(vovworld)- ປະທານາທິບໍດີ ອິນເດຍ Pranab Mukherjee ພວມໄປຢ້ຽມຢາມເຖິງ 3 ປະເທດໃນພາກພື້ນ ອາຊີຕາເວັນຕົກ ລວມມີ: ຈໍແດນ, ປາແລດສະຕີນ ແລະ ອິດສະຣາແອນ. ການຢ້ຽມຢາມ ບໍ່ພຽງແຕ່ຊ່ວຍໃຫ້ ອິນເດຍ ຮັດແຫນ້ນການພົວພັນກັບບັນດາປະເທດເຫົຼ່ານັ້ນໃນຫລາຍຂົງເຂດກວ່າອີກ ຫາກຍັງຊ່ວຍອິນເດຍ ຍົກລະດັບ ຜົນສະທ້ອນຂອງຕົນຢູ່ພາກພື້ນ ອີກດ້ວຍ.
ປະທານາທິບໍດີ ອິນເດຍ Pranab Mukherjee
ພາບ:indiatvnews.com
|
ນີ້ເປັນຄັ້ງທຳອິດ ປະທານາທິບໍດີ ອິນເດຍ Pranab Mukherjee ໄປຢ້ຽມຢາມ 3 ປະເທດ ແລະ ເຂດແຄ້ວນດັ່ງກ່າວ. ພາຍຫລັງການເຄື່ອນໄຫວທາງການທູດຢ່າງລຽນຕິດຂອງ ນີວເດລີ ນັບແຕ່ຕົ້ນປີມາຮອດປະຈຸບັນ, ໂດຍສຸມໃສ່ສ່ວນຫລາຍເຂົ້າພາກພື້ນ ອາຊີ, ການຢ້ຽມຢາມເຖິງ 3 ປະເທດ ອາຊີຕາເວັນຕົກນີ້ ສືບຕໍ່ສະແດງໃຫ້ເຫັນຍຸດທະສາດການທູດຫລາຍທິດຂອງອິນເດຍ. ບໍ່ພຽງແຕ່ປະກອບສ່ວນຊຸກຍູ້ການພົວພັນລະຫວ່າງ ອິນເດຍ ກັບ 3 ປະເທດດັ່ງກ່າວເທົ່ານັ້ນ ຫາກການຢ້ຽມຢາມຂອງປະທານາທິບໍດີ ອິນເດຍ Pranab Mukherjee ຍັງແນໃສ່ຮ່ວມມືຕ້ານການກໍ່ການຮ້າຍ, ພ້ອມທັງ ສະແດງໃຫ້ເຫັນບົດບາດຂອງ ອິນເດຍ ໃນການຊອກຫາມາດຕະການ “ສອງລັດ” ລະຫວ່າງ ປາແລດສະຕີນ ແລະ ອິດສະຣາແອນ.
ຍູ້ແຮງການພົວພັນໃນທຸກຂົງເຂດ
ເມື່ອສັງເກດໂດຍສັງເຂບ, 3 ປະເທດ ຢູ່ ອາຊີຕາເວັນຕົກ ດັ່ງກ່າວ ມີຄວາມຕ້ອງການຫລາຍກ່ຽວກັບການນຳເຂົ້າສິນຄ້າ. ບັນດາຂະແຫນງອຸດສາຫະກຳຜະລິດເຄື່ອງໃຊ້ສອຍ ແລະ ກະສິກຳຂອງ 3 ປະເທດນີ້ ບໍ່ທັນພັດທະນາຢ່າງແຮງ ສະນັ້ນ ການໃຊ້ສອຍພາຍໃນປະເທດ ແມ່ນອີງໃສ່ຫລາຍຈາກການນຳເຂົ້າ. ລາຍຮັບຂອງປະຊາຊົນເພີ່ມຂຶ້ນ ເຮັດໃຫ້ຄວາມຕ້ອງການໃຊ້ສອຍເພີ່ມຂຶ້ນ. ພາສີນຳເຂົ້າບັນດາປະເພດສິນຄ້າໃຊ້ສອຍທີ່ຈຳເປັນ, ຜະລິດຕະພັນເອເລັກໂຕນິກ ແລະ ຄອມພິວເຕີ ຢູ່ ພາກພື້ນນີ້ ແມ່ນຕ່ຳສົມຄວນ. ສະນັ້ນ ກາລະໂອກາດເພື່ອໃຫ້ ອິນເດຍ ເປີດກວ້າງການສົ່ງອອກໄປຍັງບັນດາຕະຫລາດນີ້ແມ່ນໃຫຍ່ຫລວງ, ເປັນຕົ້ນແມ່ນບັນດາຂົງເຂດຜະລິດຕະພັນກະເສດ, ບໍລິການ, ອຸດສາຫະກຳຊອບແວ.
ຢູ່ ຈໍແດນ, ຊື່ງແມ່ນປະເທດທຳອິດໃນການຢ້ຽມຢາມ ອາຊີຕາເວັນຕົກ ໃນເວລາ 5 ວັນ, ປະທານາທິບໍດີ ອິນເດຍ Pranab Mukherjee ໄດ້ເຂົ້າຢ້ຽມຂ່ຳນັບ ກະສັດ Abdullah 2. ການນຳສອງທ່ານ ໄດ້ປຶກສາຫາລືຫລາຍບັນຫາ ເພື່ອປັບປຸງການພົວພັນ ແລະ ຊຸກຍູ້ການຮ່ວມມືດ້ານການຄ້າສອງຝ່າຍ. ອິນເດຍ ໄດ້ໃຫ້ຄຳໝັ້ນສັນຍາ ສະຫງວນໃຫ້ ຈໍແດນ ບ້ວງສິນເຊື່ອລວມມູນຄ່າ 100 ລ້ານ USD. ສອງຝ່າຍ ກໍລົງນາມໃນຂໍ້ຕົກລົງບາງສະບັບ ເພື່ອຊຸກຍູ້ການຮ່ວມມືສອງຝ່າຍ, ຄຽງຄູ່ກັນນັ້ນ ກໍພ້ອມກັນປຶກສາຫາລືບາງບັນຫາສາກົນ ແລະ ພາກພື້ນ ຊື່ງຕ່າງຝ່າຍຕ່າງມີຄວາມສົນໃຈ.
ໃນການຢ້ຽມຢາມ ປາແລດສະຕີນ ໃນເວລາ 2 ວັນ ຄືວັນທີ 12 ແລະ 13/10, ປະທານາທິບໍດີ ອິນເດຍ Pranab Mukherjee ໄດ້ມີການເຈລະຈາກັບຄູ່ຕຳແຫນ່ງປະເທດເຈົ້າພາບ ທ່ານ Mahmoud Abbas, ພົບປະກັບນາຍົກລັດຖະມົນຕີ Rami Hamdallah ແລະ ຢ້ຽມຢາມນະຄອນ Ramallah. ໃນບັນດາການພົບປະ, ເຈລະຈານັ້ນ ການນຳ ນິວເດລີ ລ້ວນແຕ່ຢືນຢັນ ອິນເດຍ ສະຫນັບສະຫນູນ ປາແລດສະຕີນ ສ້າງຕັ້ງລັດສະເພາະຂອງຕົນ. ອິນເດຍ ປາດຖະຫນາຢາກໄດ້ເຫັນປະຈັກຕາ ປາແລດສະຕີນ ຄົງຕົວໂດຍສັນຕິພາບພ້ອມກັບ ອິດສະຣາແອນ ຕາມວິວັດທະນາການຂອງກຸ່ມ 4 ປະເທດ ຢູ່ ຕາເວັນອອກກາງ ແລະ ຕາມບັນດາມະຕິຂອງສະພາຄວາມໝັ້ນຄົງ ສປຊ.
ເພີ່ມທະວີກຳລັງແຮງດ້ານປ້ອງກັນຊາດ
ເດີນທາງອອກຈາກ ປາແລດສະຕິນ ເພື່ອໄປຢ້ຽມຢາມ ອິດສະຣາແອນ ຊື່ງແມ່ນປະເທດສຸດທ້າຍໃນການຢ້ຽມຢາມ 3 ປະເທດ ອາຊີຕາເວັນຕົກ, ປະທານາທິບໍດີ ອິນເດຍ Pranab Mukherjee ໄດ້ປະຊຸມກັບບັນດາການນຳຂອງປະເທດເຈົ້າພາບ ເພື່ອຊຸກຍູ້ສາຍພົວພັນສອງຝ່າຍໃນທຸກຂົງເຂດ, ເປັນຕົ້ນແມ່ນການຮ່ວມມືໃນຂົງເຂດປ້ອງກັນຊາດ ແລະ ຍຸດທະສາດ.
ແຕ່ກ່ອນມາຮອດປະຈຸບັນ, ອິນເດຍ ແລະ ອິດສະຣາແອນ ມີການພົວພັນດ້ານການທະຫານ ແລະ ຍຸດທະສາດຢ່າງແຮງ. ນັກໄຈ້ແຍກຈຳນວນຫນຶ່ງ ໄດ້ເວົ້າວ່າ ພັນທະມິດລະຫວ່າງ ອິນເດຍ ແລະ ອິດສະຣາແອນ ແມ່ນສາຍພົວພັນໃຫມ່ໃນສົງຄາມຕ້ານກໍ່ການຮ້າຍ. ນອກຈາກເປັນ ຄູ່ຮ່ວມມືດ້ານເສດຖະກິດຢືນອັນດັບ 2 ຂອງອິດສະຣາແອນ ຢູ່ ອາຊີ, ອິນເດຍ ຍັງແມ່ນຄູ່ຄ້າລາຍໃຫຍ່ ໃນການຊື້ ແລະ ນຳໃຊ້ອາວຸດທຸກປະເພດຂອງ ອິດສະຣາແອນ. ສອງຝ່າຍ ກໍໄດ້ຮັບຮອງເອົາຜ່ານກົນໄກເພີ່ມທະວີການພົວພັນຮ່ວມມືປ້ອງກັນຊາດ, ໃນນັ້ນ ມີການຈັດຕັ້ງບັນດາການຊ້ອມຮົບຮ່ວມສອງຝ່າຍ. ກ່ອນທີ່ໄປຢ້ຽມຢາມ ອິດສະຣາແອນ, ອິນເດຍ ໄດ້ຮັບຮູ້ຢ່າງເປັນທາງການວ່າ ບັນດາກຳລັງປະຕິບັດຫນ້າທີ່ພິເສດຂອງກອງທັບປະເທດນີ້ ຈະເຂົ້າຮ່ວມການຊ້ອມຮົບຮ່ວມເປັນຄັ້ງທຳອິດ ກັບກອງທັບ ອິດສະຣາແອນ. ນີ້ແມ່ນສັນຍານສະແດງໃຫ້ເຫັນວ່າ ສາຍພົວພັນຍຸດທະສາດ ແລະ ປ້ອງກັນຊາດ ລະຫວ່າງສອງປະເທດ ພວມໄດ້ຮັບການຍົກສູງຂຶ້ນສູ່ລະດັບໃຫມ່.
ໃນເດືອນ 9 ຜ່ານມາ, ລັດຖະບານ ອິນເດຍ ໄດ້ຮັບຮອງເອົາຂໍ້ສະເຫນີ ຊື້ ເຮືອບິນບໍ່ມີຄົນຂັບ 10 ລຳ ຂອງ ກຸ່ມບໍລິສັດອຸດສາຫະກຳຍ່ານເວຫາ ອິດສະຣາແອນ. ເລື່ອງ ນິວເດລີ ປະກອບພາຫະນະການທະຫານ ແລະ ກຽມພ້ອມຜັນຂະຫຍາຍເຮືອບິນບໍ່ມີຄົນຂັບ ໂດຍ ອິດສະຣາແອນ ຜະລິດ ຈະຊ່ວຍເພີ່ມກຳລັງແຮງບຸກໂຈມຕີໃຫ້ກອງທັບອາກາດ ອິນເດຍ.
ການຢ້ຽມຢາມ 3 ປະເທດ ອາຊີຕາເວັນຕົກ ຂອງທ່ານ ປະທານາທິບໍດີ ອິນເດຍ Pranab Mukherjee ແມ່ນດຳເນີນໃນສະພາບກິດຈະການປະຕິຮູບຢູ່ ອິນເດຍ ສືບຕໍ່ປະຕິບັດຢ່າງເລິກເຊິ່ງ ກວ້າງຂວາງ, ການພົວພັນການຕ່າງປະເທດ ໄດ້ຮັບການຊຸກຍູ້ຢ່າງກະໂດດຂັ້ນ ຍົກສູງບົດບາດທີ່ຕັ້ງຂອງ ອິນເດຍ ຢູ່ພາກພື້ນ ແລະ ໂລກ. ເປີດກວ້າງການຮ່ວມມືກັບພາກພື້ນ ອາຊີຕາເວັນຕົກ ແມ່ນສະແດງໃຫ້ເຫັນຄວາມຕັດສິນຍຸດທະສາດຂອງ ນິວເດລີ ເພີ່ມທະວີທີ່ຕັ້ງບົດບາດສຳລັບພາກພື້ນ ທີ່ເຕົ້າໂຮມການແກ້ງແຍ້ງລະຫວ່າງບັນດາປະເທດມະຫາອຳນາດໃນສັດຕະວັດທີ 21.