ວັນທີ 12/12, ປະທານສະພາແຫ່ງຊາດຫວຽດນາມ ຫງວຽນທິກິມເງິນ ໄດ້ເລີ່ມເຂົ້າຮ່ວມບັນດາການເຄື່ອນໄຫວທຳອິດໃນຂອບເຂດກອງປະຊຸມສຸດຍອດບັນດາປະທານສະພາແຫ່ງຊາດຍິງໂລກຄັ້ງທີ 11 ຊຶ່ງຈັດຂຶ້ນຢູ່ສະຫະລັດອາຣັບເອມມີເລັດ (UAE). ນີ້ແມ່ນໂອກາດເພື່ອໃຫ້ຫວຽດນາມພ້ອມກັບບັນດາປະທານສະພາແຫ່ງຊາດຍິງຄົນອື່ນໆໃນໂລກພ້ອມກັນແບ່ງປັນບົດຮຽນ, ປຶກສາຫາລືບັນດາວິທີການແກ້ໄຂສຳລັບບັນຫາຂາດຄວາມສະເໝີພາບລະຫວ່າງຍິງ-ຊາຍ,ຂາດຄວາມສະເໝີພາບທາງດ້ານເສດຖະກິດ, ມຸ່ງໄປສູ່ຄວາມສາມັກຄີຊຸກຍູ້ສັນຕິພາບ, ຄວາມໝັ້ນຄົງ ແລະ ການພັດທະນາແບບຍືນຍົງໃນທົ່ວໂລກ.
ພິທີຕ້ອນຮັບປະທານສະພາແຫ່ງຊາດຫວຽດນາມ ຫງວຽນທິກິມເງິນ ຢູ່ສະໜາມບິນ Abu Dhabi - Royal Jet ທີ່ນະຄອນຫຼວງ Abu Dhabi |
ກອງປະຊຸມສຸດຍອດບັນດາປະທານສະພາແຫ່ງຊາດຍິງໂລກຄັ້ງທີ 11ດ້ວຍຫົວຂໍ້ “ ສາມັກຄີພ້ອມກັນສ້າງຮູບປະທຳໃຫ້ແກ່ອະນາຄົດ”. ກອງປະຊຸມຄັ້ງນີ້ຄາດວ່າ ຈະມີການເຂົ້າຮ່ວມຂອງປະທານສະພາແຫ່ງຊາດຍິງປະມານ 50 ຄົນໃນໂລກ. ປະທານສະພາແຫ່ງຊາດຫວຽດນາມ ຫງວຽນທິກິມເງິນ ເຂົ້າຮ່ວມກອງປະຊຸມ, ດ້ານໜຶ່ງແມ່ນເພື່ອເພີ່ມທະວີການຊຸກຍູ້ການພົວພັນຫຼາຍດ້ານກັບປະເທດເຈົ້າພາບ ສະຫະລັດອາຣັບເອມມີເລັດ, ຊຸກຍູ້ການຮ່ວມມືໃນສະຫະພັນລັດຖະສະພາສາກົນ, ດ້ານອື່ນກໍປະກອບສ່ວນຢ່າງຕັ້ງໜ້າເຂົ້າໃນໂຄງການດຳເນີນງານຂອງກອງປະຊຸມ, ຊຸກຍູ້ບົດບາດຂອງແມ່ຍິງທີ່ປະກອບສຽງເວົ້າອັນໃຫຍ່ກ່ວາຂອງຕົນເຂົ້າໃນບັນດາບັນຫາທົ່ວໂລກ.
ສາມັກຄີກັນເພື່ອຊຸກຍູ້ສັນຕິພາບ, ຄວາມໝັ້ນຄົງ ແລະ ການພັດທະນາແບບຍືນຍົງໃນທົ່ວໂລກ
ກອງປະຊຸມປະທານສະພາແຫ່ງຊາດຍິງໂລກ ແມ່ນກົນໄກພົບປະສັງສັນຂອງບັນດາປະທານສະພາແຫ່ງຊາດຍິງຄັ້ງທຳອິດທີ່ຖືກດຳເນີນເນື່ອງໃນໂອກາດກອງປະຊຸມສຸດຍອດຄັ້ງທີ 2 ບັນດາປະທານສະພາແຫ່ງຊາດເມື່ອປີ 2005 ຢູ່ນິວຢອກ-ສະຫະລັດອາເມລິກາ. ນັບແຕ່ນັ້ນເປັນຕົ້ນມາ, ໃນແຕ່ລະປີ, ກອງປະຊຸມຖືກຈັດຂຶ້ນເພື່ອແນໃສ່ຊຸກຍູ້ຄວາມສະເໝີພາບລະຫວ່າງຍິງ-ຊາຍ, ເພີ່ມທະວີບົດບາດ ແລະ ການເຂົ້າຮ່ວມຂອງເພດຍິງເຂົ້າໃນບັນດາການເຄື່ອນໄຫວດ້ານການເມືອງ, ປະກອບສ່ວນແກ້ໄຂບັນດາບັນຫາສຳລັບເດັກຍິງ ແລະ ແມ່ຍິງຄື: ປົກປ້ອງ ແລະ ມອບສິດໃຫ້ແກ່ເດັກຍິງ, ຕ້ານການໃຊ້ຄວາມຮຸນແຮງສຳລັບແມ່ຍິງ ແລະ ເດັກນ້ອຍ… ໃນກ່ວາ 30 ປີທີ່ຜ່ານມາ, ໃນຂອບເຂດທົ່ວໂລກ, ການເຂົ້າຮ່ວມຂອງແມ່ຍິງເຂົ້າໃນຊີວິດການເມືອງສັງຄົມແມ່ນນັບມື້ນັບຫຼາຍຂຶ້ນ, ພິເສດແມ່ນບັນດາສະມາຊິກສະພາແຫ່ງຊາດຍິງ. ຖ້າຫາກວ່າ ໃນປີ 1995, ອັດຕາສ່ວນສະເລ່ຍຂອງແມ່ຍິງໃນໂລກທີ່ເຂົ້າຮ່ວມສະພາແຫ່ງຊາດແມ່ນ 11% ນັ້ນ, ມາຮອດປະຈຸບັນ, ອັດຕາສ່ວນນີ້ໄດ້ເພີ່ມຂຶ້ນເປັນ 22%. ແຕ່ຕົວເລກດັ່ງກ່າວແມ່ນຍັງບໍ່ທັນໄດ້ຕາມຄວາມມຸ່ງຫວັງ. ຍ້ອນເຫດນີ້ເອງ, ກອງປະຊຸມ ປະທານສະພາແຫ່ງຊາດຍິງໂລກແມ່ນໂອກາດເພື່ອໃຫ້ບັນດາ ສະມາຊິກສະພາແຫ່ງຊາດແບ່ງປັນບົດຮຽນໃນການຊຸກຍູ້ຄວາມສະເໝີພາບລະຫວ່າງຍິງ-ຊາຍ, ຊຸກຍູ້ການເຂົ້າຮ່ວມຂອງແມ່ຍິງເຂົ້າໃນດ້ານຕ່າງໆຂອງຊີວິດສັງຄົມ, ປົກປ້ອງສິດຂອງແມ່ຍິງ; ມານະພະຍາຍາມເພື່ອຢຸດຕິການໃຊ້ຄວາມຮຸນແຮງສຳລັບແມ່ຍິງ, ເພື່ອໃຫ້ແມ່ຍິງອາດຈະໄດ້ຮັບສິດທາງດ້ານເສດຖະກິດຫຼາຍກວ່າອີກ.
ຫວຽດນາມ, ປະເທດນຳໜ້າໃນບັນຫາຄວາມສະເໝີພາບລະຫວ່າງຍິງ-ຊາຍ
ຢູ່ຫວຽດນາມ, ໃນຊຸມປີທີ່ຜ່ານມາ, ພັກ ແລະ ລັດໄດ້ປະຕິບັດບັນດາບາດກ້າວບຸກທະລຸກ່ຽວກັບຄວາມຮັບຮູ້ ແລະ ການກະທຳ, ຈາກແງ່ມຸມດ້ານກົດໝາຍ, ນະໂຍບາຍຕະຫຼອດຮອດພຶດຕິກຳຕົວຈິງ ແລະ ບັນລຸໄດ້ບັນດາຜົນງານສຳຄັນກ່ຽວກັບຄວາມສະເໝີພາບລະຫວ່າງຍິງ-ຊາຍ. ຫວຽດນາມໄດ້ຮັບການຕີລາຄາວ່າ ແມ່ນໜຶ່ງໃນບັນດາປະເທດສາມາດລົບລ້າງຄວາມແຕກໂຕ່ນກັນລະຫວ່າງຍິງ-ຊາຍໄວກວ່າໝູ່ໃນກວ່າ 2 ທົດສະວັດທີ່ຜ່ານມາ. ອັດຕາແມ່ຍິງທີ່ເຂົ້າຮ່ວມສະພາແຫ່ງຊາດບັນລຸເກືອບ 25%, ອັນໄດ້ນຳຫວຽດນາມຖືກຈັດເຂົ້າໃນກຸ່ມບັນດາປະເທດທີ່ມີອັດຕາສະມາຊິກສະພາແຫ່ງຊາດຍິງສູງໃນພາກພື້ນ ແລະ ໃນໂລກ. ແມ່ຍິງໄດ້ດຳລົງບັນດາຕຳແໜ່ງການນຳຫຼັກແຫຼ່ງຂອງປະເທດຊາດ. ຢູ່ບັນດາທ້ອງຖິ່ນ, ມີແມ່ຍິງຫຼາຍຄົນໄດ້ສວມບົດບາດຫຼັກແຫຼ່ງໃນບັນດາຂະແໜງການຂັ້ນຕ່າງໆ, ປະກອບສ່ວນແກ້ໄຂບັນດາບັນຫາສຳຄັນ. ນັກທຸລະກິດຍິງແມ່ນຊາວເຜົ່າສ່ວນໜ້ອຍໄດ້ເພີ່ມຂຶ້ນ, ພິເສດແມ່ນໃນຂົງເຂດການສຶກສາ, ສາທາລະນະສຸກ…ທ່ານນາງ Pratibha Mehta ອະດີດຜູ້ປະສານງານ ສ.ປ.ຊ ປະຈຳຫວຽດນາມ ໄດ້ແບ່ງປັນວ່າ :
“ ຂ້າພະເຈົ້າມີຄວາມປະທັບໃຈພິເສດຕໍ່ບົດບາດຂອງແມ່ຍິງຫວຽດນາມ. ຢູ່ຫວຽດນາມ, ບົດບາດຂອງແມ່ຍິງນັບມື້ນັບສຳຄັນ, ເຂົາເຈົ້າສາມາດເຮັດໄດ້ທຸກສິ່ງທຸກຢ່າງ, ປະກອບສ່ວນຢ່າງໃຫຍ່ຫຼວງເຂົ້າໃນການພັດທະນາເສດຖະກິດຂອງປະເທດຊາດ, ເຂົ້າໃນສະຖຽນລະພາບທາງດ້ານການເມືອງສັງຄົມ ”
ຄວາມມານະພະຍາຍາມເພື່ອຮັບປະກັນຄວາມສະເໝີພາບລະຫວ່າງຍິງ-ຊາຍຂອງຫວຽດນາມໄດ້ຮັບການຮັບຮູ້ຈາກສາກົນ. ທ່ານນາງ Hon Rosaline J. Smith , ສ.ສ.ຊ Sierra Leone ໃນການມາຢ້ຽມຢາມຫວຽດນາມເຂົ້າຮ່ວມກອງປະຊຸມສະມັດຊາໃຫຍ່ສະຫະພັນລັດຖະສະພາສາກົນຄັ້ງທີ 32 ໄດ້ຢືນຢັນວ່າ :
“ ຫວຽດນາມໄດ້ເຮັດວຽກງານຮັບປະກັນຄວາມສະເໝີພາບລະຫວ່າງຍິງ-ຊາຍ. ຂ້າພະເຈົ້າເຫັນວ່າ ມີແມ່ຍິງຫວຽດນາມຫຼາຍຄົນໄດ້ດຳລົງບັນດາຕຳແໜ່ງທີ່ສຳຄັນໃນສະພາແຫ່ງຊາດ. ຍົກຕົວຢ່າງຄື ປະທານສະພາແຫ່ງຊາດຫວຽດນາມ. ຂ້າພະເຈົ້າຖືວ່າ ຫວຽດນາມພວມກ້າວເດີນຢ່າງຖືກທິດ ແລະ ສືບຕໍ່ສ້າງບັນດາເປົ້າໝາຍພັດທະນາສະຫັດສະວັດ ”
ບົນພື້ນຖານບັນດາຜົນງານດັ່ງກ່າວ, ຄະນະຜູ້ແທນສະພາແຫ່ງຊາດຫວຽດນາມໂດຍ ປະທານສະພາແຫ່ງຊາດຫວຽດນາມ ຫງວຽນທິກິມເງິນນຳໜ້າ ທີ່ເຂົ້າຮ່ວມກອງປະຊຸມ, ໄດ້ແບ່ງປັນບັນດາບົດຮຽນຂອງຫວຽດນາມ ຢັ້ງຢືນນະໂຍບາຍຮັບປະກັນຄວາມສະເໝີພາບລະຫວ່າງຍິງ-ຊາຍຂອງພັກ ແລະ ລັດຫວຽດນາມ, ຕັ້ງໜ້າ, ເປັນເຈົ້າການເສີມຂະຫຍາຍບົດບາດຂອງຫວຽດນາມເວົ້າລວມ ແລະ ສະພາແຫ່ງຊາດຫວຽດນາມເວົ້າສະເພາະໃນບັນດາເວທີປາໄສລັດຖະສະພາພາກພື້ນ ແລະ ສາກົນ, ພ້ອມກັບປະທານສະພາແຫ່ງຊາດຍິງຄົນອື່ນໆໃນໂລກລະດົມກຳລັງແຮງແຫ່ງສາມັກຄີ, ເປີດກ້ວາງເຄືອຂ່າຍຮ່ວມມືສາກົນ, ປຶກສາຫາລືກ່ຽວກັບວິທີການແກ້ໄຂສຳລັບບັນຫາຂາດຄວາມສະເໝີພາບລະຫວ່າງຍິງ-ຊາຍ, ຂາດຄວາມສະເໝີພາບທາງດ້ານເສດຖະກິດ, ມຸ່ງໄປສູ່ຄວາມສາມັກຄີຊຸກຍູ້ສັນຕິພາບ, ຄວາມໝັ້ນຄົງ ແລະ ການພັດທະນາແບບຍືນຍົງໃນທົ່ວໂລກ.