(vovworld)- ກົດໝາຍວ່າດ້ວຍວິສາຫະກິດ(ສະບັບປັບປຸງ) ແລະ ກົດໝາຍວ່າດ້ວຍການລົງທຶນ(ສະບັບປັບປຸງ) ຫາກໍໄດ້ຮັບຮອງເອົາຈາກສະພາແຫ່ງຊາດຫວຽດນາມ ທີ່ກອງປະຊຸມສະໄຫມສາມັນເທື່ອທີ 8 ສະພາແຫ່ງຊາດຫວຽດນາມ ຊຸດທີ 13 ແມ່ນກົດໝາຍພື້ນຖານ 2 ສະບັບ, ດັດປັບບັນດາການເຄື່ອນໄຫວໃນຂົງເຂດລົງທຶນ ແລະ ດຳເນີນທຸລະກິດຂອງວິສາຫະກິດຢູ່ຫວຽດນາມ. ເລື່ອງຮັບຮອງເອົາກົດໝາຍ 2 ສະບັບດັ່ງກ່າວ ໄດ້ຮັບການຕີລາຄາຢ່າງຕັ້ງຫນ້າຈາກບັນດານັກຄຸ້ມຄອງ ແລະ ປະຊາຄົມວິສາຫະກິດ ດ້ວຍຄວາມຫວັງ ຈະສ້າງເງື່ອນໄຂປັບປຸງສະພາບແວດລ້ອມການລົງທຶນຂອງປະເທດຊາດ.
ສະພາແຫ່ງຊາດຮັບຮອງເອົາກົດໝາຍສອງສະບັບ
ພາບ:TTXVN
|
ວິສາຫະກິດສ່ວນຫລາຍ ຊົມເຊີຍເລື່ອງສະພາແຫ່ງຊາດຮັບຮອງເອົາ ກົດໝາຍວ່າດ້ວຍວິສາຫະກິດ(ສະບັບປັບປຸງ) ແລະ ກົດໝາຍວ່າດ້ວຍການລົງທຶນ(ສະບັບປັບປຸງ) ດ້ວຍການກຳນົດຫລາຍຢ່າງທີ່ສະດວກ ຈະສ້າງບັນດາກາລະໂອກາດດຳເນີນທຸລະກິດໃຫ້ແກ່ວິສາຫະກິດ. ກົດໝາຍສອງສະບັບດັ່ງກ່າວ ກຳນົດແບບລວມໆທີ່ສຸດໃຫ້ແກ່ຂົງເຂດການລົງທຶນ, ດຳເນີນທຸລະກິດ, ກຳນົດບັນດາຫລັກການລວມໆທີ່ສຸດໃຫ້ແກ່ການສ້າງຕັ້ງ ແລະບໍລິຫານວິສາຫະກິດ, ໝູນໃຊ້ໃຫ້ທຸກວິສາຫະກິດ, ເວັ້ນເສຍແຕ່ ບາງວິສາຫະກິດດຳເນີນທຸລະກິດໃນຂົງເຂດພິເສດສະເພາະ ຄື: ທະນາຄານ, ປະກັນໄພ, ຫລັກຊັບ…
ຮັບປະກັນສິດເສລີໃນການດຳເນີນທຸລະກິດຂອງພົນລະເມືອງ, ວິສາຫະກິດ
ເລື່ອງສະພາແຫ່ງຊາດຮັບຮອງເອົາ ກົດໝາຍວ່າດ້ວຍວິສາຫະກິດ(ສະບັບປັບປຸງ) ແລະ ກົດໝາຍວ່າດ້ວຍການລົງທຶນ(ສະບັບປັບປຸງ) ແມ່ນບາດກ້າວໃຫຍ່ໃນການເປີດປະຕູໃຫ້ແກ່ວິສາຫະກິດດຳເນີນທຸລະກິດຢ່າງເສລີ ຊື່ງກົດໝາຍບໍ່ເກືອດຫ້າມ, ສ້າງສະພາບແວດລ້ອມແຫ່ງການດຳເນີນທຸລະກິດຢ່າງສະເໝີພາບລະຫວ່າງບັນດາພາກສ່ວນເສດຖະກິດ, ຫລຸດຜ່ອນລະບຽບການບໍລິຫານ ກໍຄືຫລຸດຜ່ອນລາຍຈ່າຍດຳເນີນທຸລະກິດໃຫ້ແກ່ວິສາຫະກິດ. ສິ່ງດັ່ງກ່າວແມ່ນເໝາະສົມກັບທຳນຽມສາກົນ. ທ່ານບຸ່ຍກວາງວີງ, ລັດຖະມົນຕີວ່າການກະຊວງແຜນການ ແລະ ການລົງທຶນຫວຽດນາມ ໃຫ້ຮູ້ວ່າ:
“ການປັບປຸງກົດໝາຍຄັ້ງນີ້ແມ່ນແກ້ໄຂຂໍ້ຂາດຕົກບົກຜ່ອງໃນໄລຍະກວ່າ 10 ປີພວກເຮົາໄດ້ຜັນຂະຫຍາຍປະຕິບັດກົດໝາຍສອງສະບັບດັ່ງກ່າວ. ເນື້ອໃນຕົ້ນຕໍໄດ້ຮັບການປັບປຸງໃນກົດໝາຍວ່າດ້ວຍການລົງທຶນ ນັ້ນແມ່ນວິທີສຳພັດ. ນັ້ນແມ່ນ ສິ່ງໃດຖືກຫ້າມ ແລະ ຖືກຈຳກັດລ້ວນແຕ່ລະບຸໄວ້ໃນກົດໝາຍ. ສິ່ງໃດກົດໝາຍບໍ່ຫ້າມ ປະຊາຊົນ ແລະ ວິສາຫະກິດລົງທຶນດຳເນີນທຸລະກິດຢ່າງເສລີ. ບັນຫາທີ 2 ວິສາຫະກິດຫວຽດນາມ ທັງໝົດ ບໍ່ຈຳເປັນມີຫນັງສືອະນຸຍາດລົງທຶນ. ຖ້າຫາກດຳເນີນທຸລະກິດໃນຂົງເຂດມີເງື່ອນໄຂ ເຂົາເຈົ້າຕ້ອງຕອບສະຫນອງບັນດາເງື່ອນໄຂນັ້ນ. ຫລັງຈາກນັ້ນ ບັນດາອົງການຄຸ້ມຄອງລັດ ຈະກວດກາ. ຖ້າເຫັນວ່າບໍ່ທັນຖືກຕ້ອງ ຈະຮຽກຮ້ອງຕ້ອງການປັບປຸງ, ຖ້າຫາກລະດັບລະເມີດແມ່ນໃຫຍ່ຫລວງແມ່ນຕ້ອງຢຸດຕິ.”
ເມື່ອ ກົດໝາຍວ່າດ້ວຍວິສາຫະກິດ(ສະບັບປັບປຸງ) ແລະ ກົດໝາຍວ່າດ້ວຍການລົງທຶນ(ສະບັບປັບປຸງ) ໄດ້ຮັບການນຳໃຊ້ ວິສາຫະກິດສາມາດຫັນປ່ຽນຂົງເຂດດຳເນີນທຸລະກິດ ຖ້າຫາກເຫັນວ່າກຳໄລສູງກວ່າ ແລະ ບັນດາລະບຽບການຂໍຫນັງສືອະນຸຍາດບໍ່ຫຍຸ້ງຍາກຄືກ່ອນນີ້. ການປ່ຽນແປງດັ່ງກ່າວຈະປັບປຸງສະພາບແວດລ້ອມແຫ່ງການດຳເນີນທຸລະກິດຢູ່ ຫວຽດນາມ ດີພໍສົມຄວນ, ເພີ່ມລັກສະນະເປັນເຈົ້າຂອງວິສາຫະກິດ, ເຮັດໃຫ້ມີໄຫວພິບໃນແຜນການຜະລິດ, ດຳເນີນທຸລະກິດ. ຄຽງຄູ່ກັນນັ້ນ ແມ່ນລະບຽບການບໍລິຫານໃນການລົງທຶນ ຕາມທິດຫລຸດຜ່ອນຮູບການອອກຫນັງສືອະນຸຍາດ ເພື່ອຫັນໄປສູ່ການນຳໃຊ້ຮູບການປະກາດໃຊ້ການກຳນົດກ່ຽວກັບມາດຕະຖານ, ເງື່ອນໄຂເປັນຕົ້ນ ເພື່ອໃຫ້ນັກລົງທຶນຈົດທະບຽນປະຕິບັດດ້ວຍຕົນເອງ ແລະ ອົງການຄຸ້ມຄອງດຳເນີນການກວດກາຕາມຫລັງ. ຈາກບັນດາການກຳນົດຢ່າງສະດວກດັ່ງກ່າວ, ວິສາຫະກິດຈະມີຄວາມຮັບຜິດຊອບກ່ຽວກັບຕົນເອງກໍຄືຄວາມຮັບຜິດຊອບຕໍ່ອົງການລັດຫລາຍກວ່າ. ທ່ານ ຫວູຕຽນໂລກ, ປະທານຫ້ອງການການຄ້າ ແລະ ອຸດສາຫະກຳ ຫວຽດນາມ ຕີລາຄາວ່າ:
“ບັນດາກົດໝາຍ ໄດ້ກຳນົດບັນດາມາດຕະການຢ່າງແຮງ ບົນເນື້ອໃນຈິດໃຈສ້າງຄວາມສະດວກຢ່າງສູງສູດ, ຫລຸດຜ່ອນການປະຕິຮູບລະບຽບການບໍລິຫານ ຮັບປະກັນສິດເສລີໃນການດຳເນີນທຸລະກິດຂອງວິສາຫະກິດ, ຮັບປະກັນລັກສະນະເປັນເອກະພາບຂອງລະບົບກົດໝາຍກ່ຽວກັບການດຳເນີນທຸລະກິດ ເພື່ອໃຫ້ບັນດາເນື້ອໃນນີ້ບໍ່ພຽງແຕ່ນຳໃຊ້ໃຫ້ແກ່ວິສາຫະກິດເທົ່ານັ້ນ ຫາກນັບທັງພາກສ່ວນເສດຖະກິດອື່ນອີກດ້້ວຍ. ນີ້ແມ່ນການປັບປຸງມີລັກສະນະບຸກທະລຸ.”
ສິ່ງທ້າທາຍສຳລັບອົງການຄຸ້ມຄອງ
ເລື່ອງເປີດກວ້າງບັນດາຂົງເຂດການລົງທຶນ, ດຳເນີນທຸລະກິດຄືດັ່ງກົດໝາຍສະບັບໃຫມ່ ຈະສ້າງການແກ້ງແຍ້ງລະຫວ່າງບັນດາວິສາຫະກິດ ແຕ່ກໍເຮັດໃຫ້ຕະຫລາດມີການປົນເປຢ່າງແນ່ນອນ. ນອກນັ້ນ ບັນດາຂົງເຂດໄດ້ຮັບການລົງທຶນພັດເພີ່ມຂຶ້ນທົບຫລາຍເທົ່າ ສະນັ້ນ ຈະສ້າງສິ່ງທ້າທາຍບໍ່ແມ່ນຫນ້ອຍສຳລັບບັນດາອົງການຄຸ້ມຄອງໃນບົດບາດກວດກາວິສາຫະກິດ, ນັກລົງທຶນຕາມຫລັງ, . ສະນັ້ນ ຄວນມີກົງຈັກ ດ້ວຍບັນດາບຸກຄະລາກອນເກັ່ງກ່ຽວກັບການກວດກາການດຳເນີນທຸລະກິດຕາມຫລັງ ແຕ່ບໍ່ກໍ່ຄວາມຫຍຸ້ງຍາກໃຫ້ແກ່ວິສາຫະກິດ ແລະ ນັກລົງທຶນ. ທ່ານ ເລດັກເລີມ, ສະມາຊິກສະພາແຫ່ງຊາດ ແຂວງ ບີງທ້ວນ ໃຫ້ຮູ້ວ່າ:
“ເພື່ອເສີມຂະຫຍາຍປະສິດທິຜົນ, ຜົນສັກສິດຂອງວຽກງານບໍລິຫານວິສາຫະກິດ ຕ້ອງຫັນບັນດາກົດໝາຍ, ຂໍ້ກຳນົດກ່ຽວກັບສິດອຳນາດ, ຄວາມຮັບຜິດຊອບລະຫວ່າງບັນດາອົງການບໍລິຫານລັດຢ່າງຈະແຈ້ງກວ່າ ເພື່ອມີກົນໄກໃນວຽກງານກວດກາຕາມຫລັງ.”
ກົດໝາຍວ່າດ້ວຍວິສາຫະກິດ(ສະບັບປັບປຸງ) ແລະ ກົດໝາຍວ່າດ້ວຍການລົງທຶນ(ສະບັບປັບປຸງ) ມີຜົນສັກສິດນັບແຕ່ວັນທີ 1/7/2015 ເປັນຕົ້ນໄປ. ອົງການກ່ຽວຂ້ອງ ແລະ ຫາງສຽງມີຄວາມຫວັງວ່າ ພາຍຫລັງກົດໝາຍສອງສະບັບດັ່ງກ່າວມີຜົນສັກສິດ ຈະສ້າງກຳລັງຫນູນໃຫມ່ໃຫ້ແກ່ປະຊາຊົນ ແລະ ວິສາຫະກິດ, ສ້າງຂະບວນການສ້າງຕັ້ງວິສາຫະກິດໃຫມ່, ປະກອບສ່ວນສົ່ງເສີມປະຊາຊົນລົງທຶນດຳເນີນທຸລະກິດ, ສ້າງວຽກເຮັດງານທຳໃຫ້ແກ່ຄົນງານນັບລ້ານໆຄົນ ແລະ ບັນດາຄຸນຄ່າສຳຄັນອື່ນໃຫ້ແກ່ປະເທດຊາດ.