ເວທີປາໄສເສດຖະກິດໂລກ (WEF) ຄັ້ງທີ 46 ຫາກໍຖືກໄຂຂຶ້ນຢູ່ນະຄອນ ດາໂວດ ປະເທດສະວິດ. ນີ້ແມ່ນເຫດການປະຈຳປີທີ່ເຕົ້າໂຮມນັກການເມືອງ, CEO ແລະ ຜູ້ທີ່ມີຊື່ສຽງທີ່ມາຈາກຫຼາຍປະເທດປະມານ 2.500 ຄົນ ເພື່ອປຶກສາຫາລືບັນດາບັນຫາເສດຖະກິດໃຫຍ່ໃນທົ່ວໂລກ. ໂດຍຖືກດຳເນີນໃນສະພາວະທີ່ເສດຖະກິດມີສັນຍານບໍ່ສະຫວ່າງສະໄຫວປານໃດ, ເວທີປາໄສປີນີ້ຖືກປົກຄຸມດ້ວຍບັນຍາກາດແຫ່ງຄວາມເປັນຫ່ວງຕໍ່ແງ່ຫວັງເສດຖະກິດທົ່ວໂລກ.
ດ້ວຍຫົວເລື່ອງຕົ້ນຕໍ່ “ ເປັນເຈົ້າການປະຕິວັດອຸດສາຫະກຳຄັ້ງທີ 4 ”, ເປົ້າໝາຍຂອງ ເວທີປາໄສປີນີ້ ແມ່ນສ້າງຄວາມຮັບຮູ້ລວມກ່ຽວກັບບັນດາການປ່ຽນແປງຢ່າງວ່ອງໄວທາງດ້ານເຕັກໂນໂລຢີ ແລະ ສ້າງເປັນຮູບປະທຳໃນອະນາຄົດ.
ເຂວທິດຫົວເລື່ອງ
ໂດຍຖືກດຳເນີນໃນສະພາວະເສດຖະກິດທົ່ວໂລກມີຄວາມອຶດອາດຊັກຊ້າ, ບັນດາບັນຫາເສດຖະກິດໂລກກວມລວມບັນດາໂຄງການດຳເນີນງານຂອງເວທີປາໄສ. ບົດລາຍງານກ່ຽວກັບຄວາມສ່ຽງທົ່ວໂລກຂອງ WEFທີ່ປະກາດເນື່ອງໃນໂອກາດຈັດຕັ້ງເວທີປາໄສປີນີ້ ໄດ້ສະແດງໃຫ້ເຫັນ ມີໄພເຂວທິດຂອງການເຕີບໂຕທົ່ວໂລກ. ໃນນັ້ນ, ການເຕີບໂຕທີ່ຊັກຊ້າທີ່ສຸດໃນຮອບ 25 ປີທີ່ຜ່ານມາຂອງພື້ນຖານເສດຖະກິດຈີນພວມແມ່ນຄວາມວິຕົກກັງວົນທີ່ສຸດ. ແຫຼ່ງຂ່າວຈາກກົມໃຫຍ່ສະຖີຕິຈີນໃຫ້ຮູ້ວ່າ GDP ໃນໄຕມາດທີ 4 ປີ 2015 ຂອງປະເທດນີ້ ບັນລຸພຽງ 6,8%, ອັນໄດ້ພາໃຫ້ GDP ທັງປີ 2015 ລົງ 6,9% ຊຶ່ງແມ່ນລະດັບຕ່ຳສຸດໃນ 25 ປີ ທີ່ຜ່ານມາ. ບັນດາດັດຊະນີເສດຖະກິດອື່ນໆຂອງຈີນ ກໍບໍ່ເປັນໜ້າຊື່ນຊົມປານໃດ, ຊຶ່ງໄດ້ສະແດງໃຫ້ເຫັນການສູນເສຍທ່າຢ່າງຕໍ່ເນື່ອງຂອງພື້ນຖານເສດຖະກິດຂອງປະເທດນີ້. ນອກຈາກການຫຼຸດລະດັບການເຕີບໂຕຂອງພື້ນຖານເສດຖະກິດໃຫຍ່ອັນດັບທີ 2 ໃນໂລກນີ້, ເວທີປາໄສປີນີ້ໄດ້ສະແດງໃຫ້ເຫັນຄວາມວິຕົກກັງວົນອື່ນໆອີກຈຳນວນໜຶ່ງເຊັ່ນ: ອັດຕາການວ່າງງານສູງຢູ່ຫຼາຍປະເທດ, ຜົນກະທົບຂອງລາຄານ້ຳມັນຕ່ຳທີ່ມີຕໍ່ງົບປະມານຂອງບັນດາປະເທດສົ່ງອອກນ້ຳມັນ. ນີ້ກໍແມ່ນສາຍເຫດພາໃຫ້ບັນດາຕະຫຼາດຫຼັກຊັບທົ່ວໂລກໃນເຄິ່ງເດືອນຕົ້ນປີ 2016 ຜ່ານຜ່າສະພາບຕົກຕ່ຳທີ່ຮ້າຍແຮງ. ດັ່ງນັ້ນ, ການເຕີບໂຕເສດຖະກິດທົ່ວໂລກປີ 2016 ແລະ ປີ 2017 ຖືກຄາດຄະເນວ່າ ຈະບັນລຸລະດັບ 3,3% ແລະ 3,4% ຊຶ່ງແມ່ນລະດັບຕ່ຳກວ່າເມື່ອທຽບໃສ່ການຄາດຄະເນທີ່ໄດ້ຍົກອອກມາກ່ອນນີ້ 3 ເດືອນ.
ໃນມື້ໄຂ ເວທີປາໄສ ດາໂວດເມື່ອວັນທີ 20/1, ຫຼັກຊັບຢູ່ອາຊີໄດ້ຫຼຸດລົງແຮງ, ໃນຂະນະທີ່ລາຄານ້ຳມັນດິບໃນໂລກຫຼຸດລົງເຫຼືອພຽງ 28 USD/ຖັງ, ຊຶ່ງແມ່ນລະດັບຕ່ຳສຸດໃນ 12 ປີມານີ້. ພ້ອມກັນນັ້ນ ແມ່ນການເພີ່ມທະວີຢ່າງບໍ່ສະເໝີພາບກ່ຽວກັບລາຍຮັບໃນທົ່ວໂລກ ຂະນະທີ່ມີກຸ່ມຜູ້ຮັ່ງມີກວ່າໝູ່ໃນໂລກພວມມີຊັບສົມບັດໃນຄອບຄອງດ້ວຍມູນຄ່າເທົ່າກັບຊັບສົມບັດຂອງເຄິ່ງໜຶ່ງຈຳນວນປະຊາກອນທີ່ທຸກຍາກກວ່າໝູ່ໃນໂລກ. ອົງການທີ່ບໍ່ຂຶ້ນກັບລັດຖະບານ Oxfam ໄດ້ປະກາດເມື່ອບໍ່ດົນມານີ້ວ່າ ມະຫາເສດຖີ 62 ຄົນໃນໂລກພວມມີຊັບສົມບັດດ້ວຍມູນຄ່າເທົ່າກັບຊັບສົມບັດຂອງ 3,5 ຕື້ຄົນທີ່ທຸກຍາກກວ່າໝູ່ໃນໂລກ. ການແບ່ງແຍກລະຫວ່າງຄວາມຮັ່ງມີ ແລະ ທຸກຍາກຈະພາໄປເຖິງບັນດາຜົນພາຍຫຼັງທີ່ເປັນອັນຕະລາຍ.
ວິຕົກກັງວົນຕໍ່ສະພາບການປ່ຽນແປງດິນຟ້າອາກາດ
ທີ່ເວທີປາໄສເສດຖະກິດໂລກປີນີ້, ການປ່ຽນແປງດິນຟ້າອາກາດກໍແມ່ນໜຶ່ງໃນບັນດາຫົວເລື່ອງຈຸດສຸມຂອງບັນດາກອງປະຊຸມໃນສະພາວະທີ່ບັນດາຄວາມມານະພະຍາຍາມຫຼຸດຜ່ອນ ແລະ ດັດປັບໃຫ້ແທດເໝາະກັບສະພາບການປ່ຽນແປງດິນຟ້າອາກາດ ສ່ວນຫຼາຍແມ່ນຍັງບໍ່ທັນບັນລຸໄດ້ໝາກຜົນຕາມຄວາມຫວັງ. ນີ້ເປັນຄັ້ງທຳອິດທີ່ຄວາມວິຕົກກັງວົນຕໍ່ສິ່ງແວດລ້ອມ ໄດ້ຖືກຍົກອອກໃນບົດລາຍ ງານຂອງ WEF ກ່ອນຈຸດເວລາເນີນພິທີໄຂ. ສະພາບການປ່ຽນແປງດິນຟ້າອາກາດໄດ້ ແລະ ພວມວາງອອກສິ່ງທ້າທາຍທີ່ຮ້າຍແຮງຕໍ່ບັນດາວິສາຫະກິດ ກໍຄືມວນມະນຸດ.
WEF 46 ກະຕຸກຊຸກຍູ້ການກະທຳ
ຕໍ່ໜ້າບັນດາສິ່ງທ້າທາຍທີ່ຮ້າຍແຮງດັ່ງກ່າວທີ່ເປັນໄພນາບຂູ່ຕໍ່ເສດຖະກິດທົ່ວໂລກ, ໃນຂອບເຂດເວທີປາໄສດ້ວຍການດຳເນີນກວ່າ 200 ວາລະປະຊຸມ ແລະ ແກ່ຍາວເປັນເວລາ 4 ວັນ, ບັນດາຜູ້ແທນທີ່ເຂົ້າຮ່ວມ WEF ໄດ້ເລັ່ງໃສ່ປຶກສາຫາລືຫຼາຍວິທີການແກ້ໄຂ. ບັນດາການນຳໂລກ ແລະ ການນຳບັນດາອົງການມະນຸດສະທຳ ໄດ້ໂຕ້ແຍ້ງກັນ ແລະ ປຶກສາຫາລືບັນດາມາດຕະການຊ່ວຍຊາວອົບພະຍົບເຊື່ອມຕົວເຂົ້າກັບວົງຄະນະຍາດໃຫ້ດີກວ່າເກົ່າ. ໃນຂະນະນັ້ນ, ເປັນຄັ້ງທຳອິດທີ່ປະກົດຕົວຢູ່ ດາໂວດ ນັບຕັ້ງແຕ່ເຂົ້າດຳລົງຕຳແໜ່ງ, ປະທານທານິບໍດີ ອັກຊັງຕິນ Mauricio Macri ຜູ້ຕາງໜ້າໃຫ້ແກ່ບັນດາພື້ນຖານເສດຖະກິດທີ່ຫາກໍພົ້ນເດັ່ນຂຶ້ນ ໄດ້ສະແດງທັດສະນະປະຕິຮູບເສດຖະກິດຢູ່ອາເມລິກາໃຕ້ ກໍຄືຄວາມຫຍຸ້ງຍາກຂອງ ບັນດາພື້ນຖານເສດຖະກິດທີ່ຫາກໍພົ້ນເດັ່ນຂຶ້ນໃນປະຈຸບັນ. WEF 46 ປຶກສາຫາລືບັນດາມາດຕະການປ້ອງກັນ ແລະ ຫຼີກລ້ຽງສະພາບຕົກຕ່ຳຂອງຕະຫຼາດຫຼັກຊັບ ແລະ ສະກັດກັ້ນສະພາບຫຼຸດລາຄານ້ຳມັນ. WEF 46 ຍັງກະຕຸກຊຸກຍູ້ບັນດາການນຳປະຕິບັດບັນດາຄຳໝັ້ນສັນຍາທີ່ໄດ້ຍົກອອກມາທີ່ກອງປະຊຸມສຸດຍອດແຫ່ງ ສ.ປ.ຊ ກ່ຽວກັບ ການປ່ຽນແປງດິນຟ້າອາກາດ ທີ່ຈັດຂຶ້ນຢູ່ປ່ຣີຫວ່າງແລ້ວນີ້ ແນໃສ່ຫຼຸດຜ່ອນສະພາບໜ່ວຍໂລກອຸ່ນຂຶ້ນ ແລະ ຫຼຸດຜ່ອນການນຳໃຊ້ແຫຼ່ງເຊື້ອໄຟແຮ່ທາດ.
WEF ປະຈຳປີ ຍາມໃດກໍແມ່ນເຫດການທີ່ໄດ້ຮັບການລໍຄອຍ. ເຖິງວ່າແມ່ນບ່ອນຍົກອອກຄຳຄິດຄຳເຫັນ, ທັດສະນະກໍຕາມ, ແຕ່ WEF ຍັງໄດ້ປະກອບສຽງເວົ້າທີ່ສຳຄັນ, ກະຕຸກຊຸກຍູ້ການນຳບັນດາປະເທດ ໄປສູ່ບັນດາວິທີການແກ້ໄຂລວມ ເພື່ອຮັບມືກັບຄວາມສ່ຽງຂອງພື້ນຖານເສດຖະກິດທົ່ວໂລກ.