ມົກເຈົາໃນຊຸມປີມໍ່ໆມານີ້ ໄດ້ແລະພວມກາຍເປັນໜຶ່ງໃນບັນດາສະຖານທີ່ທ່ອງທ່ຽວ ໂດຍນັກທ່ອງທ່ຽວຫຼາຍຄົນເລືອກເຟັ້ນ. ເມື່ອມາຢ້ຽມຢາມມົກເຈົາ, ພວກເຮົາຈະຄິດໄດ້ໃນທັນທີວ່າ ໄດ້ມາຢ້ຽມຢາມບັນດາດອຍຊາທີ່ຂຽວອຸ່ມທຸ່ມ, ປ່າດອກໝາກໝັ້ນຂາວຈ່ານຜ່ານ, ຝູງງົວທີ່ໃຫ້ເຄື່ອງໝາຍການຄ້ານ້ຳນົມສົດທີ່ມີຊື່ສຽງ. ເຖິງຢ່າງໃດກໍ່ຕາມ, ບັນດາຝູງງົວເຫຼົ່ານີ້ບໍ່ພຽງແຕ່ ເປັນແຫຼ່ງສະໜອງນ້ຳນົມທີ່ດີເທົ່ານັ້ນ ຫາກຍັງເປັນແຫຼ່ງສະໜອງເຍື່ອງອາຫານພິເສດທີ່ມີຊື່ສຽງໃນເຂດພູພຽງຕາເວັນຕົກສ່ຽງເໝືອອີກດ້ວຍ.
ທອດຊີ້ນງົວນ້ອຍ-ອາຫານທີ່ເປັນເອກະລັກສະເພາະຂອງມົກເຈົາ |
ພາຍຫຼັງທີ່ໄປຢ້ຽມຢາມປ່າດອກໝາກໝັ້ນນ່າກາ, ຕອນແລງປະມານ 4 ໂມງເຄິ່ງ, ລິງ ໄດ້ພາເລ, ເຊິ່ງແມ່ນເພື່ອນຮ່ວມຫ້ອງໃນສະໄໝຮຽນຢູ່ມະຫາວິທະຍາໄລ ມາຈາກໄຊງ່ອນ ໄປກິນ ທອດຊີ້ນງົວນ້ອຍ-ອາຫານທີ່ເປັນເອກະລັກສະເພາະຂອງມົກເຈົາ ບໍ່ວ່າແຂກທ່ານໃດ ເມື່ອມາຢ້ຽມຢາມເຂດດິນແດນແຫ່ງນີ້ກໍ່ຈະບໍ່ພາດໂອກາດ.
ລົດໄດ້ຈອດຢູ່ຮ້ານ ແບັກເຫງັຍຕັ້ງຢູ່ກິໂລແມັດ 70 - ເທດສະບານເມືອງນິຄົມກະເສດມົກເຈົາ-ເຊີນລາ. ຮ້ານພົ້ນເດັ່ນດ້ວຍປ້າຍຂະໜາດໃຫຍ່, ສີແດງດ້ວຍແຖວຕົວໜັງສື “ທອດຊີ້ນງົວນ້ອຍ- ແບັກເຫງັຍ ” ໄດ້ຕັ້ງຢູ່ທາງເຂົ້າຮ້ານ. ຍ້ອນມີປ້າຍນັ້ນ, ຮ້ານຈຶ່ງໄດ້ດຶງດູດຄວາມສົນໃຈຂອງແຂກທີ່ໄປມາຜ່ານຄຸ້ມຖະໜົນນີ້ໄດ້ຫຼາຍຄົນ. ອອກມາຮັບຕ້ອນລິງ ກັບ ເລ ແມ່ນເອື້ອຍ ຫງວຽນທິເຫງັຍ ເຈົ້າຂອງຮ້ານ. ເອື້ອຍເຫງັຍ ເປັນຄົນໃຈດີ ໃບໜ້າຍິ້ມແຍ້ມແຈ່ມໃສ ຍາມໃດ ກໍ່ ເຮັດໃຫ້ແຂກ ມີຄວາມຮູ້ສຶກໄດ້ວ່າ ເອື້ອຍມີຄວາມຮັກແພງ ແລະ ສະໜິດສະໜົມ. ສອງນາງສາວຟ້າວເຂົ້າໄປເລືອກໂຕະນັ່ງລົມກັນໃນຂະນະທີ່ເອື້ອຍເຫງັຍເຮັດອາຫານ.
ໃນເວລານີ້ວາງຢູ່ຕໍ່ໜ້າ ເລ ແລະ ລິງ ແມ່ນຈານທອດຊີ້ນງົວນ້ອຍທີ່ຮ້ອນໆ ຫອມໆ ພວມລະເຫີຍອາຍໄປທົ່ວຫ້ອງ (ເທບ):
“ຊີ້ນຂອງມັນນຸ້ມ. ຊີ້ນນີ້ແມ່ນຊີ້ນງົວ ແມ່ນບໍ່ ແຕ່ມັນບໍ່ມີກິ່ນຊີ້ນງົວເລີຍ ຊີ້ນມັນນຸ້ມ ມັນຫອມແຕ່ບໍ່ມີກິ່ນກຸຍງົວຄືກັນກັບຕອນເຮົາເຮັດອົບ.”
“ເມື່ອຫຍ້ຳໃຫ້ລະອຽດ, ຂ້າພະເຈົ້າຮູ້ສຶກໄດ້ວ່າ ລົດຊາດຂອງຊີ້ນງົວນ້ອຍກົມກຽວເຂົ້າກັບລົດຊາດຂອງຂີງ, ສີໄຂ, ກະທຽມທອດກອບ. ທຸກຢ່າງໄດ້ປະສົມກົມກຽວເຂົ້າກັນສ້າງເປັນລົດຊາດທີ່ແຊບນົວ ເຖິງວ່າມັນແມ່ນເຍື່ອງອາຫານທີ່ທຳມະດາກໍ່ຕາມ.”
ເຂົ້າໄປເລິກອີກ ສິບແມັດແມ່ນຫ້ອງຄົວຂອງຮ້ານ. ວັດຖຸດິບ ແລະ ອຸປະກອນທັງໝົດທີ່ຮັບໃຊ້ໃຫ້ແກ່ການປຸງແຕ່ງ ລ້ວນແຕ່ໄດ້ແຍກອອກ ແລະ ມ້ຽນໄວ້ຕ່າງຫາກ ຢ່າງເປັນລະບຽບຮຽບຮ້ອຍ. ເອື້ອຍເຫງັຍເອົາ ຊີ້ນງົວນ້ອຍ 2 ກິໂລກຼາມ ຢູ່ຕູ້ເຢັນອອກມາຊອຍເປັນຕ່ອນ ໜາ 1 ຊັງຕີແມັດ ແລະ ຍາວປະມານ 3 ຊັງຕີແມັດ:
“ຊີ້ນງົວນ້ອຍ ຕ້ອງເລືອກເອົາຊີ້ນສົດ ແລະ ຕ້ອງແມ່ນຊີ້ນໂຕທີ່ຫາກໍ່ເກີດໃໝ່ມີອາຍຸໄດ້ໜຶ່ງອາທິດ ເລືອກໄດ້ຊີ້ນງົວນ້ອຍຄືແນວນີ້ ຊີ້ນຂອງມັນຈະແຊບ. ຖ້າເຮົາເອົາຊີ້ນງົວນ້ອຍ ໂຕທີ່ແມ່ພັນມັນກິນຫຍ້າ ບໍ່ແມ່ນງົວພັນນົມ ຊີ້ນຂອງມັນຈະມີສີກ່ຳກວ່າ, ກິນກໍ່ຫຍາບ ແລະ ບໍ່ນຸ້ມ ”
ພາຍຫຼັງຊອຍຊີ້ນແລ້ວ, ເອື້ອຍເຫງັຍເອົາຫົວສີໄຄມາຊອຍບາງ, ຂີງຊອຍເປັນເສັ້ນ ແລະ ຫົວກະທຽມ ທັງໝົດທັບ ແລະ ຟັກໃຫ້ແລກເພື່ອເປັນວັດຖຸດິບໃນການເອືອບຊີ້ນ.
“ທອດຊີ້ນງົວນ້ອຍ ຕ້ອງມີຂີງ ແລະ ຫົວກະທຽມ ຈຶ່ງແຊບ, ຫົວສີໄຄພຽງແຕ່ແມ່ນວັດຖຸດິບເພີ່ມເຕີມ ບໍ່ມີຂີງ ແລະ ກະທຽມ, ຈະບໍ່ມີກິ່ນຫອມ. ຖ້າຊີ້ນງົວນ້ອຍເຄິ່ງກິໂລ ແມ່ນໃສ່ກະທຽມເຄິ່ງຫົວ ແລະ ຂີງປ້ອມນ້ອຍໜຶ່ງ. ພິເສດ ທອດຊີ້ນງົວນ້ອຍແມ່ນບໍ່ໃສ່ພິກໄທ ຖ້າໃສ່ພິກໄທ, ຈະບໍ່ມີກິ່ນຫອມຂອງງົວນ້ອຍ ເຊິ່ງມັນຈະມີກິ່ນກຸຍສາບງົວ”
ເອື້ອຍໃຊ້ສອງມືຄັ້ນຊີ້ນໃສ່ກັບເຄື່ອງປະກອບໃຫ້ສະໝ່ຳສະເໝີ ເປັນເວລາ 10 ນາທີ ຫຼັງຈາກນັ້ນ ເອື້ອຍປະໄວ້ 3-4 ນາທີ ເພື່ອໃຫ້ເຄື່ອງເຫຼົ່ານັ້ນຊຶມເຂົ້າກັບເນື້ອຊີ້ນ. ໃນຂະນະທີ່ລໍຖ້າຊີ້ນນັ້ນ ເອື້ອຍເອົາໝໍ້ກະທະຄ້າງໃສ່ເຕົາແກັດ ເອົານ້ຳມັນພືດໃສ່ປະມານເຄິ່ງໝໍ້ ເມື່ອນ້ຳມັນຮ້ອນຊີ້ນກໍ່ພໍດີໄດ້ :
“ທອດຊີ້ນຕ້ອງໃສ່ນ້ຳມັນຫຼາຍ ເມື່ອນ້ຳມັນຮ້ອນແລ້ວຈຶ່ງເອົາຊີ້ນລົງ ເປີດໄວຄ່ອຍ ຊີ້ນຈຶ່ງຄ່ອຍໆສຸກ ຍາມໃດກໍ່ແຊບກວ່າເປີດໄວແຮງ. ເຮັດຄືແນວນັ້ນ ຍາມໃດຕ່ອນຊີ້ນ ກໍ່ກອບນອກ ນຸ້ມໃນຢູ່ສະເໝີ ເມືອເວລາທອດຊີ້ນຕ້ອງເອົານ້ຳມັນໃໝ່ ຖ້າບໍ່ດັ່ງນັ້ນຊີ້ນຈະດຳກ່ຳ ແລະ ຖ້າເຮັດໄຟແຮງຊີ້ນກໍ່ຈະໄໝ້ນອກ ບໍ່ສຸກໃນ”
ເມື່ອເຄື່ອງປະສົມຂີງ, ສີໄຄ, ກະທຽມເລີ່ມມີສີເຫຼືອງ ເອື້ອຍເຫງັຍເອົາຈອງຊ່ອງຕັກອອກໃສ່ຈານດິນທີ່ກຽມໄວ້ ແລ້ວສືບຕໍ່ຄົນຊີ້ນອີກປະມານ 3 ນາທີຕື່ມ. ເມື່ອຊີ້ນມີສີເຫຼືອງສະເໝີກັນແລ້ວ ເອື້ອຍເປີດໄຟແຮງທີ່ສຸດ ຄົນຕື່ມອີກສອງສາມບາດ ຫຼັງຈາກນັ້ນຈຶ່ງຕັກອອກມາໃສ່ຈານທີ່ມີເຄື່ອງປະສົມສີໄຄ, ຂີງ, ກະທຽມ ແລະ ໂຮຍໝາກງາໃສ່ໜ້ອຍໜຶ່ງ.
ທອດຊີ້ນງົວນ້ອຍຕ້ອງຮັບປະທານກັບນ້ຳແຈ່ວຂີງ. ເມື່ອກິນເທື່ອລະໜ້ອຍພວກເຮົາຈະຮູ້ສຶກໄດ້ກິ່ນຫອມຂອງຂີງ, ລົດຊາດທີ່ເຂັ້ມຂຸ້ນຂອງນ້ຳແຈ່ວ, ກິ່ນຫອມຂອງໝາກງາ ປະສົມກົມກຽວໃສ່ກັບລົດຊາດຫວານຂອງຊີ້ນງົວນ້ອຍ ຈະມີລົດຊາດພິເສດ ແລະ ຫາກິນໄດ້ຢູ່ແຕ່ມົກເຈົາເທົ່ານັ້ນ.
ຖ້າພວກເພື່ອນຢາກຮັບປະທານກໍ່ສາມາດປະຕິບັດຕາມສູດລຸ່ມນີ້
1 ກະກຽມວັດຖຸດິບ
-ຊີ້ນງົວນ້ອຍ 300 g
- ຫົວສີໄຄ 4 ຫົວ
- ຂີງ 1 ປ້ອມນ້ອຍ
- ຫົວຜັກທຽມທຸບຟັກໃຫ້ແລກ
-ນ້ຳແຈ່ວ, ນ້ຳມັນພືດ, ໝາກງາຂົ້ວ
2 ຂັ້ນຕອນໃນການເຮັດ:
ທີ1: ຊອຍສີໄຄທັບໃຫ້ມຸ່ນກັບກະທຽມ ແລະ ຂີງ ສອງສ່ວນສາມ ( ໜຶ່ງສ່ວນສາມຂອງຂີງທີ່ຍັງເຫຼືອແມ່ນຊອຍເປັນເສັ້ນບາງ )
ທີ2 : ຊີ້ນງົວນ້ອຍຊອຍເປັນຕ່ອນພໍດີຄຳແລ້ວເອົາໄປຄົນໃສ່ກັບເຄື່ອງປະກອບຂີງ, ສີໄຄ, ກະທຽມປະໄວ້ປະມານ 10 – 15 ນາທີ
ທີ3 : ເອົານ້ຳມັນໃສ່ ເມື່ອຮ້ອນແລ້ວເອົາຊີ້ນລົງທອດ ພ້ອມກັບເຄື່ອງປະສົມຂີງ, ສີໄຄ, ກະທຽມ. ຄົນໃຫ້ສະໝ່ຳສະເໝີ ເມື່ອຊີ້ນມີເຫຼືອງ ຕັກອອກໃສ່ຈານ,ເອົາໝາກງາໂຮຍໃສ່ຕື່ມອີກໜ້ອຍໜຶ່ງ
ທີ4 : ເອົາຂີງທີ່ຊອຍໄວ້ນັ້ນ ໃສ່ກັບນ້ຳແຈ່ວຈ້ຳ ແລ້ວຄົນໃຫ້ທົ່ວ ເປັນອັນວ່າສຳເລັດ. ຫວັງວ່າພວກເພື່ອນຈະເຮັດກິນແຊບ.