(vovworld) - ຕາແສງເຕິນຈ່າວ, ເມືອງເຊີນເຢືອງ, ແຂວງຕວຽນກວາງ ແມ່ນບ້ານເກີດເມືອງນອນແຫ່ງການປະຕິວັດ, ແມ່ນສະຖານທີ່ປະຕິວັດທີ່ລືຊື່ໃນຊຸມວັນປະຕິວັດເດືອນສິງຫາປີ 1945. ເຕິນຈ່າວແມ່ນໜຶ່ງໃນ 3 ຕາແສງທີ່ຕາງໜ້າໃຫ້ 3 ພາກຂອງທົ່ວປະເທດ ໄດ້ຮັບການອຸປະຖຳຈາກທ່ານປະທານປະເທດ ເຈືອງເຕິ໋ນຊາງ ກ່ຽວກັບແຫຼ່ງກຳລັງເພື່ອປະຕິບັດໂຄງການຈຸດໝາຍແຫ່ງຊາດກໍ່ສ້າງຊົນນະບົດໃໝ່.
ຕົ້ນໄຮເຕິນຈ່າວ
(ພາບ: ອິນເຕີແນດ)
ເຕິນຈ່າວ ແມ່ນຕາແສງພູດອຍ, ດັ່ງນັ້ນເງື່ອນໄຂພັດທະນາເສດຖະກິດ, ປະຕິບັດໂຄງການກໍ່ສ້າງຊົນນະບົດໃໝ່ປະສົບກັບຄວາມຫຍຸ້ງຍາກ. ເຖິງຢ່າງໃດກໍ່ຕາມ, ຍ້ອນມີວິທີເຮັດທີ່ດີ, ມີຫົວຄິດປະດິດສ້າງເໝາະສົມກັບສະພາບຕົວຈິງຂອງທ້ອງຖີ່ນ, ຕາແສງ ເຕິນຈ່າວ ຈຶ່ງບັນລຸໄດ້ບັນດາຜົນງານທີ່ໜ້າຊື່ນຊົມໃນການກໍ່ສ້າງຊົນນະບົດໃໝ່. ມາຮອດປະຈຸບັນ, ເຕິນຈ່າວ ບັນລຸໄດ້ 19/19 ມາດຖານກໍ່ສ້າງຊົນນະບົດໃໝ່, ໃນນັ້ນມີບັນດາມາດຖານ: ວາງແຜນກຳນົດ, ທາງຄົມມະນາຄົມ, ຊົນລະປະທານ, ໄປສະນີ, ຮູບການຈັດຕັ້ງການຜະລິດ, ການສຶກສາ, ສາທາລະນະສຸກ, ວັດທະນະທຳ, ລະບົບການເມືອງ, ຄວາມສະຫົງບປອດໄພ, ຄວາມເປັນລະບຽບຮຽບຮ້ອຍ; ຊີວິດຂອງປະຊາຊົນໄດ້ຮັບການປັບປຸງຢ່າງຈະແຈ້ງ. ຍ້ອນເຫດນັ້ນໂສມໜ້າຊົນນະບົດຈຶ່ງມີການປ່ຽນແປງຫຼາຍຢ່າງ. ເສັ້ນທາງເບຕົງລະຫວ່າງບ້ານສະອາດ, ສວຍງາມ, ເຮືອນຮ້ານທີ່ເປັນມູນເຊື້ອຂອງຊາວເຜົ່າໄຕ ໄດ້ຮັບການສ້ອມແປງ ແລະ ກໍ່ສ້າງໃໝ່. ບັນດາຮາກຖານຜະລິດ, ດຳເນີນທຸລະກິດ, ການບໍລິການທ່ອງທ່ຽວເຄື່ອນໄຫວຢ່າງຟົດຟື້ນ. ທີ່ຫໍວັດທະນະທຳບ້ານ, ປະຊາຊົນແອບກິລາ, ລະຫຼິ້ນ, ບັນເທິງຢ່າງຫ້າວຫັນ… ເພື່ອບັນລຸໄດ້ຜົນງານດັ່ງກ່າວ, ນັບແຕ່ຜັນຂະຫຍາຍໂຄງການກໍ່ສ້າງຊົນນະບົດໃໝ່, ອຳນາດການປົກຄອງຕາແສງເຕິນຈ່າວ ໄດ້ກຳນົດນີ້ແມ່ນໂຄງການພັດທະນາເສດຖະກິດສັງລວມ, ຮອບດ້ານ, ຈຳເປັນຕ້ອງມີການຮ່ວມແຮງຮ່ວມໃຈຂອງທົ່ວປວງຊົນ. ຍ້ອນເຫດນັ້ນ, ອຳນາດການປົກຄອງຕາແສງເຕິນຈ່າວ ໄດ້ມີແຜນນະໂຍບາຍເສີມຂະຫຍາຍບົດບາດເປັນເຈົ້າຂອງປະຊາຊົນ. ທຸກຮູບການປະຕິບັດໂຄງການກໍ່ສ້າງຊົນນະບົດໃໝ່ລ້ວນແຕ່ໄດ້ຮັບການເປີດເຜີຍເພື່ອໃຫ້ປະຊາຊົນປຶກສາຫາລື, ອີງໃສ່ເງື່ອນໄຂຕົວຈິງຢູ່ທ້ື້ອງຖີ່ນ, ດັ່ງນັ້ນໂຄງການໄດ້ຮັບຄວາມເຫັນດີເຫັນພ້ອມ ແລະ ການສະໜັບສະໜູນຈາກປະຊາຊົນໃນຕາແສງ. ທ່ານ ເບ໋ວັນຫາຍ, ສະມາຊິກຄະນະປະຕິບັດງານກໍ່ສ້າງຊົນນະບົດໃໝ່ຢູ່ຕາແສງເຕິນຈ່າວ, ໃຫ້ຮູ້ວ່າ:
“ເພື່ອເຮັດວຽກງານປຸກລະດົມປະຊາຊົນປະຕິບັດບັນດາໂຄງການຈຸດໝາຍກ່ຽວກັບການກໍ່ສ້າງຊົນນະບົດໃໝ່, ກ່ອນອື່ນໝົດແມ່ນຕ້ອງເຮັດແນວໃດໃຫ້ພໍ່ແມ່ປະຊາຊົນເຂົ້າໃຈໄດ້ສະພາບຕົວຈິງຢູ່ທ້ອງຖີ່ນ, ກໍ່ຄືບັນດາບັນຫາທີ່ຈຳເປັນຕ້ອງໄດ້ຮັບການແກ້ໄຂ, ອັນໃດເຮັດກ່ອນ, ອັນໃດເຮັດຕາມຫຼັງ, ຈາກນັ້ນປຸກລະດົມ, ກຳນົດທິດຢ່າງລະອຽດ, ເຮັດໃຫ້ປະຊາຊົນຮູ້ພັນທະ ແລະ ຄວາມຮັບຜິດຊອບຂອງຕົນໃນການກໍ່ສ້າງຊົນນະບົດໃໝ່, ທັງເພື່ອຜົນປະໂຫຍດຂອງປະເທດ, ທັງເພື່ອຜົນປະໂຫຍດຂອງຄອບຄົວ“.
ທາງເບຕົງລະຫວ່າງບ້ານຢູ່ເຕິນຈ່າວ
(ພາບ: ອິນເຕີແນດ)
ໜຶ່ງໃນບັນດາມາດຖານສຳຄັນກວ່າໝູ່ໃນການກໍ່ສ້າງຊົນນະບົດໃໝ່ນັ້ນແມ່ນພັດທະນາການຜະລິດ. ຍົກສູງລາຍຮັບໃຫ້ປະຊາຊົນ. ອຳນາດການປົກຄອງຕາແສງ ເຕິນຈ່າວ ກຳນົດແຈ້ງສະພາບການຢູ່ທ້ອງຖີ່ນ, ຊອກຫາຄວາມສາມາດບົ່ມຊ້ອນ, ທ່າສະດວກໃນການພັດທະນາການຜະລິດ, ຈາກນັ້ນສຸມໃສ່ຊີ້ນຳເພື່ອພັດທະນາເສດຖະກິດຢ່າງໝັ້ນຄົງ, ນຳມາເຊິ່ງປະສິດທິຜົນສູງ ແລະ ເໝາະສົມກັບທ້ອງຖີ່ນ. ບັນດາມາດຕະການເພີ່ມທະວີການປູກຝັງ, ເພີ່ມສະມັດຕະພາບການຜະລິດເຂົ້າ ແລະ ພືດ, ໜູນຊ່ວຍປະຊາຊົນໃນການກູ້ຢືມທຶນພັດທະນາການຜະລິດ, ບັນດາຮູບແບບຟາມ, ລ້ຽງສັດ, ສວນໝາກໄມ້; ຖ່າຍທອດເຕັກນິກຢ່າງເໝາະສົມ, ໄດ້ນຳມາເຊິ່ງປະສິດທິຜົນເສດຖະກິດສູງ. ບາງໂຄງການຜະລິດປຸງແຕ່ງ, ຈຳໜ່າຍຜະລິດຕະພັນຊາ, ຍູ້ແຮງການລ້ຽງສັດ, ພັດທະນາຝູງສັດປີກຕາມທິດຜະລິດເປັນສິນຄ້າກໍ່ບັນລຸໄດ້ຜົນງານທີ່ດີ, ຊ່ວຍຫຼາຍຄອບຄົວຊາວກະສິກອນບືນຕົວຂຶ້ນໃນການດຳລົງຊີວິດ. ອ້າຍ ຟຸ່ງວັນມິງ, ໜຶ່ງໃນບັນດາຄອບຄົວທີ່ໄດ້ຮັບການໜູນຊ່ວຍພັດທະນາການລ້ຽງສັດຈາກອຳນາດການປົກຄອງ, ໃຫ້ຮູ້ວ່າ:
“ກ່ອນນີ້ຄອບຄົວຂ້າພະເຈົ້າແມ່ນຄອບຄົວທຸກຍາກ. ໂດຍໄດ້ຮັບຄວາມເອົາໃຈໃສ່ຊ່ວຍເຫຼືອທຶນຈາກລັດ, ອຳນາດການປົກຄອງ ເພື່ອພັດທະນາການລ້ຽງສັດ. ປະຈຸບັນ, ຂ້າພະເຈົ້າໄດ້ກໍ່ສ້າງເຮືອນໃໝ່ແລ້ວ. ນອກນັ້ນຂ້າພະເຈົ້າຍັງໄດ້ເຂົ້າຮ່ວມຊຸດຟຶກອົບຮົມແນະນຳກ່ຽວກັບເຕັກນິກປູກຝັງ, ລ້ຽງສັດ, ດັ່ງນັ້ນເສດຖະກິດກໍ່ໄດ້ດີກວ່າເກົ່າ ແລະ ຄອບຄົວຂ້າພະເຈົ້າໄດ້ຫຼຸດພົ້ນອອກຈາກຄວາມທຸກຍາກ“.
ເຮືອນຮ້ານຂອງຊາວເຜົ່າໄຕໄດ້ຮັບການສ້ອມແປງ ແລະ ກໍ່ສ້າງໃໝ່
(ພາບ: ອິນເຕີແນດ)
ດ້ວຍຄາດໝາຍຫັນປ່ຽນໂຄງປະກອບແຮງງານ, ຕາແສງເຕິນຈ່າວ ໄດ້ດຳເນີນການວາງແຜນກຳນົດດິນນາຄືນໃໝ່, ສະຫງວນທີ່ດິນເພື່ອພັດທະນາບັນດາຂະແໜງອຸດສາຫະກຳນ້ອຍຫັດຖະກຳ, ພັດທະນາການຄ້າ ແລະ ການບໍລິການ, ປັບປຸງບັນດາສູນສອນວິຊາຊີບໃນຕາແສງ, ສົມທົບກັບບັນດາສູນສອນວິຊາຊີບອື່ນໆຍູ້ແຮງການບຳລຸງສ້າງ, ພັດທະນາບັນດາຂະແໜງໃໝ່, ໂດຍສະເພາະແມ່ນຍົກສູງລະດັບສີມືແຮງງານໃຫ້ແກ່ຊາວກະສິກຳ, ຫຼຸດຜ່ອນອັດຕາສ່ວນແຮງງານໃນຂະແໜງກະສິກຳ, ເພີ່ມອັດຕາສ່ວນແຮງງານໃນຂະແໜງອຸດສາຫະກຳ ແລະ ການບໍລິການ, ສ້າງປະຖົມປັດໃຈໃຫ້ແກ່ການພັດທະນາເສດຖະກິດແບບຍືນຍົງ. ໜຶ່ງໃນບັນດາມາດຖານສຳຄັນໃນການກໍ່ສ້າງຊົນນະບົດໃໝ່, ນັ້ນແມ່ນການລົງທຶນກໍ່ສ້າງພື້ນຖານໂຄງລ່າງ, ພັດທະນາທາງຄົມມະນາຄົມຊົນນະບົດ. ມີຫຼາຍຄອບຄົວໄດ້ບໍລິຈາກທີ່ດິນໃຫ້ແກ່ການກໍ່ສ້າງທາງຄົມມະນາຄົມ, ບັນດາກິດຈະກຳວັດທະນະທຳ, ສະຫວັດດີການສັງຄົມ. ທ່ານ ຫງວຽນວັນຮ່ວາ, ປະທານຄະນະກຳມະການປະຊາຊົນຕາແສງເຕິນຈ່າວ, ໃຫ້ຮູ້ວ່າ:
“ຜົນງານພົ້ນເດັ່ນຂອງໂຄງການກໍ່ສ້າງຊົນນະບົດໃໝ່ນັ້ນແມ່ນພື້ນຖານໂຄງລ່າງຊົນນະບົດໄດ້ຮັບການກໍ່ສ້າງສຳເລັດໂດຍພື້ນຖານ, ສ້າງເງື່ອນໄຂສະດວກໃຫ້ປະຊາຊົນພັດທະນາການຜະລິດ. ທີສອງແມ່ນຈີນຕະນາການພັດທະນາການຜະລິດຂອງປະຊາຊົນໄດ້ມີການປ່ຽນແປງຫຼາຍຢ່າງ, ຈາກການຜະລິດແບບກຸ້ມຕົນເອງ, ປະຈຸບັນແມ່ນຜະລິດສິນຄ້າຕາມທິດສຸມໃສ່ຜະລິດບັນດາຜະລິດຕະພັນທີ່ຕອບສະໜອງຄວາມຕ້ອງການຂອງຕະຫຼາດ ແລະ ນຳມາເຊິ່ງມູນຄ່າເສດຖະກິດສູງ“.
ຍ້ອນມີຄວາມມານະພະຍາຍາມດັ່ງກ່າວ, ປີ 2014 ລາຍຮັບສະເລ່ຍໃສ່ຫົວຄົນຢູ່ເຕິນຈ່າວ ບັນລຸໄດ້ກວ່າ 16 ລ້ານດົ່ງ/ຄົນ/ປີ, ເພີ່ມຂຶ້ນທົບ 2 ເທົ່າເມື່ອທຽບໃສ່ປີ 2012, (ເຊິ່ງແມ່ນປີເລີ່ມຜັນຂະຫຍາຍໂຄງການກໍ່ສ້າງຊົນນະບົດໃໝ່) ແມ່ນ 8,2 ລ້ານດົ່ງ/ຄົນ/ປີ. ຜົນງານດັ່ງກ່າວໄດ້ປະກອບສ່ວນເຮັດໃຫ້ຕາແສງເຕິນຈ່າງ, ບ້ານເກີດເມືອງນອນແຫ່ງການປະຕິວັດນັບມື້ນັບພັດທະນາຢ່າງໝັ້ນຄົງໃນອະນາຄົດ.