ສຳລັບບັນດາຜູ້ຄົນທີ່ເປັນລູກຮັກຫຼານແພງຂອງເຂດດິນນາມດິ້ງ, ເມື່ອເຕື້ອງເຖິງເຍື່ອງອາຫານແໜມນັ້ນ, ທຸກໆຄົນກໍຈະຄິດເລີຍເຖິງເຍື່ອງອາຫານແໜມໜຳ ຢາວຖີ. ປະຈຸບັນ, ບໍ່ພຽງແຕ່ຢູ່ເມືອງ ຢາວຖີຈຶ່ງມີ ແໜມໜຳເທົ່ານັ້ນ, ຫາກອາຫານທີ່ມີຊື່ສຽງເຍື່ອງນີ້ໄດ້ປະກົດຕົວຢູ່ບັນດາແຂວງ, ນະຄອນເຂດພາກເໜືອອີກດ້ວຍ. ເຖິງວ່າຄືແນວນັ້ນກໍຕາມ, ແຕ່ແໜມໜຳຍັງຄົງແມ່ນເຍື່ອງອາຫານທີ່ໃໝ່ອຽມສຳລັບຫຼາຍຄົນ.
ເຍື່ອງອາຫານແໜມໜຳຢູ່ຢາວຖີໃນແຂວງນາມດິ້ງ |
ເວລາ 6 ໂມງເຊົ້າ, ຢູ່ທາງຮ່ອມ 51 ຫງວຽນແຄ້ງຖ້ຽນ, ຮ່າໂນ້ຍ, ຊຶ່ງແມ່ນຈຸດເວລາທີ່ຄົນໄປມາຍັງບໍ່ເທົ່າໃດ. ແຕ່ຢູ່ເຮືອນເລກທີ 296 ຂອງອ້າຍ ຫງວຽນກົງແຄ້ງ, ບ້ານເກີດຢູ່ຢາວຖີ, ນາມດິ້ງ ພັດຄືກຄື້ນໄປດ້ວຍຜູ້ເຂົ້າຄົນອອກ. ນີ້ບໍ່ແມ່ນຮ້ານກິນດື່ມ, ຫາກນີ້ແມ່ນບ່ອນປຸງແຕ່ງເຍື່ອງອາຫານແໜມໜຳທີ່ມີຊື່ສຽງຢູ່ແຂວງນາມດິ້ງ. ເມື່ອກ້າວເຂົ້າເຮືອນມີເນື້ອທີ່ປະມານ 30 ຕາແມັດ, ຢູ່ຊັ້ນ 1 ກໍເຫັນແໜມໜຳຖືກໃສ່ຖົງວາງເຕັມໂຕະ 4 ໜ່ວຍ ເພື່ອກຽມສົ່ງໄປຍັງບັນດາຮ້ານຂາຍແໜມໃນທົ່ວນະຄອນຮ່າໂນ້ຍ. ຢູ່ຊັ້ນ 2 ກໍແມ່ນບ່ອນປຸງແຕ່ງແໜມໜຳ. ສ່ວນຢູ່ແຈໜຶ່ງໃນຊັ້ນ 2 ແມ່ນໃຊ້ເປັນເຮືອນຄົວ. ອ້າຍແຄ້ງແນະນຳກ່ຽວກັບວິທີປຸງແຕ່ງແໜມໜຳວ່າ :
“ ກ່ອນອື່ນໝົດ, ຕ້ອງລ້າງໜັງໝູໃຫ້ສະອາດ, ແລ້ວຂູດເອົາເຍື່ອຂາວທາງນອກຂອງໜັງໝູ ແລະ ນຳໄປຕົ້ມໃຫ້ສຸກ, ແຕ່ບໍ່ໃຫ້ສຸກຫຼາຍ ເພື່ອບໍ່ໃຫ້ໜັງໝູເປື່ອຍເກີນໄປ. ຫຼັງຈາກນັ້ນ, ຕັກຂຶ້ນ ປະໃຫ້ເຢັນ, ໃຊ້ມິດຂູດເອົາມັນຕິດຢູ່ໜັງໝູອອກ, ແຕ່ຄວນປະໃຫ້ມັນເຫຼືອພຽງໜ້ອຍໜຶ່ງເປັນຊັ້ນບ່າງໆ. ຫຼັງຈາກນັ້ນຊອຍເປັນຕ່ອນບາງໆ. ເຮັດເຊັ່ນນັ້ນ, ເມື່ອປັ້ນແໜມ ມັນຈະໜຽວ ແລະ ແຊບກວ່າ ”
ນີ້ພຽງແຕ່ແມ່ນຂັ້ນຕອນທຳອິດຂອງການປຸງແຕ່ງແໜມໜຳ, ພາຍຫຼັງປະໃຫ້ເຢັນ, ໜັງໝູຈະຖືກຊອຍເປັນເສັ້ນນ້ອຍຍາວປະມານ 3-4 ຊັງຕີແມັດ ແລະ ຖືກເອົາໃສ່ຈານຕ່າງຫາກ. ຂັ້ນຕອນຕໍ່ໄປ ແມ່ນລວກຊີ້ນ, ຄວນເລືອກເອົາຊີ້ນສົດ, ຖ້າຫາກຊື້ຊີ້ນແຊ່ເຢັນ ແມ່ນບໍ່ແຊບ. ສຳລັບຊີ້ນເພື່ອເຮັດແໜມ ແມ່ນຕ້ອງເລືອກເອົາບ່ອນກົ້ນຂອງໝູ. ສຳລັບຂັ້ນຕອນລວກຊີ້ນເພື່ອເຮັດແໜມ ກໍຕ້ອງມີປະສົບການເຮັດມາເປັນໄລຍະໜຶ່ງ. ອ້າຍແຄ້ງ ເປີດເຜີຍວ່າ :
“ ສຳລັບຊີ້ນໝູ, ຖ້າຫາກເປັນຕອນໃຫຍ່, ພວກເຮົາອາດຈະຕັດເປັນຕອນພໍດີ, ແລ້ວຈຸ່ມໃສ່ນ້ຳຟົດ. ຈາກນັ້ນ, ນຳໄປລວກຈົນສຸກພໍດີ, ຖ້າຫາກສຸກເກີນໄປ, ລົດຫວານຂອງມັນຈະສູນເສຍໄປ. ແລ້ວກໍຕັກຂຶ້ນ ປະໃຫ້ເຢັນ. ຫຼັງຈາກນັ້ນ ຊອຍເປັນເສັ້ນນ້ອຍ. ”
ສຳລັບເຍື່ອງອາຫານແໜມໜຳນັ້ນ, ວັດຖຸດິບທີ່ສຳຄັນເພື່ອສ້າງໃຫ້ມີລົດຊາດພິເສດຂອງອາຫານ, ນັ້ນແມ່ນເຂົ້າຂົ້ວ. ເຂົ້າຂົ້ວເພື່ອເຮັດແໜມ ແມ່ນຕ້ອງເຮັດດ້ວຍເຂົ້າຈ້າວຫອມ ຫາຍເຫົ້າ . ຕ້ອງໝ່າເຂົ້າເປັນເວລາຄືນໜຶ່ງກ່ອນ, ແລ້ວນຳໄປຂົ້ວຈົນເຫຼືອງ, ຫຼັງຈາກນັ້ນນຳໄປຕ່ຳໃຫ້ແຫຼກ. ອ້າຍແຄ້ງ ໃຫ້ຮູ້ວ່າ ຂັ້ນຕອນສຸດທ້າຍໃນການປຸງແຕ່ງແໜມໜຳຢາວຖີ ກໍບໍ່ແມ່ນງ່າຍເລີຍ, ຕ້ອງຄົນວັດຖຸດິບທັງໝົດໃຫ້ສະໝ່ຳສະເໝີ.
“ ພາຍຫຼັງປຸງແຕ່ງແລ້ວ, ຕ້ອງເອົາວັດຖຸດິບທັງໝົດໃສ່ໝໍ້ເຊັ່ນ ຊີ້ນ, ໜັງໝູ ພ້ອມກັບເຂົ້າຂົ້ວ, ນ້ຳປາ, ແປ້ງນົວ, ໝາກພີກໄທ, ຫົວຜັກທຽມຖືກຊອຍບາງ, ແລ້ວຄົນໃຫ້ສະໝ່ຳສະເໝີ, ຫຼັງຈາກນັ້ນ ປັ້ນເປັນປັ້ນນ້ອຍໆ, ແລ້ວຫໍ່ດ້ວຍໃບເດືອ, ສ່ວນຢູ່ຊັ້ນນອກ ແມ່ນຫຸ້ມດ້ວຍໃບຕອງກ້ວຍ. ແລ້ວກໍເອົາໃສ່ຕູ້ເຢັນເປັນເວລາ 1 ມື້ ກໍສາມາດກິນໄດ້. ສຳລັບເຍື່ອງອາຫານນີ້, ພວກເຮົາສາມາດຮັກສາໄດ້ປະມານແຕ່ 4 ຫາ 5 ວັນ ຖ້າຫາກເອົາໃສ່ຕູ້ເຢັນ ”
ແຕ່ລະມື້, ຮ້ານຂອງອ້າຍແຄ້ງສາມາດຂາຍແໜມໜຳໄດ້ພັນກ້ອນ ແລະ ຖ້າຫາກຢາກຊິມລົດຊາດພິເສດຂອງແໜມໜຳຢູ່ເຂດດິນ ນາມດິ້ງນີ້, ພວກເພື່ອນຕ້ອງຊື້ດ້ວຍລາຄາແຕ່ 40.000 ຫາ 60.000 ດົງຕໍ່ 10 ກ້ອນຊຶ່ງຂຶ້ນກັບຂະໜາດຂອງແໜມ.
ເມື່ອກິນແໜມໜຳ, ພວກເພື່ອນຈະຮູ້ສຶກໄດ້ເຖິງລົດຫວານຂອງຊີ້ນ ແລະ ຄວາມກອບຂອງໜັງໝູ ພ້ອມກັບລົດຝາດຂອງໃບເດືອ, ລົດຂົມຂອງໃບເລບຄຸດ… ລົດຊາດທັງໝົດເຫຼົ່ານັ້ນຂອງແໜມໜຳຢາວຖື ໄດ້ປະສົມປະສານເຂົ້າກັນສ້າງເປັນຈຸດພິເສດສະເພາະຂອງອາຫານຢູ່ເຂດດິນນາມດິ້ງ.
----------------------------------
ທ່ານຜູ້ຟັງທີ່ເຄົາລົບ !
ເພື່ອປຸງແຕ່ງເຍື່ອງອາຫານແໜມໜຳ ພວກເພື່ອນກະກຽມວັດຖຸດິບດັ່ງນີ້ :
- ຊີ້ນໝູ(ເລືອກເອົາບ່ອນກົ້ນ): 250 ກຣາມ
- ໜັງໝູ: 200 ກຣາມ
- ຫົວຜັກທຽມ : 1 ຫົວ
- ເຂົ້າຂົ້ວ : 50 ກຣາມ
- ແປ້ງນົວ : 1 ບ່ວງກາເຟ ພ້ອມກັບນ້ຳປາ, ໝາກພີກໄທ, ໃບເດືອ, ໃບເລບຄຸດ. ໃບໝາກນາວ…
ທຳອິດຕ້ອງລ້າງໜັງໝູໃຫ້ສະອາດ, ແລ້ວຂູດເອົາເຍື່ອຂາວທາງນອກຂອງໜັງໝູອອກ ແລະ ນຳໄປຕົ້ມໃຫ້ສຸກ, ແຕ່ບໍ່ໃຫ້ສຸກເກີນໄປ ເພື່ອບໍ່ໃຫ້ໜັງໝູເປື່ອຍເກີນໄປ. ຫຼັງຈາກນັ້ນ, ຕັກຂຶ້ນ ປະໃຫ້ເຢັນ, ໃຊ້ມິດຂູດເອົາມັນຕິດຢູ່ໜັງໝູ, ແຕ່ຄວນປະໃຫ້ມັນເຫຼືອພຽງໜ້ອຍໜຶ່ງເປັນຊັ້ນບ່າງໆ. ຫຼັງຈາກນັ້ນຊອຍເປັນຕອນບ່າງໆ. ເຮັດເຊັ່ນນັ້ນ, ເມື່ອປັ້ນແໜມ ມັນຈະໜຽວ ແລະ ແຊບ . ໃບເດືອ, ໃບເລບຄຸດຕ້ອງລ້າງໃຫ້ສະອາດ, ແລ້ວປະໃຫ້ແຫ້ງ. ໃບໝາກນາວ ກໍຕ້ອງລ້າງໃຫ້ສະອາດ ແລ້ວຊອຍເປັນເສັ້ນນ້ອຍໆ.
ສຳລັບຂັ້ນຕອນຕົ້ມຊີ້ນໝູ ແລະ ໜັງໝູ, ພາຍຫຼັງລ້າງໃຫ້ສະອາດ, ກໍຕົ້ມຈົນສຸກພໍດີ, ຖ້າຫາກສຸກເກີນໄປ, ລົດຫວານຂອງມັນຈະສູນເສຍໄປ. ແລ້ວກໍຕັກຂຶ້ນ ປະໃຫ້ເຢັນ. ຫຼັງຈາກນັ້ນ ຊອຍເປັນເສັ້ນນ້ອຍ.
ສຳລັບຂັ້ນຕອນຄົນແໜມໜຳ, ພາຍຫຼັງປຸງແຕ່ງໃນເບື້ອງຕົ້ນແລ້ວ, ຕ້ອງເອົາວັດຖຸດິບທັງໝົດໃສ່ໝໍ້ເຊັ່ນ ຊີ້ນ, ໜັງໝູ ພ້ອມກັບເຂົ້າຂົ້ວ, ນ້ຳປາ, ແປ້ງນົວ, ໝາກພີກໄທ, ຫົວຜັກທຽມຖືກຊອຍບາງ, ແລ້ວຄົນໃຫ້ສະໝ່ຳສະເໝີ, ຫຼັງຈາກນັ້ນ ປັ້ນເປັນປັ້ນນ້ອຍ, ແລ້ວຫຸ້ມດ້ວຍໃບເດືອ, ສ່ວນຢູ່ຊັ້ນນອກ ແມ່ນຫໍ່ດ້ວຍໃບຕອງກ້ວຍ. ສຸດທ້າຍເອົາແໜມໜຳໃສ່ຈານ ພ້ອມກັບໃບເດືອ, ໃບເລບຄຸດ. ຫວັງວ່າພວກເພື່ອນຈະເຮັດກິນແຊບ.