(vovworld) – ຂະບວນການກໍ່ສ້າງຊົນນະບົດໃໝ່ຕິດພັນກັບການປະຕິບັດມະຕິສູນກາງຄັ້ງທີ 5 (ຊຸດທີ 8) ຂອງພັກກອມມູນິດຫວຽດນາມ ກ່ຽວກັບການກໍ່ສ້າງ ແລະ ພັດທະນາພື້ນຖານວັດທະນະທຳຫວຽດນາມ ທີ່ເຂັ້ມຄົ້ນໄປດ້ວຍສີສັນຊາດ ໂດຍສະມາຄົມຊາວກະສີກອນປຸກລະດົມ ໄດ້ຮັບການຜັນຂະຫຍາຍຢູ່ຫຼາຍທ້ອງຖີ່ນ. ມາຮອດປະຈຸບັນ, ຂະບວນການໄດ້ຮັບຜົນງານເບື້ອງຕົ້ນໃນການຍູ້ໄວຂະບວນວິວັດແຫ່ງການກໍ່ສ້າງຊົນນະບົດໃໝ່.
ພາບອິນເຕີແນດ
ມະຕິສູນກາງຄັ້ງທີ 5 (ຊຸດທີ 8) ຂອງພັກກອມມູນິດຫວຽດນາມ ກ່ຽວກັບການກໍ່ສ້າງ ແລະ ພັດທະນາພື້ນຖານວັດທະນະທຳຫວຽດນາມ ທີ່ເຂັ້ມຄົ້ນໄປດ້ວຍສີສັນຊາດ ເຊິ່ງມີມາກ່ອນນີ້ 15 ປີນັ້ນ ໄດ້ປະກອບສ່ວນເຮັດໃຫ້ວັດທະນະທຳຕິດພັນຢ່າງແໜ້ນແຟ້ນກັບຂົງເຂດຕ່າງໆຂອງຊີວິດສັງຄົມ, ປະກອບສ່ວນສຳຄັນເຂົ້າໃນການພັດທະນາເສດຖະກິດ, ວັດທະນະທຳ, ສັງຄົມຢູ່ຫຼາຍທ້ອງຖີ່ນ. ໂດຍຮັບຮູ້ໄດ້ຄວາມສຳຄັນຂອງມະຕິນີ້, ສະມາຄົມຊາວກະສີກອນຫວຽດນາມ ທຸກຂັ້ນໄດ້ເປັນເຈົ້າການນຳເອົາມະຕິນີ້ຕິດພັນກັບຂະບວນການກໍ່ສ້າງຊົນນະບົດໃໝ່, ເພື່ອແນໃສ່ສ້າງກຳລັງຕື່ມອີກໃຫ້ແກ່ການພັດທະນາເສດຖະກິດ ແລະ ຍົກສູງຊີວິດທາງດ້ານວັດທະນະທຳ, ຈິດໃຈຂອງຊາວກະສີກອນຢູ່ບັນດາເຂດຊົນນະບົດ. ດ້ວຍຈຸດໝາຍປະກອບສ່ວນປຸກລຸກນ້ຳໃຈສາມັກຄີ, ຊ່ວຍເຫຼືອເຊິ່ງກັນ ແລະ ກັນໃນການຜະລິດ ແລະ ຊີວິດການເປັນຢູ່ ເພື່ອການພັດທະນາຢູ່ເຂດຊົນນະບົດຫວຽດນາມ. ທ່ານນາງ ຫງວຽນຮົ່ງຫຼີ, ຮອງປະທານສະມາຄົມຊາວກະສີກອນຫວຽດນາມ, ໃຫ້ຮູ້ວ່າ:
“ສະມາຄົມຊາວກະສີກອນທຸກຂັ້ນ ໄດ້ຕັ້ງໜ້າຂົນຂວາຍຊາວກະສີກອນເຂົ້າຮ່ວມການກໍ່ສ້າງຊົນນະບົດໃໝ່, ດ້ວຍບັນດາວຽກງານທີ່ແທດຈິງຄື: ສະຫງວນທີ່ດິນ, ປະກອບເງິນນັບພັນຕື້ດົ່ງ, ປະກອບກຳລັງເຮື່ອແຮງເພື່ອກໍ່ສ້າງທາງຄົມມະນາຄົມ, ສາຍໄຟຟ້າ, ຫ້ອງຮຽນ, ຫໍວັດທະນະທຳ“.
ພາບອິນເຕີແນດ
ທ່ານປະທານສະມາຄົມຊາວກະສີກອນແຂວງເຊີນລາ ຮ່ວາງເຊືອງ, ໄດ້ໃຫ້ຮູ້ບົດຮຽນຂອງແຂວງເຊີນລາ ແມ່ນນຳການເຄື່ອນໄຫວວັດທະນະທຳຕິດພັນກັບໜ້າທີ່ພັດທະນາເສດຖະກິດ - ສັງຄົມຢູ່ທ້ອງຖີ່ນ, ຈາກນັ້ນສ້າງເປັນແບບຢ່າງ, ປັດໃຈໃໝ່ໃນການກໍ່ສ້າງຊົນນະບົດໃໝ່ຢູ່ທ້ອງຖີ່ນ. ທ່ານນາງປະທານສະມາຄົມຊາວກະສີກອນແຂວງນິງບິ່ງ ບູ່ຍມາຍຮວາ ໃຫ້ຮູ້ວ່າ ສະມາຄົມຊາວກະສີກອນແຂວງໄດ້ປະຕິບັດການເຄື່ອນໄຫວວັດທະນະທຳໃນທົ່ວສັງຄົມ, ຂົນຂວາຍຊາວກະສີກອນແຂ່ງຂັນກັນກໍ່ສ້າງຊົນນະບົດໃໝ່, ທະວີຄູນບັນດາຮູບແບບ, ບຸກຄົນທີ່ເປັນແບບຢ່າງ ເພື່ອໃຫ້ປະຊາຊົນປະຕິບັດຕາມ.
“ສະມາຄົມຊາວກະສີກອນມີບົດບາດເປັນເຈົ້າໃນການກໍ່ສ້າງຊົນນະບົດໃໝ່, ດັ່ງນັ້ນໄລຍະຜ່ານມາ, ສະມາຄົມໄດ້ໂຄສະນາເຖິງບັນດາສະມາຊິກໃນສະມາຄົມ ເພື່ອໃຫ້ເຂົາເຈົ້າກຳນົດໄດ້ບົດບາດເປັນເຈົ້າຂອງຊາວກະສີກອນໃນວິວັດການກໍ່ສ້າງຊົນນະບົດໃໝ່. ພວກຂ້າພະເຈົ້າກໍ່ຍູ້ແຮງຂະບວນການຊາວກະສີກອນແຂ່ງຂັນກັນຜະລິດ, ດຳເນີນທຸລະກິດເກັ່ງ; ລົງທຶນສ້າງບັນດາຮູບແບບການຜະລິດ ໂດຍຜ່ານກອງທຶນໜູນຊ່ວຍຊາວກະສີກອນ ແລະ ເຮັດວຽກງານຖ່າຍທອດວິທະຍາສາດ ເຕັກນິກໃຫ້ແກ່ຊາວກະສີກອນເປັນຢ່າງດີ, ເຊັນສັນຍາຈຳໜ່າຍຜະລິດຕະພັນໃຫ້ແກ່ຊາວກະສີກອນ ເພື່ອຊ່ວຍເຂົາເຈົ້າຍົກສູງລາຍຮັບ“.
ພາບອິນເຕີແນດ
ທ່ານ ດິງວັນຕວານ, ປະທານສະມາຄົມຊາວກະສີກອນແຂວງລາວກາຍ, ຖືວ່າ, ຊາວກະສີກອນມີບົດບາດສຳຄັນທີ່ສຸດໃນການຮັກສາສີສັນວັດທະນະທຳຂອງຊາດ ເມື່ອເຊື່ອມໂຍງກັບສາກົນ. ອາດຢືນຢັນໄດ້ວ່າ, ພາຍຫຼັງ 15 ປີ ແຫ່ງການປະຕິບັດມະຕິກອງປະຊຸມສູນກາງທີ 5 ຊຸດທີ 8, ຄວາມຮັບຮູ້ຂອງພະນັກງານ, ສະມາຊິກສະມາຄົມຊາວກະສີກອນ ກ່ຽວກັບວັດທະນະທຳນັບມື້ນັບຮອບດ້ານ, ເລິກເຊິ່ງ, ປະກອບສ່ວນຊຸກຍູ້ວຽກງານສະມາຄົມ ແລະ ປຸກລະດົມຊາວກະສີກອນເຂົ້າຮ່ວມການສ້າງສາ ແລະ ພັດທະນາປະເທດຊາດ.
“ມະຕິນີ້ມີຄວາມໝາຍທີ່ສຸດໃນການອະນຸລັກຮັກສາບັນດາສີສັນວັດທະນະທຳຂອງຊາດ. ສຳລັບລາວກາຍ, ເຊິ່ງແມ່ນແຂວງທີ່ມີວັດທະນະທຳຫຼາຍຮູບຫຼາຍແບບ, ເລື່ອງຮັກສາ, ພັດທະນາວັດທະນະທຳກໍ່ແມ່ນກຳລັງໜູນເພື່ອພັດທະນາເສດຖະກິດ. ໃນໄລຍະຈະມາເຖິງ, ສະມາຄົມຊາວກະສີກອນແຂວງລາວກາຍ ຈະສືບຕໍ່ປະຕິບັດມະຕິນີ້ໃຫ້ກ້າວເຂົ້າສູ່ລວງເລິກ, ຕາມມາດຖານອັນລະອຽດ, ຕິດພັນກັບແຜນຮ່າງກໍ່ສ້າງຊົນນະບົດໃໝ່ຂອງແຂວງ; ລົບລ້າງບັນດາຮີດຄອງທີ່ຫຼ້າຫຼັງ, ເສີມຂະຫຍາຍບັນດາຮີດຄອງທີ່ລຳ້ຄ່າຂອງຊາດຕື່ມອີກ. ຈາກນັ້ນສ້າງເປັນແຫຼ່ງທຶນເພື່ອພັດທະນາເສດຖະກິດ, ໃນນັ້ນມີເສດຖະກິດທ່ອງທ່ຽວ ແລະ ກໍ່ສ້າງຊົນນະບົດໃໝ່“.
ພາບອິນເຕີແນດ
ເພື່ອເຮັດໃຫ້ການປະຕິບັດມະຕິບັນລຸໄດ້ປະສິດທິຜົນສູງກວ່າ, ໄລຍະຈະມາເຖິງ ສະມາຄົມຊາວກະສີກອນທຸກຂັ້ນສືບຕໍ່ຍູ້ແຮງວຽກງານໂຄສະນາ, ສຶກສາໃຫ້ພະນັກງານ, ສະມາຊິກສະມາຄົມ, ຊາວກະສີກອນ ກ່ຽວກັບລັດທິຮັກຊາດ, ຈິດໃຈຍົກຍ້ອງຊາດດ້ວຍຕົນເອງ, ປຸກລຸກນຳ້ໃຈສາມັກຄີ, ຊ່ວຍເຫຼືອເຊິ່ງກັນ ແລະ ກັນ ເພື່ອຜ່ານຜ່າຄວາມຫຍຸ້ງຍາກ. ທ່ານນາງ ຫງວຽນຮົ່ງຫຼີ, ຮອງປະທານສະມາຄົມຊາວກະສີກອນຫວຽດນາມ, ໃຫ້ຮູ້ວ່າ:
“ຍູ້ແຮງບັນດາຂະບວນການຊາວກະສີກອນແຂ່ງຂັນກັນສ້າງຊົນນະບົດໃໝ່ ຕິດພັນກັບຂະບວນການ “ທົ່ວປວງຊົນສາມັກຄີກັນສ້າງຊີວິດທາງດ້ານວັດທະນະ ທຳ“ ໃຫ້ກ້າວເຂົ້າສູ່ລວງເລິກ, ແທດຈິງ ແລະ ມີປະສິດທິຜົນກວ່າ, ເພື່ອແນໃສ່ຍົກສູງຊີວິດທາງດ້ານຈິດໃຈໃຫ້ແກ່ສະມາຊິກສະມາຄົມ, ຊາວກະສີກອນ ກໍ່ຄືປະກອບສ່ວນກໍ່ສ້າງຊາວກະສີກອນໃນໄລຍະໃໝ່, ສ້າງຊີວິດທາງດ້ານວັດທະນະທຳຢູ່ບັນດາເຂດຊຸມຊົນ“.
ເລື່ອງສະມາຄົມຊາວກະສີກອນຫວຽດນາມ ນຳມະຕິສູນກາງທີ 5 ເຂົ້າໃນຊີວິດ ບໍ່ພຽງແຕ່ປະກອບສ່ວນຊຸກຍູ້ໂຄງການກໍ່ສ້າງຊົນນະບົດໃໝ່ເທົ່ານັ້ນ, ຫາກຍັງປະກອບສ່ວນກໍ່ສ້າງ ແລະ ພັດທະນາພື້ນຖານວັດທະນະທຳຫວຽດນາມທີ່ກ້າວໜ້າ ແລະ ເຂັ້ມຄົ້ນໄປດ້ວຍສີສັນຊາດອີກດ້ວຍ.