ເງົາມືດຂອງລັດທິກໍ່ການຮ້າຍພວມປົກຄຸມໄປທົ່ວປະເທດຝະລັ່ງ, ເອີລົບ ແລະ ທົ່ວໂລກ ພາຍຫຼັງເກີດການບຸກໂຈມຕີແບບກໍ່ການຮ້າຍ 2 ຄັ້ງຢູ່ຝະລັ່ງໃນອາທິດທີ່ຜ່ານມາ ອັນໄດ້ເຮັດໃຫ້ 17 ຄົນເສຍຊີວິດ. ເຫດການນີ້ ໄດ້ເຮັດໃຫ້ບັນດາປະເທດເອີລົບຫຍັບມໍ່ເຂົ້າກັນກ່ວາໃນການສູ້ຮົບຕ້ານ ລັດທິກໍ່ການຮ້າຍ, ແຕ່ກໍວາງອອກຫຼາຍບັນຫາໃນການຮັບມືກັບໄພກໍ່ການຮ້າຍ ທີ່ພວມຄຸກຄາມຕະຫຼອດ, ພິເສດເມື່ອວົງການເຈົ້າໜ້າທີ່ປ້ອງກັນຄວາມສະຫງົບເອີລົບມີຄວາມເຊື່ອໝັ້ນວ່າ ບັນດາເປົ້າໝາຍຢູ່ຝະລັ່ງໃນເວລາທີ່ຜ່ານມາ ພຽງແຕ່ຈຸດລິເລີ່ມ.
ຜູ້ຮັບເຄາະຮ້າຍຈາກເຫດການບຸກໂຈມຕີແບບກໍ່ການຮ້າຍ
(ພາບ : AP)
|
ພາຍຫຼັງບັນດາການແຫ່ຂະບວນ ສະແດງການແບ່ງເບົາຄວາມເສົ້າສະລົດໃຈກັບຊາວຝະລັ່ງ, ບັນດາປະເທດເອີລົບ ໃນທັນທີ່ໄດ້ເພີ່ມທະວີການປ້ອງກັນຄວາມສະຫງົບດ້ວຍລະດັບສູງສຸດ ເພື່ອລະວັງຕໍ່ການເກີດບັນດາກໍລະນີເຊັ່ນດຽວກັນ ກໍຄືຜັນຂະຫຍາຍແຜນການ ປ້ອງກັນຄວາມສະຫງົບພິເສດດ້ວຍບັນດາມາດຕະການຮີບດ່ວນ.
ຈິດຕະລະມັດລະວັງທີ່ປົກຄຸມໄປທົ່ວ ບັນດາປະເທດເອີລົບ
ເຫດກໍ່ການຮ້າຍໄດ້ເກີດຂຶ້ນຢ່າງລຽນຕິດຢູ່ຝະລັ່ງໃນ 2-3 ມື້ທີ່ຜ່ານມາ ໄດ້ສະແດງໃຫ້ເຫັນວ່າມີຫຼາຍຊອງວ່າງໃນການຮັບປະກັນຄວາມສະຫງົບຢູ່ຝະລັ່ງເວົ້າສະເພາະ ແລະ ບັນດາປະເທດເອີລົບເວົ້າລວມຕໍ່ໜ້າໄພກໍ່ການຮ້າຍຫົວຮຸນແຮງ. ຄວາມສາມັກຄີ ແລະ ການຮ່ວມມືກັບຝະລັ່ງຊຶ່ງ ບັນດາປະເທດເອີລົບໄດ້ສະແດງອອກໃນຊຸມມື້ທີ່ຜ່ານມາ ໄດ້ໃຫ້ເຫັນວ່າ ການນຳບັນດາປະເທດເອີລົບໄດ້ຮັບຮູ້ວ່າ : ເຫດການນອງເລືອດທີ່ເກີດຂຶ້ນຢູ່ຝະລັ່ງນັ້ນ ອາດຈະເກີດຂຶ້ນໃນດິນແດນປະເທດຂອງຕົນເອງ.
ເພາະສະນັ້ນ, ຢູ່ອັງກິດ, ທ່ານນາຍົກລັດຖະມົນຕີ David Cameron ໄດ້ສະເໜີກຳລັງຕຳຫຼວດ ແລະ ບັນດາກົມກອງທີ່ກ່ຽວຂ້ອງ ຈົ່ງກຽມພ້ອມຮັບມືກັບກໍລະນີເກີດບັນດາເຫດກໍ່ການຮ້າຍຢ່າງລຽນຕິດຢູ່ຫຼາຍສະຖານທີ່ ແລະ ແກ່ຍາວເປັນເວລາຫຼາຍວັນ. ທ່ານຍັງ ສະເໜີກຳລັງຕຳຫຼວດ ແລະ ກອງທັບສືບຕໍ່ສົມທົບກັນຢ່າງແໜ້ນແຟ້ນເພື່ອຮັບປະກັນວ່າ ກຳລັງຕຳຫຼວດອາດຈະຮັບໄດ້ການໜູນຊ່ວຍຢ່າງມີປະສິດທິຜົນເມືອ່ຈຳເປັນ. ທ່ານນາຍົກລັດຖະມົນຕີ David Cameron ໃຫ້ຄຳໝັ້ນໝາຍວ່າ ຈະມອບສິດອຳນາດແບບຮອບດ້ານກວ່າໃຫ້ແກ່ບັນດາອົງການສືບລາຊະການລັບເພື່ອຕິດຕາມກວດກາບັນດາເປົ້າໝາຍທີ່ຖືກລະແວງສົງໄສແມ່ນພວກກໍ່ການຮ້າຍຢູ່ອັງກິດ.
ຢູ່ຝະລັ່ງ, ໄພກໍ່ການຮ້າຍຍັງຄົງນາບຂູ່ຢູ່ ຂະນະທີ່ ທ່ານນາຍົກລັດຖະມົນຕີ Manuel Valls ຢືນຢັນວ່າ ແຜນການຕ້ານກໍ່ການຮ້າຍຈະສືບຕໍ່ປະຕິບັດໃນລະດັບສູງສຸດ. ຝະລັ່ງຈະລະດົມກຳລັງ ເປັນຈຳນວນຫຼາຍທີ່ສຸດເພື່ອປົກປັກຮັກສາບັນດາອົງການສຳນັກງານຂອງລັດ, ໂບດຂອງຊາວຢິວ ແລະ ຊາວມຸດສະລິມ, ບັນດາໂຮງຮຽນຂອງສາສະໜາຕ່າງໆ ຊຶ່ງເປັນແຫ່ງອາດຈະກາຍເປັນເປົ້າໝາຍບຸກໂຈມຕີຂອງພວກກໍ່ການຮ້າຍ.
ໃນຂະນະນັ້ນ, ທ່ານນາງນາຍົກລັດຖະມົນຕີເຢັຍລະມັນ Angela Merkel ໄດ້ສະເໜີ ບັນດາອົງການສືບລາຊະການລັບສາກົນຈົ່ງຮ່ວມມືຢ່າງແໜ້ນແຟ້ນກ່ວາເກົ່າເພື່ອແລກປ່ຽນຂໍ້ມູນຂ່າວສານໃນທົ່ວເອີລົບ ກໍຄືທົ່ວໂລກ. ທ່ານນາງຍັງໃຫ້ຮູ້ວ່າ ລະບົບ ປ້ອງກັນຄວາມສະຫງົບຢູ່ເຢັຍລະມັນຍາມໃດກໍຕ້ອງດັດປັບໃຫ້ເໝາະສົມ ແລະ ຕ້ອງເປີດກ້ວາງການລົງທຶນໃຫ້ລະບົບນີ້ກໍຄືເພີ່ມງົບປະມານໃຫ້ແກ່ກຳລັງຕຳຫຼວດສະຫະພັນ.
ໃນຂະນະນັ້ນ, ອີຕາລີ ກໍໄດ້ຍົກລະດັບເຕືອນໄພກໍ່ການຮ້າຍໃຫ້ສູງຂຶ້ນ. ທ່ານນາຍົກລັດຖະມົນຕີອີຕາລີ Matteo Renzi ໄດ້ສະເໜີໃຫ້ສ້າງຕັ້ງອົງການສືບລາຊະການລັບປະສົມຂອງ ບັນດາປະເທດ EU ເພາະວ່າ ນອກຈາກການນຳໃຊ້ຕະກຸນເງິນລວມ, EU ຕ້ອງສາມັກຄີກັນ ແລະ ຕ້ອງມີນະໂຍບາຍການທູດເປັນເອກະພາບ.
ສິ່ງທ້າທາຍພວມປະກົດຕົວ
ບໍ່ອາດປະຕິເສດເລື່ອງເກີດການບຸກໂຈມຕີແບບກໍ່ການຮ້າຍຢ່າງລຽນຕິດຢູ່ຝະລັ່ງໃນອາທິດທີ່ຜ່ານມາຊຶ່ງເຮັດໃຫ້ 17 ຄົນເສຍຊີວິດນັ້ນ ໄດ້ກະຕຸກຊຸກຍູ້ ບັນດາປະເທດເອີລົບຂຶ້ນແຜນການກະທຳຢ່າງເດັດດຽວກັບລັດທິກໍ່ການຮ້າຍ. ແຕ່ ການສູ້ຮົບຕ້ານ ລັດທິກໍ່ການຮ້າຍແມ່ນບໍ່ພຽງແຕ່ຖືກຈຳກັດໃນບັ້ນເຄື່ອນໄຫວ ປ້ອງກັນຄວາມສະຫງົບ ແລະ ບໍ່ແມ່ນຄວາມຮັບຜິດຊອບຂອງປະເທດໃດໜຶ່ງ. ສິ່ງທີ່ໜ້າວິຕົກກັງວົນກ່ວານັ້ນ ແມ່ນຂະນະທີ່ຜູ້ອຳນວຍການອົງການຕຳຫຼວດເອີລົບ Rob Wainwright ໃຫ້ຮູ້ວ່າ ມີພົນລະເມືອງບັນດາປະເທດ EU ເຖິງ 5000 ຄົນໄດ້ເຂົ້າຮ່ວມຖັນແຖວກຳລັງກະບົດທຳສົງຄາມສັກສິດ. ສິ່ງນີ້ແມ່ນມີຄວາມໝາຍເຊັ່ນດຽວກັນກັບເລື່ອງ EU ພວມຮັບມືກັບກຸ່ມເປົ້າໝາຍເປັນຈຳນວນຫຼວງຫຼາຍ ຊຶ່ງຕົ້ນຕໍແມ່ນໄວໜຸ່ມ ທີ່ອາດຈະກັບຕ່າວຄືນມາເພື່ອດຳເນີນບັນດາກໍລະນີບຸກໂຈມຕີ ຊຶ່ງຫາງສຽງໄດ້ເຫັນປະຈັກຕາຢູ່ປາຣີເມື່ອທ້າຍອາທິດທີ່ຜ່ານມາ.
ນອກຈາກນັ້ນ, ເອີລົບຍັງລະວັງຕົວຢ່າງສູງສຸດຂະນະທີ່ພວກຫົວຮຸນແຮງໄດ້ຫັນທິດກະທຳໄປສູ່ບັນດາກໍລະນີຕ່າງຫາກ, ກະແຈກກະຈາຍ ແນໃສ່ເປົ້າໝາຍທີ່ສາມາດປະຕິບັດໄດ້ງ່າຍ. ດັ່ງນັ້ນ, ການສູ້ຮົບຕ້ານ ລັດທິກໍ່ການຮ້າຍ ແມ່ນຮຽກຮ້ອງໃຫ້ຕ້ອງມີວິທີຢ່າງຮອບດ້ານກວ່າ. ນັ້ນແມ່ນຄວາມເຄົາລົບສິດຕັດສິນດ້ວຍຕົນເອງຂອງບັນດາປະຊາຊາດໃນໂລກອາຣັບ, ຫນູນຊ່ວຍບັນດາປະເທດຢູ່ຕາເວັນອອກກາງພັດທະນາເສດຖະກິດ, ລົບລ້າງຄວາມອຶດຫິວຫຼຸດຜ່ອນຄວາມທຸກຍາກ, ສ້າງວຽກເຮັດງານທຳໃຫ້ໄວໜຸ່ມ. ສິ່ງເຫຼົ່ານັ້ນ ຈະເປັນການຈຳກັດເລື່ອງພວກຫົວໂປບັນດາອົງການກໍ່ການຮ້າຍຮັບໄວໜຸ່ມສະໝັກເຂົ້າເປັນສະມາຊິກ.
ເປັນທີ່ຈະແຈ້ງແລ້ວວ່າ ເອີລົບສືບຕໍ່ກາຍເປັນເປົ້າໝາຍບຸກໂຈມຕີຂອງກຳລັງກໍ່ການຮ້າຍ. ການສູ້ຮົບຕ້ານ ລັດທິກໍ່ການຮ້າຍຈະຍັງໃຊ້ເວລາຍາວນານ. ໃນ ການສູ້ຮົບນີ້, ນອກຈາກແຜນການກະທຳແບບເດັດດຽວຂອງແຕ່ລະປະເທດນັ້ນ, ເອີລົບຄວນມຸ່ງໄປສູ່ການຮ່ວມມືຢ່າງເລິກເຊິ່ງກວ້າງຂວາງ, ຮອບດ້ານກວ່າ ບົນແນວຮົບຕ້ານກໍ່ການຮ້າຍ.