ການເຈລະຈາອາຍແກັສ 3 ຝ່າຍລະຫວ່າງ ລັດເຊຍ,ຢູແກຼນ, ແລະ ສະຫະພາບເອີລົບ EU ທີ່ຈັດຂຶ້ນຢູ່ບຣຸກແຊນ ປະເທດແບນຊິກເມື່ອບໍ່ດົນມານີ້ ແມ່ນບໍ່ບັນລຸໄດ້ຂໍ້ຕົກລົງໃດໆ, ສິ່ງທີ່ບັນລຸພຽງຢ່າງດຽວເທົ່ານັ້ນ ແມ່ນກຳນົດວັນເວລາໃຫ້ແກ່ການພົບປະຄັ້ງຕໍ່ໄປໃນວັນທີ 29/10 ທີ່ຈະມາເຖິງ. ໝາກຜົນນີ້, ແມ່ນບໍ່ນອນນອກເໜືອຈາກການຄາດຄະເນຍ້ອນບັນດາຂໍ້ຄວາມຕິດຂັດລະຫວ່າງ ບັນດາຝ່າຍຄັງຄົງຄ້າງຢູ່ ອັນໄດ້ເຮັດໃຫ້ການເຈລະຈາຍາກທີ່ຈະໄປສູ່ຂໍ້ຕົກລົງສຸດທ້າຍ.
(ພາບປະກອບ) |
ທີ່ການພົບປະລະຫວ່າງກຳມະການພະລັງງານ EU Guenther Oettinger, ລັດຖະມົນຕີກະຊວງພະລັງງານລັດເຊຍ Alexandrer Novak ແລະ ຄູ່ຕຳແໜ່ງຂອງຢູແກຼນ ທ່ານ Yuri Prodan , ບັນດາຝ່າຍໄດ້ປຶກສາຫາລືກ່ຽວກັບບັນຫາລາຄາ, ການຊຳລະໜີ້ອາຍແກັສຂອງ ຢູແກຼນໃຫ້ລັດເຊຍ ແລະ ປະລີມານອາຍແກັສ ຂອງລັດເຊຍທີ່ສາມາດສະໜອງໃຫ້ແກ່ ຢູແກຼນໃນລະດູໜາວປີນີ້. ລາຄາ ແລະ ປະລີມານ ອາຍແກັສສະໜອງໄດ້ເປັນເອກະພາບ, ແຕ່ບັນຫາສຳຄັນຂອງບັນຫາ ແມ່ນຍ້ອນທາງຝ່າຍ ຢູແກຼນບໍ່ຊຳລະຈຳນວນເງິນຕິດໜີ້ຈາກອາຍແກັສທີ່ໄດ້ຊຶ້ຂອງລັດເຊຍ. ກີແອບຢາກນຳໃຊ້ຈຳນວນເງິນທີ່ລັດເຊຍຈາຍລວງໜ້າໃຫ້ແກ່ເລື່ອງເປັນທາງຜ່ານໃນການຂົນສົ່ງ ອາຍແກັສເພື່ອຊຳລະໜີ້ສິນ, ແຕ່ມົດສກູ ບໍ່ຍອມເຫັນດີ, ສະເໜີ EU ຕ້ອງຮັບປະກັນໃຫ້ແກ່ຄວາມສາມາດຊຳລະໜີ້ສິນຂອງ ຢູແກຼນ ຍ້ອນລັດເຊຍມີຄວາມເປັນຫວ່ງກັງວົນຕໍ່ອຳນາດການປົກຄອງ ຢູແກຼນບໍ່ມີກຳລັງບົ່ມຊ້ອນດ້ານການເງິນຢ່າງພຽງພໍເພື່ອຊຳລະບັນບ້ວງໜີ້ເຫຼົ່ານີ້.
ສ່ວນ EU ພັດຍັງບໍ່ທັນຕົກລົງກ່ຽວກັບແຫຼ່ງຊ່ວຍເຫຼືອໃຫ້ແກ່ກີແອບ, ເພາະໃນປະຈຸບັນ, EU ກໍພວມຕ້ອງປະເຊີນໜ້າກັບຄວາມຫຍຸ້ງຍາກດ້ານການເງິນນາໆປະການ. ສະພາບບໍ່ມີທາງອອກຂອງການເຈລະຈາ 3 ຝ່າຍໄດ້ພາໄປເຖິງຄວາມວິຕົກກັງວົນວ່າ : ຄວາມຫຍຸ້ງຍາກດ້ານ ອາຍແກັສ ທີ່ເຄີຍໄດ້ເກີດຂຶ້ນເມື່ອປີ 2006 ແລະ 2009 ຂະນະທີ່ລັດເຊຍໄດ້ຕັດແຫຼ່ງສະໜອງ ອາຍແກັສ ໃຫ້ແກ່ EU ນັ້ນ, ອາດຈະກັບຕ່າວຄືນມາ.
ສິ່ງທີ່ຕັດສິນຊີ້ຂາດເພື່ອສ້າງກຳລັງດັນຂອງລັດເຊຍ ແມ່ນ ອາຍແກັສ
ການໂຕ້ຖຽງກັນທີ່ກ່ຽວຂ້ອງເຖິງບັນຫາ ອາຍແກັສລະຫວ່າງລັດເຊຍ ແລະ ຢູແກຼນ ອີກເທື່ອໜຶ່ງກໍເປັນໄພອັນຕະລາຍກ່ຽວກັບແຫຼ່ງສະໜອງທີ່ມີຕໍ່ເອີລົບ ເມື່ອລະດູໜາວພວມວຽນມາໃກ້. ປະຈຸບັນ, ລັດເຊຍແມ່ນຜູ້ສະໜອງພະລັງງານໃຫຍ່ກວ່າໝູ່ໃຫ້ແກ່ EU ຜ່ານດິນແດນ ຢູແກຼນດ້ວຍຍອດປະລີມານສະໜອງແມ່ນກວມກວ່າ 30%ຄວາມຕ້ອງການດ້ານນ້ຳມັນ ແລະ ອາຍແກັສຂອງກຸ່ມປະເທດນີ້. ຖ້າຫາກໃນກໍລະນີ ລັດເຊຍຢຸດການສົ່ງອອກ ອາຍແກັສໄປຍັງພາກພື້ນນີ້ໂດຍຊົ່ວຄາວນັ້ນ, ຕາມການປະເມີນແລ້ວ, ຫຼາຍປະເທດ EU ຈະຕ້ອງຮັບຜົນສະທ້ອນຢ່າງໜັກໜ່ວງທີ່ສຸດ ເພາະປະເທດເຫຼົ່ານັ້ນໃນປະຈຸບັນແມ່ນຕ້ອງອາໄສເຖິງ 60%ປະລີມານ ອາຍແກັສນຳເຂົ້າ. ເພາະສະນັ້ນ, ການເຈລະຈາຖືກປະລາໄຊ ໄດ້ເຮັດໃຫ້ EU ມີຄວາມເປັນຫ່ວງກັງວົນທີ່ສຸດ.
ເຖິງວ່າໄດ້ຍອມຮັບລະດັບລາຄາໃນທ້ອງຕະຫຼາດຄື 385 USD/1000 m3 ກໍຕາມ, ແຕ່ສິ່ງທີ່ຫຍຸ້ງຍາກໃນປະຈຸບັນ ແມ່ນຢູແກຼນບໍ່ມີແຫຼ່ງກຳລັງການເງິນຢ່າງພຽງພໍເພື່ອຕອບສະໜອງຄວາມຕ້ອງການຊຳລະໜີ້ສິນຂອງລັດເຊຍ. ໃນຂະນະນັ້ນ, ລັດເຊຍດ້ວຍໃບໄພ້ສຳຄັນແມ່ນ ອາຍແກັສພວມຖືກກຳແໜ້ນໃນກຳມືນັ້ນ, ກໍບໍ່ອາດຜ່ອນສັ້ນຜ່ອນຍາວໄດ້ຢ່າງງາ່ຍດາຍ. ໃນສະພາວະພວມຕ້ອງຮັບການລົງໂທດຈາກບັນດາປະເທດຝ່າຍຕາເວັນຕົກ, ມົດສະກູສາມາດເຂົ້າໃຈແຈ້ງທ່າໄດ້ປຽບຂອງຕົນໃນຂົງເຂດພະລັງງານ ເພື່ອປັບປຸງທີ່ຕັ້ງບົດບາດຂອງຕົນໃນການສູ້ຢັນກັນດ້ານເສດຖະກິດກັບຝ່າຍຕາເວັນຕົກ.
ດ້ວຍການນຳໃຊ້ໃບໄພ້ດ້ານພະລັງງານ, ມົດສະກູຫວັງຢາກຍົກອອກຄຳກ່າວເຕືອນລັບກ່ຽວກັບສະພາບຫຍຸ້ງຍາກດ້ານ ອາຍແກັສຊຶ່ງ EU ເຄີຍປະເຊີນໜ້າໃນອະດີດຕະການ. ການຂັດແຍ້ງກັນ 2 ຄັ້ງກ່ຽວກັບ ອາຍແກັສລະຫ່ວາງລັດເຊຍ ແລະ ຢູແກຼນເມື່ອປີ 2006 ແລະ 2009 ໄດ້ສົ່ງຜົນສະທ້ອນຢ່າງໜັກໜ່ວງເຖິງແຫຼ່ງສະໜອງອາຍແກັສໄປຍັງເອີລົບ. ໜູນຊ່ວຍດ້ານການເງິນ ຢູແກຼນ ຫຼືຕ້ານຢັນເອງກັບສະພາບຫຍຸ້ງຍາກດ້ານ ອາຍແກັສ ? ແນ່ນອນວ່າ EU ຈະຕ້ອງໃຫ້ຄຳຕອບໃນວັນທີ 29/10ທີ່ຈະມາເຖິງ.
ບົດລະຄອນວິກິດການດ້ານອາຍແກັສອາດຈະກັບຕ່າວຄືນມາຫຼືບໍ່ ?
ຄວາມຈິງໄດ້ສະແດງໃຫ້ເຫັນວ່າ : EU ຍາກທີ່ຈະມີການເລືອກເຟັ້ນໃດໆນອກເໜືອຈາກການຊ່ວຍເຫຼືອຢູແກຼນກ່ຽວກັບດ້ານການເງິນເພື່ອໃຫ້ຢູແກຼນ ແລະ ລັດເຊຍໄປສູ່ຂໍ້ຕົກລົງກັນຢ່າງເປັນທາງການ, ແນໃສ່ຮັບປະກັນແຫຼ່ງສະໜອງອາຍແກັສໃຫ້ຕົນເອງເປັນປົກກະຕິ. ທ່ານນາງ Angela Merkel ນາຍົກລັດຖະມົນຕີເຢັຍລະມັນ ຈຳເປັນຕ້ອງຮຽກຮ້ອງບັນດາປະເທດພັນທະມິດຝ່າຍຕາເວັນຕົກ ບໍ່ຄວນປີ້ນໜ້າເມີນເສີຍ. ແຕ່ເພື່ອລະດົມເງິນໄດ້ 2 ຕຶ້ເອີໂຣ ຕາມລະດັບຊຶ່ງອຳນາດການປົກຄອງກີແອບສະເໜີໃຫ້ກູ້ຢືນເພີ່ມເຕີມ ແມ່ນບັນຫາທີ່ EU ຕ້ອງຊັງຊາລະອຽດເພາະກຸ່ມ EU ນີ້ເອງ ກໍພວມປະສົບກັບຄວາມຫຍຸ້ງຍາກດ້ານການເງິນພາຍໃນກຸ່ມ.
ດ້ວຍການໃຊ້ອາຍແກັສເປັນ“ອາວຸດ”, ມົດສະກູພວມຍູ້ EU ຕົກເຂົ້າສູ່ສະພາບຫຍຸ້ງຍາກ ເມື່ອຕ້ອງລັ່ງເລໃຈລະຫວ່າງການໜູນຊ່ວຍຢູແກຼນຫຼືຍອມຮັບຕໍ່ການຂາດແຄນພະລັງງານອາຍແກັສ. ຄວາມຈິງໃນສະພາວະການພົວພັນລັດເຊຍ-EU ຍັງຄົງບໍ່ໄດ້ຮັບການປົວແປງນັ້ນ, ການຊອກຫາວິທີການແກ້ໄຂດ້ານອາຍແກັສຍັງຄົງແມ່ນເປົ້າໝາຍທີ່ຫ່າງໄກຫຼາຍ. ການຕໍ່ສູ້ດ້ານອາຍແກັສໃນປະຈຸບັນ ບໍ່ພຽງແຕ່ເປັນບັນຫາລະຫວ່າງກີແອບ ແລະ ມົດສະກູເທົ່ານັ້ນ, ຫາກຍັງແມ່ນການສູ້ຢັນກັນລະຫວ່າງລັດເຊຍ ແລະ ຝ່າຍຕາເວັນຕົກອີກດ້ວຍ. ຕາມບັນດານັກໄຈ້ແຍກແລ້ວ, ເລື່ອງບໍ່ສົ່ງອອກນ້ຳມັນດິບ ແລະ ອາຍແກັສໄປຂາຍໃຫ້ເອີລົບ ກໍເຮັດໃຫ້ງົບປະມານຂອງລັດເຊຍຖືກຂາດດູນ, ແຕ່ກົງກັນຂ້າມ, ຜົນພາຍຫຼັງທີ່ຜູ້ຊົມໃຊ້ຊາວເອີລົບຕ້ອງຮັບນັ້ນ ອາດຈະໃຫຍ່ຫຼວງທີ່ສຸດ .