(vovworld)- ວັດທະນະທຳໄດ້ຮັບຖືວ່າແມ່ນພື້ນຖານດ້ານຈິດໃຈສັງຄົມ,ທັງແມ່ນຈຸດໝາຍ, ທັງເປັນກຳລັງຫນູນຊຸກຍູ້ການພັດທະນາເສດຖະກິດສັງຄົມ. ເລື່ອງເປີດກວ້າງ,ຍົກສູງປະສິດທິຜົນການຮ່ວມມືສາກົນກ່ຽວກັບດ້ານວັດທະນະທຳ ແມ່ນຫນ້າທີ່ຈຸດສຸມໃນຍຸດທະສາດພັດທະນາຂອງຫວຽດນາມ. ສິ່ງດັ່ງກ່າວນັບມື້ນັບໄດ້ຮັບຄວາມເອົາໃຈໃສ່ໃນຕົວຈິງ ນັບແຕ່ເມື່ອກອງປະຊຸມຄັ້ງທີ 9, ຄະນະບໍລິຫານງານສູນກາງພັກກອມມູນິດຫວຽດນາມ ຊຸດທີ 11 ສືບຕໍ່ຢືນຢັນວ່າ: “ການກໍ່ສ້າງ ແລະ ພັດທະນາວັດທະນະທຳ, ມະນຸດ ຫວຽດນາມ ຕອບສະຫນອງຄວາມຮຽກຮ້ອງຕ້ອງການການພັດທະນາແບບຍືນຍົງຂອງປະເທດຊາດ”.
ນຳບັນດາຜະລິດຕະພັນສິລະປະຫັດຖະກຳ, ເຄື່ອງສິຂັດມັນ, ເຄື່ອງຈັກສານ, ເຄື່ອງຖັກແສ່ວ ຂອງຫວຽດນາມ ຢູ່ເຊີແນວ
|
ທ່າອ່ຽງໂລກາພິວັດພັດທະນາຢ່າງແຂງແຮງ ຊຸກຍູ້ຫວຽດນາມເພີ່ມທະວີການຮ່ວມມື, ພົວພັນແລກປ່ຽນກັບສາກົນໃນທຸກຂົງເຂດ: ການເມືອງ, ເສດຖະກິດ, ວັດທະນະທຳ, ສັງຄົມ. ໃນນັ້ນ ເປົ້າໝາຍການຮ່ວມມື, ວິທີການຮ່ວມມື, ລະດັບການຮ່ວມມືກ່ຽວກັບດ້ານວັດທະນະທຳຂອງຫວຽດນາມ ກັບບັນດາປະເທດອື່ນ ເປັນຫລາຍຮູບຫລາຍແບບ, ໄຫວພິບ ແລະ ແທດຈິງກວ່າ.
ບັນດາການເຄື່ອນໄຫວພົວພັນແລກປ່ຽນວັດທະນະທຳທີ່ຟົດຟື້ນ
ໃນຊຸມວັນຂອງເດືອນ 3/2014, ໃນເນື້ອທີ່ປະມານ 50 ຕາແມັດ ຢູ່ ເຊີແນວ ປະເທດສະວິດ, ຄະນະຊີ້ນຳແຫ່ງຊາດຂອງກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດໂລກຄັ້ງທີ 132(ໂດຍຫວຽດນາມ ເປັນເຈົ້າພາບ) ໄດ້ຈັດຕັ້ງ“ລາຍການແນະນຳວັດທະນະທຳຫວຽດນາມ” ເພື່ອໂຄສະນາກ່ຽວກັບປະເທດຊາດ ແລະ ຊາວຫວຽດນາມ ຜ່ານການວາງສະແດງເຄື່ອງສິລະປະຫັດຖະກຳ ແລະ ການເຄື່ອນໄຫວວັດທະນະທຳສິລະປະ. ທ່ານນາງ ເຈີນກີມຈີ, ຊື່ງແມ່ນຜູ້ຮັບຜິດຊອບ“ລາຍການແນະນຳວັດທະນະທຳຫວຽດນາມ” ສັງກັດອະນຸກຳມະການໂຄສະນາຂອງ ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດໂລກຄັ້ງທີ 132 ໃຫ້ຮູ້ວ່າ:
“ພວກຂ້າພະເຈົ້ານຳບັນດາຜະລິດຕະພັນສິລະປະຫັດຖະກຳ, ເຄື່ອງສິຂັດມັນ, ເຄື່ອງຈັກສານ, ເຄື່ອງຖັກແສ່ວ ຂອງຫວຽດນາມ ມາແນະນຳໃຫ້ເພື່ອນມິດສາກົນ. ນອກນັ້ນ ຍັງມີພາບໄມ້ຂອງບັນດາໝູ່ບ້ານຫັດຖະກຳຂອງຫວຽດນາມ, ບັນດາຈຸດທີ່ເປັນເອກະລັກສະເພາະຂອງວັດທະນະທຳເຂດທົ່ງພຽງພາກເຫນືອຫວຽດນາມ. ນອກນັ້ນ ຍັງແນະນຳບັນດາສິ່ງພິມກ່ຽວກັບການທ່ອງທ່ຽວ, ສິ່ງພິມໂຄສະນາທິວທັດທຳມະຊາດທີ່ສວຍງາມ ແລະ ລືຊື່ຢູ່ຫວຽດນາມ.”
ຕໍ່ຈາກນັ້ນ, ວັນທີ 9/7/2014 ຢູ່ ຫໍພິພິດທະພັນແຫ່ງຊາດສິລະປະອາຊີ Guimet (ປາຣີ ປະເທດຝລັ່ງ) ໄດ້ດຳເນີນງານວາງສະແດງວັດຖຸພັນກວ່າ 80 ຢ່າງ ກ່ຽວກັບພາບມັງກອນໃນວັດທະນະທຳ ແລະ ການເຫລື້ອມໃສຂອງຊາວ ຫວຽດນາມ. ທ່ານ ເວືອງຢູຍບຽນ, ລັດຖະມົນຕີຊ່ວຍວ່າການກະຊວງວັດທະນະທຳ ກິລາ ແລະ ທ່ອງທ່ຽວ ຫວຽດນາມ ໃຫ້ຮູ້ວ່າ:
“ເປັນຄັ້ງທຳອິດ, ບັນດາຜະລິດຕະພັນສິລະປະໃນລາຊະວັງດ້ວຍຮູບ ມັງກອນທີ່ເປັນເອກະລັກສະເພາະ, ສະແດງໃຫ້ເຫັນສິລະປະພື້ນເມືອງທີ່ຍອດຍິ່ງ ແລະ ມີຄຸນຄ່າປະຫວັດສາດ ໄດ້ນຳມາແນະນຳໃຫ້ປະຊາຊົນ ຝລັ່ງ ແລະ ເພື່ອນມິດສາກົນ. ນີ້ແມ່ນເຫດການສຳຄັນ ນອນໃນບັນດາການເຄື່ອນໄຫວສະເຫລີມສະຫລອງ 40 ປີ ແຫ່ງວັນສ້າງຕັ້ງສາຍພົວພັນທາງການທູດລະຫວ່າງ ຫວຽດນາມ ແລະ ສ ຝລ່ັງ. ງານວາງສະແດງຄັ້ງນີ້ ຈະນຳມາໃຫ້ ປະຊາຊົນ ຝລ່ັງ ແລະ ເພື່ອນມິດສາກົນເຂົ້າໃຈກ່ຽວກັບບັນດາຄຸນຄ່າດ້ານວັດທະນະທຳ, ປະຫວັດສາດຂອງປະເທດຊາດ ແລະ ຊາວຫວຽດນາມ ໃຫ້ເລິກເຊິ່ງກວ່າ.”
ສອງເຫດການດັ່ງກ່າວພຽງແຕ່ແມ່ນຫນຶ່ງໃນບັນດາການເຄື່ອນໄຫວພົວພັນແລກປ່ຽນວັດທະນະທຳ ລະຫວ່າງ ຫວຽດນາມ ກັບບັນດາປະເທດ ໂດຍ ລັດຫວຽດນາມ ຈັດຕັ້ງຂຶ້ນ ແລະ ຜັນຂະຫຍາຍຢູ່ຕ່າງປະເທດ. ບັນດາການພົວພັນແລກປ່ຽນ, ຮ່ວມມືດ້ານວັດທະນະທຳຢູ່ ຕ່າງປະເທດ ປະກອບສ່ວນຍົກສູງທີ່ຕັ້ງບົດບາດ, ເຄື່ອງໝາຍປະເທດຫວຽດນາມ; ອະນຸລັກຮັກສາຄຸນຄ່າວັດທະນະທຳ ແລະ ຢືນຢັນການພັດທະນາຂອງວັດທະນະທຳຫວຽດນາມ.
ການຮ່ວມມື, ພົວພັນແລກປ່ຽນວັດທະນະທຳສວມບົດບາດສຳຄັນໃນວິວັດການເຊື່ອງໂຍງເຂົ້າກັບສາກົນ
ຄວາມຈິງ, ການເຄື່ອນໄຫວພົວພັນແລກປ່ຽນວັດທະນະທຳ ຫວຽດນາມ ຢູ່ ຕ່າງປະເທດ ໄດ້ສົ່ງຜົນກະທົບຢ່າງຕັ້ງຫນ້າເຖິງແນວທາງການເມືອງການຕ່າງປະເທດ, ການຮ່ວມມືກັບສາກົນຂອງປະເທດຊາດ. ບັນດາການເຄື່ອນໄຫວວັດທະນະທຳ ຫວຽດນາມ ຢູ່ ຕ່າງປະເທດ ບໍ່ພຽງແຕ່ມີຄວາມໝາຍໂດຍກົງສຳລັບ ຊາວຫວຽດນາມ ອາໄສຢູ່ຕ່າງປະເທດເທົ່ານັ້ນ ຫາກຍັງເປັນການໂຄສະນາພາບພົດປະເທດຊາດ, ຊາວຫວຽດນາມ, ວັດທະນະທຳ ຫວຽດນາມ ກັບເພື່ອນມິດສາກົນ. ຈາກນັ້ນ ເພີ່ມທະວີຄວາມເຂົ້າໃຈຂອງບັນດາພື້ນຖານວັດທະນະທຳ ດ້ວຍວັດທະນະທຳທີ່ເປັນເອກະລັກສະເພາະຂອງຫວຽດນາມ, ຢືນຢັນວັດທະນະທຳຫວຽດນາມ ໃນຂອບຂະຫນາດວັດທະນະທຳກວ້າງຂວາງກວ່າ, ມີລັກສະນະວັດທະນະທຳມະນຸດ, ສາກົນ. ຈາກການພົວພັນແລກປ່ຽນນັ້ນ, ທີ່ຕັ້ງບົດບາດຂອງຫວຽດນາມ ຖືກຍົກສູງຂຶ້ນ. ສິ່ງທີ່ພົ້ນເດັ່ນຂອງຜົນສຳເລັດນີ້ ນັ້ນແມ່ນປີ 2013, ຫວຽດນາມ ໄດ້ກາຍເປັນສະມາຊິກສະພາມໍລະດົກໂລກ ຂອງ ສປຊ (UNESCO). ທ່ານ ຫງວຽນແທງເຊີນ, ລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ໃຫ້ຮູ້ວ່າ:
“ມາຮອດປະຈຸບັນ ຫວຽດນາມ ໄດ້ຮັບການຕີລາຄາຈາກເພື່ອນມິດສາກົນວ່າ ແມ່ນປະເທດປະກອບສ່ວນຢ່າງມີປະສິດທິຜົນໃນບັນດາການເຄື່ອນໄຫວຂອງ UNESCO. ຂ້າພະເຈົ້າຖືວ່າ: ບົດບາດ, ທີ່ຕັ້ງຂອງຫວຽດນາມ ນັບມື້ນັບໄດ້ຮັບການປັບປຸງໃນເວທີສາກົນ ຊື່ງເຮັດໃຫ້ສຽງເວົ້າຂອງຫວຽດນາມຢູ່ບັນດາອົງການຈັດຕັ້ງສາກົນ, ໃນນັ້ນ ມີ UNESCO ນັບມື້ນັບມີຄວາມໝາຍກວ່າ.”
ການພົວພັນແລກປ່ຽນດ້ານວັດທະນະທຳ ປະກອບສ່ວນຮັກສາຄຸນຄ່າວັດທະນະທຳ ແລະ ສີສັນຊາດຂອງປະຊາຄົມຊາວຫວຽດນາມ ຢູ່ ຕ່າງປະເທດ, ກາຍເປັນປັດໄຈພົ້ນເດັ່ນໃນການພົວພັນການທູດວັດທະນະທຳ ແລະ ການພົວພັນກັບສາກົນຂອງຫວຽດນາມ. ການຮ່ວມມື ແລະ ພົວພັນແລກປ່ຽນກັບສາກົນ ກ່ຽວກັບດ້ານວັດທະນະທຳ ໄດ້ຊ່ວຍບັນລຸບັນດາຄາດໝາຍຊື່ງນະໂຍບາຍວັດທະນະທຳຂອງຫວຽດນາມ ໄດ້ວາງອອກ, ນັ້ນແມ່ນຮັບເອົາສິ່ງຍອດຍິ່ງວັດທະນະທຳຂອງມະນຸດ, ເຮັດໃຫ້ບັນດາຄຸນຄ່າວັດທະນະທຳພື້ນເມືອງຂອງປະເທດຊາດອຸດົມສົມບູນ ແລະ ເລິກເຊິ່ງກວ່າ. ການຮ່ວມມືດ້ານວັດທະນະທຳ ຍັງແມ່ນພື້ນຖານເພື່ອເປີດກວ້າງການພົວພັນຮ່ວມມືໃນທຸກຂົງເຂດອື່ນ. ຜ່ານບັນດາການເຄື່ອນໄຫວພົວພັນແລກປ່ຽນວັດທະນະທຳກັບຕ່າງປະເທດ, ເພື່ອນມິດສາກົນມີຄວາມເຂົ້າໃຈກ່ຽວກັບປະເທດຊາດ, ວັດທະນະທຳ ແລະ ຊາວຫວຽດນາມ ກວ່າ, ຜ່ານນັ້ນ ຍົກສູງທ່ີຕັ້ງບົດບາດຂອງປະເທດຊາດໃນເວທີສາກົນ.