(vovworld)- ທີ່ວາລະໄຂກອງປະຊຸມສະໄຫມສາມັນເທື່ອທີ 5 ສະພາແຫ່ງຊາດຫວຽດນາມຊຸດທີ 13 ທີ່ດຳເນີນໃນຕອນເຊົ້າວັນທີ 20/5, ທ່ານຮອງນາຍົກລັດຖະມົນຕີ ຫງວຽນຊວນຟຸກ ສະເຫນີບົດລາຍງານສຳຄັນກ່ຽວກັບສະພາບການປະຕິບັດຫນ້າທີ່ປີ 2012; ຫນ້າທີ່ 4 ເດືອນຕົ້ນປີ 2013 ແລະ ບັນດາມາດຕະການຕົ້ນຕໍຂອງລັດຖະບານໃນການບໍລິຫານພັດທະນາເສດຖະກິດສັງຄົມແຕ່ນີ້ຮອດທ້າຍປີ.
ບົດລາຍງານຂອງລັດຖະບານໄດ້ຊີ້ອອກບັນດາໝາກຜົນເປັນຫນ້າຊື່ນຊົມຊື່ງຫວຽດນາມບັນລຸໄດ້ແຕ່ຕົ້ນປີມາຮອດປະຈຸບັນ. ນັ້ນແມ່ນເສດຖະກິດສັງຄົມໃນ 4 ເດືອນ ມີສັນຍານອັນຕັ້ງຫນ້າ. ລາຄ່າໃຊ້ສອຍໃນເດືອນ 4 ແມ່ນຕຳ່ກວ່າເມື່ອທຽບໃສ່ໄລຍະດຽວກັນຂອງປີກາຍ ແລະ ແມ່ນລະດັບຕຳ່ສຸດເມື່ອທຽບໃສ່ໄລຍະດຽວກັນຂອງ 4 ປີກ່ອນນີ້. ອັດຕາດອກເບ້ຍຫລຸດລົງ. ຍອດເຫລືອຫນີ້ດ້ານສິນເຊື່ອເພີ່ມຂຶ້ນຄືນໃຫມ່ຜ່ານຊຸມເດືອນຕົ້ນປີ. ໄລ່ມາຮອດທ້າຍເດືອນ 4 ໄດ້ເພີ່ມຂຶ້ນ 2,11 %, ສູງກວ່າເມື່ອທຽບໃສ່ໄລຍະດຽວກັນຂອງປີ 2012. ຕະຫລາດເງິນຕາຕ່າງປະເທດ ແລະ ອັດຕາແລກປ່ຽນເງິນຕາເປັນປົກກະຕິ. ການສະສົມເງິນຕາຕ່າງປະເທດເພີ່ມຂຶ້ນສູງ. ການເຄື່ອນໄຫວຂອງບັນດາອົງການສິນເຊື່ອມີຄວາມປອດໄພ. ການແກ້ໄຂຄວາມຫຍຸ້ງຍາກໃຫ້ແກ່ການຜະລິດດຳເນີນທຸລະກິດກໍບັນລຸປະສິດທິຜົນໃນເບື້ອງຕົ້ນ. ຍອດ GDP ຂອງໄຕມາດ 1 ເພີ່ມຂຶ້ນ 4,89%, ສູງກວ່າເມື່ອທຽບໃສ່ໄລຍະດຽວກັນຂອງປີກາຍ (4,75%), ບັນລຸຕາມຄາດໝາຍທີ່ວາງອອກ. ນີ້ແມ່ນລະດັບຈະເລີນເຕີບໂຕທີ່ ເໝາະສົມໃນເງື່ອນໄຂພື້ນຖານເສດຖະກິດຂອງຫວຽດນາມ ແລະ ຕ່າງປະເທດຍັງປະສົບກັບຄວາມຫຍຸ້ງຍາກ. ການຮັບປະກັນຊີວິດສັງຄົມ, ສະຫວັດດີການສັງຄົມໄດ້ຮັບຄວາມເອົາໃຈໃສ່. ນັບແຕ່ຕົ້ນປີມາຮອດປະຈຸບັນ, ຫວຽດນາມ ໄດ້ສ້າງວຽກເຮັດງານທຳໃຫມ່ໃຫ້ແກ່ຄົນງານກວ່າ 475.000 ຄົນ. ຈຳນວນຜູ້ຈົດທະບຽນຂໍອຸດຫນູນການວ່າງງານຫລຸດຜ່ອນລົງ.
ເຖິງຢ່າງໃດກໍຕາມ, ຕາມການຄາດຄະເນແລ້ວ, ເສດຖະກິດທົ່ວໂລກສືບຕໍ່ຟື້ນຕົວຢ່າງຊັກຊ້າ, ບໍ່ເປັນປົກກະຕິ. ເສດຖະກິດສັງຄົມພາຍໃນປະເທດຍັງປະສົບກັບຄວາມຫຍຸ້ງຍາກ. ອີງໃສ່ບັນດາຈຸດໝາຍ ແລະ ສະພາບຕົວຈິງ, ລັດຖະບານໄດ້ກຳນົດຫນ້າທີ່ສຳຄັນໃນໄລຍະຈະມາເຖິງ ແມ່ນສືບຕໍ່ປະຕິບັດຈຸດໝາຍ ເພີ່ມທະວີການບໍລິຫານເສດຖະກິດມະຫາພາກຢ່າງສະເຫມີຕົ້ນສະເຫມີປາຍ, ຄວບຄຸມໄພເງິນເຟີ້, ບັນລຸການເຕີບໂຕສູງກວ່າປີ 2012. ເປັນເຈົ້າການໃນການຊີ້ນຳບໍລິຫານ, ການນຳໃຊ້ບັນດາເຄື່ອງມື, ນະໂຍບາຍເງິນຕາຢ່າງໄຫວພິບ, ສົມທົບຢ່າງແຫນ້ນແຟ້ນກັບບັນດານະໂຍບາຍງົບປະມານ, ຫລຸດຜ່ອນອັດຕາດອກເບ້ຍຢ່າງເໝາະສົມ, ສູ້ຊົນບັນລຸການເຕີບໂຕດ້ານສິນເຊື່ອທັງປີ 2013 ດ້ວຍລະດັບ 12%. ທ່ານຮອງນາຍົກລັດຖະມົນຕີ ຫງວຽນຊວນຟຸກ ຊີ້ແຈງວ່າ:
“ສຸມໃສ່ແກ້ໄຂຄວາມຫຍຸ້ງຍາກໃຫ້ແກ່ການຜະລິດດຳເນີນທຸລະກິດ, ແກ້ໄຂຫນີ້ເສຍ, ພັດທະນາຕະຫລາດ, ເພີ່ມກຳລັງຊື້, ຍູ້ແຮງການຈຳຫນ່າຍສິນຄ້າ. ສືບຕໍ່ປະຕິບັດບັນດາມາດຕະການແກ້ໄຂຄວາມຫຍຸ້ງຍາກໃຫ້ແກ່ການຜະລິດດຳເນີນທຸລະກິດຢ່າງມີປະສິດທິຜົນ. ພັດທະນາເສດຖະກິດທະເລຢ່າງແຮງ, ສືບຕໍ່ຊຸກຍູ້ຕະຫລາດພາຍໃນປະເທດ, ສົ່ງສິນຄ້າລົງໄປຂາຍຢູ່ເຂດຊົນນະບົດ, ຕັ້ງຫນ້າຜັນຂະຫຍາຍບັ້ນຂົນຂວາຍຊາວຫວຽດນາມບຸລິມະສິດຊົມໃຊ້ສິນຄ້າຫວຽດນາມ. ຜັນຂະຫຍາຍປະຕິບັດບັນດາຫນ້າທີ່ຈຸດສຸມສ້າງໂຄງປະກອບເສດຖະກິດຄືນໃຫມ່ໃຫ້ບັນລຸໝາກຜົນ. ບັນດາກະຊວງ, ຂະແຫນງການ ແລະ ທ້ອງຖິ່ນ ຮີບເຮັ່ງປະກາດໃຊ້ ແລະ ຊີ້ນຳການປະຕິບັດຢ່າງຂ້ຽວຂາດໂຄງການເຄື່ອນໄຫວສ້າງໂຄງປະກອບຄືນໃຫມ່ໃນຂົງເຂດຄຸ້ມຄອງທີ່ໄດ້ຮັບການມອບໝາຍ.”
ໄຂກອງປະຊຸມສະໄຫມສາມັນເທື່ອທີ 5 ສະພາແຫ່ງຊາດຫວຽດນາມຊຸດທີ 13
ພາບ: internet
|
ລັດຖະບານກໍຊີ້ນຳປະຕິບັດບັນດາມາດຕະການສ້າງພື້ນຖານໂຄງລ່າງຢ່າງຄົບຊຸດ, ສືບຕໍ່ປະຕິບັດເສັ້ນທາງການສ້າງໂຄງປະກອບບັນດາອົງການສິນເຊື່ອຄືນໃຫມ່, ໃນນັ້ນ ສຸມໃສ່ຍົກສູງຄຸນນະພາບສິນເຊື່ອ, ສ້າງຂໍ້ກຳນົດກ່ຽວກັບຄວາມປອດໄພການເຄື່ອນໄຫວທະນາຄານໃຫ້ສົມບູນແບບ, ເພີ່ມທະວີການຮັບປະກັນຄວາມປອດໄພໃຫ້ທັງລະບົບ.
ໄປຄຽງຄູ່ກັບການພັດທະນາເສດຖະກິດ, ລັດຖະບານກໍສຸມໃສ່ຮັບປະກັນຊີວິດສັງຄົມ ແລະ ສະຫວັດດີການສັງຄົມ, ເພີ່ມທະວີການປ້ອງກັນ ແລະ ຕ້ານໄພທຳມະຊາດ, ຮັບມືກັບການປ່ຽນແປງຂອງດິນຟ້າອາກາດ. ກິດຈະການປະຕິຮູບດ້ານບໍລິຫານ, ຕ້ານການສໍ້ລາດບັງຫລວງ, ການຟຸມເຟືອຍ ຈະສືບຕໍ່ໄດ້ຮັບການຍູ້ແຮງ. ຄຽງຄູ່ກັນນັ້ນ ຫວຽດນາມ ກໍເພີ່ມທະວີການປ້ອງກັນຊາດປ້ອງກັນຄວາມສະຫງົບ, ຮັບປະກັນຄວາມເປັນລະບຽບຮຽບຮ້ອຍທາງສັງຄົມ. ກ່ຽວກັບການຍົກສູງປະສິດທິຜົນການພົວພັນຕ່າງປະເທດ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ເນັ້ນຫນັກວ່າ:
“ການສ້າງ ແລະ ຜັນຂະຫຍາຍຍຸດທະສາດສັງລວມກ່ຽວກັບການເຊື່ອມໂຍງເຂົ້າກັບສາກົນ, ຕັ້ງຫນ້າເຈລະຈາ ແລະ ເຂົ້າຮ່ວມບັນດາເຂດການຄ້າເສລີ, ເປີດກວ້າງຕະຫລາດ, ຜັນຂະຫຍາຍເສັ້ນທາງການຍົກການພົວພັນກັບຄູ່ຮ່ວມມືຈຳນວນຫນຶ່ງຂຶ້ນສູ່ລະດັບໃຫມ່, ເຮັດໃຫ້ການພົວພັນທີ່ໄດ້ສ້າງຂຶ້ນແລ້ວເຂົ້າສູ່ລວງເລິກ, ປະສິດທິຜົນ, ຍົກສູງບົດບາດ, ຮັບປະກັນຜົນປະໂຫຍດແຫ່ງຊາດຢູ່ບັນດາອົງການ, ກົນໄກ, ເວທີປາໄສສາກົນ ແລະ ພາກພື້ນ. ປະກອບສ່ວນຢ່າງຕັ້ງຫນ້າ ແລະ ມີຄວາມຮັບຜິດຊອບເຂົ້າໃນການສ້າງປະຊາຄົມອາຊຽນ ໃນປີ 2015, ເພີ່ມທະວີວຽກງານກ່ຽວກັບຊາວຫວຽດນາມ ອາໄສຢູ່ຕ່າງປະເທດ, ວຽກງານປົກປ້ອງພົນລະເມືອງ, ຊາວປະມົງເຄື່ອນໄຫວຢູ່ທະເລ, ຢືດໝັ້ນແຜນນະໂຍບາຍແກ້ໄຂບັນດາບັນຫາບົນທະເລໂດຍສັນຕິວິທີ ບົນພື້ນຖານກົດໝາຍສາກົນ, ເປັນເຈົ້າການໃນການ ສົນທະນາກ່ຽວກັບປະຊາທິປະໄຕ, ສິດທິມະນຸດ ແລະ ສາດສະ ຫນາ.”
ທ່ານຮອງນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ ຫນ້າທີ່ຍັງເຫລືອແມ່ນຫນັກຫນ່ວງທີ່ສຸດ ແຕ່ດ້ວຍຄວາມຕັດສິນໃຈຂອງລັດຖະບານ, ທຸກຂັ້ນ ແລະ ຂະແຫນງການຕ່າງໆ ຫວຽດນາມ ຈະພະຍາຍາມປະຕິບັດສຳເລັດບັນດາຈຸດໝາຍທີ່ວາງອອກໃຫ້ທັງປີ 2013, ປະກອບສ່ວນປະຕິບັດແຜນການ 5 ປີ ຄືແຕ່ 2011-2015 ສຳເລັດຜົນ.