ຢູ່ຮ່າໂນ້ຍ, ມີຮ້ານຂາຍ ເສັ້ນລ້ອນອ່ຽນນັບຮ້ອຍຮ້ານເຊັ່ນ: ຮ້ານເສັ້ນລ້ອນອ່ຽນເງະອານ, ຮ້ານເສັ້ນລ້ອນອ່ຽນນິງບີງ, ແຕ່ທີ່ແຊບກວ່າໝູ່ແມ່ນຮ້ານເສັ້ນລ້ອນອ່ຽນຮ່າໂນ້ຍຂອງອ້າຍຕ້ຽນຢູ່ຖະໜົນແບກມາຍ.
ເສັ້ນລ້ອນອ່ຽນຮ່າໂນ້ຍ |
ຮ້ານເສັ້ນລ້ອນອ່ຽນຮ່າໂນ້ຍຂອງອ້າຍຕ້ຽນຕັ້ງຢູ່ຖະໜົນແບກມາຍ ຫ່າງຈາກໜອງໂຮ່ຮ່ວານກ້ຽມປະມານ 4 ກິໂລແມດ. ຮ້ານນີ້ກວ້າງປະມານ 40 ຕາແມດ, ສາມາດວາງໂຕະໄດ້ 10 ໜ່ວຍ. ຮ້ານເສັ້ນລ້ອນອ່ຽນຮ່າໂນ້ຍຂອງອ້າຍຕ້ຽນພຽງແຕ່ເປີດປະຕູໃນຍາມຕອນເຊົ້າ ແລະ ຕອນຄ່ຳເທົ່ານັ້ນ. ລາຄາຂາຍກໍເໝາະສົມຄື 30.000 ດົງ/ຖ້ວຍ. ສຳລັບຊີ້ນອ່ຽນ ຍາມໃດອ້າຍຕ້ຽນກໍໃຫ້ຫຼາຍ ກວ່າເມື່ອທຽບໃສ່ຮ້ານອື່ນໆ. ນີ້ແມ່ນໜຶ່ງໃນບັນດາເຫດຜົນທີ່ພາໃຫ້ຮ້ານຂອງລາວສາມາດດຶດດູດຜູ້ມາກິນຢ່າງຫຼວງຫຼາຍ. ຍິ່ງກວ່ານັ້ນ, ບໍ່ພຽງແຕ່ໃຫ້ຫຼາຍຊີ້ນເທົ່ານັ້ນ, ນ້ຳຕົ້ມກະດູດຂອງຮ້ານນີ້ ທັງຫວານ ທັງຫອມ ແລະ ບໍ່ຄາວ. ກ່ຽວກັບວິທີປຸງແຕ່ງນ້ຳຕົ້ມກະດູດ, ອ້າຍຕ້ຽນເປີດເຜີຍວ່າ :
“ ສຳລັບກະດູດເພື່ອຕົ້ມນ້ຳນັ້ນ, ຕ້ອງໃຊ້ກະດູດອ່ຽນ, ແຕ່ກໍຍັງຄົງເອົາກະດູກໝູຫຼືໄກ່ຕົ້ມຕື່ມອີກເພື່ອໃຫ້ນ້ຳມີລົດຫວານ. ເມື່ອຕົ້ມ ກໍຕ້ອງໃສ່ເກືອໃຫ້ພຽງພໍ, ຫຼັງຈາກນັ້ນ ກໍຕ້ອງຕັກຟອດອອກຖິ້ມ ໃຫ້ນ້ຳໃສ. ແລະ ຢາກໃຫ້ນ້ຳຕົ້ມກະດູດມີລົດຫອມ, ແມ່ນຕ້ອງປີ້ງຂີງ ແລະ ຫົວຜັກຫອມບົວແຫ້ງໃສ່ຕື່ມ ”
ເມື່ອມີໂອກາດມາກິນ ເສັ້ນລ້ອນອ່ຽນຢູ່ຮ້ານຂອງອ້າຍຕ້ຽນ, ແຂກທັງຫຼາຍຈະໄດ້ກິນອາຫານເຍື່ອງນີ້ໂດຍຖືກປຸງແຕ່ງດ້ວຍຫຼາຍວິທີແຕກຕ່າງກັນ. ຍົກຕົວຢ່າງຄື: ເສັ້ນລ້ອນອ່ຽນໃສ່ນ້ຳ, ເສັ້ນລ້ອນອ່ຽນປະສົມ, ເສັ້ນລ້ອນອ່ຽນຂົ້ວ…
ຂັ້ນຕອນປຸງແຕ່ງທີ່ຍາກທີ່ສຸດສຳລັບ ອາຫານເຍື່ອງນີ້ ແມ່ນຊີ້ນອ່ຽນ. ຊີ້ອ່ຽນກໍແຊບແລ້ວ, ແຕ່ກໍຕ້ອງປຸງແຕ່ງຄືແນວໃດທີ່ຍັງຄົງສາມາດຮັກສາລົດຊາດໄດ້ ກໍບໍ່ແມ່ນໃຜທີ່ສາມາດເຮັດໄດ້. ນອກຈາກຂາຍ ອາຫານເຍື່ອງນີ້ຢູ່ຮ້ານ, ອ້າຍຕ້ຽນກໍຍັງຂາຍຊີ້ນອ່ຽນທີ່ໄດ້ຜ່ານການປຸງແຕ່ງເພື່ອໃຫ້ແຂກເອົາເມືອງປຸງແຕ່ງເສັ້ນລ້ອນອ່ຽນຢູ່ບ້ານ. ກ່ຽວກັບວິທີປຸງແຕ່ງຊີ້ນອ່ຽນ, ອ້າຍຕ້ຽນໃຫ້ຮູ້ວ່າ :
“ ຕ້ອງເລືອກເອົາອ່ຽນຊະນິດເຫຼືອງ ແລະ ອ້ວນ, ປະມານ 10 ໂຕ/ໜຶ່ງກິໂລກາມ. ຕ້ອງລ້າງອ່ຽນດ້ວຍເກືອໃຫ້ສະອາດ. ຕໍ່ຈາກນັ້ນ ຕ້ອງປາດເອົາຊີ້ນ, ແລ້ວ ຕັດຊອຍເປັນເສັ້ນນ້ອຍ. ຫຼັງຈາກນັ້ນ ກໍເອືອບກັບຫົວຜັກຫອມບົວແຫ້ງທີ່ໄດ້ຟັກໃຫ້ມຸ່ນ ພ້ອມກັບເກືອ, ແລະ ຂີ້ໝິ້ນຖືກຕຳໃຫ້ແຫຼກ. ພາຍຫຼັງທີ່ໄດ້ຄົນວັດຖຸດິບເຫຼົ່ານັ້ນປະສົມເຂົ້າກັນແລ້ວ, ກໍເອົາແປ້ງສາລີໃສ່, ຍ້ອນວ່າແປ້ງສາລີຈະເຮັດໃຫ້ອ່ຽນກອບເມື່ອຂົ້ວ. ຂັ້ນຕອນສຸດທ້າຍແມ່ນ ເອົານ້ຳມັນພືດໃສ່ໝໍ້ຂາງ, ປັບໄຟພໍດີ, ແລ້ວກໍຂົ້ວຈົນເຫຼືອງ ແມ່ນສຳເລັດ”
ນາງຢາງກໍແມ່ນແຂກທີ່ມາກິນເສັ້ນລ້ອນອ່ຽນເປັນປະຈຳຢູ່ຮ້ານຂອງອ້າຍຕ້ຽນ, ເກືອບຄືວ່າ ອາທິດໃດ, ຄອບຄົວຂອງລາວກໍກິນ ເສັ້ນລ້ອນອ່ຽນຢູ່ຮ້ານນີ້ແຕ່ 1 ຫາ 2 ເທື່ອ. ນາງຢາງໃຫ້ຮູ້ວ່າ ເຖິງວ່າອ້າຍຕ້ຽນໄດ້ຖ່າຍທອດວິທີປຸງແຕ່ງ ອາຫານເຍື່ອງນີ້ແລ້ວ, ແຕ່ເມື່ອນາງຢາງເຮັດ ກໍບໍ່ອາດແຊບຄືເສັ້ນລ້ອນອ່ຽນຂອງຮ້ານອ້າຍຕ້ຽນ. ດັ່ງນັ້ນນາງກໍເຄີຍໄປຊື້ ເສັ້ນລ້ອນອ່ຽນຢູ່ຮ້ານອ້າຍຕ້ຽນເມືອກິນຢູ່ເຮືອນ.
“ ເຖິງວ່າ ຮ້ານອ້າຍຕ້ຽນນ້ອຍ ແຕ່ມີແຂກມາກິນຫຼາຍ, ດັ່ງນັ້ນເຮົາມັກຊື້ ເສັ້ນລ້ອນອ່ຽນຢູ່ຮ້ານນີ້ເມືອກິນຢູ່ເຮືອນ. ເວົ້າແທ້ເດີ້, ເສັ້ນລ້ອນອ່ຽນຂອງຮ້ານອ້າຍຕ້ຽນແຊບກວ່າຮ້ານອື່ນຫຼາຍ. ເສັ້ນລ້ອນກໍໜຽວ, ອ່ຽນກໍເຫຼືອງ ແລະ ອ້ວນ, ທັງກອບ ແລະ ຫອມ. ລາຄາ 30.000 ດົງ/ຖ້ວຍກໍເໝາະສົມ ”
ຮ້ານເສັ້ນລ້ອນອ່ຽນຮ່າໂນ້ຍຂອງອ້າຍຕ້ຽນຫາກໍເປີດຂາຍໄດ້ເກືອບ 4 ປີແລ້ວ, ແຕ່ກໍສາມາດດຶງດູດແຂກມາກິນຢ່າງຫຼວງຫຼາຍ. ມື້ຂາຍດີທີ່ສຸດ , ອ້າຍຕ້ຽນກໍໄດ້ຂາຍເກືອບ 500 ຖ້ວຍ, ທັງຮັບໃຊ້ຢູ່ຮ້ານ, ທັງສົ່ງຮັບໃຊ້ຮອດເຮືອນ.
_________________________
ທ່ານຜູ້ຟັງທີ່ເຄົາລົບ!
ຖ້າຫາກພວກເພື່ອນຢາກປຸງແຕ່ງເຍື່ອງອາຫານເສັ້ນລ້ອນອ່ຽນໃຫ້ 4 ຄົນກິນ, ພວກເພື່ອນຕ້ອງກະກຽມວັດຖຸດິບດັ່ງນີ້ :
- ເສັ້ນລ້ອນແຫ້ງ : 200 ກະຣາມ
- ອ່ຽນສົດ: 400 ກະຣາມ
- ແປ້ງສາລີ : 30 ກະຣາມ
- ຜັກແພວ : 1 ມັດ
- ຜັກງອກ : 300 ກະຣາມ, ພ້ອມກັບຫົວຜັກຫອມບົວແຫ້ງ, ໝາກນາວໜ່ວຍໜຶ່ງ.
ສຳລັບບັນດາຂັ້ນຕອນໃນການປຸງແຕ່ງ, ພວກເຮົາໄດ້ແນະນຳຂ້າງເທິ່ງ. ພຽງແຕ່ເສັ້ນລ້ອນແຫ້ງ, ກ່ອນທີ່ຈະກິນ, ພວກເພື່ອນຕ້ອງໝ່າໃຫ້ອ່ອນກ່ອນ, ແລ້ວກໍຕົ້ມບຶດດຽວໃຫ້ອ່ອນ. ຫຼັງຈາກນັ້ນເອົາຜັກງອກ, ຜັກຫອມບົວ, ເສັ້ນລ້ອນ ແລະ ຊີ້ນອຽນໃສ່ຖ້ວຍ, ແລ້ວກໍຕັກນ້ຳກະດູດພວມຟົດໃສ່. ຫວັງວ່າພວກເພື່ອນຈະເຮັດກິນແຊບ .