(VOVWORLD) - ທ່ານປະທານສະພາແຫ່ງຊາດ ເຈິ່ນແທັງເໝິນ ຫາກໍ່ສິ້ນສຸດການຢ້ຽມຢາມ ລາຊະອານາຈັກ ກຳປູເຈຍ ຢ່າງເປັນທາງການ, ເຂົ້າຮ່ວມກອງປະຊຸມຄົບຄະນະຄັ້ງທີ 12 ຂອງກອງປະຊຸມສາກົນບັນດາພັກການເມືອງ ອາຊີ (ICAPP) ແລະ ມີບົດກ່າວປາໄສຢູ່ກອງປະຊຸມຄົບຄະນະຄັ້ງທີ 11 ຂອງລັດຖະສະພາສາກົນ ເພື່ອຄວາມໂອບເອື້ອອາລີ ແລະ ສັນຕິພາບ (IPTP 11). ການເຄື່ອນໄຫວຄັ້ງນີ້ ໄດ້ປະກອບສ່ວນປັບປຸງຄວາມໄວ້ວາງໃຈຍຸດທະສາດ ແລະ ເຮັດໃຫ້ການພົວພັນ ຫວຽດນາມ - ກຳປູເຈຍ ເລິກເຊິ່ງຂຶ້ນຕື່ມ. ພິເສດ, ຫວຽດນາມ ໄດ້ສົ່ງສານພ້ອມແລ້ວສະໜັບສະໜູນບັນດາຂໍ້ລິເລີ່ມປະກອບສ່ວນເຂົ້າໃນການສ້າງສັນຕິພາບ, ສະຖຽນລະພາບຂອງພາກພື້ນ ແລະ ສາກົນ.
ດ້ວຍເກືອບ 30 ກິດຈະກຳ, ການເຄື່ອນໄຫວຂອງທ່ານປະທານສະພາແຫ່ງຊາດ ຫວຽດນາມ ເຈິ່ນແທັງເໝິິນ ໄດ້ປະສົບຜົນສຳເລັດທັງໃນແງ່ມູນການພົວພັນສອງຝ່າຍ ແລະ ຫຼາຍຝ່າຍ, ບໍ່ພຽງແຕ່ປັບປຸງ, ເພີ່ມທະວີການພົວພັນ ຫວຽດນາມ - ກຳປູເຈຍ ເທົ່ານັ້ນ, ຫາກຍັງເຮັດໃຫ້ຄວາມໄວ້ວາງໃຈດ້ານການເມືອງມີຄວາມເລິກເຊິ່ງຂຶ້ນຕື່ມ ແລະ ຍົກສູງການຮ່ວມມືກັບບັນດາພັກການເມືອງຢູ່ພາກພື້ນ ອາຊີ ເທົ່ານັ້ນ ຫາກຍັງສົ່ງສານກ່ຽວກັບແນວທາງການຕ່າງປະເທດຂອງ ຫວຽດນາມ ເຖິງບັນດາພັກການເມືອງ, ລັດຖະສະພາ, ສະມາຊິກລັດຖະສະພາບັນດາປະເທດອີກດ້ວຍ.
 ທ່ານປະທານສະພາແຫ່ງຊາດ ເຈິ່ນແທັງເໝິນ ແລະ ພະບາດສົມເດັດ ມະຫາກະສັດ Norodom Sihamoni (ພາບ: VOV) |
ປັບປຸງ, ເພີ່ມທະວີການພົວພັນ ຫວຽດນາມ - ກຳປູເຈຍ
ໂດຍໄດ້ໃຫ້ການຕ້ອນຮັບທ່ານປະທານສະພາແຫ່ງຊາດ ເຈິ່ນແທັງເໝິນ ດ້ວຍພິທີສູງສຸດ, ທ່ານນາງ Samdech Khuon Sudary ປະທານສະພາແຫ່ງຊາດ ກຳປູເຈຍ, ປະທານ IPTP 11 ເນັ້ນໜັກວ່າ “ການເຂົ້າຮ່ວມຂອງທ່ານປະທານສະພາແຫງຊາດ ແລະ ຄະນະຜູ້ແທນຂັ້ນສູງພັກ, ລັດ ຫວຽດນາມ ແມ່ນມີຄວາມໝາຍສຳຄັນ, ສະແດງໃຫ້ເຫັນການຖືສາຍພົວພັນມິດຕະພາບ, ບ້ານໃກ້ເຮືອນຄຽງທີ່ສະໜິດສະໜົມ, ດີງາມ ເປັນສຳຄັນ ເໝືອນດັ່ງເປັນເພື່ອນທີ່ດີ, ເປັນອ້າຍນ້ອງທີ່ສະໜິດສະໜົມ ແລະ ເປັນຄູ່ຮ່ວມມືຍຸດທະສາດທີ່ໝັ້ນແກ່ນຍາວນານ”. ທ່ານປະທານພັກປະຊາຊົນ ກຳປູເຈຍ, ປະທານສະພາສູງ Samdech Hun Sen, ຢັ້ງຢືນວ່າ ການຢ້ຽມຢາມມີຄວາມໝາຍສຳຄັນ, ປະກອບສ່ວນພັດທະນາການພົວພັນລະຫວ່າງສອງປະເທດທັງໃນການພົວພັນສອງຝ່າຍ, ຫຼາຍຝ່າຍ ແລະ ເພີ່ມທະວີການພົວພັນຮ່ວມມືລະຫວ່າງສອງສະພາແຫ່ງຊາດ.
ດ້ວຍບັນດາການແລກປ່ຽນທີ່ແທດຈິງລະຫວ່າງປະທານສະພາແຫ່ງຊາດ ຫວຽດນາມ ເຈິ່ນແທັງເໝິນ ກັບບັນດາການນຳ ກຳປູເຈຍ ໃນການຢ້ຽມຢາມ, ໄລຍະຈະມາເຖິງສອງປະເທດຈະເພີ່ມທະວີການຊຸກຍູ້ການພົວພັນອັນດີງາມນີ້ ຕາມທິດນຳທີ່ວ່າ ບ້ານໃກ້ເຮືອນຄຽງທີ່ດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ ແລະ ຍືນຍົງຍາວນານ.
ຍົກອອກສານສ້າງຄວາມໄວ້ເນື້ອເຊື່ອໃຈ, ຊອກຫາມາດຕະການສ້າງສັນຕິພາບແບບຍືນຍົງ
ຢູ່ ກຳປູເຈຍ, ທ່ານປະທານສະພາແຫ່ງຊາດ ເຈິ່ນແທງເໝິນ ໄດ້ຕາງໜ້າພັກຄອມມູນິດ ຫວຽດນາມ ເຂົ້າຮ່ວມກອງປະຊຸມ ICAPP 12 ດ້ວຍຫົວຂໍ້ “ຊອກຫາສັນຕິພາບ ແລະ ໄກ່ເກ່ຍ” ແລະ ເຂົ້າຮ່ວມວາລະໄຂກອງປະຊຸມ IPTP 11 ດ້ວຍຫົວຂໍ້ “ຊອກຫາສັນຕິພາບ, ໄກ່ເກ່ຍ ແລະ ໃຫ້ອະໄພ”.
ກອງປະຊຸມຄົບຄະນະ ICAPP ຄັ້ງທີ 12 ມີການເຂົ້າຮ່ວມຂອງບັນດາການນຳ ແລະ ຜູ້ຕາງໜ້າ 59 ພັກການເມືອງຈາກ 39 ປະເທດໃນພາກພື້ນ ແລະ ໃນໂລກ. ຢູ່ ICAPP ຄັ້ງນີ້, ຄະນະຜູ້ແທນ ຫວຽດນາມ ໄດ້ເຂົ້າຮ່ວມບັນດາວາລະປຶກສາຫາລື ແລະ ມີການພົບປະສອງຝ່າຍກັບການນຳບັນດາພັກການເມືອງ, ລັດຖະສະພາບັນດາປະເທດເຂົ້າຮ່ວມກອງປະຊຸມ.
ໃນຂະນະນັ້ນ, ວາລະປະຊຸມຄັ້ງທີ 11 ຂອງລັດຖະສະພາສາກົນເພື່ອການໃຫ້ອະໄພ ແລະ ສັນຕິພາບ (IPTP) ມີການເຂົ້າຮ່ວມຂອງຜູ້ແທນ 260 ທ່ານມາຈາກ 49 ປະເທດ ແລະ ບັນດາອົງການຈັດຕັ້ງລະດັບພາກພື້ນ ແລະ ສາກົນ, ປະທານສະພາແຫ່ງຊາດ, ຮອງປະທານສະພາແຫງຊາດ, ເລຂາທິການໃຫຍ່ IPU, ອາຊຽນ, AIPA… ນີ້ແມ່ນຄັ້ງທຳອິດທີ່ສະພາແຫ່ງຊາດ ຫວຽດນາມ ເຂົ້າຮ່ວມວາລະປະຊຸມຂອງ IPTP ໃນຖານະເປັນແຂກຖືກເຊີນພິເສດຂອງ ກຳປູເຈຍ, ປະເທດປະທານ IPTP ໄລຍະ 2023 – 2024.
ກ່າວຄຳເຫັນທີ່ວາລະປະຊຸມ IPTP 11, ທ່ານປະທານສະພາແຫ່ງຊາດ ເຈິ່ນແທັງເໝິນ ຢັ້ງຢືນວ່າ:
“ຫວຽດນາມ ແມ່ນປະເທດຮັກຫອມສັນຕິພາບດ້ວຍມູນເຊື້ອໃຫ້ອະໄພ, ມະນຸດສະທຳ, ປອງດອງ. ຫວຽດນາມ ເຄົາລົບຄຸນຄ່າຂອງສັນຕິພາບ, ສະຖຽນລະພາບ, ມິດຕະພາບເປັນພິເສດ ເພື່ອໃຫ້ປະຊາຊົນທຸກຄົນລ້ວນແຕ່ໄດ້ດຳລົງຊີວິດໃນປະເທດເອກະລາດ, ເສລີພາບ, ອີ່ມໜຳສຳລານສົມບູນພູນສຸກ. ພວກຂ້າພະເຈົ້າກໍຮັບຮູ້ຢ່າງຈະແຈ້ງກ່ຽວກັບສັນຕິພາບ, ການພັດທະນາຂອງ ຫວຽດນາມ ຕິດພັນກັບພາກພື້ນ ແລະ ໂລກ. ຕາມນັ້ນແລ້ວ, ຫວຽດນາມ ສະໜັບສະໜູນບັນດາຂໍ້ລິເລີ່ມທີ່ປະກອບສ່ວນເຂົ້າໃນການສ້າງສັນຕິພາບ, ສະຖຽນລະພາບຂອງພາກພື້ນ ແລະ ໂລກ, ສະໜັບສະໜູນເລື່ອງແກ້ໄຂການປະທະກັນ ແລະ ຂໍ້ຂັດແຍ້ງສາກົນ ໂດຍສັນຕິວິທີ, ບໍ່ນາບຂູ່ ຫຼື ນຳໃຊ້ອາວຸດ, ເຄົາລົບກົດໝາຍສາກົນ, ກົດບັດ ສປຊ.”
ທ່ານປະທານສະພາແຫ່ງຊາດ ເຈິ່ນແທັງເໝິນ ກໍຢັ້ງຢືນວ່າ ຫວຽດນາມ ສະໜັບສະໜູນຄວາມມານະພະຍາຍາມຂອງ ກຳປູເຈຍ ເປັນສຳຄັນ ເພື່ອແນໃສ່ຊຸກຍູ້ການເຈລະຈາ, ໄກ່ເກ່ຍ ແລະ ການຮ່ວມມື; ເຊື່ອໝັ້ນຕໍ່ບົດຮຽນທີ່ປະສົບຜົນສຳເລັດຂອງ ກຳປູເຈຍໃນການພັດທະນາປະເທດຊາດ ແລະ ສ້າງສາຍພົວພັນມິດຕະພາບ, ການຮ່ວມມືກັບບັນດາປະເທດບ້ານໃກ້ເຮືອນຄຽງ, ພາກພື້ນ ຈະປະກອບສ່ວນຊຸກຍູ້ສັນຕິພາບ, ການຮ່ວມມືຢູ່ພາກພື້ນ ກໍຄືໃນໂລກ.
ສານຂອງທ່ານປະທານສະພາແຫ່ງຊາດ ເຈິ່ນແທັງເໝິນ ໄດ້ຮັບຄວາມເຫັນດີເຫັນພ້ອມ ແລະ ຕີລາຄາສູງ. ທ່ານລັດຖະມົນຕີກະຊວງຖະແຫຼງຂ່າວ ກຳປູເຈຍ Kem Gunawadh ຖືວ່າ:
“ຂ້າພະເຈົ້າມີຄວາມປະທັບໃຈຕໍ່ບົດກ່າວປາໄສທີ່ເຕັມໄປດ້ວຍຄວາມໝາຍ ແລະ ເນື້ອໃນສຳຄັນຫຼາຍຢ່າງຂອງທ່ານປະທານສະພາແຫ່ງຊາດ ຫວຽດນາມ ໃນກອງປະຊຸມຄັ້ງນີ້. ທ່ານປະທານສະພາແຫ່ງຊາດ ຫວຽດນາມ ໄດ້ເວົ້າກ່ຽວກັບສະພາບການຕົວຈິງຢູ່ ກຳປູເຈຍ, ກ່ຽວກັບວິວັດທະນາການທີ່ເຕັມໄປດ້ວຍຄວາມລຳບາກໃນການປອງດອງຊາດ, ນໍາມາເຊິ່ງສັນຕິພາບໃຫ້ແກ່ປະເທດຂ້າພະເຈົ້າ, ປະຊາຊົນປະເທດຂ້າພະເຈົ້າ ແລະ ໃນນັ້ນ, ພວກຂ້າພະເຈົ້າກໍໄດ້ຮັບການຊ່ວຍເຫຼືອຫຼາຍຢ່າງຈາກປະຊາຊົນ ຫວຽດນາມ. ພ້ອມດຽວກັນນັ້ນ, ທ່ານປະທານສະພາແຫ່ງຊາດ ກໍໄດ້ເນັ້ນໜັກເຖິງຄວາມສຳຄັນຂອງຄູ່ຮ່ວມມື, ຄວາມເຄົາລົບເຊິ່ງກັນ ແລະ ກັນ ເມື່ອເກີດມີຂໍ້ຂັດແຍ້ງກັນ ກໍຄື ບັນຫາເກີດຂຶ້ນໃໝ່ອີກດ້ວຍ”.
ການຢ້ຽມຢາມຂອງທ່ານປະທານສະພາແຫ່ງຊາດ ເຈິ່ນແທັງເໝິິນ ສືບຕໍ່ນຳການພົວພັນ ຫວຽດນາມ - ກຳປູເຈຍ ເຂົ້າສູ່ໄລຍະພັດທະນາໃໝ່. ພ້ອມດຽວກັນນັ້ນ, ການເຂົ້າຮ່ວມກອງປະຊຸມ IPTP 11 ຄັ້ງທຳອິດ ຂອງສະພາແຫ່ງຊາດ ຫວຽດນາມ ກໍ່ໄດ້ຢັ້ງຢືນທັດສະນະສະເໝີຕົ້ນສະເໝີປາຍຂອງ ຫວຽດນາມ ຍາມໃດກໍ່ຕັ້ງໜ້າປະກອບສ່ວນ, ສະໜັບສະໜູນທຸກເປົ້າໝາຍລວມແນໃສ່ຊຸກຍູ້ສັນຕິພາບ, ສ້າງຄວາມໄວ້ເນື້ອເຊື່ອໃຈລະຫວ່າງບັນດາປະເທດ./.