ກອງປະຊຸມລັດຖະມົນຕີສິ່ງແວດລ້ອມອາຊຽນຄັ້ງທີ 13 ແລະ ບາງກອງປະຊຸມທີ່ກ່ຽວຂ້ອງພວມຖືກຈັດຂຶ້ນຢູ່ຮ່າໂນ້ຍ. ນີ້ແມ່ນເຫດການໃຫຍ່ໃນການຮ່ວມມືອາຊຽນກ່ຽວກັບສິ່ງແວດລ້ອມຖືກຈັດຂຶ້ນ 3 ປີເທື່ອ 1. ດ້ວຍເປົ້າໝາຍມຸ່ງໄປສູ່ການສ້າງກຸ່ມອາຊຽນຂຽວ ແລະ ສະອາດ. ກອງປະຊຸມຄັ້ງນີ້ ແມ່ນເພື່ອແນໃສ່ສ້າງກົນໄກຮ່ວມມືໃນອາຊຽນກໍຄືລະຫວ່າງອາຊຽນກັບບັນດາປະເທດຄູ່ຮ່ວມມືໃນສະພາບການໃໝ່ ຂະນະທີ່ອາຊຽນກາຍເປັນປະຊາຄົມ, ຮັບໃຊ້ແກ່ການພັດທະນາແບບຍືນຍົງຂອງອາຊຽນໃນໄລຍະທີ່ຈະເຖິງ.
ກອງປະຊຸມລັດຖະມົນຕີສິ່ງແວດລ້ອມອາຊຽນຄັ້ງທີ 13 ຖືກຈັດຂຶ້ນຢູ່ຮ່າໂນ້ຍ |
ປະຊາຄົມອາຊຽນຈະໄດ້ຮັບການສ້າງຕັ້ງຂຶ້ນໃນທ້າຍປີ 2015 ບົນພື້ນຖານ 3 ເສົາຄ້ຳຕົ້ນຕໍ, ນັ້ນແມ່ນປະຊາຄົມການເມືອງ - ຄວາມໝັ້ນຄົງ, ປະຊາຄົມເສດຖະກິດ ແລະ ປະຊາຄົມວັດທະນະທຳ - ສັງຄົມ. ການສ້າງຕັ້ງປະຊາຄົມອາຊຽນຄາດວ່າຈະໄຂສັງກາດໃໝ່ແຫ່ງການເຊື່ອມຕໍ່ການຮ່ວມມືພາກພື້ນ, ໃນນັ້ນມີການຮ່ວມມືທາງດ້ານການປົກປັກຮັກສາສິ່ງແວດລ້ອມ.
ສ້າງກົນໄກຮ່ວມມືດ້ານ ສິ່ງແວດລ້ອມໂດຍໄວ
ອາຊຽນແມ່ນພາກພື້ນມີລະບົບຊີວະວິທະຍາທີ່ອຸດົມສົມບູນ ແລະ ແຫຼ່ງຊັບພະຍາກອນທຳມະຊາດທີ່ຫຼາຍຮູບຫຼາຍສີ. ຍ້ອນເຫດນີ້ເອງ, ການຮ່ວມມື ປົກປັກຮັກສາສິ່ງແວດລ້ອມກໍແມ່ນໜຶ່ງໃນບັນດາຂົງເຂດຮ່ວມມືຈຸດສຸມຊຶ່ງໄດ້ຖືກຍົກອອກມານັບແຕ່ຊຸມວັນທຳອິດເມື່ອສ້າງຕັ້ງອາຊຽນ ແລະ ຍາມໃດກໍໄດ້ຮັບການຊຸກຍູ້ຈາກບັນດາປະເທດສະມາຊິກ.
ແຕ່ປີ 1977, ອາຊຽນໄດ້ເລີ່ມລົງມືສ້າງໂຄງການສິ່ງແວດລ້ອມອະນຸພາກພື້ນອາຊຽນ ດ້ວຍການໜູນຊ່ວຍຂອງອົງການ ສິ່ງແວດລ້ອມແຫ່ງສະຫະປະຊາຊາດ ຊຶ່ງເປັນຂີດໝາຍເປີດສາກຂະບວນວິວັດແຫ່ງການຮ່ວມມືປົກປັກຮັກສາສິ່ງແວດລ້ອມໃນພາກພື້ນ. ປີ 1981, ເປັນຄັ້ງທຳອິດ, ອາຊຽນໄດ້ຮັບຮອງເອົາໂຄງການສິ່ງແວດລ້ອມ ແລະ ອອກຖະແຫຼງການສະບັບທຳອິດ, ໃນນັ້ນ ໄດ້ຍົກອອກບັນດາເປົ້າໝາຍ ແລະ ການກຳນົດທິດຮ່ວມມືຂອງພາກພື້ນ. ໄລຍະຕໍ່ມາ, ມີເອກະສານຫຼາຍສະບັບອື່ນໄດ້ຮັບການສ້າງຂຶ້ນເຊັ່ນ: ແຜນການດຳເນີນງານຍຸດທະສາດກ່ຽວກັບ ສິ່ງແວດລ້ອມ(1994-2010), ໂຄງການດຳເນີນງານວຽກຈັນ(2004-2010), ແຜນການດຳເນີນງານຮ່າໂນ້ຍ(1999-2004), ຖະແຫຼງການອາຊຽນກ່ຽວກັບ ສິ່ງແວດລ້ອມທີ່ໝັ້ນຄົງ(2007); ຖະແຫຼງການຂັ້ນສູງອາຊີຕາເວັນອອກກ່ຽວກັບການປ່ຽນແປງຂອງດິນຟ້າອາກາດ, ພະລັງງານ ແລະ ສິ່ງແວດລ້ອມ. ໃນມໍ່ໆມານີ້, ການຮ່ວມມືອາຊຽນໃນຂົງເຂດ ສິ່ງແວດລ້ອມໄດ້ພັດທະນາຢ່າງແຂງແຮງ ແລະ ນັບມື້ນັບເປີດກ້ວາງ. ອາຊຽນໄດ້ພ້ອມກັນແບ່ງປັນບົດຮຽນ, ຖະແຫຼງຂ່າວຢ່າງທັນການ ແລະ ສົມທົບກັນປະຕິບັດບັນດາການເຄື່ອນໄຫວ ປົກປັກຮັກສາສິ່ງແວດລ້ອມທີ່ມີຄວາມໝາຍທີ່ແທດຈິງ. ໃນວິວັດການຮ່ວມມືອາຊຽນກ່ຽວກັບ ສິ່ງແວດລ້ອມ, ອາຊຽນໄດ້ຮັບການໜູນຊ່ວຍຈາກບັນດາປະເທດຄູ່ຮ່ວມມື, ໃນນັ້ນ ມີຍີປຸ່ນ, ສ.ເກົາຫຼີ ແລະ ຈີນ. ບັນດາການເຄື່ອນໄຫວຮ່ວມມືອາຊຽນ ແລະ ອາຊຽນ + 3 ນີ້ ໄດ້ສວມບົດບາດສຳຄັນທີ່ສຸດ, ປະກອບສ່ວນເພີ່ມທະວີຄວາມສາມາດກ່ຽວກັບການຄຸ້ມຄອງ ສິ່ງແວດລ້ອມ ແລະ ສ້າງບັນດານະໂຍບາຍກ່ຽວກັບການພັດທະນາແບບຍືນຍົງຢູ່ແຕ່ລະປະເທດສະມາຊິກ.
ຮ່ວມມືແກ້ໄຂບັນດາສິ່ງທ້າທາຍກ່ຽວກັບ ສິ່ງແວດລ້ອມ
ໃນຊຸມປີມໍ່ໆມານີ້, ການປ່ຽນແປງຂອງດິນຟ້າອາກາດ, ມົນລະພິດສິ່ງແວດລ້ອມ, ຄວາມໝັ້ນຄົງດ້ານສະບຽງອາຫານ ແລະ ແຫຼ່ງນ້ຳ ໄດ້ກາຍເປັນບັນຫາໃຫຍ່ ສົ່ງຜົນກະທົບເຖິງການພັດທະນາແບບຍືນຍົງຂອງພາກພື້ນ ແລະ ແຕ່ລະປະເທດ. ດັ່ງນັ້ນ ຄວາມເອົາໃຈໃສ່ອັນດັບໜຶ່ງຂອງທຸກໆປະເທດອາຊຽນໃນປະຈຸບັນ, ແມ່ນເຮັດແນວໃດເພື່ອຮ່ວມແຮງຮ່ວມໃຈແກ້ໄຂບັນດາບັນຫາສິ່ງແວດລ້ອມຢ່າງຮີບດ່ວນ ຊຶ່ງໄດ້ ແລະ ພວມວາງອອກ. ປະຊາຄົມອາຊຽນ ເຂົ້າສູ່ການເຄື່ອນໄຫວໃນທ້າຍປີນີ້ ແລະ ວິໄສທັດ ອາຊຽນພາຍຫຼັງປີ 2015 ໄດ້ຮັບການສ້າງຕັ້ງດ້ວຍບັນດາຂອບເຂດ ແລະ ຂໍ້ກຳນົດໃໝ່. ຕາມນັ້ນແລ້ວ, ອາຊຽນໄດ້ກຳນົດເປົ້າໝາຍໃຫ້ປະຊາຄົມອາຊຽນມູ່ງໄປເຖິງ ນັ້ນແມ່ນ ອາຊຽນຂຽວ ແລະ ສະອາດດ້ວຍບັນດາກົນໄກໄດ້ຮັບການສ້າງຕັ້ງຢ່າງຄົບຖ້ວນ, ຮັບໃຊ້ແກ່ການພັດທະນາແບບຍືນຍົງ ແນໃສ່ຮັບປະກັນການ ປົກປັກຮັກສາສິ່ງແວດລ້ອມຂອງພາກພື້ນ, ລັກສະນະໝັ້ນຄົງຂອງຊັບພະຍາກອນທຳມະຊາດ ແລະ ຄຸນນະພາບຊີວິດການເປັນຢູ່ລະດັບສູງຂອງປະຊາຊົນແຕ່ລະຄົນ. ຈຸດສຸມຂອງການປະຕິບັດໃນໄລຍະນີ້ ແມ່ນປົກປັກຮັກສາແຫຼ່ງຊັບພະຍາກອນທຳມະຊາດ, ພື້ນຖານພັດທະນາເສດຖະກິດ, ສັງຄົມລວມມີການຄຸ້ມຄອງ ແລະ ການຮັກສາແຫຼ່ງນ້ຳມັນ, ແຫຼ່ງນ້ຳ, ແຮ່ທາດ, ພະລັງງານ, ຊີວະນາໆພັນ, ປ່າ, ຊັບພະຍາກອນທະເລ ແລະ ແຄມທະເລໃຫ້ໝັ້ນຄົງ ກໍຄືຊຸກຍູ້ການຮັບປະກັນຄຸນນະພາບແຫຼ່ງນ້ຳ ແລະ ບັນຍາກາດໃຫ້ແກ່ພາກພື້ນອາຊຽນ. ພ້ອມກັນນັ້ນ, ອາຊຽນກໍຕັ້ງໜ້າເຂົ້າຮ່ວມບັນດາຄວາມມານະພະຍາຍາມທົ່ວໂລກແນໃສ່ແກ້ໄຂບັນດາສິ່ງທ້າທາຍຕໍ່ ສິ່ງແວດລ້ອມທົ່ວໂລກ, ໃນນັ້ນ ມີການປ່ຽນແປງຂອງດິນຟ້າອາກາດ, ປົກປັກຮັກສາຊັ້ນໂອຊົນ ກໍຄືພັດທະນາ ແລະ ນຳໃຊ້ເຕັກໂນໂລຢີທີ່ສະໜິດສະໜົມກັບສິ່ງແວດລ້ອມເພື່ອຄວາມຮຽກຮ້ອງຕ້ອງການ ປົກປັກຮັກສາສິ່ງແວດລ້ອມໃຫ້ໝັ້ນຄົງ.
ຫັນວິໄສທັດອາຊຽນຂຽວ ແລະ ສະອາດໃຫ້ປະກົດຜົນເປັນຈິງ
ເພື່ອຫັນວິໄສທັດອາຊຽນກ່ຽວກັບ ປະຊາຄົມອາຊຽນຂຽວ ແລະ ສະອາດໃຫ້ປະກົດຜົນເປັນຈິງນັ້ນ, ພ້ອມກັບການສ້າງຕັ້ງບັນດາກົນໄກຮ່ວມມື, ອາຊຽນກໍພວມຊຸກຍູ້ການສຶກສາ ແລະ ສ້າງເງື່ອນໄຂໃຫ້ປະຊາຊົນເຂົ້າຮ່ວມຢ່າງກ້ວາງຂວາງໃນບັນດາການເຄື່ອນໄຫວ ປົກປັກຮັກສາສິ່ງແວດລ້ອມ. ປະຈຸບັນ, ອາຊຽນໄດ້ສ້າງຕັ້ງກຸ່ມປະຕິບັດງານກ່ຽວກັບການສຶກສາສິ່ງແວດລ້ອມ, ເລັ່ງໃສ່ການເຄື່ອນໄຫວ 5 ປະການທີ່ຮັບບຸລິມະສິດປະຕິບັດໃນສະເພາະໜ້າ, ນັ້ນແມ່ນຍູ້ແຮງໂຮງຮຽນຂຽວອາຊຽນ; ບຳລຸງສ້າງການນຳພັດທະນາແບບຍືນຍົງໃນການສຶກສາກ່ຽວກັບ ສິ່ງແວດລ້ອມ; ຍູ້ແຮງການສ້າງຖານຂໍ້ມູນຕີລາຄາການສຶກສາກ່ຽວກັບ ສິ່ງແວດລ້ອມ; ສ້າງເຄືອຂ່າຍສິ່ງແວດລ້ອມໝັ້ນຄົງໃນໝູ່ຊາວໜຸ່ມອາຊຽນ ແລະ ຈັດຕັ້ງງານມະໂຫລານຮູບເງົາອາຊຽນ. ອາຊຽນກໍໄດ້ຮັບຮອງເອົາແຜນການດຳເນີນງານກ່ຽວກັບການສຶກສາສິ່ງແວດລ້ອມອາຊຽນໄລຍະ 2014-2018 ແນໃສ່ຊຸກຍູ້ການພັດທະນາແບບຍືນຍົງໂດຍຜ່ານການສຶກສາ ແລະ ເພີ່ມທະວີການເຂົ້າຮ່ວມຂອງມວນຊົນໃນບັນຫາ ສິ່ງແວດລ້ອມ.
ອາຊຽນພວມຫຍັບເຂົ້າໃກ້ກັບຈຸດເວລາສ້າງຕັ້ງປະຊາຄົມ. ໃຕ້ຊາຍຄາຮ່ວມທີ່ເຊື່ອມຕໍ່ກັນນັ້ນ, ບັນດາປະເທດອາຊຽນພວມມານະພະຍາຍາມຮ່ວມແຮງຮ່ວມໃຈເພື່ອປົກປັກຮັກສາສິ່ງແວດລ້ອມຂອງພາກພື້ນ ແລະ ໂລກ.