ການສົນທະນາ Shangri-La ຄັ້ງທີ 5 ຫາກໍສິ້ນສຸດລົງຢູ່ສິງກະໂປພາຍຂດຳເນີນມາເປັນເວລາ 3 ວັນ. ໂດຍຖືກຈັດຂຶ້ນໃນສະພາບຄວາມໝັ້ນຄົງພາກພື້ນພວມຢືນຢູ່ຕໍ່ໜ້າສິ່ງທ້າທາຍຫຼາຍຢ່າງ, ພິເສດແມ່ນການຫຼຸດຜ່ອນຄວາມເຊື່ອໝັ້ນຍຸດທະສາດລະຫວ່າງບັນດາປະເທດທີ່ ການສົນທະນາ, ຫວຽດນາມໄດ້ປະກອບຄຳຄິດເຫັນຫຼາຍຂໍ້, ສົ່ງສານທີ່ຈະແຈ້ງກ່ຽວກັບສັນຕິພາບ, ຜົນປະໂຫຍດແຫ່ງຊາດ ແລະ ຄວາມຮັບຜິດຊອບໃນການສ້າງພື້ນຖານສັນຕິພາບລວມ.
ທ່ານຮອງລັດຖະມົນຕີກະຊວງປ້ອງກັນປະເທດຫວຽດນາມ ຫງວຽນຈີ້ວິ້ງ ກ່າວຄຳເຫັນທີີ່ການສົນທະນາ Shangri-La 2016 (ພາບ:qdnd) |
Shangri-La ແມ່ນເວທີປາໄສຄວາມໝັ້ນຄົງທີ່ສຳຄັນແຖວໜ້າຂອງພາກພື້ນ. ເຫດການນີ້ຍາມໃດກໍດຶງດູດຄວາມສົນໃຈເປັນພິເສດຂອງບັນດາລັດຖະມົນຕີ, ເຈົ້າໜ້າທີ່ກໍຄືວົງການນັກຮຽນຮູ້ໃນໂລກ. ການສົນທະນາ Shangri-La 2016 ມີການເຂົ້າຮ່ວມຂອງຜູ້ຊ່ຽນຊານ ແລະ ນັກຮຽນຮູ້ເປັນຈຳນວນຫຼາຍກວ່າໝູ່ນັບແຕ່ກ່ອນເປັນຕົ້ນມາ. ໂດຍຜ່ານໄລຍະທາງ 15 ປີແຫ່ງການສ້າງຕັ້ງ ແລະ ຂະຫຍາຍຕົວຂອງຕົນ, ການສົນທະນາ Shangri-La ມີທີ່ຕັ້ງບົດບາດສະເພາະຂອງຕົນ ຊຶ່ງບໍ່ວ່າໃນເວທີປາໄສຄັ້ງໃດອາດຈະປະຕິເສດຫຼືສົມທຽບໄດ້. ນີ້ແມ່ນແຫ່ງເພື່ອໃຫ້ບັນດານັກການເມືອງ, ເຈົ້າໜ້າທີ່ການທູດ, ການປ້ອງກັນຊາດໄດ້ແບ່ງປັນທັດສະນະຂອງຕົນກໍຄືຕີລາຄາຄວາມເປັນເອກະພາບກ່ຽວກັບສະພາບຄວາມໝັ້ນຄົງໃນພາກພື້ນ, ຈາກນັ້ນຈະສ້າງຂອບເຂດການຮ່ວມມືເປັນຮູບປະທຳ. ໂດຍແມ່ນປະເທດທີ່ມີສິດ ແລະ ຜົນປະໂຫຍດໂດຍກົງຕໍ່ບັນດາການຜັນແປດ້ານຄວາມໝັ້ນຄົງທີ່ເຄັ່ງຕຶງໃນພາກພື້ນໄລຍະມໍ່ໆມານີ້, ຫວຽດນາມເມື່ອເຂົ້າຮ່ວມເວທີ່ປາໄສໄດ້ຕັ້ງໜ້າສະແດງທັດສະນະ ແລະ ມີສຽງເວົ້າຂອງຕົນເພື່ອແນໃສ່ສ້າງສະພາບແວດລ້ອມແຫ່ງສັນຕິພາບ, ສະຖຽນລະພາບໃນພາກພື້ນ ແລະ ໃນໂລກ.
ຜົນປະໂຫຍດແຫ່ງຊາດຕ້ອງມີຄວາມກົມກ່ຽວໃນທ່າມກາງຜົນປະໂຫຍດຂອງປະຊາຊາດອື່ນໆ
ອາດຈະເຫັນໄດ້ວ່າ ມີເນື້ອໃນປະການໜຶ່ງໂດຍລຸລ່ວງໃນການສົນທະນາ Shangri-La ປີນີ້ ແລະ ກໍແມ່ນບັນຫາທີ່ຫາກສຽງຄອງຄ່ອຍຈະຊອກຫາໄດ້ວິທີການແກ້ໄຂ, ນັ້ນແມ່ນການຄວບຄຸມຄວາມເຄັ່ງຕຶງ. ບັນຫາຄວບຄຸມຄວາມເຄັ່ງຕຶງ ເບິ່ງຄືວ່າໄດ້ຖືກຍົກອອກຊ້ຳແລ້ວຊ້ຳອີກໃນບັນດາວາລະປະຊຸມທີ່ Shangri-La ປີນີ້, ແຕ່ພົ້ນເດັ່ນທີ່ສຸດ ຍັງຄົງແມ່ນວາລະປະຊຸມພິເສດກ່ຽວກັບ “ການຄວບຄຸມຄວາມເຄັ່ງຕຶງຢູ່ທະເລຕາເວັນອອກ” ແລະ ວາລະປະຊຸມຄົບຄະນະ “ບັນດາສິ່ງທ້າທາຍໃນການແກ້ໄຂການປະທະກັນ”. ແລະ ໃນທັງ 2 ວາລະປະຊຸມນີ້, ຫວຽດນາມລ້ວນແຕ່ມີບົດປະກອບຄຳເຫັນ ໂດຍຍົກອອກຂໍ້ສະເໜີແນະທີ່ ແທດຈິງ, ເໝາະສົມ ແລະ ໄດ້ຮັບຄວາມເຫັນດີເຫັນພ້ອມຈາກຫາງສຽງ.
ໃນວາລະປະຊຸມພິເສດກ່ຽວກັບ “ການຄວບຄຸມຄວາມເຄັ່ງຕຶງຢູ່ທະເລຕາເວັນອອກ” ຫວຽດນາມໄດ້ຊີ້ແຈ້ງເຖິງບັນດາມາດຕະການລະອຽດເພື່ອແກ້ໄຂການປະທະກັນ. ນັ້ນແມ່ນບັນດາຝ່າຍຄວນຕັ້ງໜ້າຊອກຫາບັນດາເຄື່ອງມືເພື່ອຈຳກັດຄວາມສ່ຽງຕໍ່ການຜິດກັນບົນທະເລຄື ສ້າງສາຍໂທລະສັບດ່ວນ, ເປັນເອກະພາບກັນກ່ຽວກັບຂໍ້ກຳນົດການປະພຶດໃນກໍລະນີເກີດຂຶ້ນຢ່າງກະທັນຫັນ, ສົມທົບກັນລາດຕະເວນຮ່ວມລະຫວ່າງກຳລັງທະຫານເຮືອ, ປະຕິບັດກົດໝາຍບົນທະເລຂອງບັນດາປະເທດອາຊຽນ. ໃນຂະນະນັ້ນ, ຢູ່ທີ່ວາລະປະຊຸມຄົບຄະນະ “ບັນດາສິ່ງທ້າທາຍໃນການແກ້ໄຂການປະທະກັນ”, ທ່ານຮອງລັດຖະມົນຕີກະຊວງປ້ອງກັນປະເທດຫວຽດນາມ ຫງວຽນຈີ້ວິ້ງ ໄດ້ນຳສະເໜີວ່າ ບັນດາປະເທດໃນພາກພື້ນຕ້ອງທັງຮ່ວມມື, ທັງຕໍ່ສູ້ເພື່ອແກ້ໄຂຄວາມບໍ່ລົງລອຍກັນ, ສະກັດກັ້ນການປະທະກັນ. ທ່ານຮອງລັດຖະມົນຕີກະຊວງປ້ອງກັນປະເທດຫວຽດນາມ ຫງວຽນຈີ້ວິ້ງ ກ່າວວ່າ :
“ ບັນດາປະເທດທັງໝົດຕ້ອງຮ່ວມມືກັນ ແລະ ຕໍ່ສູ້ເພື່ອແກ້ໄຂຄວາມບໍ່ລົງລອຍກັນ, ສະກັດກັ້ນການປະທະກັນ ເພີ່ມທະວີການຮ່ວມມືເພື່ອພ້ອມກັນພັດທະນາ, ສ້າງຄວາມເຊື່ອໝັ້ນຕໍ່ກັນ, ເຄົາລົບຜົນປະໂຫຍດອັນຊອບທຳຂອງກັນ; ພ້ອມກັນນັ້ນ ກໍທຳການຕໍ່ສູ້ເພື່ອຊອກຫາສຽງເວົ້າລວມ, ຜົນປະໂຫຍດຮ່ວມໃນການແກ້ໄຂການຂັດແຍ້ງ, ຄວາມບໍ່ລົງລອຍກັນ. ແຕ່ເຖິງວ່າຈະຮ່ວມມືຫຼືຕໍ່ສູ້ກໍຕາມ, ກ່ອນອື່ນໝົດຕ້ອງອີງບົນຈິດໃຈສະເໝີພາບ, ເຄົາລົບບັນດາຫຼັກການຂອງກົດໝາຍສາກົນ, ຖືນັ້ນແມ່ນມາດຖານເພື່ອໃຫ້ບັນດາຝ່າຍທີ່ກ່ຽວຂ້ອງແກ້ໄຂການຂັດແຍ້ງ, ຄວາມບໍ່ລົງລອຍກັນ, ຫຼຸດຜ່ອນຄວາມສ່ຽງເກີດການປະທະກັນ; ຍຶດໝັ້ນທັດສະນະແກ້ໄຂດ້ວຍມາດຕະການໂດຍສັນຕິວິທີ, ບໍ່ນຳໃຊ້ກຳລັງອາວຸດຫຼືນາບຂູ່ນຳໃຊ້ກຳລັງອາວຸດຢ່າງເດັດຂາດ”
ເຊີດຊູຄວາມເຄົາລົບກົດໝາຍ
ທີ່ການສົນທະນາ Shangri-La ຄັ້ງນີ້, DOC ແລະ COC ເບິ່ງຄືວ່າ ຖືກເຕື້ອງເຖິງຫຼາຍເທື່ອເທົ່າທຽມກັບ “ ທະເລຕາເວັນອອກ”. ເພາະຫຼາຍປະເທດໃນພາກພື້ນ ແລະ ໃນໂລກທີ່ມີຄວາມສົນໃຈຕໍ່ຂົງເຂດນີ້ ລ້ວນແຕ່ມີຄວາມຫວັງຢາກແກ້ໄຂການຂັດແຍ້ງກັນດ້ວຍມາດຕະການໂດຍສັນຕິວິທີໂດຍອີງໃສ່ກົດໝາຍສາກົນຄືຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ(DOC) ປະມວນຂໍ້ກຳນົດກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC), ສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982. ທີ່ເວທີປາໄສຄັ້ງນີ້, ຫວຽດນາມກໍມີທັດສະນະເຊັ່ນດຽວກັນກັບບັນດາປະເທດ ນັ້ນແມ່ນເຊີດຊູກົດໝາຍສາກົນໃນການແກ້ໄຂການຂັດແຍ້ງກັນ. ທ່ານຮອງລັດຖະມົນຕີກະຊວງປ້ອງກັນປະເທດຫວຽດນາມ ຫງວຽນຈີ້ວິ້ງ ຢືນຢັນວ່າ :
“ ທັດສະນະຂອງຫວຽດນາມກ່ຽວກັບບັນຫາທະເລຕາເວັນອອກ ນັ້ນແມ່ນແກ້ໄຂດ້ວຍມາດຕະການໂດຍສັນຕິວິທີໂດຍອີງໃສ່ກົດໝາຍສາກົນ. ໃນສະພາວະສັບສົນຄືໃນປະຈຸບັນນັ້ນ, ກ່ອນອື່ນໝົດ ພວກເຮົາປະຕິບັດນະໂຍບາຍນັ້ນດ້ວຍການຢືນຢັນອຳນາດອະທິປະໄຕ. ພວກເຮົາຄັດຄ້ານຖະແຫຼງການທັງໝົດທີ່ແຕກຕ່າງກັບຖະແຫຼງການກ່ຽວກັບອະທິປະໄຕຂອງຫວຽດນາມເພາະຖະແຫຼງການຂອງພວກເຮົາມີລັກສະນະປະຫວັດສາດ ແລະ ສອດຄ່ອງກັບກົດໝາຍສາກົນ ”
ຕໍ່ໜ້າສະພາບຂາດສະຖຽນລະພາບທີ່ພວມນັບມື້ນັບເພີ່ມຂຶ້ນໃນພາກພື້ນ, ອາດຈະຢືນຢັນວ່າ ບໍ່ມີປະເທດໃດທີ່ຈະຢືນຢູ່ນອກ ຂະນະທີ່ມີສ່ວນກ່ຽວຂ້ອງເຖິງສະຖຽນລະພາບໃນພາກພື້ນ. ເພາະສະນັ້ນ, ດ້ວຍການປຶກສາຫາລືຫຼາຍບັນຫາທີ່ເຄັ່ງຮ້ອນ, Shangri-La ສືບຕໍ່ແມ່ນເວທີປາໄສທີ່ສຳຄັນເພື່ອໃຫ້ບັນດາປະເທດໃນພາກພື້ນປຶກສາຫາລືເພື່ອຊອກຫາບັນດາວິທີການແກ້ໄຂໃຫ້ແກ່ບັນດາບັນຫາຄວາມໝັ້ນຄົງໃນປະຈຸບັນ, ປະກອບສ່ວນສ້າງພາກພື້ນອາຊີ-ປາຊີຟິກແຫ່ງສັນຕິພາບ, ສະຖຽນລະພາບ ແລະ ວັດທະນາຖາວອນ. ແລະ ຫວຽດນາມໃນຖານະແມ່ນປະເທດທີ່ຄວາມຮັບຜິດຊອບ ປະກອບສ່ວນຢ່າງຕັ້ງໜ້າເຂົ້າໃນຄວາມມານະພະຍາຍາມລວມນັ້ນ.