(vovworld) - ວັນທີ 17/11, ທ່ານປະທານປະເທດ ເຈືອງເຕິ໋ນຊາງ ໄດ້ເດີນທາງໄປ ມານີລາ, ຟີລິບປິນ, ເຂົ້າຮ່ວມການເຄື່ອນໄຫວຕ່າງໆໃນສັບປະດາຂັ້ນສູງ ເວທີປາໄສຮ່ວມມືເສດຖະກິດ ອາຊີ - ປາຊີຟິກຄັ້ງທີ 23 (APEC 23). ເຂົ້າຮ່ວມ APEC 23 ແມ່ນການເຄື່ອນໄຫວພົວພັນຕ່າງປະເທດບຸລິມາສິດຂອງ ຫວຽດນາມໃນປີ 2015, ທັງຖອດຖອນບົດຮຽນກະກຽມໃຫ້ປີ APEC 2017 ເຊິ່ງ ຫວຽດນາມເປັນເຈົ້າພາບຈັດຕັ້ງ, ທັງປະກອບສ່ວນຢ່າງແທດຈິງ ແລະ ມີປະສິດທິຜົນເຂົ້າໃນກົນໄກຮ່ວມມືຫຼາຍຝ່າຍ ທີ່ມີຜົນສະທ້ອນຢ່າງເລິກເຊິ່ງ, ກວ້າງຂວາງຢູ່ອາຊີ - ປາຊີຟິກ.
ປະທານປະເທດເຈືອງເຕິ໋ນຊາງ ແລະ ພັນລະຍາ
ດ້ວຍຫົວຂໍ້ “ພັດທະນາເສດຖະກິດຢ່າງສະໝຳ່ສະເໜີ, ກໍ່ສ້າງໂລກໜຶ່ງທີ່ຈົບງາມກວ່າ“, APEC 23 ສຸມໃສ່ 4 ບຸລິມະສິດຕົ້ນຕໍ, ເຊິ່ງລວມມີ: ຍູ້ແຮງການຮ່ວມສຳພັນດ້ານເສດຖະກິດໃນພາກພື້ນ, ເພີ່ມທະວີການເຂົ້າຮ່ວມຂອງບັນດາວິສາຫະກິດຂະໜາດກາງ ແລະ ນ້ອຍ ແລະ ນ້ອຍທີ່ສຸດ, ລົງທຶນພັດທະນາແຫຼ່ງຊັບພະຍາກອນມະນຸດ ແລະ ກໍ່ສ້າງປະຊາຄົມໃຫ້ໝັ້ນຄົງຖາວອນ ແລະ ສ້າງຄວາມເຂັ້ມແຂງດ້ວຍຕົນເອງ. ກ່ຽວກັບຫົວຂໍ້ຂອງ APEC 23, ທ່ານລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ບູ່ຍແທງເຊີນ, ຖືວ່າ:
“ປະເທດເຈົ້າພາບ ຟິລິບປີນໄດ້ເລືອກເຟັ້ນຫົວຂໍ້ທີ່ເໝາະສົມກັບປີ APEC 23, ນັ້ນແມ່ນພັດທະນາຢ່າງສະໝຳ່ສະເໝີ ແລະກໍ່ສ້າງໂລກໜຶ່ງໃຫ້ທີ່ຈົບງາມກວ່າ. ພ້ອມທັງເລືອກເຟັ້ນ 4 ບຸລິມະສິດ. ໄລຍະຜ່ານມາ APEC ໄດ້ນຳໜ້າໃນການຊຸກຍູ້ການຫັນການຄ້າ ແລະການລົງທຶນເປັນເສລີ, ກໍ່ຄືການຮ່ວມສຳພັນໃນພາກພື້ນ. ດ້ວຍຫົວຂໍ້ບຸລິມະສິດ, ພ້ອມກັບຄວາມເອົາໃຈໃສ່ລວມທີ່ເໝາະສົມກັບປະຊາຄົມສາກົນຄືແນວນັ້ນ, ຫວັງວ່າ APEC 2015 ຈະຍົກສູງບົດບາດຂອງ APEC ກວ່າອີກ, ໜູນຊ່ວຍໃຫ້ບັນດາພື້ນຖານເສດຖະກິດສະມາຊິກບັນລຸໄດ້ຄາດໝາຍທີ່ໄດ້ວາງອອກ“.
ດ້ວຍບັນດາບຸລິມາສິດເຫຼົ່ານັ້ນ, ຫວັງວ່າ APEC 23 ຈະສ້າງເປັນກຳລັງໜູນໃໝ່ໃຫ້ການເຕີບໂຕໃນພາກພື້ນ, ປະກອບສ່ວນກໍ່ສ້າງປະຊາຄົມໃຫ້ໝັ້ນຄົງ ແລະ ສ້າງຄວາມເຂັ້ມແຂງດ້ວຍຕົນເອງ.
ປະກອບສ່ວນຢ່າງຕັ້ງໜ້າເຂົ້າໃນກົນໄກຮ່ວມມື APEC
ໃນ 17 ປີທີ່ເຂົ້າເປັນສະມາຊິກ APEC, ຍາມໃດ ຫວຽດນາມກໍ່ແມ່ນສະມາຊິກຕັ້ງໜ້າ, ມີຄວາມຮັບຜິດຊອບຂອງເວທີປາໄສຮ່ວມມືນີ້. ພົ້ນເດັ່ນແມ່ນເລື່ອງ ຫວຽດນາມຮັບບົດບາດເປັນປະທານ APEC ປີ 2006 ສຳເລັດຜົນ, ດ້ວຍເລື່ອງເປັນເຈົ້າພາບຈັດຕັ້ງກອງປະຊຸມຂັ້ນສູງ APEC 14, ກອງປະຊຸມລັດຖະມົນຕີການຕ່າງປະເທດ - ເສດຖະກິດ APEC 18 ພ້ອມກັບ 100 ກວ່າເຫດການອື່ນອີກ. ຍົກອອກແງ່ຫວັງໄລຍະຍາວໃຫ້ພາກພື້ນ. ລາຍການດຳເນີນງານ ຮ່າໂນ້ຍກ່ຽວກັບການປະຕິບັດບັນດາຄາດໝາຍ Bogor (ສ້າງຕັ້ງເຂດການຄ້າເສລີ ແລະ ການລົງທຶນຢູ່ອາຊີ - ປາຊີຟິກເຖິງປີ 2020) ແລະ ບັນດາມາດຕະການປະຕິຮູບສັງລວມ, ໄດ້ສ້າງເປັນກຳລັງໜູນໃໝ່ໃຫ້ແກ່ການຮ່ວມມື APEC. ນັບແຕ່ປີ 2006 ມາຮອດປະຈຸບັນ, ຫວຽດນາມ ແມ່ນໜຶ່ງໃນບັນດາສະມາຊິກທີ່ເປັນເຈົ້າການໃນການສະເໜີ ແລະ ເຂົ້າຮ່ວມຂໍ້ລິເລີ່ມໃໝ່ຫຼາຍຢ່າງ, ດ້ວຍ 90 ຂໍ້ລິເລີ່ມໃນເກືອບທຸກຂົງເຂດ. ພິເສດ, ເດືອນ 9/2014, ຫວຽດນາມ ໄດ້ຈັດຕັ້ງກອງປະຊຸມລັດຖະມົນຕີ APEC ຄັ້ງທີ 6 ກ່ຽວກັບການພັດທະນາແຫຼ່ງຊັບພະຍາກອນມະນຸດ ດ້ວຍຂໍ້ລິເລີ່ມກ່ຽວກັບການເຊື່ອມຕໍ່ມະນຸດນຳກັນສຳເລັດຜົນ. ຫວຽດນາມ ກໍ່ຮັບຫຼາຍໜ້າທີ່ສຳຄັນໃນ APEC ອີກ.
ເຂົ້າຮ່ວມ APEC ໄດ້ເປັນຂີດໝາຍແຫ່ງບາດກ້າວຜັນຂະຫຍາຍສຳຄັນໃນນະໂຍບາຍເຊື່ອມໂມງການພົວພັນຕ່າງປະເທດຂອງ ຫວຽດນາມ. ໃນໄລຍະຍຸດທະສາດໃໝ່, APEC ສືບຕໍ່ເປັນກົນໄກຮ່ວມມືພາກພື້ນສຳຄັນສຳລັບ ຫວຽດນາມໃນວິວັດແຫ່ງການເຊື່ອມໂຍງຢ່າງຮອບດ້ານກັບສາກົນ. ຍ້ອນ APEC ເຕົ້າໂຮມບັນດາຄູ່ຮ່ວມມືຍຸດທະສາດ ແລະ ຄູ່ຮ່ວມມືຮອບດ້ານແຖວໜ້າເກືອບທັງໝົດຂອງຫວຽດນາມ.
ບາດກ້າວໃໝ່ໃນວິວັດແຫ່ງການຮ່ວມມື APEC
ເລື່ອງ ຫວຽດນາມເຂົ້າຮ່ວມກອງປະຊຸມ APEC 2015 ຄັ້ງນີ້ ມີຄວາມໝາຍສຳຄັນພິເສດ. ໃນສະພາບການທີ່ ຫວຽດນາມຈະເປັນປະເທດເຈົ້າພາບຈັດຕັ້ງ APEC 24 ໃນປີ 2017, ເຂົ້າຮ່ວມ APEC 23 ແມ່ນຈຸດສຸມໃນການພົວພັນຕ່າງປະເທດຂອງຫວຽນາມ ປີນີ້, ເພື່ອແນໃສ່ຜັນຂະຫຍາຍແຜນນະໂຍບາຍເຊື່ອມໂຍງຢ່າງເລິກເຊິ່ງ, ກວ້າງຂວາງ ແລະ ຮອບດ້ານກັບສາກົນ, ກໍ່ຄືຍົກລະດັບການພົວພັນສາກົນຫຼາຍຝ່າຍ, ໂດຍສະເພາະແມ່ນຢູ່ອາຊີ - ປາຊີຟິກ. ສິ່ງສຳຄັນກວ່ານັ້ນແມ່ນກະກຽມເປັນເຈົ້າພາບຈັດຕັ້ງ APEC ເທື່ອທີສອງໃຫ້ດີ. ນີ້ຈະແມ່ນການປະກອບສ່ວນສຳຄັນທີ່ສຸດຂອງຫວຽດນາມ ເຂົ້າໃນກົນໄກຮ່ວມມືຫຼາຍຝ່າຍທີ່ສຳຄັນຢູ່ພາກພື້ນອາຊີ - ປາຊີຟິກ ໃນສະພາບການໃໝ່. ຫວຽດນາມ ໄດ້ມີການກະກຽມຢ່າງລອບຄອບຖີ່ຖ້ວນໃຫ້ແກ່ການເຄື່ອນໄຫວພົວພັນຕ່າງປະເທດສຳຄັນນີ້ແລ້ວ. ນັບແຕ່ຕົ້ນປີ, ຫວຽດນາມ ໄດ້ຕັ້ງໜ້າປະກອບຄວາມເຫັນ, ແນວຄວາມຄິດໃຫ້ບັນດາກອງປະຊຸມ APEC. ບັນດາພື້ນຖານເສດຖະກິດສະມາຊິກຮັບຮູ້ ແລະ ຕີລາຄາສູງບັນດາຄວາມເຫັນ, ຂໍ້ລິເລີ່ມ ແລະ ການປະກອບສ່ວນຂອງຫວຽດນາມ ໃນຂົງເຂດຮັບມືກັບການປ່ຽນແປງຂອງດິນຟ້າອາກາດ, ພະລັງງານ, ການຮັບປະກັນດ້ານທັນຍາຫານ, ການພັດທະນາແຫຼ່ງຊັບພະຍາກອນມະນຸດ, ການໜູນຊ່ວຍບັນດາວິສາຫະກິດຂະໜາດກາງ ແລະ ນ້ອຍເຂົ້າຮ່ວມຕະຫຼາດສາກົນ. ນີ້ຈະແມ່ນພື້ນຖານເພື່ອສືບຕໍ່ກະກຽມໃຫ້ແກ່ປີ APEC 2017. ທ່ານລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ບູ່ຍແທງເຊີນ ເນັ້ນໜັກວ່າ:
“ພວກເຮົາກຳນົດວ່ານັບແຕ່ນີ້ເປັນຕົ້ນໄປຈະນຳເນື້ອໃນ ແລະ ບັນດາບຸລິມະສິດຂອງຫວຽດນາມ ເຂົ້າພ້ອມກັບທ່າອ່ຽງລວມຂອງກອງປະຊຸມ. ພິເສດແມ່ນປະກອບສ່ວນເຂົ້າຜົນສຳເລັດຂອງ APEC 2015, ຊຸກຍູ້ການໃຫ້ບຸລິມະສິດແກ່ການຮ່ວມມືໃນ APEC. ພ້ອມກັນນັ້ນຜ່ານກອງປະຊຸມຄັ້ງນີ້, ພວກເຮົາກໍ່ຮຳ່ຮຽນ, ແບ່ງປັນບົດຮຽນກັບພວກເພື່ອນກ່ຽວກັບວຽກງານຈັດຕັ້ງ, ພະລາທິການ ແລະ ບັນດາວຽກງານອື່ນໆ ເພື່ອເຮັດແນວໃດກະກຽມດີທີ່ສຸດໃຫ້ແກ່ກອງປະຊຸມ APEC 2017 ເຊິ່ງຈະດຳເນີນຢູຫວຽດນາມ “.
ຄຽງຂ້າງການແລກປ່ຽນ, ຮຳ່ຮຽນເອົາບົດຮຽນກ່ຽວກັບວຽກງານກະກຽມ ແລະຈັດຕັ້ງຈາກປະເທດເຈົ້າພາບ ຟິລິບປີນ ແລະ ບັນດາພື້ນຖານເສດຖະກິດທີ່ເປັນເຈົ້າພາບຈັດຕັ້ງກອງປະຊຸມ APEC ໃນຊຸມປີກ່ອນ ແລ້ວ, ການເຂົ້າຮ່ວມ APEC 23 ຍັງແມ່ນໂອກາດເພື່ອໃຫ້ຫວຽດນາມຊຸກຍູ້ການພົວພັນຮ່ວມມືສອງຝ່າຍກັບຟິລິບປີນ ເວົ້າສະເພາະ ແລະ ບັນດາພື້ນຖານເສດຖະກິດ APEC ເວົ້າລວມ, ເຮັດໃຫ້ການຮ່ວມມືກັບບັນດາຄູ່ຮ່ວມມືນີ້ເລິກເຊິ່ງ ແລະ ແທດຈິງກວ່າ. ການເຂົ້າຮ່ວມ APEC 23 ຂອງທ່ານປະທານປະເທດ ເຈືອງເຕິ໋ນຊາງ ແມ່ນບາດກ້າວໃໝ່ໃນວິວັດແຫ່ງການຮ່ວມມື APEC, ຢືນຢັນບົດບາດຂອງຫວຽດນາມ ແມ່ນະມາຊິກທີ່ຕັ້ງໜ້າ, ເປັນເຈົ້າການ ແລະ ມີຄວາມຮັບຜິດຊອບໃນ APEC, ເພື່ອຈຸດໝາຍກໍ່ສ້າງພາກພື້ນອາຊີ - ປາຊີຟິກ ໃຫ້ພັດທະນາຢ່າງໝັ້ນຄົງ.