ກອງປະຊຸມສະໄໝສາມັນເທື່ອທີ 9 ສະພາແຫ່ງຊາດຫວຽດນາມຊຸດທີ 13 ພວມສຸມໃສ່ປຶກສາຫາລືບັນດາໜ້າທີ່, ວິທີການແກ້ໄຂພັດທະນາເສດຖະກິດ-ສັງຄົມປີ 2015 ແລະ ຊຸມປີຕໍ່ໆໄປ. ໃນສະພາວະທີ່ພື້ນຖານເສດຖະກິດຫວຽດນາມພວມຢູ່ໃນທ່າຟື້ນຟູ, ການພັດທະນາແບບຍືນຍົງ ຍາມໃດກໍແມ່ນເປົ້າໝາຍຂອງຫວຽດນາມ.
ກອງປະຊຸມສະໄໝສາມັນເທື່ອທີ 9 ສະພາແຫ່ງຊາດຫວຽດນາມຊຸດທີ 13 |
ໃນຍຸດທະສາດ ພັດທະນາເສດຖະກິດ-ສັງຄົມໄລຍະ 2011-2020, ຫວຽດນາມຕັດສິນໃຈຍູ້ແຮງກິດຈະການປ່ຽນແປງໃໝ່ຢ່າງຮອບດ້ານດ້ວຍ 3 ບາດກ້າວບຸກທະລຸຍຸດທະສາດ, ນັ້ນແມ່ນສ້າງລະບອບເສດຖະກິດຕະຫຼາດໃຫ້ສົມບູນແບບ, ພັດທະນາແຫຼ່ງຊັບພະຍາກອນຄຸນນະພາບສູງ ແລະ ກໍ່ສ້າງພື້ນຖານໂຄງລ່າງທັນສະໄໝ, ແນໃສ່ນຳປະເທດຫວຽດນາມກາຍເປັນປະເທດອຸດສາຫະກຳຕາມທິດທັນສະໄໝໂດຍພື້ນຖານໃນປີ 2020. ໃນສະເພາະໜ້າ, ປີ 2015, ຫວຽດນາມສູ້ຊົນບັນລຸລະດັບເຕີບໂຕ GDP ແມ່ນ 6,2 %, ວົງເງິນສົ່ງອອກເພີ່ມຂຶ້ນ 10%, ສ້າງວຽກເຮັດງານທຳໃຫ້ແຮງງານປະມານ 1,6 ລ້ານຄົນ.
ຄວາມສະດວກພ້ອມກັບສິ່ງທ້າທາຍ
ບົດລາຍງານຂອງລັດຖະບານກ່ຽວກັບສະພາບການພັດທະນາເສດຖະກິດ-ສັງຄົມປີ 2014 ແລະ ຊຸມເດືອນຕົ້ນປີ 2015 ໄດ້ສະແດງໃຫ້ເຫັນວ່າ ມີບັນດາການຜັນແປຢ່າງຕັ້ງໜ້າ, ເປີດແງ່ຫວັງເພື່ອໃຫ້ເສດຖະກິດຫວຽດນາມພັດທະນາໃນໄລຍະທີ່ຈະມາເຖິງ. ປີ 2014, ຫວຽດນາມປະຕິບັດຢ່າງສຳເລັດຜົນກ່ຽວກັບເປົ້າໝາຍສ້າງເສດຖະກິດມະຫາພາກເປັນປົກກະຕິ, ຈຳກັດໄພເງິນເຟີ້ ແລະ ຮັບປະກັນການໜູນຊ່ວຍສັງຄົມ. ໃນຈຳນວນ 14 ຄາດໝາຍທີ່ໄດ້ວາງອອກ, ແມ່ນມີເຖິງ 13 ຄາດໝາຍ ສາມາດບັນລຸ ແລະ ລື່ນກາຍແຜນການ. ເປັນໜ້າສົນໃຈ ແມ່ນລະດັບ GDP ໃນປີ 2014 ບັນລຸ 5,98%; ດັດຊະນີລາຄາໃຊ້ສອຍ CPI ຖືກຈຳກັດໃນລະດັບ 1,84% ຊຶ່ງແມ່ນລະດັບຕ່ຳສຸດໃນຫຼາຍປີທີ່ຜ່ານມາ, ບັນລຸລະດັບວົງເງິນສົ່ງອອກເກີນດຸນ 2,1 ຕື້ USD . ທ່ານ ເຈີນຮ່ວາງເງິນ, ສ.ສ.ຊ ນະຄອນໂຮ່ຈິມິນ ຕີລາຄາວ່າ :
“ ຈຸດທີ່ສະຫວ່າງສະໄຫວທີ 1 ແມ່ນເສດຖະກິດຂະຫຍາຍຕົວ, ລະດັບເງິນເຟີ້ຫຼຸດລົງໃນ 4 ປີລຽນຕິດ. ນີ້ແມ່ນຜົນສຳເລັດຂອງທັງ 2 ຢ່າງ. ປະສິດທິຜົນການລົງທຶນສືບຕໍ່ໄດ້ຮັບການປົວແປງ. ຜົນສຳເລັດທີ 3 ແມ່ນການສ້າງໂຄງປະກອບເສດຖະກິດຄືນໃໝ່ໄດ້ບັນລຸໝາກຜົນໃດໜຶ່ງ, ໃນນັ້ນຕ້ອງເວົ້າເຖິງການສ້າງໂຄງປະກອບທະນາຄານຄືນໃໝ່, ໜີ້ເສຍໄດ້ຮັບການຄວບຄຸມ ”
ປະຕິບັດບັນດາວິທີການແກ້ໄຂຢ່າງຂ້ຽວຂາດ ແລະ ຄົບຊຸດ
ທີ່ວາລະປຶກສາຫາລືກ່ຽວກັບສະພາບການພັດທະນາເສດຖະກິດ-ສັງຄົມ, ມີ ສ.ສ.ຊ ຫຼາຍທ່ານໄດ້ສະເໜີ ປະຕິບັດບັນດາວິທີການແກ້ໄຂຢ່າງຂ້ຽວຂາດເພື່ອພັດທະນາແບບຍືນຍົງ. ຕາມບັນດາ ສ.ສ.ຊ ແລ້ວ, ວິທີການແກ້ໄຂທີ່ສຳຄັນທີ່ສຸດ ແລະ ມີລັກສະນະຍາວນານໃນປະຈຸບັນ ແມ່ນຕ້ອງເດັດດຽວປ່ຽນໃໝ່ຮູບແບບການເຕີບໂຕຕິດພັນກັບການສ້າງໂຄງປະກອບເສດຖະກິດຄືນໃໝ່, ໃນນັ້ນ ຕ້ອງປະຕິບັດການສ້າງໂຄງປະກອບການລົງທຶນແຫ່ງລັດຄືນໃໝ່, ສ້າງໂຄງປະກອບລັດວິສາຫະກິດຄືນໃໝ່ໂດຍຜ່ານການຍູ້ແຮງການຫັນເປັນຫຸ້ນສ່ວນຕິດພັນກັບການຕິດປະກາດໃນຕະຫຼາດຫຼັກຊັບ. ໃນການສ້າງໂຄງປະກອບເສດຖະກິດຄືນໃໝ່ນັ້ນ, ຄວນສ້າງເງື່ອນໄຂທີ່ສະດວກທີ່ສຸດເພື່ອພັດທະນາເສດຖະກິດພາກເອກະຊົນ, ພິເສດແມ່ນວິສາຫະກິດຂະໜາດກາງ ແລະ ນ້ອຍ, ຖືວ່າ ນີ້ແມ່ນກຳລັງໜູນເພື່ອພັດທະນາພື້ນຖານເສດຖະກິດ. ສະພາແຫ່ງຊາດຍັງຮຽກຮ້ອງລັດຖະບານ ຈົ່ງສຸມໃສ່ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດ, ຖືເປັນສຳຄັນດ້ານຄຸນນະພາບ, ປະສິດທິຜົນ ແລະ ກຳລັງແກ່ງແຍ້ງ. ທ່ານ ຫງວຽນກາວເຊີນ ສ.ສ.ຊ ແຂວງຮ່ວາບິງ ສະເໜີວ່າ :
“ ສະເໜີລັດຖະບານຈັດສັນແຜນການງົບປະມານສູນກາງໄລຍະ 2016-2020, ໜູນຊ່ວຍບັນດາວິສາຫະກິດທີ່ມີໂຄງການລົງທຶນເຂົ້າຂົງເຂດກະສີກຳ, ຊົນນະບົດ, ມີກົນໄກຮ່ວມສຳພັນດ້ານເສດຖະກິດລະຫວ່າງເຂດໃນຂົງເຂດກະສີກຳ. ລັດຖະບານຍືນສະເໜີສະພາແຫ່ງຊາດ ຈົ່ງສືບຕໍ່ຈຳໜ່າຍພັດທະບັດລັດຖະບານໄລຍະ 2016-2020 ແນໃສ່ເພີ່ມທະວີບັນດາແຫຼ່ງກຳລັງໃຫ້ແກ່ການລົງທຶນພັດທະນາ ”
ຕາມທ່ານ ບຸຍກວາງວິງ ລັດຖະມົນຕີວ່າການກະຊວງແຜນການ ແລະ ລົງທຶນຫວຽດນາມ, ສ.ສ.ຊ ແຂວງ ລາຍເຈົາແລ້ວ, ພ້ອມກັບເລື່ອງຫວຽດນາມຕ້ອງດຶງດູດບັນດານັກລົງທຶນຕ່າງປະເທດໃຫ້ແຂງແຮງນັ້ນ, ລັດຖະບານຄວນສືບຕໍ່ຈຳກັດໄພເງິນເຟີ້ໃນລະດັບປະຈຸບັນຄື ປະມານ 5%. ທ່ານລັດຖະມົນຕີວ່າການກະຊວງແຜນການ ແລະ ລົງທຶນຫວຽດນາມ ບຸຍກວາງວິງ ກ່າວວ່າ : (ເທບ) : “ ພວກເຮົາຕ້ອງຮັກສາລະດັບເງິນເຟີ້ເປັນປົກກະຕິ, ແຕ່ພວກເຮົາທັງຮັບປະກັນລະດັບເຕີບໂຕເສດຖະກິດ. ໃນ 2-3 ປີ ມໍ່ໆມານີ້, ລັດຖະບານຍັງຄົງຄາດຄະເນກ່ຽວກັບດັດຊະນີເງິນເຟີ້ເພີ່ມຂຶ້ນແຕ່ 5 – 7%. ນີ້ແມ່ນລະດັບທີ່ເໝາະສົມ. ພວກເຮົາໂຍະຍານນະໂຍບາຍເງິນຕາ ແລະ ສິນເຊື່ອເພື່ອຮັບປະກັນໃຫ້ແກ່ການລົງທຶນ ແລະ ເພື່ອໃຫ້ວິສາຫະກິດມີເງື່ອນໄຂທີ່ດີກ່ວາໃນການກູ້ຢືມທຶນ ”
ສ້າງກົນໄກ, ນະໂຍບາຍກົດໝາຍໃຫ້ສົມບູນແບບເພື່ອຮັບໃຊ້ການເຕີບໂຕ
ເພື່ອພັດທະນາແບບຍືນຍົງ, ສະພາແຫ່ງຊາດໄດ້ກຳນົດການສ້າງກົນໄກ, ນະໂຍບາຍໃຫ້ສົມບູນແບບ, ສ້າງເງື່ອນໄຂຊຸກຍູ້ການເຕີບໂຕແມ່ນໜ້າທີ່ຮີບດ່ວນໃນປະຈຸບັນ. ໃນໄລຍະທີ່ຈະມາເຖິງ, ສະພາແຫ່ງຊາດມອບໝາຍໃຫ້ລັດຖະບານ ເລັ່ງໃສ່ແກ້ໄຂສິ່ງຍັງຄົງຄ້າງໃນຂົງເຂດນີ້. ທ່ານ ດຣ ເຈີນຢູລິກ ຮອງຫົວໜ້າຄະນະ ສ.ສ.ຊ ນະຄອນໂຮ່ຈິມິນ ຖືວ່າ :
“ ຕາມຂ້າພະເຈົ້າແລ້ວ, ຕ້ອງກວດກາບັນດານະໂຍບາຍ, ກົດໝາຍທັງໝົດ. ເຮັດແນວໃດ ຕ້ອງສ້າງສະພາບແວດລ້ອມດຳເນີນທຸລະກິດທີ່ສະເໝີພາບຢ່າງແທ້ຈິງສຳລັບບັນດາວິສາຫະກິດ. ໃນໄລຍະໂລກາພິວັດ, ສິ່ງທ້າທາຍຢ່າງໃຫຍ່ຫຼວງກວ່າໝູ່ສຳລັບວິສາຫະກິດ ແມ່ນຕ້ອງແກ່ງແຍ້ງຈຶ່ງສາມາດຄົງຕົວ ແລະ ຂະຫຍາຍຕົວໄດ້”
ພັດທະນາເສດຖະກິດ-ສັງຄົມແບບຍືນຍົງ ແມ່ນການເລືອກເຟັ້ນທີ່ມີລະດັບຍຸດທະສາດຂອງຫວຽດນາມໃນປະຈຸບັນ. ການພັດທະນາເສດຖະກິດຕ້ອງສົມທົບຢ່າງກົມກ່ຽວກັບການຮັບປະກັນການໜູນຊ່ວຍສັງຄົມ. ພັດທະນາແບບຍືນຍົງກໍແມ່ນໄມ້ວັດແທກດ້ານພູມປັນຍາ, ຄຸນນະທາດຫວຽດນາມໃນການເຊື່ອມໂຍງເຂົ້າກັບສາກົນ.