(vovworld)- ມາຮອດປະຈຸບັນ, ມີກວ່າ 50 ໃນຍອດຈຳນວນ 68 ອົງຄະນະພັກບັນດາແຂວງ, ນະຄອນ ແລະ ທ້ອງຖິ່ນຕ່າງໆ ໄດ້ ແລະ ພວມດຳເນີນກອງປະຊຸມໃຫຍ່ ອາຍຸການ 2015-2020, ເພື່ອກະກຽມໃຫ້ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ. ໃນຈຳນວນເຫລົ່ານັ້ນ ໄດ້ມີບັນດາອົງຄະນະພັກບັນລຸບາດກ້າວບຸກທະລຸຢ່າງເຫັນໄດ້ຊັດ ກ່ຽວກັບຕົວເລກຄາດໝາຍພະນັກງານຫນຸ່ມ ແລະ ພະນັກງານຍິງ ໃນຄະນະບໍລິຫານງານສູນກາງພັກ.
ພະນັກງານຫນຸ່ມຢູ່ແຂວງກວ໋າງນາມໄດ້ຮັບເລືອກຕັ້ງ
ເຂົ້າຄະນະບໍລິຫານງານອົງຄະນະພັກແຂວງ
|
ປຶກສາຫາລືບົດລາຍງານການເມືອງທີ່ບັນດາກອງປະຊຸມໃຫຍ່, ອົງຄະນະພັກບັນດາແຂວງ, ນະຄອນ ລ້ວນແຕ່ສຸມໃສ່ເຂົ້າໃນບັນດາບັນຫາໃຫຍ່ ດ້ວຍຈຸດໝາຍ “ພັດທະນາເສດຖະກິດແມ່ນຈຸດສຸມ, ກໍ່ສ້າງພັກ ແມ່ນກຸນແຈ່”. ເພື່ອພັດທະນາເສດຖະກິດ, ແຕ່ລະທ້ອງຖິ່ນ ໄດ້ເລືອກເຟັ້ນບັນດາທ່າໄດ້ປຽບແກ້ງແຍ້ງສະເພາະ ເພື່ອສຸມໃສ່ພັດທະນາຄື: ກະສິກຳ, ອຸດສາຫະກຳ, ບໍລິການ, ທ່ອງທ່ຽວ. ມີບາງອົງຄະນະພັກໄດ້ວາງອອກບັນດາໂຄງການບຸກທະລຸໃນ 5 ປີຈະມາເຖິງລະອຽດທີ່ສຸດ ແລະ ແທດຈິງ ຄື: ອົງຄະນະພັກນະຄອນ ໂຮ່ຈິມີນ ໄດ້ສຸມໃສ່ປັບປຸງ ແລະ ພັດທະນາຕົວເມືອງ, ອົງຄະນະພັກແຂວງ ຮ່ວາບີງ ໄດ້ສຸມໃສ່ເຂົ້າໃນກະສິກຳນຳມາເຊິ່ງມູນຄ່າເພີ່ມສູງ.
ສຸມໃສ່ວຽກງານກໍ່ສ້າງພັກ
ສຳລັບວຽກງານກໍ່ສ້າງພັກ, ບັນດາອົງຄະນະພັກແຂວງ, ນະຄອນ ລ້ວນແຕ່ ອີງໃສ່ ມະຕິສູນກາງພັກກອມມູນິດຫວຽດນາມ ຄັ້ງທີ 4 ກ່ຽວກັບບາງບັນຫາຮີບດ່ວນໃນວຽກງານກໍ່ສ້າງພັກປະຈຸບັນ ແລະ ຄຳສັ່ງເລກທີ 03 ຂອງກົມການເມືອງ ກ່ຽວກັບການຮ່ຳຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈິມີນ ເພື່ອຜັນຂະຫຍາຍການກະທຳ. ທ່ານ ມາຍຕຽນຢູງ, ເລຂາຄະນະພັກແຂວງ ຮ່ານາມ ໃຫ້ຮູ້ວ່າ:
“ວຽກງານກໍ່ສ້າງພັກ ຍັງຄົງແມ່ນບັນຫາກຸນແຈ່. ພວກຂ້າພະເຈົ້າເອົາໃຈໃສ່ເຖິງບັນຫາປະຕິບັດມະຕິສູນກາງພັກຄັ້ງທີ 4 ຊຸດທີ 11 ຕິດພັນກັບ ຄຳສັ່ງເລກທີ 03 ຂອງກົມການເມືອງ. ພ້ອມກັນນັ້ນ ພວກຂ້າພະເຈົ້າກໍເອົາໃຈໃສ່ເຖິງວຽກງານພະນັກງານ ແລະ ເລຂາຄະນະພັກທຸກຂັ້ນ. ທັດສະນະຕີລາຄາພະນັກງານ ແມ່ນຄັດເລືອກຜູ້ກ້າເຮັດ, ກ້າຮັບຜິດຊອບ, ສຸດຈິດສຸດໃຈ. ພວກຂ້າພະເຈົ້າ ຮັບເອົາພະນັກງານຫນຸ່ມເຂົ້າເຮັດວຽກ ເພື່ອບຳລຸງລຸ້ນພະນັກງານສືບທອດ.”
ວຽກງານກໍ່ສ້າງພັກຢູ່ອົງຄະນະພັກໃນອາຍຸການຈະມາເຖິງໄດ້ຮັບການຜັນຂະຫຍາຍຕາມທິດຊຸກຍູ້ສາຍກ່ຽວພັນນຳກັນ, ສະຫນິດແຫນ້ນລະຫວ່າງການນຳ, ອຳນາດການປົກຄອງ, ຄະນະພັກທຸກຂັ້ນ ກັບປະຊາຊົນ, ຕອບສະຫນອງຄວາມມຸ້ງມາດປາດຖະຫນາອັນຊອບທຳຂອງປະຊາຊົນ, ຈາກນັ້ນ ຍົກອອກບັນດາແຜນນະໂຍບາຍ, ແນວທາງແທດຈິງກວ່າໃນການພັດທະນາເສດຖະກິດສັງຄົມຢູ່ບັນດາທ້ອງຖິ່ນ. ໃນການກໍ່ສ້າງພັກ, ບັນດາທ້ອງຖິ່ນຖືກວຽກງານພະນັກງານ ເປັນສຳຄັນຕົ້ນຕໍ, ໃນນັ້ນ ຍູ້ແຮງວຽກງານບຳລຸງສ້າງພະນັກງານ ແລະ ພະນັກງານສືບທອດ ຮັບປະກັນການຕອບສະຫນອງຄວາມຮຽກຮ້ອງຕ້ອງການຂອງໄລຍະເຊື່ອມໂຍງ.
ບາດກ້າວບຸກທະລຸກ່ຽວກັບອັດຕາສ່ວນພະນັກງານຍິງ ແລະ ພະນັກງານຫນຸ່ມ
ສຳລັບວຽກງານບຸກຄະລາກອນ, ຢູ່ ກວ່າ 50 ອົງຄະນະພັກ ບັນດາແຂວງ, ນະຄອນ, ອັດຕາສ່ວນພະນັກງານຍິງ ແລະ ອັດຕາສ່ວນພະນັກງານຫນຸ່ມ ເຂົ້າຮ່ວມຄະນະບໍລິຫານງານ ແລະ ຄະນະປະຈຳຄະນະພັກແຂວງ, ນະຄອນ ແມ່ນ 10% - 15%. ພິເສດ ຢູ່ອົງຄະນະພັກແຂວງ ກາວບັ່ງ ຊື່ງແມ່ນທ້ອງຖິ່ນຢູ່ເຂດພູດອຍທາງພາກເຫນືອ ມີອັດຕາສ່ວນພະນັກງານຍິງກວ່າ 20% ເຂົ້າຮ່ວມຄະນະບໍລິຫານງານອົງຄະນະພັກແຂວງ. ທ່ານ ລາງອກທວາງ, ຫົວຫນ້າຄະນະສະມາຊິກສະພາແຫ່ງຊາດແຂວງ ກາວບັ່ງ ໃຫ້ຮູ້ວ່າ:
“ເຖິງວ່າແມ່ນແຂວງຫນຶ່ງທີ່ຍັງປະສົບກັບຄວາມຫຍຸ້ງຍາກ, ການສ້າງລາຍຮັບເຂົ້າງົບປະມານຕ່ຳກໍຕາມ, ລະດັບຄວາມຮູ້ຂອງປະຊາຊົນຕ່ຳ ແຕ່ສະເພາະວຽກງານພະນັກງານ, ຄະນະພັກ ແລະ ອຳນາດການປົກຄອງຍາມໃດກໍເອົາໃຈໃສ່. ດ້ວຍໝາກຜົນ ກວ່າ 20% ພະນັກງານຍິງເຂົ້າຮ່ວມຄະນະບໍລິຫານງານ, ນັ້ນແມ່ນຄວາມພະຍາຍາມໃຫຍ່ຫລວງຂອງອົງຄະນະພັກ. ເພື່ອບັນລຸໄດ້ໝາກຜົນ ນັ້ນ ພວກຂ້າພະເຈົ້າຍາມໃດກໍເອົາໃຈໃສ່ບຳລຸງສ້າງຈາກຂັ້ນຮາກຖານ.”
ຜ່ານບັນດາກອງປະຊຸມໃຫຍ່ອົງຄະນະພັກແຂວງ, ນະຄອນ ໄດ້ມີພະນັກງານ 2 ຄົນອາຍຸຕ່ຳກວ່າ 40 ປີ ໄດ້ຮັບເລືອກຕັ້ງເປັນເລຂາຄະນະພັກ. ນະຄອນ ດາຫນັງ ມີ 13,46% ພະນັກງານຫນຸ່ມເຂົ້າຮ່ວມຄະນະບໍລິຫານງານ. ຢູ່ ນະຄອນ ໂຮ່ຈິມີນ, ອົງຄະນະພັກໃຫຍ່ໃນທົ່ວປະເທດ, ໃນ 4 ຄົນໄດ້ຮັບເລືອກຕັ້ງເປັນຮອງເລຂາຄະນະພັກນັ້ນ, ມີ 2 ຄົນ ອາຍຸຕ່ຳກວ່າ 45 ປີ. ຈຳນວນພະນັກງານຫນຸ່ມເຂົ້າຮ່ວມຄະນະບໍລິຫານງານອົງຄະນະພັກນະຄອນໂຮ່ຈິມີນ ແມ່ນກວ່າ 11%. ທ່ານນາງ ຫງວຽນທິກວຽດເຕີມ, ຮອງເລຂາຄະນະພັກນະຄອນ ໂຮ່ຈິມີນ ໃຫ້ຮູ້ວ່າ:
“ເພື່ອມີຖັນແຖວພະນັກງານຫນຸ່ມຄືແນວນັ້ນ ພວກຂ້າພະເຈົ້າຕ້ອງບຳລຸງສ້າງ, ສັບຊ້ອນພະນັກງານ ແລະ ຕ້ອງມີການທົດສອບ. ພະນັກງານຫນຸ່ມຕ້ອງມີປະສົບການ. ຈາກພຶດຕິກຳຕົວຈິງ ພະນັກງານຫນຸ່ມພິສູດໃຫ້ເຫັນກຳລັງຄວາມສາມາດ, ຄຸນສົມບັດ, ທ່າແຮງຂອງຕົນ.”
ອົງຄະນະພັກບັນດາແຂວງ, ນະຄອນ ແລະ ທ້ອງຖິ່ນຕ່າງໆ ພວມສືບຕໍ່ຈັດຕັ້ງກອງປະຊຸມໃຫຍ່ອາຍຸການ 2015-2020. ມາດຖານ ຍົກສູງອັດຕາສ່ວນພະນັກງານຫນຸ່ມ ແລະ ພະນັກງານຍິງເຂົ້າຮ່ວມຄະນະບໍລິຫານງານອົງຄະນະພັກບັນດາທ້ອງຖິ່ນ ຍັງຄົງສືບຕໍ່ໄດ້ຮັບການຜັນຂະຫຍາຍປະຕິບັດຢູ່ບັນດາກອງປະຊຸມໃຫຍ່.