(vovworld) - ບາກຸ້ມບັກ, ເມືອງ ແຄ໋ງເຊີນ, ແຂວງ ແຄ໋ງຮ່ວາ ແມ່ນຕາແສງຜະລິດກະສິກຳເປັນຕົ້ນ, ດ້ວຍ 86% ຈຳນວນພົນລະເມືອງແມ່ນຊາວຊົນເຜົ່າ ຣາລາຍ, ປະຈຸບັນພວມປະຕິບັດບັນດາມາດຖານກໍ່ສ້າງຊົນນະບົດໃໝ່ໃຫ້ສຳເລັດເທື່ອລະກ້າວ, ໃນນັ້ນ, ທາງຕາແສງຖືມາດຖານຍົກສູງລາຍຮັບ, ປັບປຸງຊີວິດການເປັນຢູ່ຂອງປະຊາຊົນເປັນສຳຄັນທີ່ສຸດ.
ກໍ່ສ້າງຊົນນະບົດໃໝ່ຢູ່ແຂວງແຄ໋ງຮ່ວາ
(ພາບ: ອິນເຕີແນດ)
ຕາແສງ ບາກຸ້ມບັກ, ຢູ່ເມືອງ ແຄ໋ງເຊີນ, ແຂວງ ແຄ໋ງຮ່ວາ, ໄດ້ຮັບການເລືອກເຟັ້ນກໍ່ສ້າງຊົນນະບົດໃໝ່ນັບແຕ່ຄັ້ງທຳອິດ. ໂດຍແມ່ນຕາແສງພູດອຍ, ມີເນື້ອທີ່ດິນປ່າ, ດິນທຳມະຊາດຢ່າງກວ້າງຂວາງ, ສະດວກໃຫ້ແກ່ການປູກຕົ້ນໄມ້ໃຫ້ໝາກ, ຕົ້ນໄມ້ພິເສດ ແລະ ລ້ຽງສັດ... ດັ່ງນັ້ນການກໍ່ສ້າງຊົນນະບົດຢູ່ທີ່ນີ້ໄດ້ປະກອບສ່ວນຍົກສູງຊີວິດການເປັນຢູ່ຂອງປະຊາຊົນທ້ອງຖີ່ນ, ສ້າງເງື່ອນໄຂເພື່ອພັດທະນາເສດຖະກິດສັງຄົມຢູ່ເຂດຕາເວັນຕົກແຂວງ ແຄ໋ງຮ່ວາ. ໃນຊຸມປີຜ່ານມາ, ຕາແສງ ບາກຸ້ມບັກ ໄດ້ລະດົມທຶນຈາກແຫຼ່ງຕ່າງໆເພື່ອກໍ່ສ້າງ, ສ້ອມແປງກິດຈະກຳກໍ່ສ້າງພື້ນຖານ, ປະຕິບັດຮູບແບບເສດຖະກິດຕາມບັນດາມາດຖານໃນໂຄງການກໍ່ສ້າງຊົນນະບົດໃໝ່. ປີ 2013 – 2014, ຄະນະກຳມະການປະຊາຊົນແຂວງ ໄດ້ເຊັນອະນຸມັດແຫຼ່ງງົບປະມານ 277 ລ້ານກວ່າດົ່ງໃຫ້ຕາແສງ ເພື່ອພັດທະນາການຜະລິດ, ປະຕິບັດ 6 ຮູບແບບກ່ຽວກັບການປູກຕົ້ນໄມ້, 16 ຮູບແບບກ່ຽວກັບການລ້ຽງສັດ. ຄຽງຂ້າງນັ້ນ, ທາງຕາແສງກໍ່ເອົາໃຈໃສ່ຍູ້ແຮງການພັດທະນາການຜະລິດ, ຍົກສູງລາຍຮັບໃຫ້ແກ່ປະຊາຊົນ, ດ້ວຍການໜູນຊ່ວຍການລົງທຶນ, ສົມທົບກັບການກໍ່ສ້າງບັນດາຮູບແບບເສດຖະກິດເຊັ່ນ: ປູກເຂົ້ານາທາມ, ປູກສາລີແນວພັນປະສົມທີ່ສາມາດທົນກັບໄພແຫ້ງແລ້ງ, ລ້ຽງງົວ, ຄວາຍ...
ດ້ວຍຈຸດພິເສດແມ່ນຕາແສງຜະລິດກະສິກຳເປັນຕົ້ນ, ປະຊາຊົນຊາວຊົນເຜົ່າຢູ່ທີ່ນີ້ສ່ວນຫຼາຍແມ່ນລຶ້ງເຄີຍກັບການຜະລິດກະສິກຳ, ແລະ ອີງໃສ່ປະສົບການເພື່ອຜະລິດ, ດັ່ງນັ້ນການຜັນຂະຫຍາຍໂຄງການກໍ່ສ້າງຊົນນະບົດໃໝ່ໃນບໍລິເວນຕາແສງກໍ່ບໍ່ແມ່ນເລື່ອງທີ່ງ່າຍດາຍ. ທ່ານ ເມົ໋າທ໋າຍກື, ຮອງປະທານຄະນະກຳມະການປະຊາຊົນເມືອງ ແຄ໋ງເຊີນ, ໃຫ້ຮູ້ວ່າ:
“ໃນເບື້ອງຕົ້ນແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່ຢູ່ທີ່ນີ້, ທັງມີຄວາມສະດວກ, ທັງປະສົບກັບຄວາມຫຍຸ້ງຍາກບໍ່ແມ່ນໜ້ອຍ. ຄວາມສະດວກນັ້ນແມ່ນໄດ້ຮັບການສະໜັບສະໜູນຢ່າງຕັ້ງໜ້າຈາກປະຊາຊົນ, ດ້ວຍການບໍລິຈາກທີ່ດິນ, ປະກອບເຫື່ອແຮງເພື່ອກໍ່ສ້າງທາງຄົມມະນາຄົມ, ໂຮງຮຽນ, ສຸກສາລາ, ຫໍວັດທະນະທຳ. ແຕ່ງົບປະມານໃຫ້ແກ່ການກໍ່ສ້າງພື້ນຖານໂຄງລາສງຊົນນະບົດໃໝ່ຍັງຈຳກັດຢູ່, ຊາວເຜົ່າ ຣາລາຍ ມີລະດັບຄວາມຮູ້ຕຳ່, ການສຳຜັດກັບເຕັກນິກຜະລິດໃໝ່ກໍ່ຍາກຫຼາຍ. ດັ່ງນັ້ນທາງເມືອງຈຶ່ງສຸມໃສ່ການບຳລຸງສ້າງແຫຼ່ງຊັບພະຍາກອນມະນຸດເທື່ອລະກ້າວ“.
ພາຍຫຼັງ 4 ປີ ແຫ່ງການຜັນຂະຫຍາຍໂຄງການກໍ່ສ້າງຊົນນະບົດໃໝ່, ຕາແສງ ບາກຸ້ມບັກ ລະດົມທຶນໄດ້ 6,3 ຕຶ້ດົ່ງ ເພື່ອກໍ່ສ້າງ, ສ້ອມແປງທາງຫຼາຍສາຍ, ແລະໂຮງຮຽນໃນຕາແສງຈຳນວນໜຶ່ງ. ທາງຕາແສງກໍ່ສົມທົບກັບສູນສອນວິຊາຊີບເມືອງ ແຄ໋ງເຊີນ ເປີດຊຸດກໍ່ສ້າງວິຊາຊີບທີ່ເໝາະສົມກັບຄວາມຕ້ອງການ ກໍ່ຄືສະພາບຕົວຈິງຂອງທ້ອງຖີ່ນເຊັ່ນ: ຕັດຫຍິບ, ຊ່າງໄມ້... ເພື່ອສ້າງວຽກເຮັດງານທຳ, ຫັນເປັນຫຼາຍຂະແໜງອາຊີບໃຫ້ແກ່ປະຊາຊົນ. ຍ້ອນເຫດນັ້ນຊາວໜຸ່ມຈຳນວນໜຶ່ງໃນຕາແສງໄດ້ມີອາຊີບຢ່າງແນ່ນອນ ແລະ ມີລາຍຮັບເປັນປົກກະຕິ. ພ້ອມກັບວິວັດການກໍ່ສ້າງຊົນນະບົດໃໝ່, ບາກຸ້ມບັກ ຍັງປະຕິບັດບັນດາໂຄງການຂອງລັດຖະບານກ່ຽວກັບການໜູນຊ່ວຍຊາວຊົນເຜົ່າສ່ວນໜ້ອຍລົບລ້າງຄວາມອຶກຫີວ ຫຼຸດຜ່ອນຄວາມທຸກຍາກ, ໜູນຊ່ວຍຄອບຄົວທຸກຍາກໃນການກູ້ຢືມທຶນ ສົມທົບກັບໂຄງການກໍ່ສ້າງຊົນນະບົດໃໝ່. ຄະນະກຳມະການປະຊາຊົນແຂວງ ແຄ໋ງຮ່ວາ ກໍ່ມີບາງນະໂຍບາຍສະເພາະເພື່ອໜູນຊ່ວຍໃຫ້ຊາວຊົນເຜົ່າສ່ວນໜ້ອຍໃນບໍລິເວນ. ທ່ານ ຫງວຽນກວາງງອກ, ຫົວໜ້າຄະນະຊົນເຜົ່າແຂວງ ເຄ໋ງຮ່ວາ, ໃຫ້ຮູ້ວ່າ:
“ແຂວງ ແຄ໋ງຮ່ວາ ໄດ້ມີລາຍການສະເພາະໃນໄລຍະ 2010 - 2015 ກ່ຽວກັບການພັດທະນາເສດຖະກິດສັງຄົມຢູ່ເຂດພູດອຍ, ໃນນັ້ນມີໂຄງການສົມທົບກັບອົງການຈັດຕັ້ງຕ່າງໆຄື: ຄະນະຊາວໜຸ່ມ, ສະມາຄົມຊາວນາ... ໂຄສະນາຍົກສູງຄວາມຮູ້ໃຫ້ຊາວຊົນເຜົ່າ, ໜູນຊ່ວຍງົບປະມານກໍ່ສ້າງຮູບແບບຜະລິດ, ຮັບປະກັນຊີວິດສັງຄົມ ແລະ ກໍ່ສ້າງພື້ນຖານໂຄງລ່າງ, ຕິດຕັ້ງລະບົບໄຟຟ້າ, ນຳ້ສະອາດ... ບັນດາໂຄງການດັ່ງກ່າວພວມປະກອບສ່ວນປັບປຸງບັນດາມາດຖານກໍ່ສ້າງຊົນນະບົດໃໝ່ຢູ່ ບາກຸ້ມບັກ“.
ເຖິງວ່າຍັງປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ, ແຕ່ມາຮອດປະຈຸບັນ, ຕາແສງ ບາກຸ້ມບັກ ສາມາດບັນລຸໄດ້ 6/19 ມາດຖານກໍ່ສ້າງຊົນນະບົດໃໝ່. ສຳລັບຕາແສງຢູ່ເຂດພູດອຍທີ່ຫ່າງໄກສອກຫຼີກ, ເງື່ອນໄຂພື້ນຖານດ້ານວັດຖຸ, ທາງຄົມມະນາຄົມໄປມາຫຍຸ້ງຍາກນັ້ນ, ເພື່ອບັນລຸໄດ້ຈຸດໝາຍດັ່ງກ່າວ ແມ່ນຕ້ອງມີຄວາມມານະພະຍາຍາມຢ່າງໃຫຍ່ຫຼວງ. ໃນນັ້ນ, ສິ່ງທີ່ໜ້າສົນໃຈນັ້ນ ແມ່ນມາດຖານຍົກສູງລາຍຮັບ, ປັບປຸງຊີວິດການເປັນຢູ່ຂອງປະຊາຊົນພວມມີຄວາມຄືບໜ້າ. ນີ້ແມ່ນປັດໃຈທີ່ສຳຄັນເພື່ອໃຫ້ຕາແສງ ບາກຸ້ບັກ ກໍ່ຄືຫຼາຍຕາແສງຢູ່ເຂດພູດອຍໃນເມືອງ ແຄ໋ງເຊີນ, ແຂວງ ແຄ໋ງຮ່ວາ, ມີເງື່ອນໄຂເພື່ອປະຕິບັດສຳເລັດບັນດາຄາດໝາຍກ່ຽວກັບການກໍ່ສ້າງຊົນນະບົດໃໝ່ໃນອະນາຄົດ.