(vovworld) - ຜ່ານ 3 ປີ ແຫ່ງການປະຕິບັດທົດລອງຢູ່ 8 ຕາແສງ ແລະ ເກືອບ 1 ປີ ທີ່ຜັນຂະຫຍາຍການກໍ່ສ້າງຊົນນະບົດໃໝ່, ແຂວງ ທ໋າຍບິ່ງ, ແມ່ນໜຶ່ງໃນບັນດາອູ່ເຂົ້າອູ່ປາຂອງພາກເໜືອບັນລຸໄດ້ຜົນງານທີ່ສຳຄັນໃນເບື້ອງຕົ້ນຈຳນວນໜຶ່ງ. ການຜະລິດກະສິກຳເກືອບທັງໝົດໄດ້ນຳໃຊ້ກົນຈັກ, ນຳມາເຊິ່ງປະສິດທິຜົນດ້ານເສດຖະກິດຢ່າງເຫັນໄດ້ຊັດ. ມີບາງຕາແສງບັນລຸຜົນງານໃນການຈັດຕັ້ງການຜະລິດຜະລິດຕະພັນກະເສດຕາມແຜນກຳນົດເຂດຜະລິດລວມສູນ. ເຖິງຢ່າງໃດກໍ່ຕາມ, ການຜັນຂະຫຍາຍພວມປະສົບກັບຄວາມຫຍຸ້ງຍາກບໍ່ແມ່ນໜ້ອຍ.
ປະຊາຊົນຕາແສງ ກວີ່ນມິນກໍ່ສ້າງລະບົບຄອງເໝືອງ
(ພາບ: google.com.vn)
ສຳຫຼັບທ່ານ Nguyen Van Dong ແລະ ປະຊາຊົນຕາແສງ ກວີ່ນມິນ (Quynh Minh) ແລ້ວ, ການບຸລະນະ ລະບົບຊົນລະປະທານ, ພ້ອມກັບທິດທາງ ຫັນປ່ຽນຜົນລະປູກ, ສ້າງເປັນເຂດປູກພືດສະເພາະ ໄດ້ຍົກສູງລາຍຮັບໃຫ້ແກ່ປະຊາຊົນ. ຍ້ອນເຂົ້າຮ່ວມຊຸດເຝິກອົບຮົມ, ໃຫ້ຄຳປຶກສາກ່ຽວກັບການສົ່ງເສີມກະສິກຳເປັນປະຈຳ, ຄອບຄົວທ່ານ Dong ໄດ້ປະສົບຜົນສຳເລັດ ດ້ວຍການລ້ຽງໝູພັນ ແລະ ປູກພືດຜັກຄືໝາກເຜັດ, ໝາກແຕງສົ່ງອອກ… ລາຍຮັບໃນແຕ່ລະປີບັນລຸເກືອບ 80 ລ້ານດົ່ງ. ທ່ານ Dong ໃຫ້ຮູ້ວ່າ:
”ນັບແຕ່ກໍ່ສ້າງຊົນນະບົດໃໝ່, ບ້ານນາ ກໍ່ຄືຊີວິດຂອງປະຊາຊົນໄດ້ມີການປ່ຽນແປງຫຼາຍຢ່າງ. ຍ້ອນລ້ຽງສັດ ແລະ ປູກຝັງ, ຄອບຄົວຂ້າພະເຈົ້າກໍ່ມີຊີວິດການເປັນຢູ່ທີ່ອີ່ມໜຳສຳລານ. ສະຫະກອນຊ່ວຍເຫຼືອປະຊາຊົນຫຼາຍທີ່ສຸດໃນການສະຫຼອງແນວພັນ, ແນະນຳການນຳໃຊ້ວິທະຍາສາດເຕັກນິກ, ຊ່ວຍເຫຼືອປະຊາຊົນໃນການເກັບຊື້ຜະລິດຕະພັນ”
ກໍ່ເຊັ່ນດຽວກັນກັບການ Nguyen Van Dong, ປ້າ Nguyen Thi Luyen ຢູ່ບ້ານ ເທືອງຊ໋າ (Thuong Xa) ກໍ່ດີໃຈຫຼາຍເພາະວ່າໂສມໜ້າຢູ່ເຂດບ້ານນາໄດ້ມີການປ່ຽນແປງແລະພັດທະນາ ດ້ວຍເສັ້ນທາງ, ຮ່ອມບ້ານ, ເຂດຊຸມຊົນໄດ້ຮັບການວາງແຜນຜັງຢ່າງສວຍງາມ ແລະ ຍ້ອນໄດ້ຮັບການໜູນຊ່ວຍດ້ານແນວພັນ ແລະ ທຶນຮອນເພື່ອທຳການຜະລິດ, ຄອບຄົວຂອງປ້າໄດ້ຫຼຸດພົ້ນອອກຈາກຄວາມທຸກຍາກ. ໂດຍຮັບຮູ້ໄດ້ຜົນປະໂຫຍດຂອງການກໍ່ສ້າງຊົນນະບົດໃໝ່, ປ້າ Nguyen Thi Luyen ພ້ອມກັບປະຊາຊົນໃນຕາແສງຍາມໃດກໍ່ສະໜັບສະໜູນ ແລະ ນຳໜ້າໃນການມອບທີ່ດິນ, ບໍລິຈາກເງິນ ແລະ ປະກອນເຫື່ອແຮງໃຫ້ແກ່ການກໍ່ສ້າງທາງຄົມມະນາຄົມ… ປ້າ Luyen ເວົ້າວ່າ:
”ຄອບຄົວຂ້າພະເຈົ້າຍາມໃດກໍ່ສະໜັບສະໜູນທຸກແຜນນະໂຍບາຍເຊິ່ງອຳນາດການປົກຄອງວາງອອກ… ຂ້າພະເຈົ້າເຫັນວ່າ ວຽກງານໃດທີ່ນຳມາເຊິ່ງຜົນປະໂຫຍດໃຫ້ແກ່ປະຊາຊົນ ແລະ ເຮັດໃຫ້ໂສມໜ້າໝູ່ບ້ານມີການປ່ຽນແປງ, ປະຊາຊົນທຸກຄົນລ້ວນແຕ່ໃຫ້ການສະໜັບສະໜູນ”.
ການກໍ່ສ້າງຊົນນະບົດໃໝ່ຢູ່ຕາແສງ ກວີ່ນມິນ, ແຂວງທ໋າຍບິ່ງ
(ພາບ: google.com.vn)
ເຖິງວ່າໄດ້ຮັບການສະໜັບສະໜູນ ແລະ ເຫັນດີເຫັນພ້ອມຈາກປະຊາຊົນກໍ່ຕາມ, ແຕ່ພາຍຫຼັງ 2 ປີເຄິ່ງແລ້ວ ເລື່ອງຜັນຂະຫຍາຍການກໍ່ສ້າງຮູບແບບຊົນນະບົດໃໝ່ຢູ່ຕາແສງກວີ່ນມິນ (Quynh Minh) ຍັງມີ 10 ມາດຕະຖານຍັງບໍ່ທັນສຳເລັດເທື່ອ, ຍ້ອນປະສົບກັບຄວາມຫຍຸ້ງຍາກ ແລະ ສິ່ງຄົງຄ້າງຫຼາຍຢ່າງ. ລາຍຮັບສະເລ່ຍໃສ່ຫົວຄົນຢູ່ ກວີ່ນມິນ (Quynh Minh) ພຽງແຕ່ບັນລຸລະດັບສະເລ່ຍຂອງເມືອງ, ອັດຕາແຮງງານກະສີກຳຍັງກວມເກືອບ 40%. ພາຍຫຼັງ 4 ເດືອນ ແຫ່ງການຂົນຂວາຍປະຊາຊົນ, ເຖິງວ່າວຽກງານໂອນລວມດິນປູກຝັງ, ປ່ຽນໃໝ່ຜົນລະປູກ, ເຊິ່ງແມ່ນໜ້າທີ່ຈຸດສູມຂອງຂະບວນການກໍ່ສ້າງຊົນນະບົດໃໝ່ຢູ່ຕາແສງ ກວີ່ນມິນ (Quynh Minh) ແຂວງ ທ໋າຍບິ່ງ ໄດ້ສຳເລັດແລ້ວກໍ່ຕາມ, ແຕ່ຍັງບໍທັນສ້າງເປັນເຂດຜະລິດທີ່ມີຂອບຂະໜາດໃຫຍ່ໄດ້. ທ່ານ Pham Van Vi ຄະນະຄຸ້ມຄອງສະຫະກອນໃຫ້ຮູ້ວ່າ:
”ທາງສະຫະກອນພຽງແຕ່ມີຈັກກ່ຽວແລະຕີເຂົ້າປະສົມ 2 ເຄື່ອງ, ຈັກຄາດນາ 2 ເຄື່ອງເທົ່ານັ້ນ, ດັ່ງນັ້ນຍັງຂາດເຄື່ອງຈັກເພື່ອຮັບໃຊ້ຄວາມຕ້ອງການໃຫ້ແກ່ຊາວກະສີກອນ. ເພື່ອຮັບໃຊ້ຢ່າງພຽງພໍໃຫ້ແກ່ປະຊາຊົນ 1.400 ຄອບຄົວ ແມ່ນຕ້ອງມີຈັກກ່ຽວເຂົ້າປະສົມ 7 ເຄື່ອງ ແລະ ຈັກຄາດນາ ແຕ່ 15-16 ເຄື່ອງ. ”
ການກໍ່ສ້າງຊົນນະບົດໃໝ່ຢູ່ຕາແສງ ກວີ່ນມິນ, ແຂວງທ໋າຍບິ່ງ
(ພາບ: google.com.vn)
ຕາມທ່ານ Nguyen VanLam, ຮອງປະທານຄະນະກຳມະການປະຊາຊົນຕາແສງ ກວີ່ນມິນ (Quynh Minh) ແລ້ວ, ຄວາມຫຍຸ້ງຍາກທີ່ສຸດຂອງຕາແສງໃນປະຈຸບັນ ແມ່ນບັນຫາງົບປະມານ, ດັ່ງນັ້ນ, ທາງຕາແສງມີແຜນນະໂຍບາຍປະຕິບັດທິດນຳທີ່ວ່າ, ລັດ ແລະ ປະຊາຊົນພ້ອມກັນເຮັດ, ເສີມຂະຫຍາຍກຳລັງແຮງທົ່ວປວງຊົນ, ອີງໃສ່ປະຊາຊົນເພື່ອຮັບໃຊ້ປະຊາຊົນ
”ບັນດາມາດຕະຖານທີ່ຍັງບໍ່ທັນບັນລຸໄດ້ແມ່ນຍາກທີ່ຈະປະຕິບັດໄດ້, ຕ້ອງມີເງິນລົງທຶນຫຼາຍ, ດັ່ງນັ້ນຫວັງວ່າຈະໄດ້ຮັບຄວາມເອົາໃຈໃສ່ກວ່າອີກຈາກລັດ, ຄຽງຂ້າງນັ້ນແມ່ນລະດົມແຫຼ່ງທຶນຈາກປະຊາຊົນ. ນອກນັ້ນ, ເມື່ອບຸກເບີກ. ພວກເຮົາໄດ້ຖອດຖອນເອົາບົດຮຽນທີ່ວ່າ, ວຽກງານທັງໝົດຕ້ອງປຶກສາຫາລືກັບປະຊາຊົນ, ແລະ ເມື່ອປະຊາຊົນເຫັນດີເຫັນພ້ອມແລ້ວ ວຽກງານທັງໝົດລ້ວນແຕ່ປະສົບຜົນສຳເລັດ”.
ການປ່ຽນໃໝ່ຂອງ ກວີ່ນມິນ (Quynh Minh) ແມ່ນຄວາມພາກພູມໃຈບໍ່ແມ່ນໜ້ອຍສຳຫຼັບປະຊາຊົນຢູ່ທີ່ນີ້, ແຕ່ເພື່ອປະຕິບັດໃຫ້ໄດ້ 19/19 ມາດຕະຖານຂອງຊົນນະບົດໃໝ່ໃນປີ 2013 ແມ່ນຍັງມີວຽກງານຫຼາຍຢ່າງທີ່ຈະຕ້ອງເຮັດ. ໃນຂະບວນວິວັດດັ່ງກ່າວ, ເມື່ອກຳນົດໄດ້ຄວາມຫຍຸ້ງຍາກ, ສິ່ງຄົງຄ້າງ ແມ່ນສັນຍານທີ່ໜ້າພາກພູມໃຈ, ເພາະວ່າບົນພື້ນຖານນັ້ນ, ອຳນາດການປົກຄອງ ແລະ ປະຊາຊົນຈະເປັນເຈົ້າການຊອກຫາບັນດາມາດຕະການເໝາະສົມທີ່ສຸດ ເພື່ອສືບຕໍ່ແກ້ໄຂວຽກງານຢ່າງເປັນເອກະພາບ ແລະ ຄົບຊຸດ.