ພາຍຫຼັງ 2 ປີແຫ່ງການປະຕິບັດໜ້າທີ່ຮັກສາສັນຕິພາບຂອງສະຫະປະຊາຊາດ, ມາຮອດປະຈຸບັນ, ຫວຽດນາມໄດ້ຈັດສົ່ງພະນັກງານ 12 ເທື່ອຄົນໄປປະຕິບັດໜ້າທີ່ໃນ 2 ຄະນະປະຕິບັດງານຢູ່ ຊູດານໃຕ້ ແລະ ສ.ອາຟະລິກາກາງ. ຈຳນວນທະຫານນີ້ ສືບຕໍ່ໄດ້ຮັບການເພີ່ມເຕີມໃນໄລຍະທີ່ຈະມາເຖິງ. ເປັນອັນວ່າ ຫວຽດນາມໄດ້ ແລະ ພວມຕັ້ງໜ້າ, ເປັນເຈົ້າການເຊື່ອມໂຍງເຂົ້າກັບສາກົນ ບໍ່ພຽງແຕ່ດ້ວຍຄຳໝັ້ນສັນຍາເທົ່ານັ້ນ, ຫາກຍັງມີການກະທຳໂດຍລະອຽດ, ປະກອບສ່ວນຍົກສູງທີ່ຕັ້ງບົດບາດຂອງຫວຽດນາມບົນເວທີສາກົນ.
ພັນໂທ ໝາກດຶກຈ້ອງ ແບ່ງປັນບົດຮຽນກັບພະນັກງານກະກຽມເດີນທາງເຂົ້າຮ່ວມກຳລັງຮັກສາສັນຕິພາບຂອງສະຫະປະຊາຊາດ |
ມີຄວາມໝັ້ນຄົງທາງດ້ານຄຸນທາດການເມືອງ, ເປັນເຈົ້າການ, ບໍ່ທໍ້ຖອຍໃຈຕໍ່ຄວາມຫຍຸ້ງຍາກທຸກຢ່າງເພື່ອເຮັດສຳເລັດໜ້າທີ່ ຍາມໃດກໍແມ່ນເປົ້າໝາຍຂອງບັນດານາຍທະຫານຫວຽດນາມເມື່ອເດີນທາງຮັບໜ້າທີ່ເຂົ້າຮ່ວມກຳລັງຮັກສາສັນຕິພາບຂອງສະຫະປະຊາຊາດ.
ຍົກສູງພາບພົດຫວຽດນາມໃນສາຍຕາເພື່ອນມິດສາກົນ.
ພັນໂທ ໝາກດຶກຈ້ອງ ຊຶ່ງແມ່ນໜຶ່ງໃນຈຳນວນນາຍທະຫານ 2 ຄົນທຳອິດຂອງຫວຽດນາມທີ່ເຂົ້າຮ່ວມກຳລັງຮັກສາສັນຕິພາບຂອງສະຫະປະຊາຊາດດ້ວຍໜ້າທີ່ແມ່ນນາຍທະຫານຮັບຜິດຊອບການຕິດຕໍ່ສື່ສານຢູ່ຄະນະປະຕິບັດງານສະຫະປະຊາຊາດຢູ່ຊູດານໃຕ້ ເມື່ອເດືອນ 6/2014 ໃຫ້ຮູ້ວ່າ : ດ້ວຍການກະກຽມຢ່າງລະອຽດຈາກດ້ານພາສາຕ່າງປະເທດ, ລະດັບວິຊາສະເພາະທະຫານຊ່າງແສງ, ເສນາຮັກ, ຄວາມຮູ້ດ້ານການທະຫານ, ພິເສດແມ່ນບັນດາລະດັບຄວາມຮູ້ກ່ຽວກັບການເຄື່ອນໄຫວ ຮັກສາສັນຕິພາບ, ດັ່ງນັ້ນ, ບັນດານາຍທະຫານຫວຽດນາມ ຍາມໃດກໍເສີມຂະຫຍາຍຄວາມເປັນເຈົ້າການ, ແກ້ໄຂຄວາມຫຍຸ້ງຍາກທຸກຢ່າງເພື່ອເຮັດສຳເລັດໜ້າທີ່ເປັນຢ່າງດີ. ພັນໂທ ໝາກດຶກຈ້ອງ ເວົ້າວ່າ :
“ ມີບັນດາບັນຫາປະທະກັນ, ກຳລັງຢູ່ກັບທີ່ 2-3 ຄົນໄດ້ຄວບຄຸມບໍລິເວນ, ບັງຄັບໃຫ້ຊຸມຊົນເສຍຄ່າອາກອນ, ພວກຂ້າພະເຈົ້າໄດ້ແຊກແຊງເພື່ອຮຽກຮ້ອງເຂົາເຈົ້າບໍ່ຕ້ອງເຮັດເຊັ່ນນັ້ນ. ເມື່ອໄດ້ຮູ້ຈັກພວກຂ້າພະເຈົ້າແມ່ນກອງທັບປະຊາຊົນຫວຽດນາມແລ້ວ, ເຂົາເຈົ້າໄດ້ໃຫ້ການຕ້ອນຮັບຢ່າງຈິງໃຈ, ເພາະບັນດາຜູ້ບັນຊາການ ເຂົາເຈົາກໍໄດ້ເຄີຍຊອກຮູ້ກ່ຽວກັບປະຫວັດສາດ, ປະເທດຊາດຫວຽດນາມ. ຈາກບັນຫາສະເພາະເຫຼົ່ານັ້ນ, ພວກຂ້າພະເຈົ້າກໍສາມາດແກ້ໄຂບັນກາລວມໄດ້ ”
ສ່ວນພັນຕີ ຫງວຽນຊວນແທ່ງ, ໜຶ່ງໃນບັນດານາຍທະຫານທີ່ໄດ້ສຳເລັດໜ້າທີ່ຢູ່ຄະນະປະຕິບັດງານທີ່ ສ. ອາຟະລິກາກາງ, ໃຫ້ຮູ້ວ່າ : ບັນດານາຍທະຫານທີ່ ເຂົ້າຮ່ວມກຳລັງຮັກສາສັນຕິພາບຂອງສະຫະປະຊາຊາດກໍໄດ້ມີລະບຽບວິໄນ, ແບບແຜນການດຳລົງຊີວິດ, ຮັບປະກັນອິດທິພົນ ແລະ ພາບພົດຂອງປະເທດຊາດຫວຽດນາມ. ພິເສດບັນດານາຍທະຫານຫວຽດນາມ ຍັງຕັ້ງໜ້າໂຄສະນາເຜີຍແຜ່ຮູບພາບທາງດ້ານວັດທະນະທຳ, ປະເທດຊາດ, ປະຊາຊົນ ແລະ ກອງທັບຫວຽດນາມໃຫ້ແກ່ກວ່າ 40 ປະເທດທົ່ວທະວີບ. ກ່ຽວກັບການຈັດຕັ້ງພິທີສະເຫຼີມສະຫຼອງວັນຊາດຫວຽດນາມ ໄດ້ກາຍເປັນອະນຸສອນທີ່ເປັນຈົດຈຳສຳລັບ ພັນຕີ ຫງວຽນຊວນແທ່ງດ້ວຍບົດບາດເປັນນາຍທະຫານ ເສນາທິການດ້ານການທະຫານຢູ່ ຄະນະປະຕິບັດງານທີ່ ສ. ອາຟະລິກາກາງ. ພັນຕີ ຫງວຽນຊວນແທ່ງ ໃຫ້ຮູ້ວ່າ :
“ ສິ່ງທີ່ຂ້າພະເຈົ້າປະທັບໃຈທີ່ສຸດຕໍ່ຄຳກ່າວປາໄສຂອງພົນຕີທ່ານໜຶ່ງ ເປັນຜູ້ຮັກສາການຜູ້ບັນຊາການກຳລັງທະຫານ ບັງກລາເທດ ຕໍ່ໜ້າພະນັກງານ, ນາຍທະຫານ 150 ຄົນທີ່ວ່າ : ຂ້າພະເຈົ້າມີຄວາມເປັນກຽດທີ່ໄດ້ເຂົ້າຮ່ວມພິທີສະຫຼອງວັນຊາດຫວຽດນາມໃນມື້ນີ້. ອາດເວົ້າໄດ້ວ່າ ປະເທດບັງກລາເທດ ກໍຄືຫຼາຍປະເທດອື່ນທີ່ໄດ້ຜ່ານສົງຄາມ ສາມາດເຂົົ້າໃຈໄດ້ເຖິງຄຸນຄ່າເອກະລາດ. ຂ້າພະເຈົ້າຮູ້ສຶກເອກອ້າງທະນົງໃຈເມື່ອເຂົາເຈົ້າຮູ້ເຖິງຫວຽດນາມ, ເຂົາເຈົ້າເຫັນວ່າ ການຕໍ່ສູ້ຍາດເອົາເອກະລາດແມ່ນສຳຄັນທີ່ສຸດ ບໍ່ພຽງແຕ່ສຳລັບຫວຽດນາມເທົ່ານັ້ນ, ຫາກຍັງສຳລັບປະເທດອື່ນໆອີກດ້ວຍ ”
ສະແດງໃຫ້ເຫັນທີ່ຕັ້ງບົດບາດສາກົນຂອງຫວຽດນາມ
ຈາກຈຳນວນນາຍທະຫານ 2 ຄົນຂອງຫວຽດນາມໃນເບື້ອງຕົ້ນ, ມາຮອດປະຈຸບັນ, ຫວຽດນາມໄດ້ມີພະນັກງານ 12 ເທື່ອຄົນເຂົ້າຮ່ວມການປະຕິບັດໜ້າທີ່ຮັກສາສັນຕິພາບຂອງສະຫະປະຊາຊາດໃນ 2 ຄະນະປະຕິບັດງານຢູ່ ຊູດານໃຕ້ ແລະ ສ.ອາຟະລິກາກາງ. ພັນເອກ ຮ່ວາງກິມຟຸງ ຜູ້ອຳນວຍການສູນຮັກສາສັນຕິພາບຫວຽດນາມຢືນຢັນວ່າ : ການສ້າງຕັ້ງສູນຮັກສາສັນຕິພາບຫວຽດນາມ ແລະ ການຈັດສົ່ງບັນດານາຍທະຫານເຂົ້າຮ່ວມກຳລັງຮັກສາສັນຕິພາບຂອງສະຫະປະຊາຊາດແມ່ນມີຄວາມໝາຍທາງດ້ານການເມືອງຢ່າງໃຫຍ່ຫຼວງ, ສະແດງໃຫ້ເຫັນທີ່ຕັ້ງບົດບາດສາກົນຂອງຫວຽດນາມເທື່ອລະກ້າວ. ພັນເອກ ຮ່ວາງກິມຟຸງ ກ່າວວ່າ :
“ ເປັນຄັ້ງທຳອິດທີ່ຫວຽດນາມໄດ້ຈັດສົ່ງກຳລັງຂອງຕົນອອກໄປນອກດິນແດນຂອງຕົນເພື່ອແກ້ໄຂຜົນຮ້າຍຢ້ອນຫຼັງຂອງສົງຄາມ, ຊ່ວຍກູ້ໂດຍມະນຸດສະທຳ ປະກອບສ່ວນພ້ອມກັບວົງຄະນະຍາດສາກົນໃນຖານະເປັນປະເທດພາຄີຂອງສະຫະປະຊາຊາດທີ່ມີຄວາມຮັບຜິດຊອບ. ສິ່ງນີ້ໄດ້ຮັບການຕີລາຄາສູງຈາກສະຫະປະຊາຊາດ, ພ້ອມກັນນັ້ນ ກໍຊຸກຍູ້ສາຍພົວພັນກັບກຳລັງອື່ນໆທີ່ເຂົ້າຮ່ວມໃນບໍລິເວນ ”
ສ່ວນທ່ານເລຂາທິການໃຫຍ່ ສ.ປ.ຊ ບານກີມຸນ ໄດ້ຕີລາຄາວ່າ :
“ ຂ້າພະເຈົ້າເຫັນວ່າ ການນຳພັກ, ລັດ, ລັດຖະບານຫວຽດນາມໄດ້ປະຕິບັດບັນດາຄຳໝັ້ນສັນຍາເປັນຢ່າງດີກ່ຽວກັບການຮັກສາສັນຕິພາບຂອງສະຫະປະຊາຊາດ. ເມື່ອຂ້າພະເຈົ້າເຫັນປະຈັກຕາການເຄື່ອນໄຫວຂອງບັນດາພາລະກອນຫວຽດນາມຢູ່ບັນດາຄະນະປະຕິບັດງານຮັກສາສັນຕິພາບ, ຂ້າພະເຈົ້າອາດຈະຕີລາຄາວ່າແມ່ນ ດີທີ່ສຸດ”
ປະຈຸບັນ, ຫວຽດນາມພວມຕັ້ງໜ້າຍູ້ແຮງວຽກງານຝຶກຊອ້ມ, ສ້າງລະບຽບການດ້ານກົດໝາຍໃຫ້ແກ່ການຜັນຂະຫຍາຍກຳລັງ, ແນໃສ່ປະຕິບັດບົດບາດຂອງຕົນເປັນຢ່າງດີເມື່ອເຂົ້າຮ່ວມການເຄື່ອນໄຫວ ຮັກສາສັນຕິພາບຂອງສະຫະປະຊາຊາດ. ຜ່ານນັ້ນ ປະກອບສ່ວນຮັກສາຄວາມໝັ້ນຄົງ, ສັນຕິພາບໃນໂລກ, ນັບມື້ນັບຍົກສູງທີ່ຕັ້ງບົດບາດຂອງຫວຽດນາມໃນເວທີສາກົນ.