(vovworld)- ຫວຽດນາມ ແມ່ນຫນຶ່ງໃນບັນດາປະເທດຖືກຜົນສະທ້ອນຢ່າງຫນັກຫນ່ວງທີ່ສຸດຈາກການປ່ຽນແປງຂອງດິນຟ້າອາກາດ. ຍຸດທະສາດ ການປ່ຽນແປງຂອງດິນຟ້າອາກາດ ແຫ່ງຊາດໄດ້ ແລະ ພວມມານະພະຍາຍາມຮຽກຮ້ອງການຫນູນຊ່ວຍໄລຍະຍາວຈາກບັນດານັກອຸປະຖຳສາກົນຢ່າງແຮງ ແລະ ມີຫລາຍໂຄງການກ່ຽວຂ້ອງເຖິງ ການປ່ຽນແປງຂອງດິນຟ້າອາກາດໄດ້ຮັບການຜັນຂະຫຍາຍຢູ່ຫວຽດນາມ. ປີ 2016, ການເຄື່ອນໄຫວຮ່ວມມືສາກົນໃນຂົງເຂດການປ່ຽນແປງຂອງດິນຟ້າອາກາດ ສືບຕໍ່ໄດ່ຮັບການຍູ້ແຮງ, ສ້າງກຳລັງຫນູນຢ່າງຕັ້ງຫນ້າໃຫ້ແກ່ຫວຽດນາມ ໃນການຮັບມືກັບການປ່ຽນແປງຂອງດິນຟ້າອາກາດ, ປະກອບສ່ວນຊ່ວຍຫວຽດນາມ ພັດທະນາແບບຍືນຍົງ.
ເວທີປາໄສການໂອ້ລົມສົນທະນາຂັ້ນສູງລະຫວ່າງຄະນະກຳມະການ
ແຫ່ງຊາດກ່ຽວກັບການປ່ຽນແປງຂອງດິນຟ້າອາກາດແລະບັນດາຄູ່ຮ່ວມມືພັດທະນາ
ພາບ:nhandan.com.vn
|
ໄລຍະຜ່ານມາ, ຫວຽດນາມ ໄດ້ ແລະ ພວມເປັນເຈົ້າການ, ຕັ້ງຫນ້າຜັນຂະຫຍາຍຍຸດທະສາດແຫ່ງຊາດກ່ຽວກັບການປ່ຽນແປງຂອງດິນຟ້າອາກາດ ແລະ ບັນດາຍຸດທະສາດການເຕີບໂຕຂຽວ, ການປ້ອງກັນ ແລະ ຕ້ານໄພທຳມະຊາດ, ພັດທະນາການຜະລິດພະລັງງານຄືນໃຫມ່… ດ້ວຍຫລາຍລາຍການ, ໂຄງການເໝາະສົມກັບ ການປ່ຽນແປງຂອງດິນຟ້າອາກາດ ແລະ ຫລຸດຜ່ອນການປ່ອຍອາຍພິດເຮືອນແກ້ວ. ໃນວິວັດການນັ້ນ, ຫວຽດນາມໄດ້ຮັບການຫນູນຊ່ວຍຢ່າງຕັ້ງຫນ້າຈາກປະຊາຄົມສາກົນ.
ຄຳໝັ້ນສັນຍາຫນູນຊ່ວຍຈາກປະຊາຄົມສາກົນ
ປີ 2016, ຫວຽດນາມ ສືບຕໍ່ເປີດກວ້າງບັນດາການເຄື່ອນໄຫວຮ່ວມມືສາກົນສອງຝ່າຍ ແລະ ຫລາຍຝ່າຍ, ພິເສດ ແມ່ນບັນດາການເຄື່ອນໄຫວຮ່ວມມືສາກົນໃນຂົງເຂດການປ່ຽນແປງຂອງດິນຟ້າອາກາດ, ສິ່ງແວດລ້ອມ, ຊັບພະຍາກອນນ້ຳ, ອຸຕຸນິຍົມອຸທົກກະສາດ ແລະ ການຄຸ້ມຄອງທີ່ດິນ. ໝາກຜົນນັ້ນແມ່ນ ຜູ້ຕາງຫນ້າຫລາຍປະເທດ, ອົງການຈັດຕັ້ງສາກົນໃຫ້ຄຳໝັ້ນສັນຍາຫນູນຊ່ວຍ ຫວຽດນາມຮັບມືກັບ ການປ່ຽນແປງຂອງດິນຟ້າອາກາດ. ເມື່ອລົງຢ້ຽມຢາມບັນດາເຂດຖືກຜົນສະທ້ອນຢ່າງຫນັກຫນ່ວງທີ່ສຸດຍ້ອນໄພນ້ຳເຄັມຢູ່ ແຂວງ ເບນແຈ ເມື່ອເດືອນ 5/2016, ທ່ານຮອງເລຂາທິການໃຫຍ່ ສປຊ, Jan Eliasson ຢືນຢັນວ່າ: ສປຊ ຈະຫນູນຊ່ວຍຫວຽດນາມ ແກ້ໄຂຜົນຮ້າຍຢ້ອນຫລັງຈາກໄພແຫ້ງແລ້ງ, ການແຊກຊືມຂອງນ້ຳເຄັມ ດ້ວຍບັນດາແຜນການລະອຽດ. ສປຊ ຄາດວ່າ ຈະຂົນຂວາຍປະຊາຄົມສາກົນ ຈຳນວນເງິນປະມານ 50 ລ້ານ USD ເພື່ອຫນູນຊ່ວຍໃຫ້ບັນດາປະເທດພວມຖືກຜົນສະທ້ອນຈາກໄພນ້ຳເຄັມ ໃນນັ້ນ ມີຫວຽດນາມ. ໃນການຢ້ຽມຢາມ ແລະ ເຮັດວຽກຢູ່ຫວຽດນາມ ເມື່ອເດືອນ 11/2016, ທ່ານ Karmenu ຂ້າຫລວງໃຫຍ່ກ່ຽວກັບສິ່ງແວດລ້ອມຂອງ ສະຫະພາບ ເອີລົບ ໄດ້ໃຫ້ຄຳໝັ້ນສັນຍາຈະຫນູນຊ່ວຍຫວຽດນາມໃນການຮັບມືກັບ ການປ່ຽນແປງຂອງດິນຟ້າອາກາດ, ຄຸ້ມຄອງສິ່ງແວດລ້ອມທະເລ, ຂຸດຄົ້ນພະລັງງານຈາກທະເລ, ຫນູນຊ່ວຍ, ແບ່ງປັນຂໍ້ມູນຂ່າວສານການຄົ້ນຄ້ວາກ່ຽວກັບທະເລ. ແລະກໍໃນປີ 2016, ທະນາຄານໂລກ WB ໄດ້ອະນຸມັດບ້ວງສິນເຊື່ອ 310 ລ້ານ USD ເພື່ອຊ່ວຍຫວຽດນາມ ຍົກສູງກຳລັງແຮງຮັບມືກັບການປ່ຽນແປງຂອງດິນຟ້າອາກາດ, ປະກອບສ່ວນຮັບປະກັນຊີວິດຂອງປະຊາຊົນ 1,2 ລ້ານຄົນທີ່ດຳລົງຊີວິດຢູ່ 9 ແຂວງເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ.
ຜັນຂະຫຍາຍປະສິດທິຜົນບັນດາໂຄງການຫນູນຊ່ວຍ
ພ້ອມກັບບັນດາຄຳໝັ້ນສັນຍາຈາກປະຊາຄົມສາກົນ, ປີ 2016 ມີຫລາຍໂຄງການຫນູນຊ່ວຍຫວຽດນາມ ຮັບມືກັບ ການປ່ຽນແປງຂອງດິນຟ້າອາກາດ ສືບຕໍ່ໄດ້ຮັບການຜັນຂະຫຍາຍ ແລະ ເສີມຂະຫຍາຍຢ່າງປະສິດທິຜົນ. ກິດຈະກຳຍົກລະດັບຄັນຄູກັນນ້ຳເຄັມ ສົມທົບກັບເສັ້ນທາງຄົມມະນາຄົມຫລີກລ້ຽງພາຍຸນ້ຳຖ້ວມມີຄວາມຍາວ 1,6 ກິໂລແມັດ ຊື່ງໄດ້ຮັບການກໍ່ສ້າງຢູ່ເທດສະບານ ຕາມຢາງ, ເມືອງນູຍແທ່ງ ແຂວງ ກວ໋າງນາມ ໄດ້ສະກັດກັ້ນສະພາບນ້ຳເຄັມຊືມເຂົ້າຢູ່ທ້ອງຖິ່ນຢ່າງຂ້ຽວຂາດ. ໃນຂະນະນັ້ນ, ຜ່ານການຫນູນຊ່ວຍຈາກບັນດາອົງການຈັດຕັ້ງສາກົນ, ສະພາກາແດງ ຫວຽດນາມ ໄດ້ສົມທົບກັບບັນດາທ້ອງຖິ່ນຢູ່ເຂດແຄມທະເລ ກໍ່ສ້າງເຮືອນມີຫລາຍຄຸນປະໂຫຍດເພື່ອຮັບໃຊ້ປະຊາຊົນຢູ່ເຂດເຄີຍຖືກຜົນສະທ້ອນຈາກໄພທຳມະຊາດ ແລະ ກິດຈະກຳສະຫນອງນ້ຳຈືດຢູ່ບັນດາເຂດທີ່ຖືກນ້ຳເຄັມແຊກຊືມດ້ວຍລະດັບສູງ. ຄຽງຂ້າງບັນດາປະເທດຄື: ຍີ່ປຸ່ນ, ຝລັ່ງ, ໂຮນລັງ, ແດນມາກແລ້ວ, ທະນາຄານພັດທະນາ ອາຊີ ແມ່ນຫນຶ່ງໃນບັນດາຄູ່ຮ່ວມມືສຳຄັນຂອງຫວຽດນາມໃນຂົງເຂດການປ່ຽນແປງຂອງດິນຟ້າອາກາດ, ດ້ວຍບັນດາໂຄງການທີ່ສຸມໃສ່ເຂົ້າໃນການຊ່ວຍໃຫ້ຫວຽດນາມ ສ້າງກົນໄກນະໂຍບາຍ, ປັບປຸງພື້ນຖານໂຄງລ່າງ, ຫລຸດຜ່ອນການປ່ອຍອາຍພິດເຮືອນແກ້ວ ແລະ ປູກປ່າ. ທ່ານ Eric Sidgwick, ຜູ້ອຳນວຍການທະນາຄານພັດທະນາ ອາຊີ ຢູ່ຫວຽດນາມ ໃຫ້ຮູ້ວ່າ: “ADB ພວມຜັນຂະຫຍາຍໂຄງການຄຸ້ມຄອງ ແລະ ຫລຸດຜ່ອນໄພແຫ້ງແລ້ງ ແລະ ນ້ຳຖ້ວມຢູ່ເຂດທົ່ງພຽງແມ່ນ້ຳຂອງເປີດກວ້າງ, ໃນນັ້ນ ມີຫວຽດນາມ. ໂຄງການມຸ່ງໄປເຖິງການປັບປຸງລະບົບ ລະບາຍນ້ຳ ແລະ ຄຸ້ມຄອງແຫລ່ງນ້ຳ, ຊ່ວຍຍົກສູງຄວາມສາມາດຄວບຄຸມໄພນ້ຳເຄັມ ແລະ ນ້ຳຖ້ວມ”. ທ່ານ ເຈີນຮົ່ງຮ່າ, ລັດຖະມົນຕີກະຊວງຊັບພະຍາກອນ ແລະ ສິ່ງແວດລ້ອມ ໃຫ້ຮູ້ວ່າ:
“ລັດຖະບານໄດ້ລະດົມບັນດາອົງການ, ບັນດາປະເທດອື່ນເຂົ້າຮ່ວມຕ້ານການປ່ຽນແປງຂອງດິນຟ້າອາກາດຢູ່ ເຂດທົ່ງພຽງແມ່ນ້ຳຂອງຄື: ໂຮນລັງ. ພວກເຮົາໄດ້ສ້າງແຜນການຢູ່ເຂດທົ່ງພຽງແມ່ນ້ຳຂອງ, ໃນນັ້ນ ມີການປ່ຽນແປງໂດຍພື້ນຖານສຳລັບການພັດທະນາຢູ່ເຂດນີ້ໃນອະນາຄົດ. ທ່ານນາຍົກລັດຖະມົນຕີກໍໄດ້ເຊັນອະນຸມັດລາຍການ, ຄາດໝາຍແຫ່ງຊາດກ່ຽວກັບການເຕີບໂຕຂຽວຢ່າງເປັນທາງການ, ຕາມນັ້ນແລ້ວ ແມ່ນຊຸກຍູ້ການລະດົມທຸກແຫລ່ງກຳລັງຮ່ວມມືໃຫຍ່ຫລວງທີ່ສຸດສຳລັບບັນດາຄູ່ຮ່ວມມືພັດທະນາເພື່ອປະຕິບັດລາຍການຫນູນຊ່ວຍ.”
ການປ່ຽນແປງຂອງດິນຟ້າອາກາດແມ່ນສິ່ງທ້າທາຍໃຫຍ່ສຳລັບບັນດາປະເທດໃນໂລກ ກໍຄືສຳລັບຫວຽດນາມ. ສະນັ້ນ ເພື່ອຮັບມືກັບການປ່ຽນແປງຂອງດິນຟ້າອາກາດ, ຄວນລະດົມແຫລ່ງກຳລັງສັງລວມ ແລະ ມີການຮ່ວມມືໃນຂອບເຂດທົ່ວໂລກ. ຄຽງຂ້າງນັ້ນ ເພີ່ມທະວີການຮ່ວມສຳພັນລະຫວ່າງບັນດາຝ່າຍກ່ຽວຂ້ອງ ແລະ ປ່ຽນແປງວິທີສຳພັດຈາກການຄຸ້ມຄອງການປ່ຽນແປງຂອງດິນຟ້າອາກາດໄປສູ່ການຄຸ້ມຄອງໄພທຳມະຊາດ. ທ່ານນາງ Louise Chamberlain, ຜູ້ຮັກສາການຫົວຫນ້າຜູ້ຕາງຫນ້າ ສປຊ ປະຈຳຫວຽດນາມ ຖືວ່າ:
“ບັນດາຄວາມສ່ຽງຈາກການປ່ຽນແປງຂອງດິນຟ້າອາກາດກໍ່ຂຶ້ນ ຄວນໄດ້ຮັບການຄິດໄລ່ໃນບັນດານະໂຍບາຍ, ລາຍການຂອງຂະແຫນງກະສິກຳ, ພ້ອມທັງດັດປັບການສ້າງແຜນບັນດາລາຍການເພື່ອຮັບມືກັບການປ່ຽນແປງຂອງດິນຟ້າອາກາດ. ໂຄງການພັດທະນາຂອງ ສປຊ ໄດ້ ແລະ ພວມຜັນຂະຫຍາຍການຄຸ້ມຄອງບັນດາຄວາມສ່ຽງກ່ຽວກັບອາກາດ, ໄພທຳມະຊາດ ເຂົ້າໃນບັນດານະໂຍບາຍ, ລາຍການຕ່າງໆໃນບັນດາຂະແຫນງການ, ໃນນັ້ນ ມີຂະແຫນງກະສິກຳ, ການສ້າງບັນດາລາຍການຄຸ້ມຄອງຄວາມສ່ຽງໂດຍອີງໃສ່ປະຊາຄົມ, ຫລຸດຜ່ອນການປ່ອຍອາຍພິດເຮືອນແກ້ວຢູ່ປະຊາຄົມທີ່ດຳລົງຊີວິດຢູ່ເຂດແຄມທະເລ.”
ປີ 2016 ແມ່ນປີທີ່ຫວຽດນາມ ຕ້ອງຮັບມືກັບການປ່ຽນແປງຂອງດິນຟ້າອາກາດຢ່າງຮ້າຍແຮງທີ່ສຸດ. ການປ່ຽນແປງຂອງດິນຟ້າອາກາດໄດ້ຜັນແປໄປຢ່າງວ່ອງໄວ ແລະ ຮ້າຍແຮງກວ່າເມື່ອທຽບໃສ່ການປະກາດໃນປີ 2012. ດ້ວຍລະດັບຜົນສະທ້ອນຄືໃນປະຈຸບັນ, ໃນປີ 2030, ຜົນເສຍຫາຍໂດຍໄພທຳມະຊາດກໍ່ຂຶ້ນສຳລັບຫວຽດນາມ ອາດຈະຂຶ້ນເຖິງ 3-5% GDP. ສະນັ້ນ ເລື່ອງເປັນເຈົ້າການໃນການລະດົມ, ຫັນແຫລ່ງກຳລັງເປັນຫລາຍຮູບແບບ ເພື່ອຮັບມືກັບ ການປ່ຽນແປງຂອງດິນຟ້າອາກາດ ບໍ່ພຽງແຕ່ປະກອບສ່ວນພ້ອມກັບບັນດາປະເທດ ເພື່ອແກ້ໄຂບັນຫາທົ່ວໂລກເທົ່ານັ້ນ ຫາກຍັງມີຄວາມໝາຍສຳຄັນຊ່ວຍໃຫ້ຫວຽດນາມ ພັດທະນາແບບຍືນຍົງອີກດ້ວຍ.