(vovworld) - ເຂດໄຕງວຽນລວມມີບັນດາແຂວງ ກອນຕຸມ, ຢາລາຍ, ດັກລັກ, ດັກນົງ ແລະ ເລິມດົ່ງ, ແມ່ນເຂດດິນແດງ bazan ຈະເລີນພັນ, ເໝາະສົມກັບຕົ້ນໄມ້ຫຼາຍຊະນິດ, ດັ່ງນັ້ນຈຶ່ງມີເງື່ອນໄຂຢ່າງພຽງພໍເພື່ອພັດທະນາຂະແໜງກະສິກຳເປັນຫຼາຍຮູບຫຼາຍແບບ. ຍ້ອນເຫດນັ້ນໃນທິດທາງພັດທະນາເສດຖະກິດເຂດໄຕງວຽນ, ບັນດາແຂວງລ້ວນແຕ່ເອົາໃຈໃສ່ເປັນພິເສດເຖິງການພັດທະນາກະສິກຳຕາມທິດເຕັກໂນໂລຢີສູງ, ຈາກນັ້ນຍົກສູງຊີວິດການເປັນຢູ່ຂອງປະຊາຊົນ ແລະຊຸກຍູ້ວິວັດການກໍ່ສ້າງຊົນນະບົດໃໝ່. ບົດຂຽນຂອງ ກວົກຮອກ, ນັກຂ່າວວິທະຍຸກະຈາຍສຽງຫວຽດນາມ ທີ່ມີຫົວຂໍ້ວ່າ: “ກະສິກຳເຕັກໂນໂລຢີສູງ-ທິດພັດທະນາເສດຖະກິດແບບຍືນຍົງຂອງເຂດໄຕງວຽນ“.
ການບົວລະບັດດອກໄມ້ດ້ວຍການນຳໃຊ້ເຕັກໂນໂລຢີສູງຢູ່ແຂວງດັກນົງ
(ພາບ: ອິນເຕີແນດ)
ເລິມດົ່ງ ແມ່ນແຂວງທີ່ເປັນແບບຢ່າງຢູ່ເຂດ ໄຕງວຽນໃນການພັດທະນາກະສິກຳໃຊ້ເຕັກໂນໂລຢີສູງ ທັງແມ່ນແຂວງບັນລຸລະດັບເຕີບໂຕເສດຖະກິດສູງສຸດໃນ 5 ປີຜ່ານມາ (2010-2015). ກະສິກຳໃຊ້ເຕັກໂນໂລຢີສູງ ແມ່ນບາດກ້າວບຸກທະລຸໃນການພັດທະນາເສດຖະກິດຂອງ ເລິມດົ່ງ, ປະກອບປະມານ 1/3 ມູນຄ່າການຜະລິດ, ປະກອບສ່ວນເຂົ້າລະດັບເຕີບໂຕຂອງຂະແໜງອຸດສາຫະກຳທ້ອງຖີ່ນແມ່ນເກືອບ 8,5%, ສູງທົບສອງເທົ່າເມື່ອທຽບໃສ່ທົ່ວປະເທດ. ຕີລາຄາກ່ຽວກັບການພັດທະນາຂອງແຂວງ ເລິມດົ່ງ, ທ່ານປະທານຄະນະກຳມະການສູນກາງແນວໂຮມປະເທດຊາດຫວຽດນາມ ຫງວຽນທ້ຽນເຍິນ, ຖືວ່າ:
“ຄວາມຈິງກ່ຽວກັບການຜະລິດກະສິກຳຢູ່ແຂວງ ເລິມດົ່ງ ໃນໄລຍະຜ່ານມາໄດ້ເປັນການພິສູດໃຫ້ເຫັນປະສິດທິຜົນຂອງຮູບແບບເຕີບໂຕໃໝ່. ເລື່ອງກະສິກຳແຂວງ ເລິມດົ່ງເຕີບໂຕດ້ວຍລະດັບສູງໃນທົ່ວປະເທດ, ບໍ່ແມ່ນຍ້ອນມີທຶນຫຼາຍ, ຫາກຍ້ອນຫຼາຍປັດໃຈອື່ນໆ. ໃນນັ້ນພົ້ນເດັ່ນແມ່ນການໝູນໃຊ້ວິທະຍາສາດເຕັກນິກເຂົ້າຂົງເຂດກະສິກຳ, ການນຳໃຊ້ແນວພັນໃໝ່, ທີ່ມີຄຸນນະພາບສູງ, ສະມັດຕະພາບສູງ, ມີຂັ້ນຕອນບົວລະບັດທີ່ທັນສະໄໝ. ມີການຮ່ວມສຳພັນລະຫວ່າງວິສາຫະກິດກັບຄອບຄົວຊາວກະສິກອນ ແລະ ລະຫວ່າງບັນດາຄອບຄົວຊາວກະສິກອນນຳກັນເພື່ອສ້າງຕັ້ງສະຫະກອນແບບໃໝ່.“
ຍ້ອນຍູ້ແຮງຄວາມກ້າວໜ້າດ້ານວິທະຍາສາດເຕັກນິກເຂົ້າໃນການ ຜະລິດ, ໃນ 5 ປີຜ່ານມາ, ມູນຄ່າຜະລິດກະສິກຳຂອງແຂວງ ດັກນົງ ເພີ່ມຂຶ້ນຈາກ 45 ລ້ານຂຶ້ນ 70 ລ້ານດົ່ງ/1ເຮັກຕາ, ປະກອບສ່ວນ ຍົກລາຍຮັບສະເລ່ຍໃສ່ຫົວຄົນຂຶ້ນເກືອບ 36,5 ລ້ານດົ່ງ. ປະຈຸບັນ, ແຂວງ ດັກນົງ ກຳນົດກະສິກຳນຳໃຊ້ເຕັກໂນໂລຢີສູງແມ່ນ ໜຶ່ງໃນ 3 ປາຍແຫຼມທີ່ຄວນສຸມໃສ່ລົງທຶນພັດທະນາໃນໄລຍະຈະມາເຖິງ. ພ້ອມກັບທິດທາງຄືດັ່ງກ່າວ, ແຂວງ ດັກນົງ ກໍ່ກຳນົດສ້າງໂຄງປະກອບພື້ນຖານເສດຖະກິດຄືນໃໝ່ຕິດພັນກັບການສ້າງໂຄງປະກອບກະສິກຳຂອງທ້ອງຖີ່ນເພື່ອຂຸດຄົ້ນ, ນຳໃຊ້ບັນດາແຫຼ່ງຊັບພະຍາກອນໃຫ້ປະຢັດ ແລະ ມີປະສິດທິຜົນ, ແນໃສ່ຊຸກຍູ້ການພັດທະນາເສດຖະກິດຕິດພັນກັບການປົກປັກຮັກສາສະພາບແວດລ້ອມຊີວະພາບ. ພ້ອມທັງພັດທະນາກະສິກຳ, ປ່າໄມ້, ສິນໃນນຳ້ ຕາມທິດຜະລິດເປັນສິນຄ້າ; ເອົາໃຈໃສ່ເປັນພິເສດເຖິງການພັດທະນາຕົ້ນໄມ້ເປັນຢາທີ່ລຳ້ຄ່າ ແລະ ລ້ຽງສັດ; ຂຸດຄົ້ນອ່າງໄຟຟ້ານຳ້ຕົກເພື່ອລ້ຽງປູກສິນໃນນຳ້, ເພີ່ມສະມັດຕະພາບໃນການນຳໃຊ້ທີ່ດິນ ແລະ ປ່າ.
ການລ້ຽງສັດດ້ວຍການນຳໃຊ້ເຕັກໂນໂລຢີສູງຢູ່ແຂວງດັກນົງ
(ພາບ: ອິນເຕີແນດ)
ໃຂະນະນັ້ນ, ດັກລັກ ແລະ ຢາລາຍ ແມ່ນສອງທ້ອງຖີ່ນທີ່ມີຄວາມສາມາດບົ່ມຊ້ອນຫຼາຍຢ່າງກ່ຽວກັບຊັບພະຍາກອນດິນແດງ bazan, ຍ້ອນເຫດນັ້ນ, ໃນຊຸຸມປີຜ່ານມາ, ສອງແຂວງນີ້ໄດ້ສຸມໃສ່ພັດທະນາອຸດສາ ຫະກຳຜະລິດປຸງແຕ່ງຜະລິດຕະພັນກະເສດ, ເຄື່ອງປ່າຂອງດົງ, ພິເສດແມ່ນການຜະລິດ, ປຸງແຕ່ງ, ສົ່ງອອກກາເຟ. ຕາມທ່ານ ເຈືອງເຟືອກແອງ , ຫົວໜ້າພະແນກກະສິກຳ ແລະ ພັດທະນາຊົນນະບົດແຂວງ ຢາລາຍແລ້ວ, ໃນໄລຍະຜ່ານມາ, ແຂວງຢາລາຍ ລົງທຶນພັດທະນາກະສິກຳ, ນຳໃຊ້ຄວາມກ້າວໜ້າດ້ານວິທະຍາສາດ - ເຕັກໂນໂລຢີເຂົ້າໃນການຜະລິດ, ດຳເນີນທຸລະກິດ ເພື່ອແນໃສ່ຍົກສູງສະມັດຕະພາບ, ຄຸນນະພາບ, ກຳລັງແກ່ງແຍ້ງຂອງຜະລິດຕະພັນກະເສດ. ຍ້ອນເຫດນັ້ນ, ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການຍົກສູງຂຶ້ນ. ການກໍ່ສ້າງຊົນນະບົດໃໝ່ຢູ່ຫຼາຍເມືອງ, ຕາແສງບັນລຸໄດ້ບັນດາຜົນງານທີ່ໜ້າສົ່ງເສີມ. ທ່ານ ເຈືອງເຟືອກແອງ ໃຫ້ຮູ້ວ່າ:
“ໃນໄລຍະຈະມາເຖິງ, ຂະແໜງກະສິກຳຍູ້ແຮງວຽກງານໂຄສະນາ, ຍົກສູງຄວາມຮັບຮູ້, ສ້າງຄວາມເຫັນດີເຫັນພ້ອມ ແລະ ຄວາມຕັດສິນໃຈສູງໃຫ້ວິສາຫະກິດ ແລະ ຊາວກະສິກອນໃນການປະຕິບັດໜ້າທີ່ສ້າງໂຄງປະກອບຂະແໜງກະສິກຳຄືນໃໝ່ ຕາມທິດຍົກສູງມູນຄ່າເພີ່ມ ແລະ ພັດທະນາແບບຍືນຍົງຕິດພັນກັບການກໍ່ສ້າງຊົນນະບົດໃໝ່“.
ຕາມແຜນກຳນົດກໍ່ສ້າງເຂດໄຕງວຽນເຖິງປີ 2030 ຂອງທ່ານນາຍົກລັດຖະມົນຕີແລ້ວ, ເຂດ ໄຕງວຽນຈະແມ່ນເຂດຈຸດສຸມພັດທະນາຕົ້ນໄມ້ອຸດສາຫະກຳ ຍ້ອນເຫດນັ້ນ, ບັນດາແຂວງ ໄຕງວຽນພວມຜັນຂະຫຍາຍຍຸດທະສາດພັດທະນາເສດຖະກິດຂອງທົ່ວເຂດ ດ້ວຍບັນດານະໂຍບາຍ ແລະ ມາດຕະການທີ່ເໝາະສົມກັບທ້ອງຖີ່ນຢ່າງວ່ອງໄວ. ພ້ອມກັນນັ້ນແມ່ນຍູ້ແຮງການກໍ່ສ້າງຊັບພະຍາກອນມະນຸດທີ່ມີຄຸນນະພາບສູງ, ມີນະໂຍບາຍບຸລິມາສິດສຳສຳລັບຊາວກະສິກອນ, ພິເສດແມ່ນຊາວຊົນເຜົ່າສ່ວນໜ້ອຍ, ເພື່ອໃຫ້ປະຊາຊົນປ່ຽນໃໝ່ການຜະລິດ, ຍູ້ແຮງການນຳໃຊ້ເຕັກໂນໂລຢີວິທະຍາສາດ ເຂົ້າໃນການພັດທະນາກະສິກຳ.