ໃນຍຸກປະຈຸບັນ, ເບິ່ງຄືວ່າ ສິນຄ້າທຸກໆປະເພດ ກໍລ້ວນແຕ່ມີຂາຍທາງເຄືອຂ່າຍອິນເຕີເນັດ, ຈາກເຄື່ອງໃຊ້ໄມ້ສອຍ ຕະຫຼອດຮອດອາຫານເຍື່ອງຕ່າງໆກໍລ້ວນແຕ່ຖືກຂາຍຜ່ານ ເຄືອຂ່າຍອິນເຕີເນັດ. ໃນນັ້ນ ເຍື່ອງອາຫານເສັ້ນລ້ອນຂົ້ວ ກໍມີຂາຍ ແລະ ຮັບໃຊ້ຜູ້ບໍລິໂພກຮອດເຮືອນ. ອາຫານເຍື່ອງນີ້ ແມ່ນສາມາດປຸງແຕ່ງໄດ້ຢ່າງງ່າຍດາຍ ຍ້ອນວັດຖຸດິບ ແມ່ນຫາງ່າຍທີ່ສຸດຢູ່ຕະຫຼາດ.
ເຍື່ອງອາຫານເສັ້ນລ້ອນຂົ້ວກັບເຄື່ອງທະເລ |
ມື້ໃດກໍເຊັ່ນດຽວກັນ, ນັບແຕ່ 5 ໂມງເຊົ້າ, ນາງລິງຊຶ່ງແມ່ນຜູ້ຂາຍເສັ້ນລ້ອນຂົ້ວຜ່ານເຄືອຂ່າຍອິນເຕີເນັດ, Facebook ດ້ວຍ Nick name “ກິນຂອງຫວ່າງ” ໄດ້ຕື່ນນອນເພື່ອໄປຕະຫຼາດຊື້ອາຫານເພື່ອປຸງແຕ່ງເຍື່ອງອາຫານເສັ້ນລ້ອນຂົ້ວເພື່ອຮັບໃຊ້ຜູ້ບໍລິໂພກ. ຈາກເຮືອນຂອງຕົນ, ນາງລິງໃຊ້ເວລາບໍ່ຮອດ 5 ນາທີ່ເພື່ອຍ່າງໄປຮອດຕະຫຼາດ ມາຍດົ້ງ, ລາວໄດ້ແວ່ຊື້ເສັ້ນລ້ອນ, ເຄື່ອງແຫ້ງ, ຜັກຫອມ, ປາມຶກ ແລະ ກຸ້ງທະເລ. ນາງລິງໃຫ້ຮູ້ວ່າ :
“ ຂ້າພະເຈົ້າຕ້ອງຕື່ນເຊົ້າ ຈຶ່ງຈະຊື້ໄດ້ອາຫານທີ່ດີກວ່າ. ມີວັດຖຸດິບບາງຢ່າງຄື ເສັ້ນລ້ອນ, ເຫັດຫອມ, ເກືອ…ກໍສາມາດຊື້ໄວ້ກ່ອນ, ແຕ່ສຳລັບຜັກ, ກຸ້ງແມ່ນຕ້ອງຊື້ແນວສົດມາປຸງແຕ່ງເລີຍ. ຖ້າຫາກຊື້ໄວ້ແຕ່ມື້ກ່ອນນັ້ນ ແລະ ຖ້າຮອດມື້ໜ້ານຳມາປຸງແຕ່ງ, ຜັກ ແລະ ກຸ້ງກໍບໍ່ແຊບຄືຂອງສົດເລີຍ ”
ເມື່ອຊື້ໄດ້ວັດຖຸດິບທີ່ຕົນຕ້ອງການນັ້ນ, ນາງໄດ້ກັບເມືອບ້ານ ເຂົ້າເຮືອນຄົວປຸງແຕ່ງເສັ້ນລ້ອນຂົ້ວ ເພື່ອຮັບໃຊ້ແຂກທັນກັບການສັ່ງຊື້ແຕ່ຕອນຄ່ຳມື້ກ່ອນ. ຄິດວ່າ ເສັ້ນລ້ອນຂົ້ວແມ່ນເຍື່ອງອາຫານທີ່ເຮັດຢ່າງງ່າຍດາຍ ພຽງແຕ່ນຳເອົາວັດຖຸດິບທຸກຢ່າງມາຂົ້ວເທິ່ງເຕົາໄຟເທົ່ານັ້ນ. ແຕ່ເພື່ອປຸງແຕ່ງເຍື່ອງອາຫານເສັ້ນລ້ອນຂົ້ວໃຫ້ແຊບນັ້ນ ກໍຕ້ອງຜ່ານຫຼາຍຂັ້ນຕອນ. ນາງລິງ ນຳເອົາເສັ້ນລ້ອນມັດໜຶ່ງທີ່ຫາກໍຊື້ມາຈາກຕະຫຼາດ ໃສ່ຊາມນ້ຳ ພ້ອມທັງເປີດເຜີຍກ່ຽວກັບຂັ້ນຕອນທຳອິດໃນການປຸງແຕ່ງເຍື່ອງອາຫານເສັ້ນລ້ອນຂົ້ວກັບເຄື່ອງທະເລວ່າ :
“ ທຳອິດແມ່ນຕ້ອງໝ່າເສັ້ນລ້ອນເສຍກ່ອນ, ຈຶ່ງຮອດບັນດາຂັ້ນຕອນປຸງແຕ່ງວັດຖຸດິບອື່ນໆ. ຕ້ອງໝ່າເສັ້ນລ້ອນປະມານ 10 ນາທີ່, ເມື່ອສັງເກດວ່າແມ່ນອ່ອນໄປ ແມ່ນໄດ້ແລ້ວ. ບໍ່ຕ້ອງໝ່າຫຼາຍ ເພາະເມື່ອຂົ້ວມັນຈະເປື່ອຍ, ຖ້າຫາກຟ້າວໝ່າ, ເສັ້ນລ້ອນຈະແຂງ. ຫຼັງຈາກນັ້ນ ກໍຕັກໃສ່ກະບຽນ ປະໃຫ້ນ້ຳຍ້ອຍໝົດ. ຂັ້ນຕອນຕໍ່ໄປແມ່ນໝ່າເຫັດຫອມ ແລະ ເຫັດຊະນຸ່ນໃຫ້ມັນໄນ ”
ບັນດາຂັ້ນຕອນໃນການປຸງແຕ່ງສຳລັບວັດໂຖຸດິບແຕ່ລະຢ່າງ, ນາງລິງເຮັດລະອຽດທີ່ສຸດ ຕາມການຖ່າຍທອດຈາກແມ່ຂອງຕົນ. ນາງລິງ ໃຫ້ຮູ້ວ່າ :
“ ພາຍຫຼັງທີ່ໄດ້ໝ່າເຫັດຫອມ ແລະ ເຫັດຊະນຸ່ນແລ້ວ, ກໍນຳໄປຕັດຊອຍເປັນເສັ້ນນ້ອຍ,. ສຳລັບເສັ້ນລ້ອນ ກໍຕັດເປັນຕອນປະມານ 5-6 ຊັງຕິແມັດ. ສວ່ນຖົ່ວຍາວ ແມ່ນຕ້ອງລ້າງໃຫ້ສະອາດ, ແລ້ວກໍຕັດຊອຍບ່ຽງໄປ. ສຳລັບປ່າມຶກແຫ້ງກໍຕ້ອງໝ່າໃສ່ນ້ຳອຸ່ນປະມານ 15 ນາທີ, ແລ້ວກໍຕັດເປັນເສັ້ນນ້ອຍ. ສ່ວນກຸ້ງ ກໍຕ້ອງ ລ້າງໃຫ້ສະອາດ, ຫຼັງຈາກນັ້ນກໍໜຶ້ງໃຫ້ສຸກ, ແລ້ວກໍຕ້ອງປອກເປືອກ. ສຳລັບປາມຶກ ແມ່ນຕ້ອງຂົ້ວຕ່າງຫາກໃຫ້ສຸກເຫຼືອງ, ຫຼັງຈາກນັ້ນ ໃສ່ນ້ຳຕານ 1 ບ່ວງກາເຟ ”
ນາງລິງທັງປຸງແຕ່ງ ທັງສະຫຼະເວລາເພື່ອຊອກຫາຜູ້ບໍລິໂພກສັ່ງຊື້ຜ່ານ ເຄືອຂ່າຍອິນເຕີເນັດ. ເຖິງວ່າຈຳນວນຜູ້ບໍລິໂພກບໍ່ຫຼາຍຄືຢູ່ຮ້າຍອາຫານຕາມຖະໜົນຫົນທາງກໍຕາມ, ແຕ່ໃນແຕ່ລະມື້ ນາງລິງໄດ້ຮັບໃຊ້ ຜູ້ບໍລິໂພກແຕ່ 20 ຫາ 30 ຄົນ. ນາງລິງເວົ້າວ່າ :
“ ທຳອິດແມ່ນຕ້ອງຂົ້ວແບບປະສົມລະຫວ່າງບັນດາວັດຖຸດິບທີ່ໄດ້ກະກຽມໄວ້ແລ້ວ ຄື : ຖົ່ວຍາວ, ກາຣົດ, ເຫັດຫອມ ແລະ ເຫັດຊະນຸ່ນ. ຕ້ອງໃສ່ເກືອໜ້ອຍໜຶ່ງຕາມໃຈ. ວັດຖຸດິບເຫຼົ່ານັ້ນ ຕ້ອງຂົ້ວເກືອບສຸກ, ແລ້ວຈຶ່ງເອົາເສັ້ນລ້ອນຂົ້ວນຳດ້ວຍ. ຕ້ອງຄົນໃຫ້ສະໝ່ຳສະເໝີ, ຫຼັງຈາກນັ້ນຈຶ່ງເອົາປາມຶກ ແລະ ກຸ້ງຂົ້ວນຳຕາມພາຍຫຼັງ. ຄວນໃສ່ນ້ຳຊ໋ອດໝາກເຜັດໜ້ອຍໜຶ່ງ ແລະ ຕ້ອງຂົ້ວຮອດເວລາເສັ້ນລ້ອນອ່ອນໄປ ແມ່ນສຳເລັດ. ສຸດທ້າຍຕ້ອງໃສ່ໝາກພີກໄທໜ້ອຍໜຶ່ງເພື່ອເພີ່ມລົດຫອມ ”
ນາງລິງໃຫ້ຮູ້ວ່າ ເຍື່ອງອາຫານເສັ້ນລ້ອນຂົ້ວເມື່ອເຮັດສຳເລັດ ຈະຕ້ອງເອົາໃສ່ກັບດີໆເພື່ອສາມາດຮັບປະກັນຄວາມອຸ່ນ ແລະ ລົດຊາດພິເສດເມື່ອແຂກເອົາມາກິນ
_________________________
ທ່ານຜູ້ຟັງທີ່ເຄົາລົບ!
ຖ້າຫາກພວກເພື່ອນຢາກປຸງແຕ່ງເສັ້ນລ້ອນຂົ້ວກັບເຄື່ອງທະເລ, ພວກທ່ານຕ້ອງກະກຽມວັດຖຸດິບດັ່ງນີ້ :
- ເສັ້ນລ້ອນແຫ້ງ : 100 ກະຣາມ
- ກຸ້ງສົດ: 150 ກະຣາມ
- ປາມຶກແຫ້ງ : 150 ກະຣາມ
- ກະຣົດ : ໜ່ວຍໜຶ່ງ
- ເຫັດຫອມ ແລະ ເຫັດຊະນຸ່ນ: 10 ກະຣາມ ພ້ອມກັບເກືອ, ໝາກພີກໄທ, ໝາກເຜັດ, ນ້ຳປາ, ຜັກຫອມບົ່ວ, ຜັກຫອມປ້ອມ, ນ້ຳສົ້ມ…ສຳລັບບັນດາຂັ້ນຕອນໃນການປຸງແຕ່ງ, ພວກເຮົາໄດ້ແນະນຳຂ້າງເທິ່ງ. ຫວັງວ່າພວກເພື່ອນຈະເຮັດກິນແຊບ .