ໃນເມື່ອກ່ອນ ພໍ່ແມ່ຂອງພວກເຮົາເຮັດເຂົ້າໜົມຕາມປົກກະຕິແລ້ວແມ່ນອີງໃສ່ວິທີຂອງການເຮັດ, ຄຸນລັກສະນະ ຫຼືວ່າ ຮູບແບບຂອງເຂົ້າໜົມເພື່ອຕັ້ງຊື່. ເຊັ່ນວ່າ: ເຂົ້າໜົມຂີງກໍ່ຈະມີຮູບຮ່າງຄືຂີງຂອງຊາວເຜົາຈຳ ( ແຂວງບິ່ງທ້ວນ )… ແລະ ປັນຕ່າຍ ແມ່ນເຂົ້າໜົມທີ່ເປັນເອກະລັກ, ມີຊື່ສຽງຂອງຟູ໋ເຖາະກໍ່ແມ່ນປະເພດເຂົ້າໜົມທີ່ໄດ້ຮັບການຕັ້ງຊື່ໂດຍອີງຕາມວິທີການເຮັດ ຫຼື ຮູບຮ່າງຂອງມັນ, ປັນຕ່າຍກໍໝາຍເຖິງເຂົ້າໜົມຫູ. ເມື່ອເບິ່ງແລ້ວ ເຂົ້າໜົມນີ້ນຸ້ມ ຫອມ, ງ່າຍດາຍ ແຕ່ເພື່ອໃຫ້ໄດ້ເຂົ້າໜົມນັ້ນ, ຂັ້ນຕອນຂອງການເຮັດຕ້ອງລະອຽດ ແລະ ຄ່ອງແຄ້ວ.
ປັນຕ່າຍ-ອາຫານພິເສດຂອງດິນແດນແຫ່ງບັນພະບູລຸດ
|
ນັບແຕ່ເວລາ 7 ໂມງເຊົ້າຂອງວັນທ້າຍລະດູຮ້ອນ ໃນໄລຍະທາງຍາວປະມານ 200 ແມັດຢູ່ໃຈກາງເທດສະບານເມືອງຟູ໋ເຖາະ, ເຊິ່ງຫ່າງຈາກນະຄອນຫວຽດຈີ່ 20 ກິໂລແມັດ. ພຽງແຕ່ໄລຍະທາງສັ້ນເທົ່ານັ້ນ ແຕ່ມີຮ້ານຂາຍອາຫານການກິນໃຫຍ່, ນ້ອຍກວ່າ 20 ຮ້ານຄື: ແບ້ງກາຍ, ແບ້ງຢໍ, ໂນ້ມດູດູ່…..ແຜ່ນປ້າຍສີແດງ “ປັນຕ່າຍ ພື້ນເມືອງ ” ໄດ້ແຂວນຢູ່ເທິງໜ້າປະຕູເຮືອນສອງຊັ້ນທີ່ທາສີຂາວ ເຊິ່ງໄດ້ຮັບການກໍ່ສ້າງ ແຕ່ຊຸມປີ 90 ໃນສະຕະວັດທີ່ 20 ນັ້ນແມ່ນເຮືອນຂອງປ້າ ຫງວຽນທິງວຽດ. ຂອບເຂດຮ້ານກວ້າງປະມານ 50 ຕາແມັດດ້ວຍໂຕະ, ຕັ່ງຢາງຢາຍໃສ່ຕັ້ງແຕ່ໃນເຮືອນອອກຮອດທາງຍ່າງ. ຂ້າງປະຕູທາງອອກແມ່ນໂຕະໄມ້, ຢູ່ເທິງໜ້າໂຕະແມ່ນຕູ້ແກ້ວບັນຈຸ ປັນຕ່າຍທີ່ຍັງຮ້ອນໆຢູ່. ປ້າງວຽດ ປີນີ້ອາຍຸໄດ້ 70 ປີແລ້ວແຕ່ເບິ່ງຄືວ່າຍັງແຂງແຮງຢູ່, ຄອບຄົວຂອງປ້າມີມູນເຊື້ອເຮັດ ປັນຕ່າຍມາໄດ້ສີ່ລຸ້ນຄົນແລ້ວ. ປະຈຸບັນປ້າໄດ້ຖ່າຍຖອດອາຊີບເຮັດເຂົ້າໜົມນີ້ໃຫ້ລູກຊາຍ ແລະ ລູກໃພ້ ເພື່ອສືບຕໍ່ຮັກສາ ແລະ ເສີມຂະຫຍາຍອາຊີບທີ່ເປັນມູນເຊື້ອນີ້ໄວ້.
“ເພື່ອເຮັດປັນຕ່າຍທີ່ແຊບນັ້ນ ຕ້ອງໄດ້ຜ່ານຫຼາຍຂັ້ນຕອນທີ່ລະອຽດ. ກ່ອນອື່ນໝົດຕ້ອງເລືອກເຂົ້າຈ້າວຊະນິດທີ່ແຊບ, ເມັດຂາວງາມ ແລະ ກໍ່ນຸ້ມ, ນີ້ແມ່ນຂັ້ນຕອນສຳຄັນທີ່ສຸດ. ຫຼັງຈາກນັ້ນລ້າງເຂົ້າໃຫ້ສະອາດ, ມ່າປະໄວ້ປະມານ 3-4 ຊົ່ວໂມງ, ແລ້ວຊາວອອກໃຫ້ສະເດັດນ້ຳຈຶ່ງນຳເອົາໄປໂມ້ ແລະ ເຮັດເປັນປັ້ນຊ່ຳໜ່ວຍໝາກກ້ຽງໃຫຍ່. ຕົ້ມນ້ຳໃຫ້ຟົດແລ້ວຈຶ່ງເອົາແຕ່ລະປັ້ນລົງໃສ່ໝໍ້ ຕົ້ມຈົນຮອດເວລາໃດມັນຟູຂຶ້ນແລ້ວຈຶ່ງຕັກອອກໃສ່ຄົກຕຳໃຫ້ແຫຼກ.”
ຢູ່ໃນເຮືອນຄົວ ອ້າຍຮືງ ແລະ ເອື້ອຍຮ່າ ສອງຜົວເມຍກຳລັງເຮັດ ປັນຕ່າຍໃນຂັ້ນຕອນຕໍ່ໄປ. ສອງມືຂອງອ້າຍຮືງກຳສາກໄມ້ຍາວ 1,5 ແມັດ, ຕຳແປ້ງປະມານແຕ່ 15-20 ນາທີເພື່ອໃຫ້ແປ້ງແຫຼກດີ.
“ຕຳແປ້ງຕ້ອງແມ່ນຜູ້ທີ່ມີປະສົບການ ແລະ ແຂງແຮງດີ ແປ້ງຈຶ່ງນຸ້ມສະໝ່ຳສະເໝີກັນ ແລະ ບໍ່ເປັນກ້ອນ. ນີ້ກໍ່ແມ່ນໜຶ່ງໃນປັດໃຈທີ່ພາໄປເຖິງຄຸນນະພາບຂອງປັນຕ່າຍ ”
ເພື່ອເຮັດ ປັນຕ່າຍທີ່ແຊບນັ້ນ ສຳຄັນທີ່ສຸດແມ່ນຂັ້ນຕອນການປຸງແຕ່ງໄສ້ຂອງເຂົ້າໜົມ, ເອື້ອຍຮ່າ ໄດ້ແບ່ງປັນເຄັດລັບວ່າ:
“ສຳລັບປັນຕ່າຍແລ້ວ ໄສ້ຂອງມັນຕ້ອງເຮັດດ້ວຍຊີ້ນໝູ. ຊີ້ນໝູທີ່ຊື້ມາຕ້ອງຮັບປະກັນຄວາມສົດ. ຊີ້ນໝູທີ່ພວກຂ້າພະເຈົ້າເອົາມາເຮັດຕົ້ນຕໍແມ່ນ ຊີ້ນສາມຊັ້ນ, ຊີ້ນສັນ, ຊີ້ນກົ້ນມີນ້ຳມັນປົນໜ້ອຍໜຶ່ງກໍຍິງ່ດີ. ຫຼັງຈາກນັ້ນເອົາມາຟັກໃຫ້ມຸ່ນແລ້ວເອົາມາຄົນໃສ່ກັບຜັກບົ່ວແຫ້ງ, ພິກໄທໜ້ອຍໜຶ່ງ, ແປ້ງນົວ ແລະ ເກືອໃຫ້ສະໝ່ຳສະເໝີກັນ ”
ເອື້ອຍຮ່າເອົາແປ້ງມາເຮັດເຂົ້າໜົມຊັ້ນນອກບາງໆ ແລ້ວກໍ່ຕັກເອົາໄສ້ເຂົ້າໜົມໃສ່ສອງບ່ວງແກງ, ຫຼັງຈາກນັ້ນຈຶ່ງພັບເຂົ້າຄືນເຮັດໃຫ້ເຂົ້າໜົມເປັນຮູບຮ່າງຂອງໃບຫູ. ເຂົ້າໜົມແຕ່ລະອັນໃຫຍ່ຊ່ຳຝາມື. ແລ້ວກໍ່ເອົາໄປໜຶ້ງປະມານ 30 ນາທີຈຶ່ງສຸກ. ປ້າງວຽດໃຫ້ຮູ້ຕື່ມອີກວ່າ:
“ປັນຕ່າຍທີ່ໄດ້ຕາມຄວາມຕ້ອງການແມ່ນຕ້ອງຮັບປະກັນເມື່ອເວລາກິນ, ພວກເຮົາຮູ້ສຶກມີກິ່ນຫອມຈາກແປ້ງເຂົ້າ ແລະ ໄສ້ເຮັດດ້ວຍຊີ້ນ. ເມື່ອກິນເຂົ້າໜົມກໍ່ຮູ້ສຶກນຸ້ມ, ເຢັນ, ກອບ ມັນແຕ່ບໍ່ເຍື່ອຍ.”
ແຕ່ລະມື້, ຄອບຄົວຂອງປ້າງວຽດຂາຍເຂົ້າໜົມໄດ້ແຕ່ 30 – 40 ຈານ ດ້ວຍລາຄາແຕ່ 20 ຫາ 30.000 ດົງ. ເມື່ອລົບຄ່າໃຊ້ຈ່າຍອອກໃນແຕ່ລະເດືອນ ຄອບຄົວຂອງປ້າງວຽດກໍ່ມີລາຍຮັບປະມານ 6-7 ລ້ານດົງ. ເຂົ້າໜົມຂອງຄອບຄົວປ້າງວຽດເປັນທີ່ຮູ້ຈັກເຖິງຂອງແຂກທັງຢູ່ພາຍໃນ ແລະ ຕ່າງແຂວງ ແລະ ເປັນເຍື່ອງອາຫານພື້ນເມືອງທີ່ເປັນເອກະລັກຂອງດິນແດນຟູ໋ເຖາະ.
------------------------
ຖ້າຫາກພວກເພື່ອນຢາກປຸງແຕ່ງເຍື່ອງອາຫານນີ້ໃຫ້ຄອບຄົວ ແລະ ໝູ່ເພື່ອນກິນ ກໍ່ສາມາດປະຕິບັດຕາມຂັ້ນຕອນລຸ່ມນີ້:
1. ຄວນກະກຽມ:
- ເຂົ້າຈ້າວ 400 ກຼາມ
- ຊີ້ນສັນ 150 ກຼາມ
- ຜັກບົ່ວແຫ້ງ 2 ຫົວ
- ນ້ຳອຸ່ນ 500 ມິນລີລິດ
- ເຄື່ອງປຸງ ນ້ຳປາ, ເກືອ, ແປ້ງນົວ, ພິກໄທ.
2. ວິທີເຮັດ
- ຂັ້ນຕອນທີ1ແມ່ນ ຟັກຊີ້ນ ແລະ ຫົວບົ່ວແຫ້ງ
- ຂັ້ນຕອນທີ່2ແມ່ນ ຄົນຊີ້ນ, ຜັກບົ່ວ, ພິກໄທ 1 ບ່ວງ, ນ້ຳປາ 1 ບ່ວງໃສ່ກັນເພື່ອເຮັດໄສ້ເຂົ້າໜົມ.
- ຂັ້ນຕອນທີ3ແມ່ນ ເອົາແປ້ງເຂົ້າຈ້າວ ແລະ ເກື່ອ1ສ່ວນສີ່ບ່ວງ ຄົນໃສ່ໃຫ້ເຂົ້າກັນ, ຫຼັງຈາກນັ້ນປັ້ນໃຫ້ເປັນປັ້ນແລ້ວຈຶ່ງເອົາໄປຕົ້ມຈົນໃຫ້ມັນຟູຈຶ່ງຕັກອອກ.
- ຂັ້ນຕອນທີ4ແມ່ນ ນຳເອົາແປ້ງນັ້ນມາຕຳໃຫ້ນຸ້ມ ແລະ ໜຽວດີ.
ຂັ້ນຕອນທີ5 ແມ່ນ ເອົາແປ້ງທີ່ຕຳແລ້ວນັ້ນມາເຮັດເປັນແຜ່ນບາງ ແລ້ວກໍ່ຕັກເອົາໄສ້ໃສ່ເຄິ່ງກາງຈຶ່ງພັບເຂົ້າຄືນໃຫ້ເປັນຮູບເຄິ່ງວົງມົນ. ເມື່ອສຳເລັດແລ້ວຈຶ່ງເອົາໄປໜຶ້ງປະມານ 30 ນາທີ ເປັນອັນວ່າສຳເລັດຂັນຕອນການເຮັດເຂົ້າໜົມທີ່ເປັນເອກະລັກສະເພາະຂອງດິນແດນຟູ໋ເຖາະ ດ້ວຍລົດຊາດທີ່ແຊບ, ມີກິນຫອມ ແລະ ນຸ້ມ. ຫວັງວ່າພວກເພື່ອນຈະເຮັດກິນແຊບ