(vovworld) - ປະຈຸບັນ, ຢາລາຍ ພວມນຳໜ້າເຂດໄຕງວຽນ ໃນການປະຕິບັດໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ດ້ວຍ 5 ຕາແສງບັນລຸໄດ້ 19 ມາດຖານ, ໃນນັ້ນມີບາງຕາແສງຢູ່ເຂດທີ່ປະສົບກັບຄວາມຫຍຸ້ງຍາກເປັນພິເສດ. ບັນດາການປ່ຽນໃໝ່ບົນພື້ນຖານເກົ່າ ໄດ້ຊ່ວຍໃຫ້ຕາແສງເຫຼົ່ານັ້ນມີບາດກ້າວກະໂດດຂັ້ນໃນຫຼາຍຂົງເຂດ. ບົດຂຽນ “ກໍ່ສ້າງຊົນນະບົດໃໝ່ຢູ່ຢາລາຍ: ການປ່ຽນໃໝ່ບົນພື້ນຖານເກົ່າ“ ຂອງ ກົງບັກ, ນັກຂ່າວວິທະຍຸກະຈາຍສຽງຫວຽດນາມ, ໄດ້ເວົ້າເຖິງຄວາມຈິງຢູ່ຕາແສງເຂດ 2 ດັກເຮຼີ, ເມືອງ ກບາງ.
ໃນລະດູຝົນປີນີ້, ຢູ່ເຂດຮ່ອມພູ ດັກເຮຼີ (ເມືອງ ກບາງ, ແຂວງຢາລາຍ) ຖືກປົກຄຸມໄປດ້ວຍສີຂຽວຂອງຕົ້ນອ້ອຍ. ທ່ານ ຕົ໋ງວັນຢາງ, ຢູ່ບ້ານ 4, ຕາແສງ ດັກເຮຼີ, ໃຫ້ຮູ້ວ່າ, ເຂດນີ້ສ່ວນຫຼາຍແມ່ນດິນປົນຂີ້ຊາຍ, ທີ່ເໝາະສົມກັບຕົ້ນອ້ອຍ. ໄລຍະ 3ປີ ແຫ່ງການຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ຜ່ານມາ, ກໍ່ແມ່ນ 3 ປີທີ່ທ່ານ ແລະ ປະຊາຊົນໃນຕາແສງຍູ້ແຮງການນຳໃຊ້ບັນດາຄວາມກ້າວໜ້າດ້ານວິທະຍາສາດ, ເຕັກນິກ, ນຳໃຊ້ກົນຈັກໃນການຜະລິດ, ນຳແນວພັນໃໝ່ເຂົ້າໃນການປູກຝັງ. ປະສິດທິຜົນໄດ້ເພີ່ມຂຶ້ນຢ່າງຈະແຈ້ງ, ສະມັດຕະພາບຕົ້ນອ້ອຍໄດ້ເພີ່ມຈາກ 60 ໂຕນ/ເຮັກຕາ ຂຶ້ນ 100 ໂຕນ/ເຮັກຕາ, ຊຳ້ບໍ່ໜຳມີບາງແຫ່ງບັນລຸເຖິງ 130 ໂຕນ/ເຮັກຕາ. ປະຈຸບັນ, ທ່ານ ຢາງ ພ້ອມກັບ 15 ຄອບຄົວອື່ນໃນຕາແສງ ດັກເຮຼີ ພວມສ້າງຮູບແບບທົ່ງນາຂະໜາດໃຫຍ່ທົດລອງ, ດ້ວຍເນື້ອທີ່ເກືອບ 13 ເຮັກຕາ ເພື່ອສືບຕໍ່ເສີມຂະຫຍາຍທ່າແຮງຂອງວິທະຍາສາດ, ເຕັກນິກໃນການປູກຕົ້ນອ້ອຍ. ທ່ານ ຕົ໋ງວັນຢາງ, ໃຫ້ຮູ້ວ່າ:
“ເມື່ອໂຮງງານຍົກອອກແຜນນະໂຍບາຍກໍ່ສ້າງທົ່ງນາຂະໜາດໃຫຍ່, ຂ້າພະເຈົ້າກໍ່ລະດົມປະຊາຊົນເຂົ້າຮ່ວມ. ເມື່ອເຫັນໄດ້ຜົນປະໂຫຍດຈາກທົ່ງນາຂະໜາດໃຫຍ່ເຂົາເຈົ້າກໍ່ເຫັນດີນຳ.“
ໂດຍມີດິນຟ້າອາກາດ ແລະ ທີ່ດິນເໝາະສົມກັບການປູກຕົ້ນອ້ອຍ, ພ້ອມກັບການຮ່ວມແຮງຮ່ວມໃຈຂອງໂຮງງານຜະລິດນຳ້ຕານອານເຄ ກໍ່ຄືຄວາມມານະພະຍາຍາມຂອງຊາວທ້ອງຖີ່ນ, ໃນໄລຍະຈະມາເຖິງ ຮູບແບບທົ່ງນາຂະໜາດໃຫຍ່ຈະໄດ້ຮັບການຜັນຂະຫຍາຍຢ່າງກວ້າງຂວາງ, ເພື່ອນຳມາເຊິ່ງປະສິດທິຜົນເສດຖະກິດສູງກວ່າໃຫ້ແກ່ຕາແສງ ດັກເຮຼີ, ເມືອງ ກບາງ. ພ້ອມກັບການປ່ຽນໃໝ່ຈີນຕະນາການໃນການຜະລິດ, ໂສມໜ້າຊົນນະບົດໃໝ່ຢູ່ຕາແສງ ດັກເຮຼີ ໄດ້ມີການປ່ຽນໃໝ່ໂດຍພື້ນຖານ. ດ້ວຍນຳ້ໃຈສະໝັກໃຈ, ປະຊາຊົນໃນຕາແສງໄດ້ຕັ້ງໜ້າເຂົ້າຮ່ວມ, ປະ ກອບເຫື່ອແຮງ, ຊັບສິນ ເພື່ອກໍ່ສ້າງເສັ້ນທາງໃນບ້ານ, ໃນເຂດທົ່ງນາ. ມາຮອດປະຈຸບັນ, ເສັ້ນທາງໃນຕາແສງ ດັກເຮຼ ກວມກວ່າ 90%, ດ້ວຍ 8 ກມ, ແມ່ນໄດ້ຮັບການປູຢາງ, ກໍ່ສ້າງດ້ວຍເບຕົງແລ້ວ, ອັນໄດ້ສ້າງເງື່ອນໄຂໃຫ້ແກ່ການໄປມາ, ຂົນສົ່ງສິນຄ້າ. ທ່ານ ຫງວຽນແທງເຟື້ອງ, ຢູ່ບ້ານ 3, ຕາແສງ ດັກເຮຼີ, ໃຫ້ຮູ້ວ່າ:
”ປະຊາຊົນໃນໝູ່ບ້ານມີຄວາມສຸດຈິດສຸດໃຈທີ່ສຸດ, ເພາະວ່າກ່ອນນີ້ເສັ້ນທາງຖືກເປເພ, ເປັນຕົມ, ການໄປມາຍາກຫຼາຍ. ເມື່ອມີໂຄງການກໍ່ສ້າງຊົນນະບົດໃໝ່ ແລະ ໄດ້ຮັບການໜູນຊ່ວຍຈາກລັດ, ປະຊາຊົນໄດ້ພ້ອມກັນເຮັດ. ເມື່ອມີເສັ້ນທາງໃໝ່ແລ້ວໝູ່ບ້ານກໍ່ສະອາດ, ສວຍງາມກວ່າ.”
ໂຄງລ່າງພັດທະນາ, ເສດຖະກິດເຕີບໂຕໄດ້ສ້າງເລື່ອນໄຂ ແລະ ເປັນກຳລັງໜູນເພື່ອໃຫ້ຫຼາຍຄອບຄົວຢູ່ ດັກເຮຼີ ກໍ່ສ້າງເຮືອນໃໝ່. ທ່ານ ຫງວຽນວັນທັ໋ງ, ຢູ່ບ້ານ 2, ຕາແສງ ດັກເຮຼີ ໃຫ້ຮູ້ວ່າ:
“ຄອບຄົວຂ້າພະເຈົ້າກຳນົດວ່າຕ້ອງປຸກສ້າງເຮືອນແບບຖາວອນໃຫ້ສວຍງາມ, ທັງເໝາະສົມກັບຄອບຄົວທັງເໝາະສົມກັບທ້ອງຖີ່ນໃນໄລຍະປະຕິບັດໂຄງການກໍ່ສ້າງຊົນນະບົດໃໝ່“.
ໃນ 3 ປີຜ່ານມາ, ໃນບໍລິເວນຕາແສງ ດັກເຮຼີ ໄດ້ມີເຮືອນນັບຮ້ອຍຫຼັງ ໄດ້ຮັບການລົງທຶນກໍ່ສ້າງໃໝ່, ແຕ່ລະຫຼັງມີມູນຄ່ານັບຮ້ອຍລ້ານດົ່ງ, ຊຳ້ບໍໜຳມີບາງຫຼັງມີມູນຄ່າເຖິງຕຶ້ດົ່ງ. ບັນດາເຮືອນທີ່ໃຫຍ່ໂຕໂອໂຖງ ແລະ ສວຍງາມເຫຼົ່ານັ້ນໄດ້ເປັນການພິສູດໃຫ້ແກ່ການພັດທະນາຂອງດິນແດນແຫ່ງນີ້.
ຫວນຄືນຫຼັງ 3 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່. ທ່ານເຈິ່ນຮື້ວເຟືອກ, ປະທານຄະນະກຳມະການປະຊາຊົນຕາແສງ ດັກເຮຼີ, ເມືອງ ກບາງ, ໃຫ້ຮູ້ວ່າ, ສິ່ງສຳຄັນກວ່າໝູ່ ແລະ ປະສົບຜົນສຳເລັດທີ່ສຸດນັ້ນແມ່ນການປ່ຽນໃໝ່ໃນຈີນຕະນາການ, ວິທີເຮັດຂອງປະຊາຊົນ. ການປ່ຽນໃໝ່ນັ້ນໄດ້ນຳມາເຊິ່ງປະສິດທິຜົນຢ່າງແທດຈິງ. ຕົວຢ່າງຄື, ໃນເນື້ອທີ່ປູກຕົ້ນອ້ອຍປະມານ 1700 ເຮັກຕາດຽງກັນ, ແຕ່ລາຍຮັບໃສ່ຫົວຄົນ ໃນປະຈຸບັນບັນລຸປະມານ 27,6 ລ້ານດົ່ງ/ຄົນ, ເພີ່ມຂຶ້ນທົບສອງເທົ່າເມື່ອທຽບໃສ່ປີ 2011. ທັງຕາແສງມີ 800 ຄອບຄົວ, ແຕ່ມີພຽງ 50 ຄອບຄົວທຸກຍາກເທົ່ານັ້ນ. ທ່ານ ເຈິ່ນຮື້ວເຟືອກ, ໃຫ້ຮູ້ວ່າ:
“ເມື່ອຜັນຂະຫຍາຍແຜນນະໂຍບາຍ, ພວກຂ້າພະເຈົ້າຕ້ອງຊາບຊືມໃຫ້ພະນັກງານກ່ອນ, ຫຼັງຈາກນັ້ນຈຶ່ງແມ່ນປະຊາຊົນ. ເມື່ອປະຊາຊົນເຂົ້າໃຈແລ້ວ, ເຂົາເຈົ້າຈະເປັນຜູ້ປະຕິບັດ. ລັດພຽງແຕ່ໜູນຊ່ວຍ, ສ້າງກົນໄກ, ນະໂຍບາຍ, ສ້າງເງື່ອນໄຂເພື່ອໃຫ້ປະຊາຊົນປະຕິບັດເທົ່ານັ້ນ.“
ດັກເຮຼີ, ແມ່ນຕາແສງທີ່ຍັງປະສົບກັບຄວາມຫຍຸ້ງຍາກຂອງເມືອງ ກບາງ, ແຂວງຢາລາຍ , ແຕ່ພາຍຫຼັງ 3 ປີ ແຫ່ງການຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່ໄດ້ມີການຫັນປ່ຽນຢ່າງຈະແຈ້ງ. ນີ້ແມ່ນໝາກຜົນແຫ່ງການປ່ຽນໃໝ່ໂດຍພື້ນຖານ, ແທດຈິງບົນພື້ນຖານເກົ່າ.