(vovworld)- ປີ 2015, ຫວຽດນາມ ສຳເລັດການເຂົ້າຮ່ວມສັນຍາການຄ້າເສລີ ຈຳນວນຫນຶ່ງ, ພົ້ນເດັ່ນແມ່ນສັນຍາຄູ່ຮ່ວມມືເສດຖະກິດຍຸດທະສາດຂ້າມປາຊີຟີກ (TPP), ສັນຍາການຄ້າເສລີ ຫວຽດນາມ - ສະຫະພາບເອີລົບ (EU) ແລະ ປະຊາຄົມເສດຖະກິດ ອາຊຽນ (AEC). ເວລານັ້ນ ພື້ນຖານເສດຖະກິດຫວຽດນາມ ຈະມີກຳລັງຫນູນພັດທະນາໃຫມ່ຕື່ມອີກ. ເຖິງຢ່າງໃດກໍຕາມ, ຄຽງຄູ່ກັບບັນດາສັນຍານີ້ ແມ່ນສິ່ງທ້າທາຍບໍ່ແມ່ນຫນ້ອຍ, ຮຽກຮ້ອງອົງການກ່ຽວຂ້ອງ, ປະຊາຄົມວິສາຫະກິດຕ້ອງເປັນເຈົ້າການເພື່ອຍາດແຍ່ງກາລະໂອກາດນີ້ຢ່າງສຸດຂີດ.
ບັນດາສັນຍາການຄ້າທີ່ກ່າວມາຂ້າງເທິງນັ້ນ ຈະສົ່ງຜົນກະທົບທີ່ດີເຖິງການເຄື່ອນໄຫວຜະລິດ ດຳເນີນທຸລະກິດຂອງວິສາຫະກິດ ແຕ່ຄຽງຄູ່ກັບບັນດາສັນຍາດັ່ງກ່າວ ແມ່ນບັນດາຮົ້ວກີດຂວາງກ່ຽວກັບເຕັກນິກ, ຊັບສິນພູມປັນຍາເຄື່ອງໝາຍການຄ້າ, ຮົ້ວກີດຂວາງກ່ຽວກັບນະໂຍບາຍຮັບປະກັນຊີວິດສັງຄົມ, ສິ່ງແວດລ້ອມ.. ຊື່ງບັນດາປະເທດນຳເຂົ້າວາງອອກມາດຖານສູງທີ່ສຸດ.
ທ່ານ ຫວູຮູຍຮ່ວາງ, ລັດຖະມົນຕີວ່າການກະຊວງອຸດສາຫະກຳ - ການຄ້າ ແລະ ທ່ານ Andrei A. Slepnhev ລັດຖ່ະມົນຕິກະຊວງການຄ້າ ຄະນະກຳມະການເສດຖະກິດອາຊີ -ເອີລົບ
ພາບ:.vnexpress.net
|
ສິ່ງທ້າທາຍໄປຄຽງຄູ່ກັບກາລະໂອກາດ
ການເຈລະຈາຄັ້ງທີ 11 ແລະ ກໍແມ່ນວາລະສຸດທ້າຍກ່ຽວກັບສັນຍາການຄ້າເສລີລະຫວ່າງຫວຽດນາມ ແລະ ອີຢູ ສິ້ນສຸດ, ຈະລົງນາມໃນ 6 ເດືອນຕົ້ນປີ 2015. ນີ້ແມ່ນສັນຍາ ດ້ວຍລະດັບຫັນເປັນເສລີຢ່າງເລິກເຊິ່ງກ້ວາງຂວາງ. ກ່ອນອື່ນໝົດ, ສິນຄ້າຂອງຫວຽດນາມ ສົ່ງໄປຂາຍຢູ່ຕະຫລາດ ອີຢູ ໄດ້ຮັບຜົນປະໂຫຍດໃຫຍ່ກ່ຽວກັບອັດຕາພາສີ. ຄິດໄລ່ໃນເບື້ອງຕົ້ນ, ອີຢູ ຈະຍົກເລີກພາສີສຳລັບ 90 ປະເພດ. ບັນດາຂະແຫນງໄດ້ຮັບຜົນປະໂຫຍດກວ່າໝູ່ ນັ້ນແມ່ນ: ຕຳ່ແຜ່ນຕັດຫຍິບ, ເກີບຫນັງ, ປຸງແຕ່ງອາຫານ… ຕາມການຕີລາຄາຂອງຫ້ອງການການຄ້າ ເອີລົບ ປະຈຳຫວຽດນາມ (Euro Cham) ແລ້ວ, ພາຍຫລັງສັນຍາການຄ້າເສລີ ຫວຽດນາມ -ອີຢູ ໄດ້ຮັບການລົງນາມ ຈະສົ່ງຜົນກະທົບຢ່າງຕັ້ງຫນ້າສຳລັບຫວຽດນາມ, ຊ່ວຍໃຫ້ຍອດຜະລິດຕະພັນພາຍໃນຂອງ ຫວຽດນາມເພີ່ມຂຶ້ນ ແຕ່ 10-15%. ນອກນັ້ນ, ສັນຍາກໍແມ່ນເງື່ອນໄຂຊຸກຍູ້ການສົ່ງອອກຂອງຫວຽດນາມໄປຍັງ ອີຢູ ເພີ່ມຂຶ້ນ ແຕ່ 30-40%.
ໃນຂະນະນັ້ນ, ສັນຍາຄູ່ຮ່ວມມືການຄ້າຂ້າມປາຊີຟີກ TPP ລວມມີ 12 ພື້ນຖານເສດຖະກິດສະມາຊິກ ພວມລໍຄອຍ ສັນຍາໄດ້ຮັບການລົງນາມໃນປີ 2015, ດ້ວຍຂອບຂະຫນາດກວມເຖິງ 40% ຍອດ GDP ທົ່ວໂລກ, ກາຍເປັນເຂດການຄ້າເສລີໃຫຍ່ກວ່າໝູ່ໃນໂລກ. ຫວຽດນາມ ແມ່ນຫນຶ່ງໃນບັນດາປະເທດໄດ້ຮັບຜົນປະໂຫຍດຫລາຍກວ່າໝູ່, ເພາະວ່າຈຸດໝາຍໃຫຍ່ສຸດ ເມື່ອລົງນາມໃນສັນຍາ TPP ແມ່ນຫລຸດຜ່ອນອັດຕາພາສີ ແລະ ຍົກເລີກບັນດາຮົ້ວກີດຂວາງດ້ານການຄ້າ. ເມື່ອບັນດາອັດຕາພາສີຫລຸດລົງ ກໍໝາຍຄວາມວ່າ ບັນດາວິສາຫະກິດຫວຽດນາມ ເພີ່ມທະວີການສົ່ງອອກໄປຍັງ 11 ປະເທດສະມາຊິກ, ໃນນັ້ນ ມີຕະຫລາດມີກຳລັງຊື້ສູງ ແລະ ເປັນປົກກະຕິຄື: ຕະຫລາດອາເມລິກາ, ຍີ່ປຸ່ນ, ການາດາ.
ສຳລັບ ປະຊາຄົມເສດຖະກິດ ອາຊຽນ (AEC), ຜົນປະໂຫຍດໃຫຍ່ສຸດແມ່ນວິສາຫະກິດຫວຽດນາມ ຈະໄດ້ດຳເນີນທຸລະກິດໃນສະພາບແວດລ້ອມຂະຫຍັນຂັນເຄື່ອນ. ພິເສດ ທີ່ຕັ້ງພູມສາດໃຈກາງຂອງບັນດາສາຍທາງຂົນສົ່ງສິນຄ້າທົ່ວໂລກ ກໍແມ່ນທ່າໄດ້ປຽບເພື່ອໃຫ້ສິນຄ້າຫວຽດນາມ ຫລຸດຜ່ອນລາຄາຜະລິດຕະພັນ.
ເມື່ອຕີລາຄາລວມກ່ຽວກັບກາລະໂອກາດຂອງບັນດາວິສາຫະກິດ, ທ່ານ ໂດທັງຫາຍ, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າຫວຽດນາມ ຖືວ່າ:
“ນີ້ແມ່ນກາລະໂອກາດໃຫຍ່ສຳລັບບັນດາວິສາຫະກິດ. ບັນດາປະເພດສິນຄ້າຂອງພວກເຮົາສາມາດແຊກຊືມເຂົ້າຕະຫລາດນີ້ ແມ່ນບັນດາປະເພດສິນຄ້າມີທ່າແຮງຂອງຫວຽດນາມ ຊື່ງລວມມີ: ເກີບຫນັງ, ເຄື່ອງຕ່ຳແຜ່ນຕັດຫຍິບ, ສິນໃນນ້ຳ, ເຄື່ອງ ສິລະປະຫັດຖະກຳ.. ປະຈຸບັນ ສຳລັບປະເພດສິນຄ້າມີທ່າແຮງນີ້ ຈະສ້າງເງື່ອນໄຂສະດວກເພື່ອໃຫ້ວິສາຫະກິດຍູ້ແຮງການສົ່ງອອກໃນໄລຍະຈະມາເຖິງ.”
ຄຽງຄູ່ກັບບັນດາການກະທົບຢ່າງຕັ້ງຫນ້າ, ການເຂົ້າຮ່ວມກັບບັນດາສັນຍາ FTA ກໍເຮັດໃຫ້ຕະຫລາດພາຍໃນຖືກແກ້ງແຍ້ງຢ່າງແຮງ, ການນຳເຂົ້າເກີນດຸ່ນເພີ່ມຂຶ້ນສູງ. ນອກນັ້ນ ກະສິກຳ, ຊາວກະສິກອນ, ຊົນນະບົດ, ພົ້ນເດັ່ນ ແມ່ນຜະລິດຕະພັນກະເສດຂອງຫວຽດນາມ ພວມຖືກແກ້ງແຍ້ງຢ່າງແຮງຢູ່ຕະຫລາດພາຍໃນ. ທ່ານ ໂດທັງຫາຍ, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າຫວຽດນາມ ໄດ້ໃຫ້ຂໍ້ສັງເກດວ່າ:
“ເມື່ອພວກເຮົາໄດ້ຊົມໃຊ້ອັດຕາພາສີ 0% ຢູ່ບັນດາຕະຫລາດທີ່ພວກເຮົາລົງນາມໃນສັນຍາ, ແນ່ນອນວ່າ ຢູ່ຫວຽດນາມ ຕ້ອງຍອມຮັບການຫລຸດຜ່ອນອັດຕາພາສີຂອງບາງປະເພດສິນຄ້າ. ການເຄື່ອນໄຫວສົ່ງເສີມການຄ້າເວົ້າລວມ ແລະ ການເຄື່ອນໄຫວຂອງຂະແຫນງອຸດສາຫະກຳ ເວົ້າສະເພາະ ໄດ້ມີການກຳນົດທິດ ນັ້ນແມ່ນຕ້ອງໃກ້ຊິດຕິດແທດກັບທ່າໄດ້ປຽບ ເມື່ອຫວຽດນາມ ເຂົ້າຮ່ວມ ແລະ ລົງນາມໃນບັນດາສັນຍາ, ພວກເຮົາມີທ່າແຮງໃນປະເພດສິນຄ້າໃດຕ້ອງຍູ້ແຮງການສົ່ງອອກໄປຍັງຕະຫລາດນັ້ນ. ສັນຍາການຄ້າທັງໝົດລ້ວນແຕ່ມີຄວາມສະດວກ ແລະ ຄວາມຫຍຸ້ງຍາກ. ຖ້າຫາກວິສາຫະກິດຮູ້ຈັກເຖິງການຍາດແຍ່ງກາລະໂອກາດ ຈະມີຄວາມສະດວກ ແລະ ບຸລິມະສິດກວ່າ.”
ຍາດແຍ່ງກາລະໂອກາດເພື່ອຜ່ານຜ່າສິ່ງທ້າທາຍ
ຕາມທ່ານ ຫວູຮູຍຮ່ວາງ, ລັດຖະມົນຕີວ່າການກະຊວງອຸດສາຫະກຳ ແລະ ການຄ້າຫວຽດນາມແລ້ວ, ເມື່ອ ຕັດສິນເຈລະຈາສັນຍາການຄ້າເສລີ ກັບຄູ່ຮ່ວມມື ລັດຖະບານ ໄດ້ຄິດໄລ່ເຖິງທ່າໄດ້ປຽບ ແລະ ວິວັດການປົກປ້ອງການຜະລິດພາຍໃນປະເທດໃຫ້ເໝາະສົມກັບການເຊື່ອມໂຍງ ແລະ ປົກປ້ອງຕະຫລາດພາຍໃນປະເທດ. ເມື່ອເວົ້າເຖິງການກະກຽມຂອງຫວຽດນາມ, ທ່ານ ຫວູຮູຍຮ່ວາງ, ລັດຖະມົນຕີວ່າການກະຊວງອຸດສາຫະກຳ ແລະການຄ້າ ໃຫ້ຮູ້ວ່າ:
“ຕາມການຊີ້ນຳຂອງລັດຖະບານ, ໃນ ປີ 2015 ນີ້ ແລະ ຊຸມປີຕໍ່ໄປ, ເມື່ອສັນຍາການຄ້າເສລີຫລາຍສະບັບມີຜົນສັກສິດ, ວຽກງານສື່ສານແມ່ນສຳຄັນທີ່ສຸດ. ທີສອງ ບັນດາອົງການລັດ ຕ້ອງມີຄວາມຮັບຜິດຊອບໃຫຍ່, ຕ້ອງສົມທົບກັບປະຊາຄົມວິສາຫະກິດເປັນປະຈຳ, ສຳພັດກັບປະຊາຊົນ ເພື່ອສ່ອງແສງຢ່າງທັນການ ແລະ ແລກປ່ຽນກັບບັນດາຄູ່ຮ່ວມມື ເມື່ອບັນດາຄຳໝັ້ນສັນຍາທີ່ໄດ້ລົງນາມເກີດບັນຫາໃຫມ່ ຕ້ອງປັບປຸງຢ່າງທັນການ.”
ຍາດແຍ່ງບັນດາກາລະໂອກາດດີໂດຍ ສັນຍາ FTA ນຳມາໃຫ້ ຈະເປັນການກະຕຸກຊຸກຍູ້ຢ່າງແຮງໃຫ້ແກ່ການພັດທະນາພື້ນຖານເສດຖະກິດ. ສະນັ້ນ ເລື່ອງອົງການກ່ຽວຂ້ອງ, ປະຊາຄົມວິສາຫະກິດ ແລະ ປະຊາຊົນ ເປັນເຈົ້າການໃນການຕອບສະຫນອງບັນດາເງື່ອນໄຂຂອງສັນຍາ FTA ແມ່ນຄວາມຈຳເປັນທີ່ສຸດ, ປະກອບສ່ວນສຳຄັນເຂົ້າໃນວິວັດການເຊື່ອມໂຍງຢ່າງເລິກເຊິ່ງ, ກວ້າງຂວາງຂອງປະເທດຊາດ.