ທ່ານປະທານປະເທດຫວຽດນາມ ເຈືອງເຕີ້ນຊາງ ພ້ອມດ້ວຍຄະນະຜູ້ແທນຂັ້ນສູງຫວຽດນາມຫາກໍສິ້ນສຸດບັນດາການເຄື່ອນໄຫວໃນຂອບເຂດກອງປະຊຸມສຸດຍອດສະຫະປະຊາຊາດ ແຕ່ວັນທີ 24-28/9 ແລະ ການຢ້ຽມຢາມກຸຍບາຢ່າງເປັນທາງການແຕ່ວັນທີ 28-30/9. ການເຂົ້າຮ່ວມກອງປະຊຸມສຸດຍອດສະຫະປະຊາຊາດ ແລະ ການຢ້ຽມຢາມກຸຍບາຢ່າງເປັນທາງການໄດ້ປະສົບຜົນສຳເລັດຢ່າງດີງາມ, ອັນໄດ້ປະກອບສ່ວນເພີ່ມທະວີເປົ້າໝາຍເຊື່ອມໂຍງເຂົ້າກັບສາກົນຂອງຫວຽດນາມ.
ທ່ານປະທານປະເທດຫວຽດນາມ ເຈືອງເຕີ້ນຊາງກ່າວຄຳເຫັນທີ່ພິທີໄຂ
ກອງປະຊຸມສຸດຍອດສະຫະປະຊາຊາດຄັ້ງທີ 70 |
ພ້ອມກັບການເຂົ້າຮ່ວມຢ່າງຕັ້ງໜ້າ, ປະກອບສ່ວນຢ່າງແທດຈິງເຂົ້າໃນວິວັດການເຈລະຈາຮັບຮອງເອົາໂຄງການດຳເນີນງານ 2030 ກ່ຽວກັບການພັດທະນາແບບຍືນຍົງຢູ່ທີ່ກອງປະຊຸມສຸດຍອດສະຫະປະຊາຊາດຄັ້ງທີ 70 ແລະ ເປັນຂີດໝາຍແຫ່ງການພັດທະນາໃໝ່ໃນສາຍພົວພັນມິດຕະພາບທີ່ເປັນມູນເຊື້ອລະຫວ່າງຫວຽດນາມ - ກຸຍບາ, ທ່ານປະທານປະເທດຫວຽດນາມ ເຈືອງເຕີ້ນຊາງ ພ້ອມດ້ວຍຄະນະຜູ້ແທນຂັ້ນສູງຫວຽດນາມໄດ້ແບ່ງປັນກັບປະຊາຄົມໂລກໃນຫຼາຍທັດສະນະກ່ຽວກັບເປົ້າໝາຍພັດທະນາຂອງຫວຽດນາມ ແລະ ບັນດາບັນຫາ 2 ຝ່າຍ ແລະ ຫຼາຍຝ່າຍ.
ສານກ່ຽວກັບເປົ້າໝາຍພັດທະນາຂອງຫວຽດນາມ
ຂີດໝາຍທີ່ພົນເດັ່ນຂອງຫວຽດນາມຢູ່ທີ່ກອງປະຊຸມສຸດຍອດສະຫະປະຊາຊາດຄັ້ງທີ 70, ນັ້ນແມ່ນເລື່ອງທ່ານປະທານປະເທດຫວຽດນາມ ເຈືອງເຕີ້ນຊາງໄດ້ຂຶ້ນກ່າວປາໄສໃນມື້ທຳອິດຂອງກອງປະຊຸມຊຶ່ງໄດ້ຢືນຢັນຫວຽດນາມຈະ ສຸມທຸກໆແຫຼ່ງກຳລັງ, ລະດົມທຸກໆກະຊວງ, ຂະແໜງການ, ທ້ອງຖິ່ນຕ່າງໆ ແລະ ປະຊາຄົມເພື່ອປະຕິບັດໂຄງການດຳເນີນງານ 2030 ແລະ ບັນດາເປົ້າຫມາຍພັດທະນາສະຫັດສະວັດຢ່າງສຳເລັດຜົນ. ທ່ານປະທານປະເທດຫວຽດນາມ ເຈືອງເຕີ້ນຊາງໄດ້ຊີ້ແຈ້ງເຖິງສານຕ່າງໆ ແລະ ບັນດາຂໍ້ສະເໜີໃຫຍ່ ຊຶ່ງລວມມີ : ການຮັບປະກັນສະພາບແວດລ້ອມແຫ່ງສັນຕິພາບ, ຄວາມໝັ້ນຄົງບົນພື້ນຖານການເຄົາລົບກົດໝາຍສາກົນ ຊຶ່ງແມ່ນເງື່ອນໄຂຕັດສິນຊີ້ຂາດເພື່ອປະຕິບັດບັນດາເປົ້າຫມາຍພັດທະນາແບບຍືນຍົງຢູ່ແຕ່ລະປະເທດຢ່າງສຳເລັດຜົນ; ບັນດາປະເທດຕ້ອງມີຄວາມຕັດສິນໃຈດ້ານການເມືອງຢ່າງສູງ, ເສີມຂະຫຍາຍກຳລັງພາຍໃນ ແລະ ຄວາມສາມາດບົ່ມຊ້ອນຂອງປະເທດຊາດໃນລະດັບສູງສຸດ, ປະສານສົມທົບບັນດາເປົ້າຫມາຍພັດທະນາເຂົ້າກັບທຸກໆນະໂຍບາຍ, ຍຸດທະສາດກ່ຽວກັບການພັດທະນາ, ໃນນັ້ນ ມະນຸດຍາມໃດກໍມີທີ່ຕັ້ງບົດບາດເປັນສູນກາງ; ຄວນເພີ່ມທະວີການພົວພັນຄູ່ຮ່ວມມືທົ່ວໂລກເພື່ອການພັດທະນາ. ພ້ອມກັບບັນດາບົດປະກອບຄຳເຫັນໃນວາລະປະຊຸມສຳຄັນໃນກອງປະຊຸມ, ທ່ານປະທານປະເທດ ຫວຽດນາມເຈືອງເຕີ້ນຊາງຍັງມີ 3 ບົດປະກອບຄຳເຫັນ ແບ່ງປັນບົດຮຽນກ່ຽວກັບຜົນສຳເລັດຂອງຫວຽດນາມກ່ຽວກັບການພັດທະນາຊົນນະບົດຢ່າງໝັ້ນຄົງ, ຮັບປະກັນຄວາມສະເໝີພາບລະຫວ່າງຍິງ-ຊາຍ ແລະ ການທີ່ຫວຽດນາມເຂົ້າຮ່ວມການເຄື່ອນໄຫວປົກປັກຮັກສາສັນຕິພາບຂອງສະຫະປະຊາຊາດ. ຈາກສານເຫຼົ່ານັ້ນ, ບັນດາປະເທດຄູ່ຮ່ວມມືໄດ້ສັງເກດຫວຽດນາມແມ່ນບໍ່ພຽງແຕ່ເປັນສັນຍາລັກແຫ່ງການຕໍ່ສູ້ເພື່ອຍາດເອົາເອກະລາດແຫ່ງຊາດເທົ່ານັ້ນ, ຫາກຍັງເປັນແບບຢ່າງກ່ຽວກັບການພັດທະນາເສດຖະກິດ-ສັງຄົມອີກດ້ວຍ.
ຫັນການພົວພັນສາກົນເປັນຫຼາຍຮູບຫຼາຍແບບ
ທ່ານປະທານປະເທດຫວຽດນາມ ເຈືອງເຕີ້ນຊາງ ພ້ອມດ້ວຍຄະນະຜູ້ແທນຂັ້ນສູງຫວຽດນາມຍັງໄດ້ພົບປະ 2 ຝ່າຍກັບປະທານາທິບໍດີ, ນາຍົກລັດຖະມົນຕີ, ຫົວໜ້າຄະນະຜູ້ແທນຂອງເກືອບ 20 ປະເທດເພື່ອແລກປ່ຽນບັນດາບັນຫາສາກົນເຊິ່ງຕ່າງຝ່າຍຕ່າງມີຄວາມສົນໃຈ ແລະ ເພີ່ມທະວີການພົວພັນດ້ານເສດຖະກິດ, ການຄ້າ, ການລົງທຶນ ແລະ ສົມທົບຢ່າງແໜ້ນແຟ້ນຢູ່ທີ່ບັນດາເວທີປາໄສຫຼາຍຝ່າຍ, ເປັນຕົ້ນແມ່ນສະຫະປະຊາຊາດ. ທຸກໆປະເທດເມື່ອພົບປະກັບຄະນະຜູ້ແທນຂັ້ນສູງຫວຽດນາມ, ກໍລ້ວນແຕ່ຕີລາຄາສູງກິດຈະການລົບລ້າງຄວາມອຶດຫິວ ຫຼຸດຜ່ອນຄວາມທຸກຍາກຢູ່ຫວຽດນາມ ແລະ ຖືວ່າດ້ວຍບັນດາຜົນງານເຊັ່ນນັ້ນ, ຫວຽດນາມສົມກັບການສະເໜີເປັນກຳມະການບໍ່ປະຈຳສະພາຄວາມໝັ້ນຄົງສະຫະປະຊາຊາດສົກປີ 2020 – 2021. ບັນດາປະເທດເຊື່ອໝັ້ນຫວຽດນາມຈະສືບຕໍ່ເຮັດສຳເລັດບັນດາເປົ້າຫມາຍພັດທະນາສະຫັດສະວັດ, ມີຄວາມຫວັງຢາກສົມທົບ, ຮ່ວມມື ແລະ ໜູນຊ່ວຍຫວຽດນາມໃນໄລຍະປະຕິບັດບັນດາເປົ້າຫມາຍພັດທະນາສະຫັດສະວັດນັບແຕ່ນີ້ຫາປີ 2030.
ພ້ອມກັນນັ້ນ, ບັນດາການເຄື່ອນໄຫວພົບປະ 2 ຝ່າຍຂອງທ່ານປະທານປະເທດຫວຽດນາມ ເຈືອງເຕີ້ນຊາງ ແລະ ຄະນະຜູ້ແທນຂັ້ນສູງຫວຽດນາມ ກັບບັນດາເຈົ້າຫນ້າທີ່ຂັ້ນສູງລັດຖະບານ, ນັກຮຽນຮູ້, ຜູ້ຕາງໜ້າວິສຫະກິດ, ປະຊາຄົມຊາວຫວຽດນາມອາໄສຢູ່ອາເມລິກາ ໄດ້ປະກອບສ່ວນຜັນຂະຫຍາຍໝາກຜົນການຢ້ຽມຢາມອາເມລິກາໃນມໍ່ມາໆນີ້ຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງຢ່າງແທດຈິງ, ເຮັດໃຫ້ການພົວພັນຄູ່ຮ່ວມມືຮອບດ້ານລະຫວ່າງ 2 ປະເທດເລິກເຊິ່ງຂຶ້ນຕື່ມ. ການຢ້ຽມຢາມກຸຍບາຢ່າງເປັນທາງການຂອງທ່ານປະທານປະເທດຫວຽດນາມ ເຈືອງເຕີ້ນຊາງ ກໍເພີ່ມທະວີການພົວພັນສາມັກຄີອ້າຍນ້ອງ ແລະ ການຮ່ວມມືຮອບດ້ານລະຫວ່າງພັກ, ລັດ ແລະ ປະຊາຊົນ 2 ປະເທດຫວຽດນາມ-ກຸຍບາ.
ຕໍ່ສູ້ປົກປັກຮັກສາອະທິປະໄຕຕາມກົດໝາຍສາກົນ
ຢູ່ທີ່ກອງປະຊຸມສຸດຍອດສະຫະປະຊາຊາດຄັ້ງທີ 70 ແລະ ບັນດາການເຄື່ອນໄຫວການທູດ 2 ຝ່າຍ ແລະ ຫຼາຍຝ່າຍເນື່ອງໃນໂອກາດນີ້, ທ່ານປະທານປະເທດຫວຽດນາມ ເຈືອງເຕີ້ນຊາງ ພ້ອມດ້ວຍຄະນະຜູ້ແທນຂັ້ນສູງຫວຽດນາມສືບຕໍ່ຢັ້ງຢືນທັດສະນະຢ່າງສະເໝີຕົ້ນສະເໝີປາຍຂອງຫວຽດນາມກ່ຽວກັບອະທິປະໄຕຂອງຫວຽດນາມທີ່ມີຕໍ່ 2 ຫມູ່ເກາະຮ່ວາງຊາ ແລະ ເຈືອງຊາ. ໃນບົດປາໄສຢູ່ທີ່ກອງປະຊຸມສຸດຍອດສະຫະປະຊາຊາດ, ທ່ານປະທານປະເທດຫວຽດນາມ ເຈືອງເຕີ້ນຊາງໄດ້ຢືນຢັນວ່າ ຫວຽດນາມພວມມານະພະຍາຍາມພ້ອມກັບບັນດາປະເທດອາຊຽນ ແລະ ບັນດາປະເທດທີ່ກ່ຽວຂ້ອງຮັກສາ ແລະ ປັບປຸງສັນຕິພາບ, ຄວາມໝັ້ນຄົງໃນພາກພື້ນ ແນໃສ່ສ້າງສະພາບແວດລ້ອມທີ່ສະດວກໃຫ້ແກ່ການພັດທະນາແບບຍືນຍົງ, ໃນນັ້ນມີຄວາມໝັ້ນຄົງ, ປອດໄພ ແລະ ສິດເສລີໃນການເດີນທະເລ, ການບິນຢູ່ທະເລຕາເວັນອອກ. ຫວຽດນາມເດັດດຽວ ແລະ ມີແຜນນະໂຍບາຍຢ່າງສະເໝີຕົ້ນສະເໝີປາຍກ່ຽວກັບການແກ້ໄຂດ້ວຍມາດຕະການໂດຍສັນຕິວິທີສຳລັບບັນດາການຂັດແຍ້ງຢູ່ທະເລຕາເວັນອອກບົນພື້ນຖານເຄົາລົບກົດໝາຍສາກົນ, ປະຕິບັດ DOC ແລະ ຊຸກຍູ້ການບັນລຸ COC ໂດຍໄວ.
ບັນດາການເຄື່ອນໄຫວພົວພັນຕ່າງປະເທດຂອງທ່ານປະທານປະເທດຫວຽດນາມ ເຈືອງເຕີ້ນຊາງ ພ້ອມດ້ວຍຄະນະຜູ້ແທນຂັ້ນສູງຫວຽດນາມໃນການເດີນ ທາງຄັ້ງນີ້ ປະກອບສ່ວນຍົກສູງພາບພົດ, ທີ່ຕັ້ງບົດບາດສາກົນຂອງຫວຽດນາມ, ພ້ອມທັງເພີ່ມທະວີການພົວພັນຮ່ວມມືຫຼາຍດ້ານລະຫວ່າງຫວຽດນາມກັບສະຫະປະຊາຊາດ ແລະ ບັນດາປະເທດ, ຄູ່ຮ່ວມມືໃຫຍ່ ແລະ ເພື່ອນມິດທີ່ມີການພົວພັນຮ່ວມມືມາແຕ່ດົນນານ.