(vovworld)- ພ້ອມກັບການພັດທະນາຢ່າງວ່ອງໄວຂອງສັງຄົມ, ລະດັບການພັດທະນາເຕັກນິກ, ວິທະຍາສາດເຕັກໂນໂລຊີ ແມ່ນຫນຶ່ງໃນບັນດາການວັດແທກເພື່ອຕີລາຄາການພັດທະນາຂອງປະເທດຫນຶ່ງ. ບັນດານະໂຍບາຍບຸລິມະສິດ, ໂຄງການພັດທະນາວິທະຍາສາດເຕັກໂນໂລຊີມີລັກສະນະຍຸດທະສາດ, ມີວິໄສທັດອະນາຄົດຂອງຫວຽດນາມ ໄລຍະຜ່ານມາ ໄດ້ສະແດງໃຫ້ເຫັນວ່າ ຄວາມເອົາໃຈໃສ່ເປັນພິເສດຂອງພັກ, ລັດ ແລະ ລັດຖະບານ ຫວຽດນາມ ສຳລັບຂົງເຂດນີ້.
ພາບປະກອບ:(dantri.com.vn)
|
ຢູ່ຫວຽດນາມ ພຽງໃນປີ 2013 ມີເກືອບ 3000 ກິດຈະກຳວິທະຍາສາດທີ່ມີຄຸນນະພາບໄດ້ຮັບການຮັບຮູ້ຈາກອົງການວິຊາການ. ເປັນຫນ້າສົນໃຈ ນັ້ນແມ່ນເລື່ອງເປັນເຈົ້າ ດາວທຽມສັງເກດຫນ່ວຍພິພົບທຳອິດຂອງຫວຽດນາມ VNRETSAT1, ຜະລິດສຳເລັດດາວທຽມຂະຫນາດນ້ອຍ PicoDragon ເຄື່ອນໄຫວໃນຫ່ວງອາວະກາດ ແລະ ສົ່ງສັນຍານເຖິງຫນ້າດິນສຳເລັດຜົນ. ຈາກແຫລ່ງທຶນຫນູນຊ່ວຍພັດທະນາຢ່າງເປັນທາງການ ໃຫ້ແກ່ ຫວຽດນາມ(ODA), ປະຈຸບັນ ສະພາມະຫາບັນດີດວິທະຍາສາດ ແລະ ເຕັກໂນໂລຊີ ຫວຽດນາມ ພວມສ້າງຕັ້ງສູນ ດາວທຽມແຫ່ງຊາດ ມຸ່ງໄປສູ່ຈຸດໝາຍ ຮອດປີ 2018 ຈະສົ່ງດາວທຽມຜະລິດຢູ່ ຍີ່ປຸ່ນ ແລະ ຮອດປີ 2020 ຈະສົ່ງດາວທຽມຜະລິດຢູ່ຫວຽດນາມ. ນີ້ແມ່ນບັນດາກິດຈະກຳ ປະກອບສ່ວນບໍ່ຫນ້ອຍ ເຂົ້າໃນການພັດທະນາຂອງຫວຽດນາມ ໃນຫລາຍຂົງເຂດ.
ພັດທະນາ ແລະ ໝູນໃຊ້ວິທະຍາສາດ-ເຕັກໂນໂລຊີແມ່ນລັດຖະນະໂຍບາຍຕົ້ນຕໍ
ກ່ອນນີ້ບໍ່ດົນ, ທີ່ພິທີປະກາດວັນວິທະຍາສາດ-ເຕັກໂນໂລຊີ ຫວຽດນາມ(18/5), ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ໄດ້ຊີ້ແຈ້ງວ່າ ໃນຍຸກໂລກາພິວັດ ແລະ ເຊື່ອມໂຍງຢ່າງເລິກເຊິ່ງ ແລະ ກວ້າງຂວາງເຂົ້າກັບສາກົນ, ປະເທດໃດມີຄຸນນະພາບແຫລ່ງຊັບພະຍາກອນມະນຸດ ແລະ ລະດັບວິທະຍາສາດເຕັກໂນໂລຊີສູງ ຈະມີກາລະໂອກາດຫລາຍຢ່າງເພື່ອພັດທະນາຢ່າງວ່ອງໄວ ແລະ ໝັ້ນຄົງ. ສະນັ້ນ ຫນ້າທີ່ພັດທະນາວິທະຍາສາດ ແລະ ເຕັກໂນໂລຊີ ແມ່ນຫນ້າທີ່ສຳຄັນ ຄວນໄດ້ຮັບການສຸມໃສ່ບຸລິມະສິດ, ລະດົມທຸກແຫລ່ງກຳລັງ ເພື່ອປະກອບສ່ວນເພີ່ມທະວີກຳລັງຄວາມສາມາດດ້ານວິທະຍາສາດ ແລະ ເຕັກໂນໂລຊີແຫ່ງຊາດ. ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນຫນັກວ່າ:
“ມະຕິສູນກາງຄັ້ງທີ 6 ຊຸດທີ 11 ຂອງພັກກອມມູນິດ ຫວຽດນາມ ກ່ຽວກັບການພັດທະນາວິທະຍາສາດ ແລະ ເຕັກໂນໂລຊີ ໄດ້ເນັ້ນຫນັກເຖິງການພັດທະນາ ແລະ ໝູນໃຊ້ວິທະຍາສາດເຕັກໂນໂລຊີ ແມ່ນລັດຖະນະໂຍບາຍຕົ້ນຕໍ, ແມ່ນຫນຶ່ງໃນບັນດາກຳລັງຫນູນສຳຄັນທີ່ສຸດ ເພື່ອພັດທະນາເສດຖະກິດສັງຄົມ ແລະ ປົກປັກຮັກສາປະເທດຊາດ. ວິທະຍາສາດ ແລະ ເຕັກໂນໂລຊີ ແມ່ນການກະຕຸກຊຸກຍູ້ໃນວິວັດການສ້າງໂຄງປະກອບເສດຖະກິດຄືນໃຫມ່, ຫັນປ່ຽນຮູບແບບການເຕີບໂຕ, ຍົກສູງສະມັດຕະພາບ, ຄຸນນະພາບ, ປະສິດທິຜົນ ແລະ ກຳລັງຄວາມສາມາດແກ້ງແຍ້ງຂອງພື້ນຖານເສດຖະກິດ ມູ່ງໄປເຖິງຈຸດໝາຍ ນຳຫວຽດນາມ ກາຍເປັນປະເທດອຸດສາຫະກຳໂດຍໄວ.”
ຈາກຄວາມຮຽກຮ້ອງຂອງພຶດຕິກຳ, ລັດຖະບານ ກໍມີດຳລັດກ່ຽວກັບການລົງທຶນພັດທະນາແຫລ່ງກຳລັງ ແລະ ສົ່ງເສີມການເຄື່ອນໄຫວວິທະຍາສາດ ແລະ ເຕັກໂນໂລຊີ ໃນບັນດາຮາກຖານການສຶກສາມະຫາວິທະຍາໄລ ແລະ ຈະມີຜົນສັກສິດປະຕິບັດແຕ່ວັນທີ 15/12/2014 ເປັນຕົ້ນໄປ. ໃນນັ້ນ ບຸລິມະສິດສູງສຸດໃຫ້ແກ່ບັນດາສ່ວນບຸກຄົນ ຊື່ງແມ່ນນັກສຶກສາ, ຄູອາຈານ ແມ່ນບັນດາວິທະຍາສາດຫນຸ່ມ. ບັນດາຜູ້ຄົນເຫລົ່ານີ້ ຈະໄດ້ຄັດເລືອກສົ່ງໄປຮຽນຢູ່ພາຍໃນປະເທດຫລືຢູ່ຕ່າງປະເທດ ເພື່ອຍົກສູງລະດັບຄວາມຮູ້. ນອກນັ້ນ ເຂົາເຈົ້າຍັງໄດ້ສ້າງເງື່ອນໄຂເຂົ້າຮ່ວມການຄົ້ນຄ້ວາວິທະຍາສາດ ເພື່ອເສີມຂະຫຍາຍ, ພັດທະນາການກຳນົດທິດວິຊາສະເພາະ.
ຫວຽດນາມ ສຸມໃສ່ບຸລິມະສິດຄົ້ນຄ້ວາ ແລະ ພັດທະນາວິທະຍາສາດ-ເຕັກໂນໂລຊີ
ພ້ອມກັບການຊີ້ນຳ, ນະໂຍບາຍຢ່າງຂ້ຽວຂາດຂອງລັດຖະບານ ໃນການໃຫ້ບຸລິມະສິດພັດທະນາວິທະຍາສາດ - ເຕັກໂນໂລຊີ, ເປັນຄັ້ງທຳອິດ ກະຊວງວິທະຍາສາດເຕັກໂນໂລຊີ ໄດ້ປຸກລະດົມຂະບວນການປ່ຽນໃຫມ່ຫົວຄິດປະດິດສ້າງ ຜ່ານການເຄື່ອນໄຫວຄົ້ນຄ້ວາວິທະຍາສາດ ແລະ ເຕັກໂນໂລຊີ. ມີກອງທຶນຫນູນຊ່ວຍການເຄື່ອນໄຫວປ່ຽນໃຫມ່ຫົວຄິດປະດິດສ້າງສະຫງວນໃຫ້ແກ່ນັກທຸລະກິດ ແລະ ບັນດາວິສາຫະກິດ ກໍໄດ້ຮັບການຜັນຂະຫຍາຍ ດ້ວຍຂອບຂະຫນາດຂຶ້ນເຖິງ 2000 ຕື້ດົ່ງ. ໃນສະພາວະພື້ນຖານເສດຖະກິດພວມມີສັນຍານຟື້ນຕົວ, ເລື່ອງກະຊວງວິທະຍາສາດ ເຕັກໂນໂລຊີ ປຸກລະດົມຂະບວນການດັ່ງກ່າວ ໄດ້ຮັບຖືວ່າ ແມ່ນປັດໄຈໃຫມ່, ສວມບົດບາດສຳຄັນໃນການປະຕິບັດພັດທະນາແບບຍືນຍົງ. ທ່ານ ຫງວຽນກວນ, ລັດຖະມົນຕີກະຊວງວິທະຍາສາດ ເຕັກໂນໂລຊີ ຫວຽດນາມໃຫ້ຮູ້ວ່າ:
“ທີຫນຶ່ງ, ພວກຂ້າພະເຈົ້າສຸມໃສ່ລົງທຶນ ແລະ ດຶງດູດແຫລ່ງທຶນ ODA ຂອງຕ່າງປະເທດ ເພື່ອກໍ່ສ້າງບັນດາສະຖາບັນຄົ້ນຄ້ວາມີພື້ນຖານດ້ານວັດຖຸ, ອຸປະກອນທັນສະໄຫມເທົ່າທຽມກັບບັນດາສະຖາບັນຄົ້ນຄ້ວາຂອງຕ່າງປະເທດ. ທີສອງ ພວກຂ້າພະເຈົ້າໝູູນໃຊ້ບັນດາກົນໄກຄຸ້ມຄອງທີ່ກ້າວຫນ້າ.”
ເສີມຂະຫຍາຍຄວາມສາມາດບົ່ມຊອ້ນແຫລ່ງຊັບພະຍາກອນມະນຸດຮັບໃຊ້ວິທະຍາສາດເຕັກໂນໂລຊີ
ວຽກງານບຳລຸງສ້າງແຫລ່ງຊັບພະຍາກອນມະນຸດທີ່ມີຄຸນນະພາບສູງ ຮັບໃຊ້ວຽກງານຄົ້ນຄ້ວາ ແລະ ພັດທະນາວິທະຍາສາດເຕັກໂນໂລຊີ ກໍໄດ້ຮັບຖືວ່າ ແມ່ນຫນ້າທີ່ສຳຄັນໃນບັນດານະໂຍບາຍບຸລິມະສິດຂອງລັດຖະບານຫວຽດນາມ. ພ້ອມກັບການສ້າງສຳເລັດນະໂຍບາຍຫນູນຊ່ວຍ, ມີຫລາຍໂຄງການໄດ້ປະກອບສ່ວນດຶງດູດນັກວິທະຍາສາດຫວຽດນາມ ຢູ່ ຕ່າງປະເທດກັບຄືນເມືອປະເທດ ໄດ້ ແລະ ພວມໄດ້ຮັບການປະຕິບັດ. ໃນນັ້ນ ພົ້ນເດັ່ນ ແມ່ນ ໂຄງການ “ຍູ້ແຮງການປ່ຽນໃຫມ່ຫົວຄິດປະດິດສ້າງຜ່ານການຄົ້ນຄວ້າວິທະຍາສາດ ແລະ ເຕັກໂນໂລຊີ” ມີຍອດຈຳນວນເງິນລົງທຶນແມ່ນ 110 ລ້ານ USD.
ຄຽງຄູ່ກັນນັ້ນ, ລັດຖະບານຫວຽດນາມ ກໍສົ່ງເສີມ, ບຸລິມະສິດໃຫ້ບັນດາສ່ວນບຸກຄົນພ້ອມກັນປະກອບສ່ວນນຳວິທະຍາສາດເຕັກໂນໂລຊີພັດທະນາ. ທ່ານ ຫງວຽນກວນ, ລັດຖະມົນຕີກະຊວງວິທະຍາສາດເຕັກໂນໂລຊີ ໃຫ້ຮູ້ວ່າ:
“ພັກ ແລະ ລັດ ຍາມໃດກໍສົ່ງເສີມປະຊາຊົນທຸກຄົນ ຖ້າມີຄວາມເມົາມົວຜະລິດບັນດາຜະລິດຕະພັນຮັບໃຊ້ຜົນປະໂຫຍດໃຫ້ແກ່ຄອບຄົວຕົນ ແລະສັງຄົມ. ໃນຫລາຍປີຜ່ານມາ, ມີການປະດິດສ້າງຂອງປະຊາຊົນຫລາຍຄົນໄດ້ຮັບການຫນູນຊ່ວຍຈາກກະຊວງວິທະຍາສາດ ເຕັກໂນໂລຊີ ຜ່ານບັນດາງານຕະຫລາດນັດເຕັກໂນໂລຊີ ອຸປະກອນ ແລະ ປະຊາຊົນຫລາຍຄົນໄດ້ກາຍເປັນເຈົ້າຂອງວິສາຫະກິດດຳເນີນທຸລະກິດບັນດາການປະດິດສ້າງຂອງຕົນ.”
ພື້ນຖານວິທະຍາສາດເຕັກໂນໂລຊີຫວຽດນາມ ພັດທະນາ ແລະ ພວມມີການປ່ຽນໃຫມ່, ຜ່ານຜົ້ນຄວາມຈຳກັດ, ອ່ອນດ້ອຍ ເພື່ອສອດຄອ່ງກັບການພັດທະນາລວມຂອງໂລກ, ສົມກັບຄວາມສາມາດບົ່ມຊ້ອນທີ່ມີຢູ່ແລ້ວ. ພ້ອມກັບບັນດານະໂຍບາຍສຸມໃສ່ພັດທະນາວິທະຍາສາດເຕັກໂນໂລຊີ, ຄວາມຕັດສິນໃຈຂອງບັນດາອົງການ, ກະຊວງ, ຂະແຫນງການ ຕັ້ງຄວາມຫວັງວ່າ ຈະບັນລຸຈຸດໝາຍນຳຫວຽດນາມ ກາຍເປັນປະເທດອຸດສາຫະກຳໃນປີ 2020 ຕາມມະຕິກອງປະຊຸມໃຫຍ່ທົ່ວປະເທດຄັ້ງທີ 8 ຂອງພັກກອມມູນິດຫວຽດນາມ ທີ່ໄດ້ວາງອອກ.