ທ່ານລັດຖະມົນຕີກະຊວງການຄ້າ ອົດສະຕາລີ Don Farrell  (ພາບ: VOV)

ໃນກອງປະຊຸມສຳມະນາຂອງສະຖາບັນນະໂຍບາຍ ອົດສະຕາລີ - ຫວຽດນາມ (AVPI) ໄດ້ດຳເນີນຢູ່ນະຄອນ Adelaide, ອົດສະຕາລີ, ຫວ່າງມໍ່ໆມານີ້, ນັກຊ່ຽວຊານຂົງເຂດເສດຖະກິດຈຳນວນຫຼາຍ ຕາງກໍໃຫ້ຂໍ້ສັງເກດລວມວ່າ: ຫວຽດນາມ ບັນລຸໄດ້ຄວາມກ້າວໜ້າຫຼາຍພໍສົມຄວນໃນການປົວແປງສະພາບແວດລ້ອມທາງດ້ານການຄ້າ ແລະ ການລົງທຶນ. ໃນທົດສະວັດຜ່ານມາ, ຫວຽດນາມ ບັນລຸໄດ້ບັນດາການປະຕິຮູບສຳຄັນ ເພື່ອແນໃສ່ປົວແປງການເຄື່ອນໄຫວດຳເນີນທຸລະກິດ, ເຊັ່ນ: ຫັນບັນດາລະບຽບການບໍລິຫານເປັນງ່າຍດາຍ ແລະ ເພີ່ມທະວີລັກສະນະຈະແຈ້ງໃນບັນດາຂັ້ນຕອນຄຸ້ມຄອງ.

ຫວຽດນາມ ປະກອບສ່ວນເຂົ້າໃນການເຕີບໂຕຂອງພາກພື້ນ

ທ່ານ Leigh Howard, ຜູ້ອຳນວຍການຝ່າຍບໍລິຫານ Asialink Business, ໃຫ້ຮູ້ວ່າ 10 ປີ ຜ່ານມາ, ທ່ານໄດ້ມາ ຫວຽດນາມ ເປັນຫຼາຍຄັ້ງ ແລະ ໄດ້ເຫັນປະຈັກຕາການປ່ຽນແປງກໍຄືຄວາມມານະພະຍາຍາມຢ່າງແຮງໃນການປົວແປງສະພາບແວດລ້ອມທາງດ້ານການຄ້າ ແລະ ການລົງທຶນ. ລັດຖະບານ ຫວຽດນາມ ກໍໄດ້ລົງທຶນເຂົ້າພື້ນຖານໂຄງລ່າງ ແລະ ນີ້ແມ່ນສິ່ງທີ່ມີຄວາມສຳຄັນຍິ່ງ, ປະກອບສ່ວນເຮັດໃຫ້ເສດຖະກິດເຕີບໂຕຢ່າງວ່ອງໄວ.

ໃນຂະນະນັ້ນ, ທ່ານລັດຖະມົນຕີກະຊວງການຄ້າ ອົດສະຕາລີ, Don Farrell, ຖືວ່າ ລັດຖະບານ ຫວຽດນາມ ໄດ້ລົງທຶນຫຼາຍເຂົ້າໃນພື້ນຖານໂຄງລ່າງ ແລະ ນີ້ແມ່ນສິ່ງທີ່ມີຄວາມສຳຄັນຍິ່ງ, ປະກອບສ່ວນຢ່າງຕັ້ງໜ້າໃຫ້ແກ່ເສດຖະກິດເຕີບໂຕຢ່າງວ່ອງໄວ. ພິເສດ, ຫວຽດນາມ ໄດ້ສ້າງວັດທະນະທຳອັນຕັ້ງໜ້າໃນການເຄື່ອນໄຫວດຳເນີນທຸລະກິດ. ດັ່ງນັ້ນ, ຫວຽດນາມ ສວມບົດບາດສຳຄັນ, ປະກອບສ່ວນເຂົ້າໃນການເຕີບໂຕຂອງພາກພື້ນ.

“ຍຸດທະສາດເສດຖະກິດ ອາຊີຕາເວັນອອກສ່ຽງໃຕ້ຮອດປີ 2040 ຂອງ ອົດສະຕາລີ ຄາດຄະເນວ່າ GDP ຂອງພາກພື້ນ ຈະເຕີບໂຕຢ່າງແຮງໃນ 2 ທົດສະວັດຈະມາເຖິງ, ແຕ່ 3,6 ພັນຕື້ USD ຂຶ້ນເປັນເກືອບ 14.000 ຕື້ USD ໃນປີ 2040. ແລະ ຫວຽດນາມ ແມ່ນໜຶ່ງໃນບັນດາກຳລັງໜູນປະກອບສ່ວນເຂົ້າໃນການເຕີບໂຕນີ້ດ້ວຍລະດັບການເຕີບໂຕ GDP ຄາດວ່າ ແຕ່ 5% ຫາ 7% ຕໍ່ປີ ນັບແຕ່ນີ້ຮອດປີ 2040. ຈຳນວນຄອບຄົວຢູ່ ຫວຽດນາມ ທີ່ມີລາຍຮັບຫຼາຍກວ່າ 15.000 USD ຈະເພີ່ມຂຶ້ນຕື່ມອີກ 20 ລ້ານຄົນ ໃນປີ 2040. ແລະ ເວລານັ້ນ, ຈຳນວນຜູ້ບໍລິໂພກຊັ້ນກາງຢູ່ ຫວຽດນາມ ຈະຫຼາຍກວ່າທົບ 2 ເທົ່າ ເມື່ອທຽບໃສ່ຈຳນວນຜູ້ບໍລິໂພກຢູ່ ອົດສະຕາລີ ໃນປັດຈຸບັນ.”

ທ່ານນາງ Louise Adams, ຜູ້ອຳນວຍການບໍລິສັດ Aurecon, ອົດສະຕາລີ, ເຊິ່ງເປັນບໍລິສັດສະໜອງການບໍລິການໃຫ້ຄຳປຶກສາດ້ານເຕັກນິກ ແລະ ການອອກແບບ, ໄດ້ຢັ້ງຢືນວ່າ ລະດັບການເຕີບໂຕແບບຍືນຍົງໃນຫຼາຍປີຜ່ານມາຂອງ ຫວຽດນາມ ແມ່ນດັດຊະນີທີ່ຊີ້ໃຫ້ເຫັນການເຕີບໂຕຢ່າງແຮງຂອງພື້ນຖານເສດຖະກິດ:

“ຂ້າພະເຈົ້າຖືວ່າ ສາຍເຫດທີ່ເຮັດໃຫ້ເສດຖະກິດ ຫວຽດນາມ ມີການເຕີບໂຕຢ່າງລຽນຕິດກໍຍ້ອນວ່າ ຫວຽດນາມ ພວມກາຍເປັນສູນກາງຜະລິດທົ່ວໂລກ. ໄປຄຽງຄູ່ກັນນັ້ນ, ກໍປະກອບມີບັນດາປັດໄຈອື່ນຄື ລະດັບທັກສະດີ, ພົນລະເມືອງອາຍຸໜຸ່ມກວມເອົາສ່ວນຫຼາຍ, ລະບົບການສຶກສາດີ, ພື້ນຖານໂຄງລ່າງໄດ້ຮັບຄວາມເອົາໃຈໃສ່ລົງທຶນ. ຫວຽດນາມ ພວມນັບມື້ນັບເປີດອົກເປີດໃຈຜ່ານການເຂົ້າຮ່ວມສັນຍາການຄ້າເສລີຫຼາຍສະບັບກັບບັນດາຄູ່ຮ່ວມມືສາກົນ… ແລະ ບັນດາສິ່ງດັ່ງກ່າວ ໄດ້ສ້າງຜົນງານໃຫ້ແກ່ ຫວຽດນາມ”.

ຍາດແຍ່ງກາລະໂອກາດເພື່ອນຳ ຫວຽດນາມ ກ້າວໄປໄກ

ບັນດາຜົນງານທີ່ບັນລຸໄດ້ໃນໄລຍະຜ່ານມາ ໄດ້ສ້າງພື້ນຖານໃຫ້ ຫວຽດນາມ ມີກຳລັງແຮງພາຍໃນ ແລະ ຄວາມຕັດສິນໃຈເພື່ອສາມາດຍາດແຍ່ງກາລະໂອກາດໃນອະນາຄົດ. ເພື່ອສາມາດບັນລຸໄດ້ບາດກ້າວບຸກທະລຸ, ທ່ານ Layton Pike, ຜູ້ຮ່ວມສ້າງຕັ້ງສະຖາບັນນະໂຍບາຍ ອົດສະຕາລີ - ຫວຽດນາມ, ຖືວ່າ:

“ເຖິງວ່າມີລະດັບການເຕີບໂຕທີ່ໜ້າຕົກສະເງິກໍຕາມ, ແຕ່ ຫວຽດນາມ ຕ້ອງສຸມໃສ່ການພັດທະນາບັນດາຂະແໜງອຸດສາຫະກຳພາຍໃນປະເທດ, ໃນນັ້ນ, ຕ້ອງມີຄວາມເອົາໃຈໃສ່ເປັນພິເສດເຖິງການພັດທະນາແຫຼ່ງຊັບພະຍາກອນມະນຸດໃຫ້ສອດຄ່ອງກັບຄວາມຕ້ອງການ ແລະ ມີຄຸນນະພາບສູງ ຫວຽດນາມ ຕ້ອງສຸມໃສ່ການພັດທະນາແຫຼ່ງຊັບພະຍາກອນມະນຸດຫຼາຍກວ່າອີກ, ໂດຍສະເພາະແມ່ນການສຶກສາມະຫາວິທະຍາໄລພາຍໃນປະເທດ. ຂ້າພະເຈົ້ າຖືວ່າ ຫວຽດນາມ ມີກາລະໂອກາດຫຼາຍຢ່າງໃນບັນຫານີ້ ກໍຄື ບັນດາຂົງເຂດຄົ້ນຄວ້າ ແລະ ປ່ຽນແປງໃໝ່, ຕົວຢ່າງຄື ຂົງເຂດເຄິ່ງຊັກນຳໄຟຟ້າ ຫຼື ກະສິກຳ”.

ຕາມທ່ານນາງ Louise Adams, ຜູ້ອຳນວຍການຝ່າຍບໍລິຫານບໍລິສັດ Aurecon, ອົດສະຕາລີ ແລ້ວ, ກາລະໂອກາດພວມມີຢູ່ ແລະ ບັນດາຄວາມມານະພະຍາຍາມຂອງ ຫວຽດນາມ ພວມກ້າວເດີນບົນເສັ້ນທາງໄປສູ່ສຳເລັດຜົນ.

“ພວກຂ້າພະເຈົ້າໄດ້ຮັບຟັງບັນດາລັດຖະມົນຕີຂອງ ຫວຽດນາມ ເວົ້າວ່າ ຫວຽດນາມ ຢາກສວມບົດບາດໃຫຍ່ກວ່າໃນຕະຫຼາດທົ່ວໂລກ ແລະ ຢາກທົດສອບຕົນເອງໃນບັນດາຂົງເຂດໃໝ່ ເຊັ່ນການຫັນປ່ຽນພະລັງງານ, ເສດຖະກິດສີຂຽວ, ການເບິ່ງແຍງປະຊາຊົນ ແລະ ສ້າງອະນາຄົດວັດທະນາຖາວອນ. ດ້ວຍຄວາມເຂົ້າໃຈຂອງຕົນກ່ຽວກັບ ຫວຽດນາມ, ຂ້າພະເຈົ້າຖືວ່າ ຫວຽດນາມ ມີຄວາມຄາດຫວັງ ແລະ ຫວຽດນາມ ຈະຍາດໄດ້ສິ່ງທີ່ຕົນເອງປາດຖະໜາ”.

ດ້ວຍຄວາມຕັດສິນໃຈສູງ ພ້ອມກັບການຍາດແຍ່ງກາລະໂອກາດ ທ່າໄດ້ປຽບ, ຫວຽດນາມ ຈະສວມບົດບາດໃຫຍ່ກວ່າໃນຕະຫຼາດທົ່ວໂລກ, ສ້າງອະນາຄົດທີ່ວັດທະນາຖາວອນ./.