເຮັດໃຫ້ຈຳນວນຊາວຕ່າງປະເທດກຳມະສິດເຮືອນຢູ່ ຢູ່ ຫວຽດນາມ ແມ່ນຫນ້ອຍທີ່ສຸດ. ສະນັ້ນ ກົດໝາຍວ່າດ້ວຍເຮືອນຢູ່ (ສະບັບປັບປຸງ) ເປີດກວ້າງເປົ້າໝາຍ ແລະ ເງື່ອນໄຂໄດ້ກຳມະສິດເຮືອນຢູ່ຢູ່ຫວຽດນາມສຳລັບອົງການ, ສ່ວນບຸກຄົນຊາວຕ່າງປະເທດນັ້ນ ໄດ້ຮັບການສະຫນັບສະຫນູນຢ່າງຕັ້ງຫນ້າຈາກຫາງສຽງ. ທ່ານ ເລຮ່ວ່າງເຈົາ, ປະທານສະຫະສະມາຄົມອະສັງຫາລິມະຊັບ ນະຄອນ ໂຮ່ຈິມີນ ຕີລາຄາວ່າ:
“ກົດໝາຍວ່າດ້ວຍເຮືອນຢູ່(ສະບັບປັບປຸງ)ຄັ້ງນີ້ ໄດ້ສ້າງເງື່ອນໄຂສູງສຸດເພື່ອໃຫ້ ຊາວຕ່າງປະເທດຊື້ ແລະ ກຳມະສິດເຮືອນຢູ່ ຢູ່ ຫວຽດນາມ. ຕາມກົດໝາຍດັ່ງກ່າວແລ້ວ, ຊາວຕ່າງປະເທດ ເມື່ອເຂົ້າເມືອງເຂົ້າຫວຽດນາມ ຖ້າມີຄວາມຕ້ອງການ ສາມາດຊື້ເຮືອນຢູ່ ຢູ່ບັນດາໂຄງການ ຊື່ງລັດຖະບານບໍ່ຫ້າມ.”
ຈຳນວນຊາວຕ່າງປະເທດ ກວ່າ 70.000 ຄົນທີ່ພວມເຮັດວຽກ ແລະ ທຳມາຫາກິນຢ່າງຍາວນານຢູ່ຫວຽດນາມ ໄດ້ສະແດງໃຫ້ເຫັນວ່າ ຄວາມຕ້ອງການເຮືອນຢູ່ໃຫ້ແກ່ຊາວຕ່າງປະເທດຢູ່ຫວຽດນາມ ແມ່ນໃຫຍ່ຫລວງ. ຫວຽດນາມ ຕອບສະຫນອງຄວາມຕ້ອງການນີ້ ໄດ້ ສະແດງໃຫ້ເຫັນພາບພົດຫວຽດນາມ ພວມເຊື່ອມໂຍງ. ດຣ ຟ້າມຊີ້ລຽມ, ຮອງປະທານສະມາຄົມໃຫຍ່ກໍ່ສ້າງຫວຽດນາມ ຖືວ່າ:
“ເລື່ອງເປີດປະຕູທຸກຕະຫລາດ, ໃນນັ້ນ ມີ ຕະຫລາດອະສັງຫາລິມະຊັບໃຫ້ແກ່ຊາວຕ່າງປະເທດ ຈະເຮັດໃຫ້ຕະຫລາດເພີ່ມແຫລ່ງສະຫນອງ. ຍິ່ງກວ່ານັ້ນ ເຂົາເຈົ້າລົງທຶນແບບມືອາຊີບ ເຮັດໃຫ້ພວກເຮົາມີບົດຮຽນຫລາຍຢ່າງໃນການດຳເນີນທຸລະກິດ ອະສັງຫາລິມະຊັບ. ຫວຽດນາມ ປະຕິບັດວຽກງານດັ່ງກ່າວຍິ່ງໄວເທົ່າໃດຍິ່ງສະແດງໃຫ້ເຫັນວ່າ ພວກເຮົາປັບປຸງລະບອບນະໂຍບາຍການຕະຫລາດສົມບູນແບບໄວເທົ່ານັ້ນ.”
ວິໄສທັດໄລຍະຍາວ
ການເປີດກວ້າງຕະຫລາດໃຫ້ຊາວຕ່າງປະເທດຊື້ເຮືອນຢູ່ ໄດ້ຮັບຖືວ່າ ແມ່ນຮູບການສົ່ງອອກຢູ່ກັບທີ່. ສຳລັບຜະລິດຕະພັນພິເສດສະເພາະນີ້, ຊາວຕ່າງປະເທດ ພຽງໄດ້ນຳໃຊ້ ຫາກບໍ່ສາມາດນຳເອົາບ່ອນອື່ນໄດ້. ດຣ ເລບາຈີເຍີນ, ຜູ້ຊ່ຽວຊານດ້ານ ອະສັງຫາລິມະຊັບ ໃຫ້ຮູ້ວ່າ:
“ຊາວຕ່າງປະເທດພຽງເຂົ້າເມືອງ ເຂົ້າຫວຽດນາມ ກໍ່ສາມາດຊື້ເຮືອນຢູ່ໄດ້. ນີ້ແມ່ນປັດໄຈສະດວກທີ່ສຸດ.ສິ່ງດັ່ງກ່າວແມ່ນແກ້ໄຂໄດ້ 2 ບັນຫາ ນັ້ນແມ່ນ: ທຶນຮອນຖືກຄ້າງໃນໄລຍະ 4-5 ປີ ແລະ ຂາຍໄດ້ອະສັງຫາລິມະຊັບ ນີ້ກໍແມ່ນສິ່ງທີ່ຊື່ງຊາວຕ່າງປະເທດ ມີຄວາມຕ້ອງການ.”
ຕະຫລາດອະສັງຫາລິມະຊັບ ຫວຽດນາມ ຍັງໄດ້ຮັບຖືວ່າ ແມ່ນຕະຫລາດລົງທຶນອັນດູດດື່ມ. ເລື່ອງກົດໝາຍວ່າດ້ວຍເຮືອນຢູ່ ສະບັບປັບປຸງ ໄດ້ກຳນົດລະອຽດກ່ຽວກັບນະໂຍບາຍໃຫ້ແກ່ຊາວຕ່າງປະເທດຊື້ເຮືອນຢູ່ ຢູ່ຫວຽດນາມ ໄດ້ນຳມາເຊິ່ງກາລະໂອກາດ ແລະ ສິ່ງທ້າທາຍໃຫ້ແກ່ວິສາຫະກິດ ແລະແມ່ນບັນດາສິ່ງທ້າທາຍມີລັກສະນະຕັ້ງຫນ້າ. ທ່ານ ຫງວຽນງອກແທ່ງ, ຮອງປະທານສະຫະສະມາຄົມ ອະສັງຫາລິມະຊັບ ຖືວ່າ:
“ສຳລັບວິສາຫະກິດ ມັນນຳມາເຊິ່ງກາລະໂອກາດໃຫມ່ໃຫ້ແກ່ນັກລົງທຶນ, ສ້າງຄວາມຕ້ອງການໃຫມ່ໃຫ້ແກ່ ຕະຫລາດອະສັງຫາລິມະຊັບ ຍ້ອນຊາວຕ່າງປະເທດໄດ້ອະນຸຍາດຊື້ເຮືອນຢູ່. ເຖິງຢ່າງໃດກໍຕາມ ການລົງທຶນຕ້ອງມີມາດຖານ, ການພົວພັນຄ້າຂາຍຕ້ອງຮັບປະກັນຕາມທຳນຽມສາກົນ. ນັ້ນກໍແມ່ນສິ່ງທ້າທາຍສຳລັບບັນດານັກລົງທຶນ.”
ສາດສະດາຈານ ດັ້ງຮຸ່ງຫວໍ, ຜູ້ຊ່ຽວຊານດ້ານອະສັງຫາລິມະຊັບ ຖືວ່າ: ນີ້ແມ່ນກາລະໂອກາດຍາວນານໃຫ້ແກ່ ຕະຫລາດອະສັງຫາລິມະຊັບຫວຽດນາມ.
“ຄຽງຄູ່ກັບເລື່ອງພວກເຮົາເປີດກວ້າງບັນດາຂໍ້ກຳນົດດ້ານກົດໝາຍສຳລັບກົດໝາຍວ່າດ້ວຍເຮືອນຢູ່, ພວກເຮົາຍັງມີຫລາຍວຽກງານຕ້ອງເຮັດ, ພວກເຮົາຕ້ອງເຮັດໃຫ້ຊາວຕ່າງປະເທດເຊື່ອໝັ້ນວ່າ ລະບົບກົດໝາຍຫວຽດນາມແມ່ນສະຖຽນລະພາບ. “
ກົດໝາຍວ່າດ້ວຍເຮືອນຢູ່ ສະບັບປັບປຸງ ຈະມີຜົນສັກສິດນັບແຕ່ວັນທີ 1/7/2015 ເປັນຕົ້ນໄປ. ເລື່ອງກົດໝາຍດັ່ງກ່າວເປີດກວ້າງເປົ້າໝາຍ ແລະ ເງື່ອນໄຂກຳມະສິດເຮືອນຢູ່ ຢູ່ ຫວຽດນາມ ສຳລັບອົງການ, ສ່ວນບຸກຄົນຊາວຕ່າງປະເທດ ໄດ້ແກ້ໄຂສະພາບຕິດຂັດຂອງຂົງເຂດອະສັງຫາລິມະຊັບໃນໄລຍະຜ່ານມາ, ນຳມາເຊິ່ງແຫລ່ງກຳລັງຫນູນໃຫມ່ໃຫ້ແກ່ຕະຫລາດອະສັງຫາລິມະຊັບພາຍໃນປະເທດ, ປະກອບສ່ວນສຳຄັນເພື່ອຊຸກຍູ້ເສດຖະກິດພັດທະນາ.