ວັນທີ 24/10 ຊຶ່ງເປັນຂີດໝາຍຄົບຮອບ 70 ປີແຫ່ງວັນສ້າງຕັ້ງສະຫະປະຊາຊາດ(24/10/1945-24/10/2015). ຈາກຈຳນວນ 51 ປະເທດສະມາຊິກ, ມາຮອດປະຈຸບັນ, ສະຫະປະຊາຊາດໄດ້ມີ 193 ປະເທດສະມາຊິກ ແລະ 2 ປະເທດສັງເກດການ, ກາຍເປັນອົງການສາກົນທີ່ມີຜົນສະທ້ອນໃຫຍ່ທີ່ສຸດເຖິງຊີວິດສາກົນ, ເປັນພື້ນຖານທີ່ຂາດບໍ່ໄດ້ຂອງໂລກແຫ່ງສັນຕິພາບ ແລະ ວັດທະນາຖາວອນ. 38 ປີ ນັບຕັ້ງແຕ່ເຂົ້າເປັນສະມາຊິກ ສະຫະປະຊາຊາດ, ຫວຽດນາມຍາມໃດກໍແມ່ນ ປະເທດສະມາຊິກທີ່ມີຄວາມຮັບຜິດຊອບ ແລະ ປະກອບສ່ວນຢ່າງມີປະສິດທິຜົນເຂົ້າໃນການເຄື່ອນໄຫວຂອງອົງການນີ້.
ທ່ານປະທານປະເທດຫວຽດນາມ ເຈືອງເຕີ້ນຊາງ ແລະ
ທ່ານເລຂາທິການໃຫຍ່ສະຫະປະຊາຊາດ Ban Ki-Moon |
ນັບຕັ້ງແຕ່ໄດ້ຮັບການສ້າງຕັ້ງ, ສະຫະປະຊາຊາດຍາມໃດກໍເຄື່ອນໄຫວຕາມທິດນຳແມ່ນຮັບປະກັນໂລກສັນຕິພາບ ແລະ ຍຸດຕິທຳກວ່າ. ຜ່ານ 70 ປີ, ສະຫະປະຊາຊາດໄດ້ກາຍເປັນອົງການໜຶ່ງດຽວອັນຖືກຕ້ອງຕາມກົດໝາຍ ແລະ ມີຂອບເຂດການເຄື່ອນໄຫວຢ່າງກ້ວາງຂວາງຍ້ອນມີຈຳນວນບັນດາປະເທດສະມາຊິກຢູ່ເກືອບທຸກທະວີບໃນໂລກ. ບໍ່ພຽງແຕ່ມີສິດອຳນາດໃຫຍ່ໃນຂົງເຂດພັດທະນາ, ຄວາມໝັ້ນຄົງ, ປົກປັກຮັກສາສັນຕິພາບເທົ່ານັ້ນ, ສະຫະປະຊາຊາດຍັງແມ່ນອົງການປົກປ້ອງບັນດາສິດພື້ນຖານຂອງມະນຸດໃນທົ່ວໂລກອີກດ້ວຍ.
ກາຍເປັນປະເທດສະມາຊິກທີ່ຕັ້ງໜ້າ
ກ່ອນນີ້ 38 ປີ, ວັນທີ 20/9/1977, ຫວຽດນາມໄດ້ເຂົ້າເປັນສະມາຊິກ ສະຫະປະຊາຊາດຢ່າງເປັນທາງການ. ນີ້ແມ່ນເຫດການເປີດສັງກາດໃໝ່ໃຫ້ແກ່ນະໂນບາຍຫັນການພົວພັນຕ່າງປະເທດເປັນຫຼາຍຮູບຫຼາຍແບບ ແລະ ຫຼາຍຝ່າຍຂອງຫວຽດນາມ. ເມື່ອເຂົ້າເປັນສະມາຊິກ ສະຫະປະຊາຊາດ, ຫວຽດນາມຍາມໃດກໍພະຍາຍາມເຮັດສຳເລັດໜ້າທີ່ຂອງຕົນ, ເປັນເຈົ້າການຍົກອອກຂໍ້ລິເລີ່ມທີ່ແທດຈິງຫຼາຍຂໍ້. ຫວຽດນາມຍາມໃດກໍສະໜັບສະໜູນບັນດາເປົ້າໝາຍແຖວໜ້າຂອງສະຫະປະຊາຊາດເຊັ່ນ: ປົກປັກຮັກສາສັນຕິພາບ, ຄວາມໝັ້ນຄົງ, ຕ້ານການຊ່ວງເສັງປະກອບອາວຸດ, ຫຼຸດກຳລັງທັບ, ສະກັດກັ້ນ ແລະ ແກ້ໄຂບັນດາການຂັດແຍ້ງ, ປະທະກັນດ້ວຍມາດຕະການໂດຍສັນຕິວິທີ, ເພີ່ມທະວີການພົວພັນມິດຕະພາບລະຫວ່າງບັນດາປະຊາຊາດ. ຫວຽດນາມກໍແມ່ນປະເທດເຂົ້າຮ່ວມລົງນາມໃນສົນທິສັນຍາສາກົນຫຼາຍສະບັບໂດຍສະຫະປະຊາຊາດຈັດຕັ້ງ. ປີ 2009, ຫວຽດນາມໄດ້ຮັບເລືອກຕັ້ງເປັນປະທານໝູນວຽນກອງປະຊຸມຫຼຸດກຳລັງທັບ ແລະ ປະຈຸບັນພວມເຂົ້າຮ່ວມການເຄື່ອນໄຫວປົກປັກຮັກສາສັນຕິພາບໃນບາງຂົງເຂດປອດອາວຸດ, ສອດຄ່ອງກັບເງື່ອນໄຂ ແລະ ຄວາມສາມາດຂອງຕົນ. ທ່ານເລຂາທິການໃຫຍ່ສະຫະປະຊາຊາດ Ban Ki-Moon ໄດ້ເຄີຍເວົ້າວ່າ ຫວຽດນາມເຂົ້າຮ່ວມກຳລັງປົກປັກຮັກສາສັນຕິພາບແຫ່ງສະຫະປະຊາຊາດ ໄດ້ນຳມາເຊິ່ງກຽດສັກສີ ແລະ ຄຸນຄ່າໃຫ້ແກ່ການເຄື່ອນໄຫວນີ້ຂອງສະຫະປະຊາຊາດ.
ຫວຽດນາມກໍແມ່ນປະເທດນຳໜ້າໃນການເຮັດສຳເລັດກ່ອນກຳນົດກ່ຽວກັບຫຼາຍເປົ້າໝາຍພັດທະນາສະຫັດສະວັດ, ພ້ອມກັນນັ້ນ ກໍແມ່ນໜຶ່ງໃນຈຳນວນ 8 ປະເທດປະຕິບັດທົດລອງຂໍ້ລິເລີ່ມ “ ເປັນເອກະພາບກະທຳ ” ແລະ ພວມຜັນຂະຫຍາຍຂໍ້ລິເລີ່ມນີ້ໃຫ້ສຳເລັດຜົນ. ໃນຖານະຕຳແໜ່ງເປັນປະທານສະພາຄວາມໝັ້ນຄົງສະຫະປະຊາຊາດເມື່ອເດືອນ 7/2009, ຫວຽດນາມເປັນຄັ້ງທຳອິດໄດ້ຍົກອອກຂໍ້ລິເລີ່ມທາບທາມຄຳເຫັນບັນດາປະເທດສະມາຊິກສະຫະປະຊາຊາດກ່ຽວກັບບົດລາຍງານກຽວ່ກັບວຽກງານປະຈຳປີຂອງ ສະພາຄວາມໝັ້ນຄົງສະຫະປະຊາຊາດ ແລະ ໄດ້ຮັບການຕີລາຄາສູງຈາກຫຼາຍປະເທດ. ທີ່ບັນດາເວທີປາໄສສະຫະປະຊາຊາດ, ຫວຽດນາມໄດ້ຕັ້ງໜ້າເຂົ້າຮ່ວມປຶກສາຫາລືເພື່ອແກ້ໄຂບັນດາບັນຫາທີີ່ມີຄວາມສົນໃຈຮ່ວມກ່ຽວກັບເສດຖະກິດ, ສັງຄົມ, ວັດທະນະທຳ, ມະນຸດສະທຳ ແລະ ຮັບປະກັນສິດທິມະນຸດ, ພ້ອມກັນນັ້ນ, ກໍປະກອບສ່ວນເຂົ້າໃນການປະຕິຮູບບັນດາອົງການ ສະຫະປະຊາຊາດຕາມທິດເປີດກ້ວາງ, ກະຈ່າງແຈ້ງ, ປະຊາທິປະໄຕ ແລະ ມີປະສິດທິຜົນ.
ທີ່ຕັ້ງບົດບາດນນັບມື້ນັບຍົກສູງຂຶ້ນ
ຕະຫຼອດ 38 ປີທີ່ຜ່ານມາ, ຫວຽດນາມຍາມໃດກໍປະຕິບັດນະໂຍບາຍການຕ່າງປະເທດເອກະລາດ, ເປັນເຈົ້າຕົນເອງ,ສັນຕິພາບ, ເປີດກ້ວາງ, ຫັນການພົວພັນຕ່າງປະເທດເປັນຫຼາຍຮູບຫຼາຍແບບ ແລະ ຫຼາຍຝ່າຍ. ປະຊາຄົມໂລກໄດ້ເຫັນແຈ້ງວ່າ ຫວຽດນາມແມ່ນຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ມີຄວາມຮັບຜິດຊອບ. ຫວຽດນາມໄດ້ຕັ້ງໜ້າ, ເປັນເຈົ້າການເຂົ້າຮ່ວມບັນດາວຽກງານຂອງສະຫະປະຊາຊາດ, ປະກອບສ່ວນຍົກສູງທີ່ຕັ້ງບົດບາດໃນເວທີສາກົນ, ຕໍ່ສູ້ເພື່ອປົກປ້ອງບັນດາຜົນປະໂຫຍດຂອງປະເທດຊາດບົນຫຼັກການເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນ, ແກ້ໄຂບັນດາການຂັດແຍ້ງກັນດ້ວຍມາດຕະການໂດຍສັນຕິວິທີ, ຮັບປະກັນຜົນປະໂຫຍດອັນຊອບທຳຂອງທຸກໆ ປະເທດສະມາຊິກ, ໂດຍສະເພາະແມ່ນບັນດາປະເທດດ້ອຍພັດທະນາ. ໂດຍຮັບຮູ້ບັນດາການປະກອບສ່ວນຫຼາຍດ້ານຂອງຫວຽດນາມເຂົ້າໃນວຽກງານຂອງ ສະຫະປະຊາຊາດ, ບັນດາປະເທດສະມາຊິກມີຄວາມໄວ້ວາງໃຈເລືອກຕັ້ງຫວຽດນາມເປັນກຳມະການບໍ່ປະຈຳ ສະພາຄວາມໝັ້ນຄົງສະຫະປະຊາຊາດອາຍຸການ 2008-2009, ຮັບເລືອກຕັ້ງເຂົ້າເປັນສະມາຊິກສະພາສິດທິມະນຸດອາຍຸການ 2014-2016 ແລະ ເມື່ອບໍ່ດົນມານີ້, ຫວຽດນາມໄດ້ຮັບຂ່າວມ່ວນເມື່ອໄດ້ຮັບເລືອກຕັ້ງເຂົ້າເປັນສະມາຊິກສະມັດຊາເສດຖະກິດສັງຄົມ ສະຫະປະຊາຊາດອາຍຸການ 2016-2018 ດ້ວຍຈຳນວນບັດສະໜັບສະໜູນຫຼາຍທີ່ສຸດ. ນີ້ບໍ່ພຽງແຕ່ແມ່ນການຮັບຮູ້ຂອງປະຊາຄົມໂລກກ່ຽວກັບບັນດາຜົນງານຂອງຫວຽດນາມໃນວິວັດການປ່ຽນແປງໃໝ່ເທົ່ານັ້ນ, ຫາກຍັງແມ່ນການຮັບຮູ້ທີ່ຕັ້ງບົດບາດຂອງຫວຽດນາມໃນການປະກອບສ່ວນແກ້ໄຂບັນດາບັນຫາລວມຂອງມວນມະນຸດ.
ດ້ວຍແນວທາງການຕ່າງປະເທດເປີດກ້ວາງຂອງຫວຽດນາມ, 38 ປີທີ່ຜ່ານມາ, ການພົວພັນລະຫວ່າງຫວຽດນາມ- ສະຫະປະຊາຊາດໄດ້ພັດທະນາຢ່າງກ້າວກະໂດດຂັ້ນໃນທຸກດ້ານ. ເຂົ້າເປັນສະມາຊິກສະຫະປະຊາຊາດ, ຫວຽດນາມໄດ້ຍົກສູງທີ່ຕັ້ງບົດບາດຂອງຕົນຢ່າງບໍ່ຢຸດຢັ້ງ, ປະກອບສ່ວນສຳຄັນເຂົ້າໃນການ ປົກປັກຮັກສາພື້ນຖານສັນຕິພາບ, ສະຖຽນລະພາບ, ພັດທະນາຢູ່ໃນພາກພື້ນ ແລະ ໃນໂລກ.