ເຖິງວ່າສົງຄາມຫວຽດນາມໄດ້ຜ່ານພົ້ນໄປເປັນເວລາກວ່າ 4 ທົດສະວັດກໍຕາມ, ແຕ່ສື່ມວນຊົນຕ່າງປະເທດຍັງເຕື້ອງເຖິງການສູ້ຮົບທີ່ດຸເດືອດນີ້ດ້ວຍຄວາມນິຍົມນັບຖື. ມະຫາໄຊລະດູບານໃໝ່ປີ 1975 ຂອງຫວຽດນາມ ດ້ວຍການສັງເກດຂອງສື່ມວນຊົນສາກົນນັ້ນ ກໍແມ່ນເຫດການທີ່ພົ້ນເດັ່ນທີສຸດຢູ່ອາຊີໃນທົດສະວັດທີ 70 ຂອງສະຕະວັດກ່ອນ, ອັນໄດ້ສົ່ງຜົນສະທ້ອນຢ່າງເລິກເຊິ່ງເຖິງພາກພື້ນ ແລະ ໂລກ.
ລົດຖັງຂອງກອງທັບປົດປ່ອຍບຸກເຂົ້າທຳນຽບເອກະລາດ |
ຍາກທີ່ຈະມີຕົວເລກສະຖີຕິກ່ຽວກັບຈຳນວນບົດໜັງສືພິມ, ສາລະຄະດີ, ຮູບຖ່າຍທີ່ໄດ້ລົງພິມ ແລະ ແນະນຳຜ່ານບັນດາພາຫະນະສື່ມວນຊົນຕ່າງປະເທດໃນມື້ມະຫາໄຊ 30/4/1975 ແລະ ຊຸມວັນເດືອນປີນັບແຕ່ນັ້ນເປັນຕົ້ນມາ. ທັງໝົດກໍລ້ວນແຕ່ມີຂໍ້ສັງເກດລວມວ່າ ເຫດການວັນທີ 30/4/1975 ໄດ້ກໍ່ໃຫ້ເກີດສຽງດັ່ງກ້ອງກັງວານບົນເວທີສາກົນກ່ຽວກັບຊາດໜຶ່ງທີ່ບໍ່ຍອມຈຳນົນຕໍ່ໜ້າສັດຕູຜູ້ຮຸກຮານ, ມີຄວາມໝາຍສຳຄັນຍິ່ງບໍ່ພຽງແຕ່ສຳລັບຊາດຫວຽດນາມເທົ່ານັ້ນ, ຫາກຍັງສຳລັບປະຊາຄົມໂລກອີກດ້ວຍ.
ສຽງກ້ອງກັງວານເຮັດໃຫ້ໂລກສັ່ນສະເທືອນ
ພາຍຫຼັງທີ່ພາກໃຕ້ຫວຽດນາມໄດ້ຮັບການປົດປ່ອຍຢ່າງສົມບູນເປັນເວລາມື້ໜຶ່ງ, ວັນທີ 1/5/1975, ຂ່າວສານ AFP ຂອງຝະລັ່ງໄດ້ມີບົດໂດຍຂຽນວ່າ “ ໃນປີ 1975, ເຫດການທີ່ພົ້ນເດັ່ນທີ່ສຸດໃນອາຊີແມ່ນເຫດການວັນທີ 30/4 ຂອງຫວຽດນາມ. ບໍ່ຕ້ອງລະແວງສົງໄສຫຍັງອີກແລ້ວ, ເຫດການດັ່ງກ່າວຈະສົ່ງຜົນສະທ້ອນບໍ່ໜ້ອຍເຖິງພາກພື້ນ ແລະ ສາກົນໃນອະນາຄົດອັນໃກ້ໆນີ້ ” . ບົດໜັງສືພິມຖືວ່າ ວັນທີ 30/4/1975 ແມ່ນການສ່ອງແສງດ້ວຍຄວາມສັດຊື່ທີ່ສຸດໃນສົງຄາມ, ແມ່ນສຽງລະຄັງບອກເຕືອນມວນມະນຸດຈົ່ງເຮັດຈົນສຸດຄວາມສາມາດຂອງຕົນເພື່ອບໍ່ປະໃຫ້ເກີດມີສົງຄາມເຊັ່ນດຽວກັນອີກ ເຖິງວ່າຈະເປັນຝ່າຍໄຊຊະນະກໍຕາມ. ໜັງສືພິມ Asahi Simbun ຂອງຍີປຸ່ນສະບັບອອກວັນທີ 1/5/1975 ໄດ້ລົງພິມບົດນຳໂດຍຂຽນວ່າ : ສົງຄາມຫວຽດນາມໄດ້ສິ້ນສຸດໄປແລ້ວດ້ວຍໄຊຊະນະຂອງກຳລັງປົດປ່ອຍ. ສິ່ງນີ້ສາມາດຢັ້ງຢືນວ່າ ສະໄໝທີ່ບັນດາປະເທດໃຫຍ່ໃຊ້ກຳລັງແຮງເພື່ອບີບບັງຄັບລັດທິຊາດໄດ້ຢຸດຕິລົງ. ພາຍຫຼັງ 30 ປີ, ໜັງສືພິມ Nikei ສະບັບອອກວັນທີ 28/4/2005 ໄດ້ລົງພິມຮູບພາບລົດຖັງຄັນທຳອິດຂອງກອງທັບປົດປ່ອຍບຸກເຂົ້າທຳນຽບເອກະລາດ, ພ້ອມກັບບົດຄວາມທີ່ພາດຫົວຂໍ້ “ ຫວຽດນາມພາຍຫຼັງສົງຄາມເປັນເວລາ 30 ປີ ”. ບົດໜົງສືພິມຍັງເນັ້ນໜັກວ່າ : “ ສົງຄາມຢູ່ຫວຽດນາມໄດ້ເປັນຂີດໝາຍຢ່າງເລິກເຊິ່ງ ແລະ ເຕັມໄປດ້ວຍຄວາມປະທັບໃຈໃນແນວຄິດຈິດໃຈຂອງຊາວອາເມລິກາ, ອັນໄດ້ສົ່ງຜົນກະທົບໄປທົ່ວພາກພື້ນອິນດູຈີນ”
ວັນທີ 29/4/2010, ໜັງສືພິມປະຊາຊົນຂອງລາວໄດ້ລົງພິມບົດຂຽນດ້ວຍຫົວຂໍ້ “ ມູນເຊື້ອຕໍ່ສູ້ທີ່ພິລະອາດຫານຂອງປະຊາຊົນຫວຽດນາມ ” ໄດ້ຍ້ອງຍໍການນຳພາທີ່ປິຊາສາມາດຂອງພັກກອມມູນິດຫວຽດນາມ ແລະ ນ້ຳໃຈຕໍ່ສູ້ທີ່ອົງອາດກ້າແກ່ນຂອງປະຊາຊົນຫວຽດນາມ. ຕາມບົດໜັງສືພິມແລ້ວ, ບັ້ນຮົບໂຮ່ຈິມິນໄດ້ຮັບໄຊຊະນະຢ່າງສົມບູນໄດ້ກາຍເປັນຈຸດເວລາແຫ່ງປະຫວັດສາດຂອງການຕໍ່ສູ້ທີ່ອົງການກ້າຫານຂອງກອງທັບ ແລະ ປະຊາຊົນຫວຽດນາມ. ໄຊຊະນະໄດ້ໄຂສັງກາດໃໝ່, ສັງກາດເອກະລາດ, ອິດສະຫຼະພາບ ແລະ ເອກະພາບ.
ສະເພາະອາເມລິກາ, ສື່ມວນຊົນຂອງປະເທດນີ້ ໄດ້ໃຫ້ຂ່າວ ແລະ ບົດຢ່າງຫຼວງຫຼາຍກ່ຽວກັບສົງຄາມທີ່ກໍ່ຄວາມເສຍຫາຍຢ່າງໜັກຫນ່ວງນີ້. ດ້ວຍຫົວຂໍ້ວ່າ : “ໄຊງ່ອນພັງທະລາຍລົງ ” ໜັງສິພິມ ນິວຢອກທາຍ ສະບັບອອກວັນທີ 1/5/1975 ໄດ້ລົງພິມຂ່າວ ແລະ ບົດພ້ອມດ້ວຍຮູບພາບກ່ຽວກັບການລົ້ມເຫຼວຂອງອຳນາດການປົກຄອງໄຊງອ່ນ ແລະ ໄຊຊະນະຂອງກຳລັງປະຕິວັດຫວຽດນາມ. ແລະ ກໍໃນວັນທີ 1/5/1975, ຂ່າວສານ AP ໄດ້ລົງພິມບົດຊຶ່ງມີຕອນຂຽນວ່າ “ ລົດຖັງ, ລົດຫຸ້ມເກາະ ແລະ ລົດຂົນສົ່ງຊຶ່ງຖືກແຊມກາຍດ້ວຍໃບໄມ້ຂອງກອງທັບປົດປ່ອຍໄດ້ຟ້າວບຸກເຂົ້າທຳນຽບປະທານາທິບໍດີ. ແລະ ໃນຈຸດເວລານີ້, ນາຍພົນເຢືອງວັນມິນຂອງລະບອບຫຸ່ນໄຊງ່ອນໄດ້ຂຶ້ນກ່າວຄຳຍອມຈຳນົນທາງວິທະຍຸກະຈາຍສຽງ ແລະ ໂທລະພາບ”.
ໄຊຊະນະວັນທີ 30/4 ສ້າງບາດລ້ຽວແຫ່ງປະຫວັດສາດ
ກວ່າ 40 ປີທີ່ຜ່ານມາ, ເມື່ອຮອດວັນທີ 30/4 ໃນແຕ່ບະປີ, ສື່ມວນຊົນຕ່າງປະເທດ ກໍລ້ວນແຕ່ໃຫ້ຂ່າວ ແລະ ບົດທີ່ຍ້ອງຍໍສັນລະເສີນກ່ຽວກັບມະຫາໄຊລະດູບານໃໝ່ປີ 1975 ຂອງຊາດຫວຽດນາມ, ພ້ອມກັນນັ້ນ ກໍຖືວ່າ ວັນທີ 30/4 ແມ່ນວັນບຸນໃຫຍ່ຂອງຊາວຫວຽດນາມ ແລະ ກໍແມ່ນວັນທີ່ບັນດາຜູ້ຮັກຫອມສັນຕິພາບໃນທົ່ວໂລກຈັດຕັ້ງສະເຫຼີມສະຫຼອງ. ໄຊຊະນະຂອງຫວຽດນາມໃນການຕໍ່ສູ້ຕ້ານຈັກກະພັດອາເມລິກາເພື່ອກູ້ຊາດ ໄດ້ປະກອບສ່ວນຊຸກຍູ້ການຕໍ່ສູ້ຂອງປະຊາຊົນໂລກເພື່ອຈຸດໝາຍເອກະລາດແຫ່ງຊາດ, ສັນຕີພາບ, ປະຊາທິປະໄຕ ແລະ ຄວາມກ້າວໜ້າທາງສັງຄົມ; ລະດົມກຳລັງໃຈແກ່ບັນດາປະຊາຊາດທີ່ພວມດຳເນີນກິດຈະການປົດປ່ອຍຊາດ, ຕ້ານລັດທິຈັກກະພັດ; ເລີ່ມຕົ້ນການລົ້ມລະລາຍຂອງລັດທິລ່າເມືອງຂຶ້ນແບບໃໝ່ໃນທົ່ວໂລກ. ໄຊຊະນະວັນທີ 30/4/1975 ໄດ້ສ້າງບາດລ້ຽວປະຫວັດສາດ, ໄຂສັງກາດໃໝ່, ສັງກາດເອກະລາດ, ອິດສະຫຼະພາບ ແລະ ເອກະພາບຂອງຊາດຫວຽດນາມ. ໃນທຸກວັນນີ້, ຫວຽດນາມພວມດຳເນີນກິດຈະການປ່ຽນແປງໃໝ່ໂດຍພາຍໃຕ້ການຊີ້ນຳນຳພາຂອງພັກກອມມູນິດຫວຽດນາມ ຊຶ່ງສາມາດຍາດໄດ້ຫຼາຍຜົນງານທີ່ເປັນໜ້າເອກອ້າງທະນົງໃຈ.
ກວ່າ 40 ປີທີ່ໄດ້ຜ່ານພົ້ນໄປ, ແຕ່ໄຊຊະນະວັນທີ 30/4/1975 ຍັງຄົງແມ່ນຫຼັກໝາຍອັນຮຸ່ງເຮືອງເຫຼືອງເຫຼື້ອມທີ່ບໍ່ອາດຈືດຈາງໄດ້ໃນຈິດໃຈຂອງຊາວຫວຽດນາມ ແລະ ເພື່ອນມິດສາກົນຕະຫຼອດການ. ຫວຽດນາມໄດ້ຜ່ານຜ່າບັນດາຄວາມຫຍຸ້ງຍາກແລະ ສິ່ງທ້າທາຍນາໆປະການ ແລະ ພວມມຸ່ງໄປສູ່ອະນາຄົດ, ການເຊື່ອມໂຍງ ແລະ ພັດທະນາ. ໄຊຊະນະທີ່ລືຊາຜາກົດຂອງບັ້ນຮົບໂຮ່ຈິມິນປະຫວັດສາດຍັງຄົງແມ່ນຄວາມເອກອ້າງທະນົງໃຈ ແມ່ນກຳລັງໜູນເພື່ອໃຫ້ຊາວຫວຽດນາມສືບຕໍ່ກ້າວຂຶ້ນບົນເສັ້ນທາງແຫ່ງການສ້າງສາ, ປົກປັກຮັກສາ ແລະ ພັດທະນາປະເທດຊາດ.