ພາຍຫຼັງດຳເນີນມາເປັນເວລາ 3 ປີ, ດ້ວຍການເຈລະຈາຢ່າງເປັນທາງການ 14 ຄັ້ງ ແລະ ການເຈລະຈາກາງສະໄໝຫຼາຍຄັ້ງ, ວັນທີ 4/8, ຫວຽດນາມ ແລະ ສະຫະພາບເອີລົບ EU ໄດ້ປະກາດຢ່າງເປັນທາງການກ່ຽວກັບການສິ້ນສຸດການເຈລະຈາເນື້ອໃນພື້ນຖານທັງໝົດຂອງສັນຍາ. ສິ່ງດັ່ງກ່າວ ໄດ້ເປີດບັນດາແງ່ຫວັງແຫ່ງການຮ່ວມມື, ພັດທະນາໃໝ່ທີ່ມີຕໍ່ຫວຽດນາມ ແລະ EU.
ການປະຊຸມຂ່າວສິ້ນສຸດໂດຍພື້ນຖານການເຈລະຈາສັນຍາການຄ້າເສລີ ລະຫວ່າງຫວຽດນາມ - EU |
ວັນທີ 26/6/2012, ຮອບເຈລະຈາ ສັນຍາການຄ້າເສລີລະຫວ່າງຫວຽດນາມ - EU (EVFTA) ໄດ້ເລີ່ມດຳເນີນຢ່າງເປັນທາງການ. ດ້ວຍຈິດໃຈເຈລະຈາຢ່າງຕັ້ງໜ້າ ແລະ ມີໄຫວພິບຂອງທັງຫວຽດນາມ ແລະ EU, ບັນດາຮອບເຈລະຈາໄດ້ມີຄວາມຄືບໜ້າດີ. ພາຍຫຼັງ ການເຈລະຈາຄັ້ງທີ 14 ຊຶ່ງດຳເນີນໃນວັນທີ 13 ແລະ 14/7/2015, ທ່ານລັດຖະມົນຕີວ່າການກະຊວງອຸດສາຫະກຳ-ການຄ້າຫວຽດນາມ ວູ້ຮີຮ່ວາງ ແລະ ຂະຫຼວງໃຫຍ່ການຄ້າ EU ທ່ານນາງ Cecilia Malmstrom ໄດ້ເປັນເອກະພາບກັນສິ້ນສຸດໂດຍພື້ນຖານການເຈລະຈາສັນຍາການຄ້າເສລີລະຫວ່າງຫວຽດນາມ - EU. FTA ແມ່ນໜຶ່ງໃນບັນດາສັນຍາທີ່ມີຄຸນນະພາບສູງສຸດຂອງຫວຽດນາມ ແລະ EU, ຊຶ່ງຄາດວ່າຈະນຳມາຊຶ່ງຜົນປະໂຫຍດສູງສຸດໃຫ້ແກ່ປະຊາຊົນ ແລະ ວິສາຫະກິດ 2 ຝ່າຍ.
ກາລະໂອກາດເພີ່ມທະວີການແລກປ່ຽນສິນຄ້າ, ເປີດກ້ວາງຕະຫຼາດລະຫວ່າງຫວຽດນາມ- EU
ຂະຫຼວງໃຫຍ່ການຄ້າ EU ທ່ານນາງ Cecilia Malmstrom ໄດ້ຕີລາຄາສັນຍາກັບຫວຽດນາມແມ່ນລື່ນກາຍຢ່າງຂາດຂັ້ນເມື່ອທຽບໃສ່ບັນດາ FTA ຊຶ່ງ EU ໄດ້ເຊັນກັບບັນດາປະເທດພວມພັດທະນາ, ພ້ອມທັງສ້າງມາດຕະຖານທີ່ດີໃນການຄ້າລະຫວ່າງບັນດາປະເທດພາຄີກັບບັນດາປະເທດອາຊຽນເວົ້າລວມ. ສັນຍາຈະມີຜົນສັກສິດນັບແຕ່ມື້ລົງລາຍເຊັນ ແລະ ປະມານ 65% ປະລິມານສິນຄ້າສົ່ງອອກຂອງຫວຽດນາມໄປຍັງພາກພື້ນນີ້ ແມ່ນບໍ່ຕ້ອງເສຍພາສີໃນມື້ທຳອິດ. ພ້ອມກັບການລົບລ້າງພາສີ, ຫວຽດນາມ ແລະ EU ຈະລົບລ້າງບັນດາອັດຕາພາສີຂາອອກຂາເຂົ້າເກືອບທັງໝົດເພື່ອສ້າງເງື່ອນໄຂສະດວກໃຫ້ສຳພັດກັບຕະຫຼາດໃໝ່ໃນຂົງເຂດການບໍລິການ ແລະ ການລົງທຶນ. 2 ຝ່າຍຈະລົບລ້າງກວ່າ 99% ຈຳນວນປະເພດພາສີຕາມແຜນການ. ນີ້ອາດຈະແມ່ນລະດັບການໝັ້ນໝາຍສູງສຸດຊຶ່ງຫວຽດນາມບັນລຸໄດ້ໃນບັນດາສັນຍາ FTA ຊຶ່ງໄດ້ຮັບການລົງນາມມາຮອດປະຈຸບັນ. ທ່ານລັດຖະມົນຕີວ່າການກະຊວງອຸດສາຫະກຳ-ການຄ້າຫວຽດນາມ ວູ້ຮີຮ່ວາງ ຊີ້ແຈ້ງວ່າ :
“ ລັກສະນະການໜູນຊ່ວຍ ແລະ ເພີ່ມເຕີມໃຫ້ແກ່ກັນໃນສັນຍານີ້ ແມ່ນສຳຄັນ. EVFTA ໄດ້ຮັບການລົງນາມ ຈະສືບຕໍ່ແມ່ນໂອກາດທີ່ສະດວກເພື່ອໃຫ້ 2 ຝ່າຍເພີ່ມທະວີຂອບຂະໜາດຮ່ວມມືໃນຂົງເຂດການຄ້າ, ການລົງທຶນ, ຂາອອກຂາເຂົ້າ. ກ່ຽວກັບຂົງເຂດກະສີກຳ, ເມື່ອສັນຍາມີຜົນບັງຄັບໃຊ້, ບັນດາປະເພດສິນຄ້າກະສີກຳຂອງຫວຽດນາມ, ໃນນັ້ນ ມີຜັກ, ສິນໃນນ້ຳ ແລະ ເຂົາ້ສານຈະໄດ້ຮັບບຸລິມະສິດດ້ານອັດຕາພາສີຈາກ EU . ກົງກັນຂ້າມ, ສຳລັບບາງຜະລິດຕະພັນກະສີກຳຊຶ່ງ EU ມີທ່າແຮງ ຄື ຜະລິດຕະພັນເຂົ້າບະເລ, ໝາກໄມ້, ບາງຜະລິດຕະພັນສັດລ້ຽງນັ້ນ, ທາງຝ່າຍຫວຽດນາມ ຈະສ້າງເງື່ອນໄຂເພື່ອໃຫ້ບັນດາວິສາຫະກິດ, ບັນດານັກສົ່ງອອກຂອງ EU ສາມາດສົ່ງຜະລິດຜະລິດຕະພັນອອກຂາຍໃຫ້ຫວຽດນາມ”
ສະເພາະແຕ່ການຫຼຸດຜ່ອນພາສີ ກໍຈະເຮັດໃຫ້ວົງເງິນສົ່ງອອກຂອງຫວຽດນາມໄປຍັງ EUເພີ່ມຂຶ້ນປະມານ 30% ຫາ 40%, ສູງກວ່າລະດັບສົ່ງອອກໃນກໍລະນີບໍ່ມີສັນຍາ. ບັນດາຂະແໜງການທີ່ອາດຈະຮັບຜົນປະໂຫຍດຫຼາຍກວ່າໝູ່ຈາກ FTA ລວມມີ ຂະແໜງຕ່ຳແຜ່ນຕັດຫຍິບ, ເກີບ, ປຸງແຕ່ງອາຫານ. ຂົງເຂດການບໍລິການ ກໍເປີດກ້ວາງຫຼາຍພໍສົມຄວນຍ້ອນມີ FTA .
FTA ມີບົດບາດສຳຄັນໃນການຮ່ວມມືດ້ານການຄ້າລະຫວ່າງຫວຽດນາມ ແລະ EU
ໃນຂົງເຂດການລົງທຶນ, ບັນດາຄຳໝັ້ນສັນຍາທີ່ແນໃສ່ຮັບປະກັນສະພາບແວດລ້ອມແຫ່ງການລົງທຶນ, ດຳເນີນທຸລະກິດທີ່ສະດວກສະບາຍກວ່າໃນສັນຍາ FTA ຈະຊ່ວຍຊຸກຍູ້ແຫຼ່ງເງິນລົງທຶນທີ່ມີຄຸນນະພາບສູງຂອງ EU ແລະ ບັນດາຄູ່ຮ່ວມມືອື່ນໆເຂົ້າຫວຽດນາມ. ດ້ວຍຂອບຂະໜາດ ແລະ ຄວາມສາມາດບົ່ມຊ້ອນໃນການພັດທະນາການລົງທຶນຂອງ EU ໃນພາກພື້ນ. ສິ່ງນີ້ຈະຊຸກຍູ້ວິວັດການຫັນປ່ຽນໂຄງປະກອບເສດຖະກິດ, ຫັນປ່ຽນຮູບແບບການເຕີບໂຕຕາມທິດຕັ້ງໜ້າຂອງຫວຽດນາມ. ທ່ານລັດຖະມົນຕີວ່າການກະຊວງອຸດສາຫະກຳ-ການຄ້າຫວຽດນາມ ວູ້ຮີຮ່ວາງ ຢືນຢັນວ່າ :
“ ດ້ວຍບັນດາທ່າໄດ້ປຽບ, ຜົນປະໂຫຍດຂອງ FTA ຊຶ່ງຫວຽດນາມ ແລະ EU ໄດ້ລົງນາມ ຈະປະກອບສ່ວນສຳຄັນສຳລັບຫວຽດນາມໃນວິວັດການຍູ້ແຮງການເຊື່ອມໂຍງເຂົ້າກັບສາກົນ, ສ້າງໂຄງປະກອບເສດຖະກິດຄືນໃໝ່ຕິດພັນກັບການປ່ຽນໃໝ່ຮູບແບບການເຕີບໂຕ ແລະ ນຳຫວຽດນາມໃຫ້ນັບມື້ນັບມີທີ່ຕັ້ງບົດບາດສຳຄັນໃນເວທີ່ການຄ້າ ແລະ ການລົງທຶນໃນໂລກ ”
ເມືຶ່ອ FTA ໄດ້ຮັບການລົງນາມດ້ວຍບັນດາຄຳໝັ້ນສັນຍາທີ່ແນໃສ່ຮັບປະກັນສະພາບແວດລ້ອມແຫ່ງການລົງທຶນ, ດຳເນີນທຸລະກິດທີ່ສະດວກສະບາຍກວ່າ, ຈະຊ່ວຍຊຸກຍູ້ແຫຼ່ງເງິນລົງທຶນທີ່ມີຄຸນນະພາບສູງຂອງ EU ແລະ ບັນດາຄູ່ຮ່ວມມືອື່ນໆເຂົ້າຫວຽດນາມ. ຕາມນັ້ນແລ້ວ, ຫວຽດນາມມີກາລະໂອກາດຕື່ມອີກເພື່ອດຶງດູດບັນດາໂຄງການລົງທຶນທີ່ມີມຸນຄ່າເພີ່ມສູງ, ມີເຕັກໂນໂລຢີທີ່ກ້າວໜ້າເຂົ້າຫວຽດນາມ.
ກ່ຽວກັບຄວາມໝາຍຂອງສັນຍາການຄ້າເສລີລະຫວ່າງຫວຽດນາມ - EU, ທ່ານເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າ EU ປະຈຳຫວຽດນາມ ໃຫ້ຮູ້ວ່າ :
“ ສັນຍານີ້ ແມ່ນຫຼັກໝາຍທີ່ສຳຄັນໃນການຮ່ວມມືດ້ານການຄ້າລະຫວ່າງ EU ແລະ ອາຊຽນ. ພາຍຫຼັງທີ່ສຳເລັດ FTA ກັບສິງກະໂປ, ນີ້ແມ່ນ FTA ທີ 2 ລະຫວ່າງ EU ແລະ ອາຊຽນ. ສັນຍານີ້ ໄດ້ສ້າງຮູບແບບໃໝ່ທີ່ດີກວ່າ ແລະ ທັນສະໄໝກວ່າສຳລັບບັນດາ ສັນຍາການຄ້າເສລີລະຫວ່າງ EU ແລະ ບັນດາປະເທດພວມພັດທະນາ ”
ພາຍຫຼັງບາດກ້າວບຸກທະລຸໃນວິວັດການເຈລະຈາ FTA, ບັນດາກຸ່ມເຈລະຈາຝ່າຍຫວຽດນາມ ແລະ EU ຈະສືບຕໍ່ດຳເນີນວິວັດທະນາການ ແລະ ແກ້ໄຂບັນດາບັນຫາດ້ານວິຊາການທີ່ຍັງເຫຼືອ, ພ້ອມທັງສ້າງສັນຍາໃຫ້ສົມບຸນແບບ. ເມື່ອສ້າງໃຫ້ສົມບຸນແບບແລ້ວ, ສັນຍານີ້ຕ້ອງໄດ້ຮັບການຮັບຮອງເອົາຈາກລັດຖະສະພາເອີລົບ. 2 ຝ່າຍຄາດຄະເນວ່າ ຈະສຳເລັດວິວັດການທັງໝົດນີ້ໄດ້ໂດຍໄວ , ກ້າວໄປເຖິງການລົງນາມໃນສັນຍາໃນປີນີ້