ແຜນທີ່ “10 ຕອນ”ສະແດງໃຫ້ເຫັນກົນອຸບາຍຢືດຄອງທະເລຕາເວັນອອກ

Anh Huyen -

ວັນຈັນ ທີ 30 ມິຖຸນາ ຄ.ສ. 2014 | 15:59:26

(vovworld)- ຫວ່າງແລ້ວນີ້ ຈີນ ສືບຕໍ່“ມີການກະທຳຕື່ມອີກບາດຫນຶ່ງ”ໃນຄວາມມັກໃຫຍ່ໄຝ່ສູງຢາກແຜ່ຂະຫຍາຍອານາເຂດຢູ່ທະເລຕາເວັນອອກ ດ້ວຍການພິມຈຳຫນ່າຍແຜນທີ່ປະກາດເສັ້ນຊາຍແດນບົນທະເລ ຊື່ງລວມມີ 10 ຕອນ, ກວມເອົາເນື້ອທີ່ທະເລຕາເວັນອອກເກືອບທັງໝົດ. ເຖິງຢ່າງໃດກໍຕາມ, ການກະທຳພຽງລຳພັງຝ່າຍດຽວຂອງຈີນ ໄດ້ຖືກປະຊາຄົມໂລກ ເຜີຍແບ.

ແຜນທີ່ “10 ຕອນ”ສະແດງໃຫ້ເຫັນກົນອຸບາຍຢືດຄອງທະເລຕາເວັນອອກ - ảnh 1

ທ່ານເອກອັກຄະລັດຖະທູດອາເມລິກາປະຈຳ Philip Goldberg
ຄັດຄ້ານແຜນທີ່ສະບັບໃຫມ່ຂອງຈີນ
ພາບ: AFP

ໃນແຜນທີ່ສະບັບໃຫມ່ ໂດຍສຳນັກພິມຈຳຫນ່າຍແຜນທີ່ ຮູ່ຫນານ ຈຳຫນ່າຍເມື່ອວັນທີ 25/6, ຈີນ ຖະແຫລງອະທິປະໄຕຢູ່ທະເລຕາເວັນອອກໂດຍບັງອາດ, ດ້ວຍການແຕ້ມສີ“ເສັ້ນ 10 ຕອນ”ບຽດໃກ້ກັບບັນດາຝ່ັງທະເລຂອງຫວຽດນາມ, ມາເລເຊຍ, ຟິລີບປີນ ແລະ ບຣູໄນ, ກວມເອົາເນື້ອທີທະເລຕະເວັນອອກເກືອບທັງໝົດ, ນັບທັງ ສອງໝູ່ເກາະ ຮ່ວາງຊາ ແລະ ເຈື່ອງຊາຂອງຫວຽດນາມ, ເກາະ Palawan ແລະ Luzon ແລະເກາະ Scarborough ຂອງຟີລີບປີນ, ຊ້ຳບໍໜຳ ຍັງກວມເອົາລັດ Arunachal Pradesh ຂອງອິນເດຍ. ບໍ່ພຽງແຕ່ກວມເອົາໝູ່ເກາະບາງແຫ່ງຂອງປະເທດອື່ນເປັນດິນແດນຂອງຕົນເທົ່ານັ້ນ ຫາກຈີນ ຍັງຖະແຫລງວ່າ ການໃຫ້ສັດຕະຍາບັນແຜນທີ່ສະບັບໃຫມ່ ແມ່ນເພື່ອປົກປັກຮັກສາອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຈີນ ແລະ ແຜນທີ່ສະບັບນີ້ ຈະສະຫນອງ ຄວາມຮັບຮູ້ຢ່າງຮອບດ້ານ ໃຫ້ແກ່ປະຊາຊົນ ແລະ ຈະບໍ່ຕ້ອງລັ່ງເລໃຈກ່ຽວກັບອະທິປະໄຕຜືນແຜ່ນດິນຂອງຈີນ. ຄາດວ່າ ແຜນທີ່ສະບັບນີ້ຈະຖືກນຳໃຊ້ໃນໂຮງຮຽນຢູ່ຈີນ.

ຖະແຫລງການຕາມລຳພັງ ແລະ ໄຮ້ເຫດຜົນ

ດ້ວຍການກະທຳແຕ້ມຄືນແຜນທີ່, ໃນນັ້ນ ກວມເອົາທັງເຂດນ້ຳແດນດິນຂອງປະເທດອື່ນເປັນຂອງຕົນ ຢາກຕັ້ງໃຈເຮັດໃຫ້ຄວາມຮັບຮູ້ຂອງປະຊາຊົນພາຍໃນປະເທດກ່ຽວກັບອະທິປະໄຕຢູ່ທະເລຕາເວັນອອກຜິດເຂວ, ປະຊາຄົມໂລກ ໄດ້ເຜີຍແບກົນອຸບາຍຢືດຄອງທະເລຕາເວັນອອກຂອງຈີນ.

ແຜນທີ່ “10 ຕອນ”ສະແດງໃຫ້ເຫັນກົນອຸບາຍຢືດຄອງທະເລຕາເວັນອອກ - ảnh 2

ແຜນທີ່ 10 ຕອນຂອງຈີນຖືກຫລາຍປະເທດຄັດຄ້ານ
ພາບ:khampha.vn

ຫລາຍປະເທດໃນພາກພື້ນ ໄດ້ຄັດຄ້ານຢ່າງແຮງ, ແລະ ຖືວ່າ ແຜນທີ່ສະບັບໃຫມ່ ລວມມີ 10 ຕອນ ຂອງຈີນບົນທະເລຕາເວັນອອກ ແມ່ນຄວາມມັກໃຫຍ່ໄຝ່ສູງຢາກແຜ່ຂະຫຍາຍອານາເຂດທີ່ໄຮ້ເຫດຜົນ, ໄປຝືກກັບກົດໝາຍສາກົນ ແລະ ລະເມີດສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລປີ 1982 ຊື່ງຈີນແມ່ນຝ່າຍຫນຶ່ງເຂົ້າຮ່ວມ. ແຜນທີ່ສະບັບນີ້ ພຽງແມ່ນຮູບແຕ້ມທີ່ໄຮ້ເຫດຜົນ ສະນັ້ນມັນບໍ່ມີຄຸນຄ່າ. ອາເມລິກາ ກໍ່ປະຕິເສດ ແຜນທີ່ 10 ຕອນຂອງຈີນ, ຕຳນິຕິຕຽນ ປັກກີງ ຖືເບົາ ບັນດາມາດຕະການທາງການທູດ ແລະ ສັນຕິພາບໃນການແກ້ໄຂບັນດາຄວາມບໍ່ລົງລອຍກັນ ແລະ ຄວາມຂັດແຍ້ງກັນ. ອິນເດຍ ກໍຄັດຄ້ານຢ່າງແຮງ ແລະ ຖືວ່າ: ເຫດການທີ່ຈີນພິມຈຳຫນ່າຍ ແຜນທີ່ສະບັບນີ້ ແມ່ນກົນອຸບາຍໃຫມ່ຂອງຈີນໃນການ ບຽດຢືດທີ່ດິນ, ບຽດຢືດທະເລ . ອິນເດຍ ຢືນຢັນວ່າ ລັດ Arunachal Pradesh ຢູ່ ທາງທິດຕາເວັນອອກສ່ຽງເຫນືອຂອງອິນເດຍ ຊື່ງຈີນ ໄດ້ສະແດງອອກໃນແຜນທີ່ສະບັບໃຫມ່ ຄືດັ່ງສ່ວນຫນຶ່ງຂຶ້ນກັບ ທິເບດ, ແມ່ນສ່ວນຫນຶ່ງຂອງເຂດນ້ຳແດນດິນ ອິນເດຍ ທີ່ບໍ່ອາດຕັດແຍກໄດ້ ແລະ ໄດ້ຮັບການຄຸ້ມຄອງຈາກ New Deli ພາຍຫລັງສົງຄາມຊາຍແດນລະຫວ່າງສອງປະເທດເມື່ອປີ 1962.

ສື່ມວນຊົນສາກົນ ກໍເຢາະເຢີ້ຍແຜນທີ່ສະບັບໃຫມ່ຂອງຈີນ. ຫນັງສືພິມ Washington Post ຂອງອາເມລິກາ ສະບັບອອກໃນວັນທີ 27/6 ໄດ້ຕຳນິຕິຕຽນແຜນທີ່ສະບັບໃຫມ່ຂອງຈີນ ແມ່ນສິ່ງທີ່ແປກປະຫລາດເກີນໄປຂອງບັນດາປະເທດບ້ານໃກ້ເຮືອນຄຽງ ແລະ ເປັນຫນ້າຫົວທີ່ສຸດເມື່ອແຜນທີ່ສະບັບນີ້ ຍັງກວມເອົາທັງລັດ Arunachal Pradesh ຂອງອິນເດຍອີກ. ໃນບົດຂຽນດ້ວຍຫົວຂໍ້ວ່າ: “ປັກກີງ ຈັດວາງບັນດາເງື່ອນໄຂໄຮ້ເຫດຜົນບົນທະເລຕາເວັນອອກ” ຫນັງສືພິມ Le Monde ຂອງຝລ່ັງ ສະບັບອອກຫວ່າງແລ້ວນີ້, ນັກຂ່າວ Brice Pedroletti ໄດ້ໄຈ້ແຍກຄວາມມັກໃຫຍ່ໄຝ່ສູງ ກາຍເປັນປະເທດມະຫາອຳນາດບົນທະເລ ແມ່ນຫນຶ່ງໃນບັນດາຫນ້າທີ່ຫລັກແຫລ່ງ ໃນອາຍຸການຂອງປະທານປະເທດຈີນ ສີຈີ້ນຜິງ, ເພື່ອປະຕິບັດ “ຄວາມໄຝ່ຝັນຂອງຈີນ”. ແລະ ເພື່ອຫັນຄວາມໄຝ່ຝັນຂອງຕົນໃຫ້ປະກົດຜົນເປັນຈິງ, ຈີນ ພ້ອມແລ້ວນຳໃຊ້ທຸກເລ່ຫລ່ຽມ, ກົນອຸບາຍເມີນເສີຍຕໍ່ກົດໝາຍສາກົນ, ນຳໃຊ້ທ່າໄດ້ປຽບດ້ານການທະຫານເພື່ອບັງບຽດປະເທດນ້ອຍ ແນໃສ່ຊຸກຍູ້ບັນດາການຮຽກສິດຂອງຕົນ. ສຳນັກຂ່າວ Reuter ຂອງອັງກິດ ໄດ້ວິຈານວ່າ ດ້ວຍບາດກ້າວໃຫມ່ນີ້, ອາຊີ ຍາກທີ່ສາມາດເຊື່ອໃຈຕໍ່ເຈດຈຳນົງຂອງຈີນ ແມ່ນຢາກມີສັນຕິພາບຢ່າງແທ້ຈິງ. ຫນັງສືພິມລາຍວັນ La Croix ຂອງຝລ່ັງ ສະບັບອອກວັນທີ 26/6 ໄດ້ຄັດຄຳເວົ້າບັນດານັກຄົ້ນຄ້ວາ ໂດຍໃຫ້ສັງເກດວ່າ: ຈີນ ພວມນຳໃຊ້ຄວາມມັກໃຫຍ່ໄຝ່ສູງຢາກແຜ່ອຳນາດຢູ່ທະເລຕາເວັນອອກ ແລະ ທະເລຮວາຕຸງ ເພື່ອປົກປິດສະພາບຂາດສະຖຽນລະພາບພາຍໃນປະເທດ.

ບໍ່ພຽງແຕ່ເຮັດໃຫ້ບັນດາປະເທດບ້ານໃກ້ເຮືອນຄຽງ, ບັນດາປະເທດນອກພາກພື້ນ ຄັດຄ້ານເທົ່ານັ້ນ ຫາກຫາງສຽງພາຍໃນປະເທດກໍຕຳນິຕິຕຽນແຜນທີ່ສະບັບນີ້. ນັກວິຈານການທະຫານທົ່ວໂລກຂອງຈີນ ມີຊ່ືວ່າ: Wu Ge ໄດ້ມີບົດຂຽນທາງສື່ສັງຄົມອອນໄລ Weibo ໂດຍຖືວ່າ: ຖ້າມີການກະທຳຄືປັກກີງ, ອາເມລິກາ, ອັງກິດ ຫລືບໍ່ວ່າປະເທດໃດຢາກມີເຂດນ້ຳແດນດິນຢູ່ຕ່າງປະເທດ ພຽງແຕ້ມແຜນທີ່ກໍແລ້ວ. ແລະ ແຜນທີ່ສະບັບໃຫມ່ຂອງຈີນ ພຽງສະແດງໃຫ້ເຫັນນ້ຳໃຈຮັກຊາດແບບ ຕາຍຕົວເທົ່ານັ້ນ

ຄວາມມັກໃຫຍ່ໄຝ່ສູງແຜ່ອຳນາດສະແດງອອກຢ່າງຈະແຈ້ງ

ແຕ່ກ່ອນມາຮອດປະຈຸບັນ, ຍາມໃດຈີນ ກໍບໍ່ສະເໝີຕົ້ນສະເໝີປາຍກ່ຽວກັບສິ່ງທີ່ເອີ້ນວ່າ:“ເສັ້ນທາງ 9 ຕອນ”. ຄວາມຈິງ, ຈີນເອງ ຍັງເຂົ້າໃຈບໍ່ແຈ້ງ ແລະ ຂັດແຍ້ງກັນ, ບໍ່ຮູ້ວ່າຈະອະທິບາຍແນວໃດກ່ຽວກັບເສັ້ນທາງ 9 ຕອນ ຢ່າງມີເຫດຜົນ. ເສັ້ນທາງ 9 ຕອນ ຖືກແຕ້ມ ຄືແນວໃດ, ນັບແຕ່ຈຸດເວລາໃດ ມາຮອດປະຈຸບັນບໍ່ມີເອກະສານສະບັບໃດອະທິບາຍຢ່າງຊັດເຈນ. ວົງການສື່ສານ, ນັກວິທະຍາສາດ, ນັກທະນາຍຄວາມ, ນັກການເມືອງ ແລະ ພູມສາດຂອງຈີນ ແຕ່ລະຄົນກໍ່ລາຍງານແບບແຕກຕ່າງກັນ, ຊ້ຳບໍ່ໜຳຍັງຂັດແຍ້ງກັນ. ໃນປະຫວັດສາດ, ຈີນ ຍັງແຕ້ມ ເສັ້ນທາງ 9 ຕອນ ເປັນ 11 ຕອນ.

ດ້ວຍການຜັນປ່ຽນແບບລຳພັງ ຊື່ງຈີນ ພວມນຳໃຊ້ ເພື່ອປະຕິບັດຄຳຮຽກສິດທີ່ໄຮ້ເຫດຜົນ, ປັກກີງ ພວມເຮັດໃຫ້ພາບພົດຂອງຕົນຊ່ົວຮ້າຍລົງຕໍ່ຫນ້າປະຊາຄົມໂລກ. ຕັ້ງໃຈກວມເອົາໝູ່ເກາະເກືອບທັງໝົດໃຫ້ແກ່ຕົນເອງ, ການກະທຳຂອງຈີນ ໄດ້ສະແດງໃຫ້ເຫັນຄວາມມັກໃຫຍ່ໄຝ່ສູງຢາກແຜ່ອຳນາດ ບໍ່ປົກປິດໄດ້. ແຕ່ເສັ້ນທາງ 9 ຕອນ, 10 ຕອນ ຫລື 11 ຕອນ ຕາມບັນດານັກໄຈ້ແຍກສາກົນແລ້ວ, ນັ້ນພຽງແຕ່ຊ່ວຍໃຫ້ຈີນ ພຶງພໍໃຈຢູ່ພາຍໃນປະເທດເທົ່ານັ້ນ ຫາກບໍ່ມີຄຸນຄ່າຫຍັງກັບໂລກ. ເຖິງວ່າ ຈີນ ຈະພະຍາຍາມປະຕິບັດສິ່ງໃດຫນື່ງອີກ ແຕ່ສຸດທ້າຍ ສະນະດ້ານກົດໝາຍຂອງເສັ້ນທາງ 9 ຕອນ ຫລື 10 ຕອນ ພຽງແຕ່ແມ່ນສານຕຸລາການສາກົນເປັນຜູ້ຕັດສິນເທົ່ານັ້ນ.

Anh Huyen