(vovworld)-ທ່ານຫງວຽນຟູຈ້ອງ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ພວມດຳເນີນການຢ້ຽມຢາມສະຫະພັນລັດເຊຍຢ່າງເປັນທາງການ ຕາມຄຳເຊີນຂອງທ່ານ Vladimir Putin, ປະທານາທິບໍດີ ສະຫະພັນລັດເຊຍ. ໃນສະພາວະທີ່ການພົວພັນລະຫວ່າງສອງປະເທດພວມພັດທະນາອັນດີງາມ, ການຢ້ຽມຢາມຂອງທ່ານເລຂາທິການໃຫຍ່ ຫງວຽນຟູຈ້ອງ ໄດ້ສ້າງກຳລັງຫນູນໃຫມ່, ເຮັດໃຫ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສະຫະພັນລັດເຊຍເລິກເຊິ່ງກວ່າ.
ທ່ານເລຂາທິການໃຫຍ່ ຫງວຽນຟູຈ້ອງ ທີ່ພິທີຕ້ອນຮັບ
ພາບ:news.go.vn
|
ໃນການຢ້ຽມຢາມ, ທ່ານເລຂາທິການໃຫຍ່ ຫງວຽນຟູຈ້ອງ ຈະເຈລະຈາກັບປະທານາທິບໍດີ ລັດເຊຍ V.Putin ແລະ ບັນດາການນຳສະຫະພັນລັດເຊຍ, ພ້ອມກັນແລກປ່ຽນຄຳເຫັນກ່ຽວກັບທິດທາງໃຫຍ່ ແລະ ມາດຕະການລະອຽດ ເພື່ອຍູ້ແຮງການພົວພັນຮ່ວມມືລະຫວ່າງສອງປະເທດໃນທຸກຂົງເຂດ ຈາກການເມືອງຕະຫລອດຮອດເສດຖະກິດການຄ້າ, ການລົງທຶນ, ພະລັງງານ, ນ້ຳມັນອາຍແກສ, ໄຟຟ້ານິວເຄຼຍ, ການປ້ອງກັນຊາດປ້ອງກັນຄວາມສະຫງົບ ແລະ ຂົງເຂດອື່ນ. ນອກນັ້ນ ການນຳສອງທ່ານກໍແລກປ່ຽນກ່ຽວກັບບັນດາບັນຫາສາກົນ ແລະ ພາກພື້ນ ທີ່ຕ່າງຝ່າຍຕ່າງມີຄວາມສົນໃຈ, ສົມທົບກັນດຳເນີນງານລະຫວ່າງສອງປະເທດໃນເວທີສາກົນ.
ພຶດຕິກຳຕົວຈິງແຫ່ງການຮ່ວມມືທີ່ມີຊີວິດຊີວາ
ປີ 2012 ເປັນຂີດໝາຍສຳຄັນໃນປະຫວັດສາດແຫ່ງການພົວພັນລະຫວ່າງ ຫວຽດນາມ - ລັດເຊຍ ເມື່ອສອງປະເທດຍົກການພົວພັນຈາກຄູ່ຮ່ວມມືຍຸດທະສາດ ຂຶ້ນເຖິງການພົວພັນຄູ່ຮ່ວມມືຍຸດທະສາດຮອບດ້ານ. ການຮ່ວມມືຢ່າງແທດຈິງ, ປະສິດທິຜົນຂອງການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ- ລັດເຊຍ ໄດ້ຮັບການຮັບຮູ້ຜ່ານການພັດທະນາຢ່າງຂະຫຍັນຂັນເຄື່ອນດ້ວຍທ່າເຕີບໂຕດ້ານການຄ້າສອງຝ່າຍ. ທ່ານ ຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດຫວຽດນາມ ຟ້າມບີງມີງ ໄດ້ໃຫ້ຂໍ້ສັງເກດວ່າ:
“ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ ແລະ ສະຫະພັນລັດເຊຍ ໃນໄລຍະຜ່ານມາໄດ້ພັດທະນາຢ່າງຕັ້ງຫນ້າ, ການຮ່ວມມືໃນບັນດາຂົງເຂດໄດ້ຮັບການຍູ້ແຮງ ແລະ ນຳມາເຊິ່ງຜົນປະໂຫຍດແທດຈິງໃຫ້ແກ່ທັງສອງປະເທດ. ກ່ຽວກັບດ້ານການເມືອງການຕ່າງປະເທດ, ສອງຝ່າຍຮັກສາເປັນປະຈຳບັນດາກົນໄກແລກປ່ຽນ, ທາບທາບຄຳເຫັນເຊິ່ງກັນ ແລະ ກັນ, ແລກປ່ຽນບັນດາການຢ້ຽມຢາມຂັ້ນສູງກໍຄືການຢ້ຽມຢາມຂອງບັນດາກະຊວງ, ຂະແຫນງການສອງປະເທດ. ການຮ່ວມມືດ້ານເສດຖະກິດການຄ້າມີບາດກ້າວພັດທະນາຢ່າງຕັ້ງຫນ້າ. ວົງເງິນການຄ້າສອງປະເທດບັນລຸເກືອບ 4 ຕື້ USD, ເພີ່ມຂຶ້ນ 7% ໃນປີ 2013, ເມື່ອທຽບໃສ່ປີ 2012. ການຮ່ວມມືໃນບັນດາຂົງເຂດອື່ນ, ພິເສດ ໃນຂົງເຂດນ້ຳມັນອາຍແກສ, ພະລັງງານລະຫວ່າງຫວຽດນາມ ແລະ ລັດເຊຍ ບັນລຸໄດ້ໝາກຜົນສຳຄັນຫລາຍຢ່າງ, ມີປະສິດທິຜົນ, ນຳມາເຊິ່ງລາຍຮັບໃຫຍ່ ແລະ ໝັ້ນທ່ຽງໃຫ້ແກ່ງົບປະມານຂອງສອງປະເທດ.”
ປະຈຸບັນ ສະຫະພັນລັດເຊຍ ຢືນອັນດັບທີ 18 ໃນຍອດຈຳນວນ 101 ປະເທດ ແລະ ເຂດແຄ້ວນລົງທຶນຢູ່ຫວຽດນາມ. ການລົງທຶນຂອງຫວຽດນາມ ໄປຍັງລັດເຊຍໃນສອງສາມປີມານີ້ ກໍເພີ່ມຂຶ້ນຢ່າງວ່ອງໄວ. ສອງຝ່າຍ ໄດ້ສ້າງຕັ້ງຫນ່ວຍວຽກງານຂັ້ນສູງກ່ຽວກັບບັນດາໂຄງການລົງທຶນບຸລິມະສິດຫວຽດນາມ - ລັດເຊຍ, ໄດ້ກຳນົດ 17 ໂຄງການບຸລິມະສິດ, ປະກອບສ່ວນສຳຄັນເຂົ້າໃນການເພີ່ມທະວີການພົວພັນລົງທຶນລະຫວ່າງສອງປະເທດປະຈຸບັນ. ເປັນຫນ້າສົນໃຈ, ຫວຽດນາມ ແລະ ສຳພັນທະມິດພາສີ ລັດເຊຍ -ກາຊັກສະຖານ- ເບລາຣຸດ ໄດ້ດຳເນີນການເຈລະຈາກ່ຽວກັບສັນຍາການຄ້າເສລີ ເປັນ 7 ຮອບ ແລະ ພວມວາງຈຸດໝາຍສຳເລັດໃນທ້າຍປີ 2014, ສູ້ຊົນບັນລຸຈຸດໝາຍຍົກວົງເງິນແລກປ່ຽນສິນຄ້າສອງຝ່າຍໃຫ້ຂຶ້ນເຖິງ 7 ຕື້ USD ໃນປີ 2015 ແລະ 10 ຕື້ USD ໃນປີ 2020. ໃນການຢ້ຽມຢາມຫວຽດນາມ ໄລຍະຕົ້ນປີນີ້, ທ່ານ Sergei Lavrov, ລັດຖະມົນຕີການຕ່າງປະເທດລັດເຊຍ ຢືນຢັນວ່າ:
“ການເຈລະຈາກ່ຽວກັບສັນຍາການຄ້າເສລີ (FTA) ພວມດຳເນີນໄປຄຽງຄູ່ກັບການເຄື່ອນໄຫວຂອງຫນ່ວຍປະຕິບັດງານຂັ້ນສູງກ່ຽວກັບບັນດາໂຄງການບຸລິມະສິດ. ສອງຝ່າຍພວມພິຈາລະນາ, ປຶກສາຫາລືກ່ຽວກັບບັນດາໂຄງການສອງຝ່າຍສຳຄັນ. ບັນດາບໍລິສັດ, ກຸ່ມບໍລິສັດສອງປະເທດພວມພິຈາລະນາຄວາມສາມາດເປີດກວ້າງການຮ່ວມມືໃນຂົງເຂດນ້ຳມັນອາຍແກສ, ເພື່ອຜັນຂະຫຍາຍບັນດາຂໍ້ຕົກລົງຕາມການຊີ້ນຳຂອງການນຳຂັ້ນສູງສອງປະເທດ, ເພື່ອເຮັດແນວໃດເຮັດໃຫ້ຂົງເຂດພະລັງງານກາຍເປັນເສົາຄ້ຳຂອງການພົວພັນເສດຖະກິດລະຫວ່າງຫວຽດນາມ ແລະ ລັດເຊຍ ໄລຍະປະຈຸບັນ ກໍຄືໃນອະນາຄົດ.”
ເຄົາລົບປະຫວັດສາດ, ມຸ່ງໄປສູ່ອະນາຄົດ
64 ປີກ່ອນນີ້, ໂຊວຽດເກົ່າ(ສະຫະພັນລັດເຊຍປະຈຸບັນ) ແມ່ນຫນຶ່ງໃນບັນດາປະເທດທຳອິດໃນໂລກຮັບຮູ້ ແລະ ສ້າງຕັ້ງການພົວພັນທາງການທູດກັບຫວຽດນາມຢ່າງເປັນທາງການ. ຜ່ານການທົດສອບນາໆປະການ ແລະ ການຜັນແປຫລາຍຢ່າງຂອງສະພາບການໂລກກໍຄືການພັດທະນາຢູ່ແຕ່ລະປະເທດ, ການພົວພັນລະຫວ່າງສອງປະເທດ ສືບຕໍ່ໄດ້ຮັບການປັບປຸງ ແລະ ພັດທະນາຢ່າບໍ່ຢຸດຢັ້ງ. ໃນສະພາບການໃຫມ່ ດ້ວຍບັນດາການຫັນປ່ຽນຢ່າງໃຫຍ່ຫລວງໃນຊີວິດດ້ານການເມືອງ ສັງຄົມໂລກ, ດ້ວຍລະດັບການພົວພັນຄູ່ຮ່ວມມືຍຸດທະສາດຮອບດ້ານ, ລັດເຊຍ ແລະ ຫວຽດນາມສືບຕໍ່ແມ່ນບັນດາເພື່ອນທີ່ໄວ້ເນື້ອເຊື່ອໃຈ, ແມ່ນຄູ່ຮ່ວມມືສຳຄັນຂອງກັນ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຫວຽດນາມ ຟ້າມບີງມີງ ຖືວ່າ:
“ຫວຽດນາມ ເຊື່ອໝັ້ນວ່າ ລັດເຊຍ ຈະສືບຕໍ່ປະກອບສ່ວນຫລາຍກວ່າໃຫ້ແກ່ສັນຕິພາບ, ຄວາມໝັ້ນຄົງ ຢູ່ພາກພື້ນ ອາຊີ -ປາຊີຟີກ. ຫວຽດນາມ ຖືວ່າ ອາຊີ- ປາຊີຟີກ ມີສັນຕິພາບ, ສະຖຽນລະພາບ ແມ່ນສອດຄ່ອງກັບຜົນປະໂຫຍດພັດທະນາຂອງບັນດາປະເທດໃນນັ້ນ ມີລັດເຊຍ ແລະ ຫວຽດນາມ. ການເຂົ້າຮ່ວມຢ່າງແທດຈິງ, ໂປ່ງໃສ ແລະ ມີຄວາມຮັບຜິດຊອບຂອງບັນດາປະເທດໃຫຍ່ ໃນນັ້ນ ມີລັດເຊຍ ຈະນຳມາເຊິ່ງຜົນປະໂຫຍດໃຫ້ແກ່ສັນຕິພາບ, ສະຖຽນລະພາບ ແລະ ການພັດທະນາຂອງພາກພື້ນ.”
ປີ 2015 ຈະແມ່ນປີ ຊື່ງຫວຽດນາມ ແລະ ລັດເຊຍ ສະເຫລີມສະຫລອງ 65 ປີແຫ່ງວັນສ້າງຕັ້ງການພົວພັນທາງການທູດ. ນີ້ເປັນຂີດໝາຍສຳຄັນໃນປະຫວັດສາດແຫ່ງການພັດທະນາການພົວພັນລະຫວ່າງສອງປະເທດ. ໃນສະພາວະນັ້ນ, ການຢ້ຽມຢາມສະຫະພັນລັດເຊຍຢ່າງເປັນທາງການຄັ້ງນີ້ຂອງ ທ່ານເລຂາທິການໃຫຍ່ ຫງວຽນຟູຈ້ອງ ມີຄວາມໝາຍສຳຄັນ, ປະກອບສ່ວນຊຸກຍູ້ນ້ຳໃຈມິດຕະພາບ ແລະ ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ ແລະ ສະຫະພັນລັດເຊຍ ນັບມື້ນັບເລິກເຊິ່ງ ແລະ ມີປະສິທິຜົນ.