ວັນທີ 24/10, ຢູ່ຮ່າໂນ້ຍໄດ້ເລີ່ມດຳເນີນບັນດາເຫດການການຕ່າງປະເທດຫຼາຍຝ່າຍຊຶ່ງລວມມີ: ກອງປະຊຸມສັ້ນສູງກ່ຽວກັບການຮ່ວມມືກຳປູເຈຍ-ລາວ-ມ້ຽນມາ-ຫວຽດນາມ(CLMV)ຄັ້ງທີ 8, ກອງປະຊຸມຂັ້ນສູງຍຸດທະສາດການຮ່ວມມືເສດຖະກິດ ອາເຢວາດີ-ເຈົ້າພະຍາ-ແມ່ຂອງ (ACMECS) ຄັ້ງທີ 7 ແລະ ກອງປະຊຸມເວທີປາໄສເສດຖະກິດໂລກກ່ຽວກັບແມ່ນ້ຳຂອງ (WEF - ແມ່ຂອງ). ເລື່ອງຫວຽດນາມເປັນເຈົ້າພາບຈັດຕັ້ງບັນດາກອງປະຊຸມນີ້ ແມ່ນເພື່ອແນໃສ່ເສີມຂະຫຍາຍສາຍພົວພັນທີ່ເປັນມູນເຊື້ອກັບບັນດາປະເທດເພື່ອນບ້ານໃກ້ຄຽງ, ປະກອບສ່ວນເຮັດໃຫ້ບັນດາກົນໄກຮ່ວມມືນີ້ພັດທະນາຕາມທິດທີ່ແທດຈິງກວ່າ ເພື່ອເປົ້າໝາຍສ້າງອະນຸພາກພື້ນແມ່ນນ້ຳຂອງແຫ່ງສັນຕິພາບ ແລະ ວັດທະນາຖາວອນ.
ທ່ານຮອງລັດຖະມົນຕີການຕ່າງປະເທດຫວຽດນາມ ເລດິງກຸຍ |
ນີ້ເປັນຄັ້ງທີ 2 ທີ່ຫວຽດນາມເປັນເຈົ້າພາບຈັດຕັ້ງກອງປະຊຸມສັ້ນສູງກ່ຽວກັບການຮ່ວມມື CLMV ແລະ ACMECS. 3 ກອງປະຊຸມ ACMECS 7, CLMV 8 ແລະ WEF - ແມ່ຂອງ ແມ່ນບັນດາການເຄື່ອນໄຫວການຕ່າງປະເທດຫຼາຍຝ່າຍໃຫຍ່ກວ່າໝູ່ຂອງຫວຽດນາມໃນປີ 2016. ການຈັດຕັ້ງບັນດາກອງປະຊຸມດັ່ງກ່າວຢ່າງສຳເລັດຜົນ ແມ່ນມີຄວາມໝາຍສຳຄັນສຳລັບຫວຽດນາມໃນທຸກໆດ້ານຄື : ການເມືອງ, ການປ້ອງກັນຄວາມສະຫງົບ, ເສດຖະກິດ, ວັດທະນະທຳ; ເພື່ອຜົນປະໂຫຍດຂອງຫວຽດນາມກໍຄືຜົນປະໂຫຍດຂອງບັນດາປະເທດບ້ານໃກ້ເຮືອນຄຽງທີ່ມີການຜູກພັນກັນຢ່າງສະໜິດແໜ້ນໃນອະນຸພາກພື້ນແມ່ນ້ຳຂອງ.
ປະກອບສ່ວນຢ່າງຕັ້ງໜ້າໃຫ້ແກ່ໂຄງການດຳເນີນງານ
ໂດຍແມ່ນປະເທດເຈົ້າພາບ, ຫວຽດນາມໄດ້ນຳສະເໜີ ແລະ ໄດ້ຮັບຄວາມເຫັນດີຈາກບັນດາປະເທດກ່ຽວກັບຫົວຂໍ້ຂອງກອງປະຊຸມຂັ້ນສູງ CLMV 8, ນັ້ນແມ່ນ “ຍາດແຍ່ງໂອກາດ, ສ້າງຮູບປະທຳໃນອະນາຄົດ”. ຫົວຂໍ້ຂອງກອງປະຊຸມຂັ້ນສູງ ACMECS 7 ແມ່ນ “ມຸ່ງໄປສູ່ພາກພື້ນແມ່ນ້ຳຂອງທີ່ຂະຫຍັນຂັນເຄື່ອນ ແລະ ວັດທະນາຖາວອນ ”; ຫົວຂໍ້ຂອງກອງປະຊຸມ WEF - ແມ່ຂອງແມ່ນ “ ຊອກຫາຄວາມເປັນເອກະພາບ: ບັນດາການນຳພາກພື້ນແບ່ງປັນວິໄສທັດກ່ຽວກັບພາກພື້ນແມ່ນ້ຳຂອງ ”. ບັນດາຫົວຂໍ້ນີ້ ໄດ້ສະແດງໃຫ້ເຫັນເປົ້າໝາຍລວມຂອງບັນດາປະເທດນີ້, ນັ້ນແມ່ນສ້າງອະນຸພາກພື້ນແມ່ນ້ຳຂອງທີ່ຂະຫຍັນຂັນເຄື່ອນ ແລະ ວັດທະນາຖາວອນ; ເຮັດໃຫ້ພົ້ນເດັ່ນຂຶ້ນກ່ຽວກັບຄວາມຂະຫຍັນຂັນເຄື່ອນ, ຄວາມສາມາດຍາດແຍ່ງກາລະໂອກາດໃໝ່ຂອງບັນດາປະເທດແມ່ນ້ຳຂອງ, ກໍຄືຄວາມຈຳເປັນຕ້ອງປ່ຽນແປງໃໝ່ ແລະ ກຳນົດທິດກ້າວເດີນທີ່ແທດເໝາະໃຫ້ແກ່ການຮ່ວມມືໃນໄລຍະທີ່ຈະມາເຖິງ. ທ່ານຮອງລັດຖະມົນຕີການຕ່າງປະເທດຫວຽດນາມ ເລດິງກຸຍ ໃຫ້ຮູ້ວ່າ :
“ ໃນຄັ້ງນີ້, ພວກເຮົາໄດ້ພະຍາຍາມຍົກອອກຫຼາຍຂໍ້ລິເລີ່ມ. ຂໍ້ລິເລີ່ມໃຫຍ່ກວ່າໝູ່ແມ່ນພວກເຮົາໄດ້ເຊື້ອເຊີນເວທີປາໄສເສດຖະກິດໂລກເຂົ້າມາຈັດຕັ້ງກອງປະຊຸມ ເວທີປາໄສເສດຖະກິດໂລກກ່ຽວກັບແມ່ນ້ຳຂອງ(WEF - ແມ່ຂອງ) ຄັ້ງທຳອິດເພື່ອເພີ່ມທະວີການເຊື່ອມຕໍ່ລະຫວ່າງວິສາຫະກິດກັບບັນດາປະມຸກລັດ ແລະ ກັບບັນດາຜູ້ວາງນະໂຍບາຍ. ຜ່ານການຈັດຕັ້ງກອງປະຊຸມຄັ້ງນີ້, ຫວັງວ່າ ບັນດາຝ່າຍຈະຫຍັບເຂົ້າໃກ້ກວ່າເພື່ອມີບັນດາໂຄງການໂດຍລະອຽດທີ່ສຸດ, ຫັນຄຳໝັ້ນສັນຍາໃຫ້ກາຍເປັນການກະທຳຕົວຈິງ ”
ກອງປະຊຸມຄັ້ງນີ້ໄດ້ດຶງດູດການເຂົ້າຮ່ວມຂອງກ່ວາ 100 ກຸ່ມບໍລິສັດ, ວິສາຫະກິດທີ່ເປັນສະມາຊິກຂອງເວທີປາໄສເສດຖະກິດໂລກ ແລະ 60 ວິສາຫະກິດໃຫຍ່ຂອງບັນດາປະເທດສະມາຊິກອະນຸພາກພື້ນແມ່ນ້ຳຂອງ. ນີ້ແມ່ນໂອກາດທີ່ດີເພື່ອໂຄສະນາຄວາມສາມາດບົ່ມຊ້ອນຂອງພາກພື້ນແມ່ນ້ຳຂອງໃຫ້ແກ່ປະຊາຄົມວິສາຫະກິດສາກົນ, ປະກອບສ່ວນດຶງດູດເງິນລົງທຶນໃຫ້ແກ່ການພັດທະນາພື້ນຖານໂຄງລ່າງ, ແຫຼ່ງຊັບພະຍາກອນມະນຸດ ແລະ ເພີ່ມທະວີການເຊື່ອມຈອດຢູ່ພາກພື້ນແມ່ນ້ຳຂອງ.
ພ້ອມກັນນັ້ນ, ຫວຽດນາມກໍຍັງສະເໜີບັນດາປະເທດສະມາຊິກ ACMECS, CLMV ກ່ຽວກັບບັນດາມາດຕະການເພີ່ມທະວີການປະສານສົມທົບປະຕິບັດໂຄງການດຳເນີນງານເຖິງປີ 2030 ຂອງສະຫະປະຊາຊາດກ່ຽວກັບການພັດທະນາແບບຍືນຍົງ.
ມຸ່ງໄປສູ່ອະນຸພາກພື້ນແມ່ນ້ຳຂອງທີ່ຂະຫຍັນຂັນເຄື່ອນ ແລະ ວັດທະນາຖາວອນ
ໂດຍໄດ້ຮັບການສ້າງຕັ້ງຂຶ້ນແຕ່ປີ 2003, ກົນໄກຮ່ວມມື CLMV ແລະ ກົນໄກຮ່ວມມື ACMECS ໄດ້ ແລະ ພວມກາຍເປັນ ກົນໄກຮ່ວມມືທີ່ສຳຄັນເພື່ອຊຸກຍູ້ບັນດາຄວາມສາມາດບົ່ມຊ້ອນຂອງບັນດາປະເທດເພື່ອນບ້ານໃກ້ຄຽງຮ່ວມແມ່ນ້ຳຂອງສາຍນີ້.
ພາຍຫຼັງກ່ວາ 13 ປີແຫ່ງການເຄື່ອນໄຫວ, ການຮ່ວມມື CLMV ແລະ ACMECS ໄດ້ບັນລຸຫຼາຍໝາກຜົນທີ່ຕັ້ງໜ້າ, ປະກອບສ່ວນປັບປຸງສະພາບແວດລ້ອມແຫ່ງສັນຕິພາບ, ສະຖຽນລະພາບ, ຊຸກຍູ້ການຮ່ວມມືເສດຖະກິດ, ການຄ້າ ແລະ ການລົງທຶນລະຫວ່າງບັນດາປະເທດພາກພື້ນແມ່ນ້ຳຂອງ, ຮັດແຄບຄວາມຜິດໂຕນກັນໃນການພັດທະນາໃນອາຊຽນ. ຍ້ອນບັນດາການປະຕິຮູບດ້ານເສດດຖະກິດທີ່ກ້ວາງເລິກ ແລະ ຄວາມມານະພະຍາຍາມຫັນເປັນເສລີ ແລະ ສ້າງເງື່ອນໄຂສະດວກໃຫ້ແກ່ການຄ້າ ແລະ ການລົງທຶນ, ພາກພື້ນແມ່ນ້ຳຂອງໄດ້ກາຍເປັນພາກພື້ນພັດທະນາທີ່ຂະຫຍັນຂັນເຄື່ອນ ແລະ ເປັນກຳລັງໜູນຊຸກຍູ້ການເຕີບໂຕທີ່ສຳຄັນຂອງອາຊຽນ. ຕີລາຄາກ່ຽວກັບບົດບາດຂອງ 2 ກົນໄກນີ້, ທ່ານຮອງລັດຖະມົນຕີການຕ່າງປະເທດຫວຽດນາມ ເລດິງກຸຍ ຖືວ່າ :
“ 2 ກົນໄກຮ່ວມມືນີ້ແມ່ນບັນດາກົນໄກຮ່ວມມືທີ່ສຳຄັນທີ່ສຸດ, ເພາະໃນຍອດຈຳນວນ 12 ກົນໄກຮ່ວມມືອະນຸພາກພື້ນແມ່ນ້ຳຂອງໃນປະຈຸບັນນັ້ນ, 2 ກົນໄກຮ່ວມມືນີ້ ໄດ້ຮວບຮ່ວມບັນດາເນື້ອໃນສຳຄັນທີ່ສຸດຂອງບັນດາປະເທດພາຍໃນເຂດ. ຖ້າຫາກປະຕິບັດກົນໄກຮ່ວມມືຢູ່ນອກເຂດເປັນຢ່າງດີນັ້ນ, ບັນດາປະເທດພາຍໃນເຂດຕ້ອງເຮັດດີເສຍກ່ອນ. ແລະ ບັນດາກົນໄກນີ້ ໄດ້ສ້າງໂອກາດເພື່ອໃຫ້ບັນດາປະເທດໃນເຂດສາມາດໂອ້ລົມໂດຍກົງນຳກັນກ່ຽວກັບບັນດາຄວາມສົນໃຈຮ່ວມ, ບັນດາບັນຫາຕ້ອງໄດ້ຮັບການແກ້ໄຂ. ພ້ອມກັນນັ້ນ, ປະເທດເຫຼົ່ານີ້, ກໍຕ້ອງນອນຢູ່ໃນທີ່ຕັ້ງສຳຄັນທີ່ສຸດຂອງອາຊຽນ ”
ໃນໄລຍະພັດທະນາໃໝ່ຂອງອະນຸພາກພື້ນ, 2 ກົນໄກຮ່ວມມື CLMV ແລະ ACMECS ຈະມີບົດບາດສຳຄັນຊ່ວຍບັນດາປະເທດອະນຸພາກພື້ນຜ່ານຜ່າບັນດາສິ່ງທ້າທາຍຮ່ວມ, ຍົກສູງກຳລັງແກ່ງແຍ້ງ, ຍາດແຍ່ງກາລະໂອກາດພັດທະນາໃໝ່. ດ້ວຍບັນດາຄວາມມານະພະຍາຍາມປະກອບສ່ວນໃນໄລຍະທີ່ຜ່ານມາ, ຢູ່ທີ່ບັນດາກອງປະຊຸມຄັ້ງນີ້, ດ້ວຍບົດບາດເປັນປະເທດເຈົ້າພາບ, ຫວຽດນາມໄດ້ຕັ້ງໜ້າພ້ອມກັບບັນດາປະເທດພາຄີ, ນຳກົນໄກຮ່ວມມື CLMV ແລະ ACMECS ກ້າວເຂົ້າສູ່ໄລຍະໃໝ່, ນັບມື້ນັບປະກອບສ່ວນຢ່າງຫຼວງຫຼາຍເຂົ້າໃນການພັດທະນາແບບຍືນຍົງ ແລະ ວັດທະນາຖາວອນລວມ.