ປີ 2011, ແຂວງກວາງນາມ ໄດ້ຄັດເລືອກຕາແສງຢຸຍເຊີນ ເປັນຕາແສງຜັນຂະຫຍາຍການກໍ່ສ້າງຊົນນະບົດໃໝ່. ນັບແຕ່ມື້ທຳອິດແຫ່ງການປຸກລະດົມຂະບວນການ, ຍ້ອນປະຕິບັດວຽກງານໂຄສະນາ, ອະທິບາຍໃຫ້ພໍ່ແມ່ປະຊາຊົນກ່ຽວກັບຈຸດປະສົງ, ຄວາມໝາຍຂອງໂຄງການກໍ່ສ້າງຊົນນະບົດໃໝ່ເປັນຢ່າງດີ, ປະຊາຊົນໃນຕາແສງເປັນຈຳນວນຫຼາຍ ໄດ້ສະໜັບສະໜູນຢ່າງສຸດອົກສຸດໃຈ. ມາຮອດປະຈຸບັນ, ຕາແສງ ຢຸຍເຊີນ ໄດ້ປະຕິບັດສຳເລັດ 14/19 ມາດຖານກໍ່ສ້າງຊົນນະບົດໃໝ່.
ນັບແຕ່ມື້ທຳອິດແຫ່ງການຜັນຂະຫຍາຍ, ປະຊາຊົນໃນຕາແສງໄດ້ສະໝັກໃຈມອບທີ່ດິນນັບພັນຕາແມັດ ເພື່ອກໍ່ສ້າງທາງຄົມມະນາຄົມລະຫວ່າງບ້ານ, ປະກອບເງິນນັບຮ້ອຍລ້ານດົ່ງເພື່ອກໍ່ສ້າງຄອງເໝືອງດ້ວຍເບຕົງ, ຮັບປະກັນແຫຼ່ງນ້ຳເພື່ອຫົດ ໃຫ້ທົ່ງນາທີ່ມີເນື້ອທີ 80 ເຮັກຕາ. ມາຮອດປະຈຸບັນ, ເມືອງ ຢຸຍຊວຽນ ໄດ້ຄັດເລືອກທົ່ງນາດັ່ງກ່າວເພື່ອສ້າງທົດລອງ “ທົ່ງນາຂະໜາດໃຫຍ່” ຕາມມາດຖານກໍ່ສ້າງຊົນນະບົດໃໝ່. ເພື່ອໃຫ້ທົ່ງນານີ້ໄດ້ກາຍເປັນ “ອູ່ເຂົ້າ” ຂອງເມືອງຢຸຍຊວຽນ, ພໍ່ແມ່ປະຊາຊົນໄດ້ເຂົ້າຮ່ວມການຄູນຄັນນາ, ແບ່ງທີ່ດິນ, ສ້າງທົ່ງນາຂະໜາດໃຫຍ່, ຫັນປ່ຽນຜົນລະປູກ, ນຳກົນຈັກເຂົ້າໃນການຜະລິດ. ທ່ານ ບຸຍກຸຍຮ່ວາງ, ປະຊາຊົນບ້ານ ຈ່າເຈົາ, ຕາແສງຢຸຍເຊີນ, ເມືອງຢຸຍຊວຽນ, ແຂວງກວາງນາມ ໃຫ້ຮູ້ວ່າ.
“ການປຸກລະດົມທັງໝົດຂອງລັດ, ລ້ວນແຕ່ໄດ້ຮັບການສະໜັບສະໜູນຈາກປະຊາຊົນແຫ່ງນີ້, ນັບທັງດ້ານວັດຖຸ ແລະຈິດໃຈ. ຍ້ອນປະຈຸບັນຊີວິດສັງຄົມໄດ້ມີຄວາມກ້າວໜ້າ, ຊີວິດຂອງປະຊາຊົນກໍ່ພັດທະນາ. ດັ່ງນັ້ນຂ້າພະເຈົ້າກໍຮູ້ສຶກພາກພູມໃຈຫຼາຍ”.
ຍ້ອນຮູ້ວິທີລະດົມບັນດາແຫຼ່ງກຳລັງໃນສັງຄົມ, ສະນັ້ນ ຢຸຍເຊີນ ສາມາດລະດົມແຫຼ່ງທຶນໄດ້ຫຼາຍພໍສົມຄວນເພື່ອຮັບໃຊ້ໃຫ້ໂຄງການກໍ່ສ້າງຊົນນະບົດໃໝ່. ມາຮອດປະຈຸບັນ, ຢຸຍເຊີນ ລະດົມແຫຼ່ງເງິນທັງໝົດໄດ້ເກືອບ 60 ຕື້ດົ່ງ ເພື່ອກໍ່ສ້າງໂຄງປະກອບພື້ນຖານໂຄງລ່າງໃນການກໍ່ສ້າງຊົນນະບົດໃໝ່. ນອກຈາກແຫຼ່ງງົບປະມານຂອງແຂວງ ແລະ ເມືອງແລ້ວ, ຕາແສງຍັງນຳໃຊ້ແຫຼ່ງທຶນປະສົມຈາກໂຄງການອື່ນໆ, ແຫຼ່ງທຶນຈາກບັນດາວິສາຫະກິດໃນບໍລິເວນຕາແສງ ແລະ ປະຊາຊົນກໍ່ໄດ້ປະກອບເງິນ 3,3 ຕື້ກວ່າດົ່ງ ໃຫ້ແກ່ການກໍ່ສ້າງຊົນນະບົດໃໝ່. ຢຸຍເຊີນ ໄດ້ປະຕິບັດບັນດາໂຄງການສຳຄັນກ່ຽວກັບຄົມມະນາຄົມ, ຊົນລະປະທານ. ທາງຄົມມະນາຄົມໃນບໍລິເວນຕາແສງມີລວງຍາວທັງໝົດແມ່ນເກືອບ 80 ກ.ມ. ຕາແສງໄດ້ລະດົມບັນດາແຫຼ່ງທຶນ, ສົມທົບບັນດາໂຄງການເພື່ອກໍ່ສ້າງທາງເບຕົງທີ່ມີລວງຍາວກວ່າ 30 ກ.ມ. ໃນນັ້ນທາງເບຕົງລະຫວ່າງບ້ານ, ລະຫວ່າງຕາແສງກວມ 80% . ເພື່ອສ້າງເງື່ອນໄຂໃຫ້ພໍ່ແມ່ປະຊາຊົນສຳພັດກັບຄວາມກ້າວໜ້າດ້ານວິທະຍາສາດເຕັກນິກ, ເພື່ອເຂົ້າຮ່ວມການກໍ່ສ້າງຕາແສງຊົນນະບົດໃໝ່, ອຳນາດການປົກຄອງທຸກຂັ້ນ ໄດ້ຈັດຕັ້ງການສອນວິຊາຊີບໃຫ້ຄົນງານຊົນນະບົດ, ຖ່າຍທອດວິທະຍາສາດເຕັກນິກໃນການລ້ຽງງົວພັນ ຕິດພັນກັບການປົກປັກຮັກສາສິ່ງແວດລ້ອມ, ກໍ່ສ້າງບັນດາຮາກຖານຜະລິດປຸງແຕ່ງ, ສ້າງບັນດາໜ່ວຍບໍລິການຮັບໃຊ້ການເຮັດນາ ແລະ ເກັບກ່ຽວເຂົ້າດ້ວຍກົນຈັກ. ຊີວິດຂອງພໍ່ແມ່ປະຊາຊົນໃນຕາແສງໄດ້ຍົກສູງຂຶ້ນເທື່ອລະກ້າວ, ອັດຕາຄອບຄົວທຸກຍາກໄດ້ຫຼຸດລົງໃນແຕ່ 3 ຫາ 3,5%/ປີ. ທ່ານ ຫງວຽນເຕີນຟຸກ, ປະທານຄະນະກຳມະການແນວໂຮມປະເທດຊາດຫວຽດນາມ ເມືອງຢຸຍຊວຽນ, ແຂວງກວາງນາມ ໃຫ້ຮູ້ວ່າ.
“ພໍ່ແມ່ປະຊາຊົນໄດ້ເຫັນດີເຫັນພ້ອມສະໜັບສະໜູນທີ່ສຸດ. ຕາແສງຢຸຍເຊີນ ເຄີຍນຳໜ້າທົ່ວເມືອງມາຫຼາຍປີຢ່າງລ້ຽນຕິດແລ້ວ ແລະ ປີນີ້ກໍສືບຕໍ່ນຳໜ້າອີກ. ພໍ່ແມ່ປະຊາຊົນມີຄວາມຟົດຟື້ນມ່ວນຊື່ນຫຼາຍ. ສ່ວນທ້ອງຖິ່ນກໍ່ສ້າງທຸກເງື່ອນໄຂເພື່ອປັບປຸງຊີວິດການເປັນຢູ່ຂອງພໍ່ແມ່ປະຊາຊົນໃຫ້ມີຄວາມເບີກບານມ່ວນຊື່ນ”.
ຜ່ານໄລຍະ 4 ປີແຫ່ງການຮ່ວມແຮງຮ່ວມໃຈກໍ່ສ້າງຊົນນະບົດໃໝ່, ຕາແສງຢຸຍເຊີນ ບັນລຸໄດ້ 14/19 ມາດຖານກໍ່ສ້າງຊົນນະບົດໃໝ່, ໃນນັ້ນມີບັນດາມາດຖານສຳຄັນຄື: ການວາງແຜນກຳນົດ, ໄຟຟ້າ, ໂຮງຮຽນ, ຕະຫຼາດຊົນນະບົດ, ໄປສະນີ, ເຂດຊຸມຊົນ, ລາຍຮັບ, ໂຄງປະກອບແຮງງານ, ຮູບການຜະລິດ, ການສຶກສາ ແລະ ສິ່ງແວດລ້ອມ. ປີ 2014, ທົ່ວຕາແສງຍັງມີ 187 ຄອບຄົວທຸກຍາກ, ຮອດທ້າຍປີ 2015 ຄອບຄົວທຸກຍາກໄດ້ຫຼຸດລົງ 50 ຄອບຄົວ. ມາຮອດປະຈຸບັນ, ຕາແສງຢຸຍເຊີນ ໄດ້ປະຕິບັດບັນດາມາດຖານດ້ານວັດຖຸ, ວັດທະນະທຳໂດຍພື້ນຖານ. 8 ບ້ານໃນຕາແສງລ້ວນແຕ່ມີຫໍວັດທະນະທຳ, ໃນນັ້ນ, ປະຊາຊົນໃນບ້ານລົງທຶນປະກອບອຸປະກອນບັນລຸມາດຖານຫໍວັດທະນະທຳ ແລະ ເຂດກິລາບັນດາບ້ານ. ສະເພາະຫໍວັດທະນະທຳຕາແສງ, ອຳນາດການປົກຄອງ ແລະ ປະຊາຊົນກໍໄດ້ຮັບການລົງທຶນກວ່າ 4,6 ຕື້ດົ່ງ ແລະ ຈະກໍ່ສ້າງສຳເລັດໃນໄລຍະຈະມາເຖິງ.
ໄລ່ຮອດຊຸມວັນທ້າຍປີ 2015, ຢຸຍເຊີນ ໄດ້ປະຕິບັດໄລຍະສຸດທ້າຍ, ເພື່ອປະຕິບັດສຳເລັດ 5 ມາດຖານທີ່ຍັງເຫຼືອແມ່ນ: ຄອບຄົມທຸກຍາກ, ວັດທະນະທຳ, ຄົມມະນາຄົວ, ຊົນລະປະທານ, ພື້ນຖານດ້ານວັດຖຸວັດທະນະທຳ, ເພື່ອກາຍເປັນໜຶ່ງໃນບັນດາຕາແສງທຳອິດໃນແຂວງບັນລຸມາດຖານຊົນນະບົດໃໝ່.