(vovworld) - ພາຍຫຼັງ 3 ປີ ແຫ່ງການຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ກວາງນິງ ໄດ້ກໍ່ສ້າງບັນດາເຂດຜະລິດ ຜະລິດຕະພັນກະເສດຈຸດສຸມ, ລົງທຶນກໍ່ສ້າງໂຮງງານຜະລິດປຸງແຕ່ງ, ສົມທົບກັບບັນດາວິສາຫະກິດຊອກຫາສົ້ນອອກໃຫ້ຜະລິດຕະພັນກະເສດ, ເຄື່ອງປ່າຂອງດົງ, ສິນໃນນ້ຳ, ສິນທະເລ. ຍ້ອນມີວິທີເຮັດຄືດັ່ງກ່າວ, ລາຍຮັບຂອງປະຊາຊົນກໍ່ເພີ່ມຂຶ້ນ ແລະ ເຄື່ອງໝາຍການຄ້າຂອງຜະລິດຕະພັນກະເສດຢູ່ຫຼາຍເຂດໃນແຂວງກວາງນິງ ຈຶ່ງໄດ້ຮັບການຢັ້ງຢືນເທື່ອລະກ້າວ.
ຊາວກະສີກອນເບີກບານມ່ວນຊື່ນເກັບກ່ຽວຜັກປອດສານພິດ
ໃນທົ່ງນາກວ້າງ 30 ເຮັກຕາຢູ່ຕາແສງກົ້ງຮ່ວາ, ເທດສະບານກວາງອຽນ, ແຂວງກວາງນິງ. ຊາວກະສິກອນພວມຮີບເຮັ່ງເກັບກ່ຽວຜັກປອດສານພິດ, ການປູກຜັກໃນລະດູການນີ້ໄດ້ຮັບຜົນດີ. ບັນດາບໍລິສັດປຸງແຕ່ງຜະລິດຕະພັນກະເສດໃນບໍລິເວນໄດ້ຊື້ຜັກທັງໝົດຂອງຕາແສງກົ້ງຮ່ວາ. ນັບແຕ່ຕົ້ນລະດູການມາຮອດປະຈຸບັນ, ຄິດສະເລ່ຍແຕ່ລະມື້ຊາວກະສີກອນເກັບກ່ຽວຜັກປອດສານພິດໄດ້ແຕ່ 2,5 – 3 ໂຕນເພື່ອຂາຍອອກຕະຫຼາດ, ເຂົ້າຮ່ວມລາຍການຮ່ວມມືກັບບັນດາບໍລິສັດເກັບຊື້ຜະລິດຕະພັນກະເສດໃນຫຼາຍລະດູການຜ່ານມາ, ຊາວຕາແສງກົ້ງຮ່ວາ ນຳໃຊ້ຫຼາຍຂັ້ນຕອນເພື່ອຮັບ ປະກັນຄຸນນະພາບຜະລິດຕະພັນສົ້ນອອກ. ດັ່ງນັ້ນ, ບັນດາວິສາຫະກິດຈຶ່ງໃຫ້ຄຳໝັ້ນສັນຍາເກັບຊື້ຜັກຂອງຊາວກະສີກອນດ້ວຍລາຄາສູງກວ່າຕະຫຼາດປະມານ 5%.
ກ່ອນນີ້, ຜູ້ປູກຜັກຢູ່ຕາແສງກົ້ງຮ່ວາ ເຄີຍຜະລິດແບບກະແຈກກະຈາຍ, ເຕັກນິກບໍ່ສູງ, ສະມັດຕະພາບຕຳ່, ດັ່ງນັ້ນຊີວິດຂອງຊາວກະສີກອນປະສົບກັບຄວາມຫຍຸ້ງຍາກ. ເມື່ອຫັນເປັນການຜະລິດແບບລວມສຸນ, ວາງແຜນກຳນົດເຂດປູກຜັກ ແລະ ສົ້ນອອກຂອງຜະລິດຕະພັນໄດ້ຮັບປະກັນນັ້ນ, ຫຼາຍຄອບຄົວຢູ່ຕາແສງກົ້ງຮ່ວາ ໄດ້ຂະຫຍາຍເນື້ອທີ່ປູກຜັກສະອາດຕື່ມອີກ. ເອື້ອຍຟານເຟືອງຖາວ, ຢູ່ຕາແສງກົ້ງຮ່ວາ, ເທດສະບານກວາງອຽນ, ໃຫ້ຮູ້ວ່າ:
“ນັບແຕ່ສ້າງຕັ້ງບໍລິສັດເກັບຊື້ຜັກ, ຄອບຄົວຂ້າພະເຈົ້າກໍ່ຫັນໄປສູ່ການປູກຜັກ, ຮອດລະດູການເກັບກ່ຽວບໍລິສັດໄດ້ມາຊື້ໃຫ້ຄອບຄົວ. ລາຄາຜັກທີ່ບໍລິສັດຊື້ນັ້ນກໍ່ສູງກວ່າລາຄາທີ່ພໍ່ຄ້າຊາວຂາຍມາຊື້ກ່ອນນີ້, ດັ່ງນັ້ນເສດຖະກິດຂອງຄອບຄົວກໍ່ພັດທະນາຂຶ້ນຕື່ມ“.
ນັບແຕ່ປີ 2012, ອຳນາດການປົກຄອງຕາແສງກົ້ງຮ່ວາ ໄດ້ມີກົນໄກເໝາະສົມເພື່ອດຶງດູດບັນດາວິສາຫະກິດມາຮ່ວມມື, ລົງທຶນ ເພື່ອຍູ້ແຮງວິວັດການກໍ່ສ້າງຊົນນະບົດໃໝ່. ຕາມທ່ານ ຟ້າມວັນເຊີນ, ເລຂາຄະນະພັກ, ປະທານຄະນະກຳມະການປະຊາຊົນຕາແສງກົ້ງຮ່ວາແລ້ວ, ຄຽງຂ້າງການເກັບຊື້ຜະລິດຕະພັນໃຫ້ແກ່ຊາວກະສີກອນແລ້ວ, ວິສາຫະກິດເກັບຊື້ຜະລິດຕະພັນກະເສດຍັງລົງທຶນກວ່າ 17 ຕື້ດົ່ງ ເພື່ອກໍ່ສ້າງລະບົບຊົນລະປະທານ, ໂຮງງານຜະລິດປຸງແຕ່ງ, ເຂດຄຸ້ມຄອງຮັກສາ… ບັນດາບໍລິສັດດັ່ງກ່າວຍັງປະກອບສ່ວນສ້າງເຄື່ອງໝາຍການຄ້າໃຫ້ແກ່ຜະລິດຕະພັນກະເສດຂອງທ້ອງຖີ່ນ. ປະຈຸບັນ, ເຖິງວ່າຜັກປອດສານພິດຂອງຕາແສງກົ້ງຮ່ວາ ພວມຢູ່ໃນໄລຍະສ້າງເຄື່ອງໝາຍກໍ່ຕາມ, ແຕ່ພັດໄດ້ຮັບຄວາມນິຍົມຈາກຕະຫຼາດທີ່ສຸດ. ກ່ອນນີ້ໃນເນື້ອທີ່ປູກຜັກ 1 ເຮັກຕາສາມາດສ້າງລາຍຮັບໄດ້ພຽງ 50-70 ລ້ານດົ່ງເທົ່ານັ້ນ, ແຕ່ເມື່ອປະຕິບັດໂຄງການສ້າງເຄື່ອງໝາຍການຄ້າ, ມູນຄ່າດ້ານເສດຖະກິດໄດ້ຂຶ້ນເຖິງ 150 ລ້ານດົ່ງ/ເຮັກຕາ. ທ່ານ ຟ້າມວັນເຊີນ ໃຫ້ຮູ້ວ່າ:
“ພວກຂ້າພະເຈົ້າພວມສົ່ງເສີມການສ້າງເຮືອນປູກຜັກຝືນລະດູການ ແຕ່ມີມູນຄ່າເສດຖະກິດສູງ, ຜ່ານແຜນກຳນົດເຂດປູກຜັກສອດສານພິດນີ້, ຊາວກະສີກອນຍັງຕ້ອງສືບຕໍ່ປະຕິບັດຂັ້ນຕອນການປູກຜັກປອດສານພິດຢ່າງຖືກຕ້ອງອີກ, ຈຶ່ງສາມາດສ້າງເຄື່ອງໝາຍການຄ້າໄດ້“.
ບັນດາຄອບຄົວປູກຜັກປອດສານພິດໃນຕາແສງກົ້ງຮ່ວາ
ຄາດວ່າຈະຂະຫຍາຍເນື້ອທີ່ປູກຜັກສະອາດຕື່ມອີກ
ປະຈຸບັນ, ແຂວງກວາງນິງ ພວມສືບຕໍ່ຜັນຂະຫຍາຍການກໍ່ສ້າງ 23 ໂຄງການເຄື່ອງໝາຍການຄ້າຜະລິດຕະພັນກະເສດ. ແຂວງກວາງນິງ ໄດ້ສຳເລັດການວາງແຜນກຳນົດເຂດຜະລິດເປັນສິນຄ້າແບບລວມສູນ, ແລະ ສ້າງຕັ້ງ 15 ສະມາຄົມ, ສະຫະກອນຜະລິດ ແລະ ດຳເນີນທຸລະກິດບັນດາຜະລິດຕະພັນທີ່ໄດ້ຮັບການສ້າງເຄື່ອງໝາຍການຄ້າ. ບັນດາສະມາຄົມ, ສະຫະກອນເຫຼົ່ານັ້ນ ປະຕິບັດມີບົດບາດຈັດຕັ້ງການຜະລິດ, ຮັບເອົາແລະນຳໃຊ້ຄວາມກ້າວໜ້າດ້ານວິທະຍາສາດເຕັກນິກ ເຂົ້າໃນການຜະລິດ, ກວດກາຄຸນນະພາບຜະລິດຕະພັນ ແລະ ຊອກຫາສົ້ນອອກໃຫ້ຜະລິດຕະພັນ. ທ່ານ ດິງສີງວຽນ, ຫົວໜ້າຫ້ອງຊັບສິນທາງປັນຍາ, ພະແນກວິທະຍາສາດ ແລະ ເຕັກໂນໂລຢູ ແຂວງກວາງນິງ, ໃຫ້ຮູ້ວ່າ:
“ໃນ 19 ມາດຖານກ່ຽວກັບການກໍ່ສ້າງຊົນນະບົດໃໝ່ຂອງທົ່ວປະເທດ ມີ 3 ມາດຖານກ່ຽວກັບເສດຖະກິດ ແມ່ນສຳຄັນ, ທັງແມ່ນຄາດໝາຍປະຕິບັດຍາກທີ່ສຸດ. ແຕ່ການສ້າງເຄື່ອງໝາຍການຄ້າ ຈະສາມາດແກ້ໄຂບັນຫາດັ່ງກ່າວໄດ້ໂດຍທັນທີ. ການວາງແຜນກຳນົດເຂດຜະລິດແບບລວມສູນ, ຂັ້ນຕອນການຜະລິດ, ບັນດາມາດຖານຄຸນນະພາບ, ຍີ່ຫໍ້… ຕ້ອງຮັບປະກັນ. ແລະ ສິ່ງສຳຄັນກວ່າແມ່ນຕ້ອງຊອກຫາສົ້ນອອກໃຫ້ຜະລິດຕະພັນກະເສດ“.
ຈາກວິທີເຮັດຄືດັ່ງກ່າວ, ບັນດາຜະລິດຕະພັນກະເສດ, ສິນໃນນຳ້ຕົ້ນຕໍຂອງກວາງນິງ ຄືໝາກຂຽບດົງຈ່ຽວ, ດອກເໝີຍເຫຼືອງອຽນຕື…ພວມຄ່ອຍໆມີທີ່ຕັ້ງຢ່າງໝັ້ນຄົງໃນຕະຫຼາດ, ອັນໄດ້ປະກອບສ່ວນຍົກສູງກຳລັງແກ່ງແຍ້ງໃຫ້ຜະລິດຕະພັນກະເສດກວາງນິງ, ສ້າງການຫັນປ່ຽນຢ່າງຕັ້ງໜ້າ, ກໍ່ຄືປະກອບສ່ວນເຂົ້າໃນການພັດທະນາເສດຖະກິດ - ສັງຄົມຂອງທ້ອງຖີ່ນ.