(vovworld) - ໂດຍແມ່ນໜຶ່ງໃນຈຳນວນ 22 ຕາແສງປະຕິບັດທົດລອງການກໍ່ສ້າງຊົນນະບົດໃໝ່ຂອງແຂວງຊອກຈັງ, ພາຍຫຼັງ 4 ປີແຫ່ງການຜັນຂະຫຍາຍ, ມາຮອດປະຈຸບັນຕາແສງລອງຮຶງ, ເມືອງມີ້ຕູ໋, ໄດ້ກາຍເປັນຕາແສງທຳອິດບັນລຸມາດຖານຊົນນະບົດໃໝ່ຂອງແຂວງ. ເພື່ອບັນລຸໄດ້ຜົນສຳເລັດຄືດັ່ງກ່າວ ແມ່ນຍ້ອນລອງຮຶງໄດ້ເປັນເຈົ້າການ, ມີວິທີເຮັດໄດ້ດີ, ສ້າງຄວາມເຫັນດີເຫັນພ້ອມສູງໃນໝູ່ປະຊາຊົນ.
ຜົນສຳເລັດບົນເສັ້ນທາງກາຍເປັນຕາແສງຊົນນະບົດໃໝ່ຂອງລອງຮຶງ ແມ່ນຕ້ອງເວົ້າເຖິງວຽກງານຫັນປ່ຽນໂຄງປະກອບເສດຖະກິດຕາມທິດຜະລິດເປັນສິນຄ້າ. ເພື່ອປະຕິບັດຄາດໝາຍດັ່ງກ່າວ, ຕາແສງລອງຮຶງ ໄດ້ໃກ້ຊິດຕິດແທດກັບບັນດາມາດຖານກໍ່ສ້າງຊົນນະບົດໃໝ່ເຊັ່ນ: ກໍ່ສ້າງທົ່ງນາຂະໜາດໃຫຍ່, ວາງແຜນຜະລິດຕາມເຂດ, ພ້ອມທັງຮ່ວມສຳພັນກັບວິສາຫະກິດ, ເພີ່ມມູນຄ່າຜະລິດໃນເນື້ອທີ່ດຽວ. ການຫັນປ່ຽນຜົນລະປູກ, ສັດລ້ຽງຢ່າງເໝາະສົມໄດ້ຊ່ວຍຊາວກະສີກອນຍູ້ແຮງການຜະລິດດຳເນີນທຸລະກິດ, ປະກອບສ່ວນຍົກສູງຊີວິດຂອງປະຊາຊົນທ້ອງຖີ່ນ. ທ່ານ ຫງວຽນວັນເລີ້ຍ, ແມ່ນໜຶ່ງໃນບັນດາຜູ້ທີ່ມີຊື່ສຽງໃນການຜະລິດແບ່ງປັນວ່າ: 400 ກວ້າລ້ານດົ່ງແມ່ນກຳໄລເຊິ່ງຄອບຄົວທ່ານຫາໄດ້ໃນແຕ່ລະປີຈາກການປູກຕົ້ນໝາກກ້ຽງນ້ອຍ, ໝາກສົ້ມໂອ…
“ກ່ອນນີ້ຂ້າພະເຈົ້າປູກຕົ້ນອ້ອຍ, ແຕ່ຜົນກຳໄລບໍ່ສູງ, ເມື່ອເຫັນວ່າທີ່ດິນຢູ່ເຕິນແທ່ງ ເໝາະສົມກັບຕົ້ນໃມ້ກິນໝາກ, ຂ້າພະເຈົ້າໄດ້ຫັນມາປູກຕົ້ນໄມ້ກິນໝາກ ແລະ ບັນລຸໄດ້ປະສິດທິຜົນສູງທີ່ສຸດ, ອັນໄດ້ສ້າງຊີວິດອິ່ມໜຳສຳລານໃຫ້ແກ່ຄອບຄົວ “.
ມາຮອດປະຈຸບັນ, ລອງຮຶງ ໄດ້ຫັນປ່ຽນຜົນລະປູກ ແລະ ສັດລ້ຽງໃນເນື້ອທີ່ກວ່າ 500 ເຮັກຕາ, ອັນໄດ້ສ້າງລາຍຮັບນັບຮ້ອຍລ້ານດົ່ງຕໍ່ປີ. ລອງຮຶງ ຍັງກໍ່ສ້າງບັນດາເຂດຜະລິດເຂົ້າ, ອ້ອຍພິເສດ, ຮັບປະກັນລະບົບຊົນລະປະທານເພື່ອຫົດນຳ້. ນອກນັ້ນ, ການນຳໃຊ້ວິທະຍາສາດ, ເຕັກນິກ, ເພີ່ມສະມັດຕະພາບ, ຜົນກຳໄລ ຫຼືແກ້ໄຂຕະຫຼາດສົ້ນອອກໃຫ້ແກ່ຜະລິດຕະພັນກໍ່ໄດ້ຮັບຄວາມເອົາໃຈໃສ່ເປັນພິເສດ, ຜ່ານການສ້າງສະຫະກອນ, ສະໂມສອນ ຫຼືໜ່ວຍສະຫະກອນຜະລິດເພື່ອຜະລິດ ແລະ ຈຳໜ່າຍຜະລິດຕະພັນ.
ຊີວິດຂອງປະຊາຊົນໄດ້ຮັບການຍົກສູງ, ອັນໄດ້ສ້າງຄວາມເຫັນດີເຫັນພ້ອມໃນທົ່ວສັງຄົມ ເພື່ອພ້ອມກັນຮ່ວມແຮງຮ່ວມໃຈກໍ່ສ້າງຊົນນະບົດໃໝ່. ທ່ານ ເລວັນຈັ໋ງ, ແມ່ນຄອບຄົວນຳໜ້າໃນການບໍລິຈາກທີ່ດິນເພື່ອກໍ່ສ້າງບັນດາກິດຈະກຳຊົນນະບົດໃໝ່ຢູ່ທ້ອງຖີ່ນ, ແບ່ງປັນວ່າ:
“ຜ່ານຂະບວນການຂົນຂວາຍກໍ່ສ້າງຊົນນະບົດໃໝ່, ບັນດາຄອບຄົວຊາວກະສີກອນພວກຂ້າພະເຈົ້າໄດ້ບໍລິຈາກທີ່ດິນເພື່ອກໍ່ສ້າງພື້ນຖານໂຄງລ່າງຄື: ທາງຄົມມະນາຄົມ, ໄຟຟ້າ, ໂຮງຮຽນ ແລະ ສຸກສາລາ. ນີ້ທັງແມ່ນຜົນປະໂຫຍດຂອງຕົນ, ທັງແມ່ນຜົນປະໂຫຍດຂອງປະຊາຊົນທ້ອງຖີ່ນ“.
ພ້ອມກັບເລື່ອງປະຕິບັດສຳເລັດ 19 ມາດຖານກ່ຽວກັບການກໍ່ສ້າງຊົນນະບົດໃໝ່, ຊີວິດຂອງປະຊາຊົນຕາແສງລອງຮຶງ ກໍ່ໄດ້ຮັບການພັດທະນາຢ່າງບໍ່ຢຸດຢັ້ງ. ໃນປີນີ້, ລາຍຮັບສະເລ່ຍໃສ່ຫົວຄົນໃນຕາແສງບັນລຸ 37 ລ້ານດົ່ງ/ຄົນ/ປີ; ອັດຕາຄອບຄົວທຸກຍາກຫຼຸດລົງເຫຼືອພຽງເກືອບ 7%, ຈຳນວນຄອບຄົວຮັ່ງມີກໍ່ນັບມື້ນັບເພີ່ມຂຶ້ນ. 10 ບ້ານໃນຕາແສງລ້ວນແຕ່ແມ່ນບ້ານວັດທະນະທຳ. ທາງຄົມມະນາຄົມໃນບ້ານກໍ່ກວ້າງຂວາງ, ລະບົບຊົນລະປະທານບໍລິບຸນ. ໃນເກືອບ 4 ປີ ແຫ່ງການກໍ່ສ້າງຊົນນະບົດໃໝ່, ຕາແສງສາມາດລະດົມເງິນລົງທຶນກໍ່ສ້າງພື້ນຖານໂຄງລ່າງໄດ້ 216 ຕື້ດົ່ງ, ໃນນັ້ນກວ່າ 50 ຕື້ດົ່ງແມ່ນໂດຍປະຊາຊົນບໍລິຈາກ. ທ່ານ ຫງວຽນຮື້ວດຶກ, ຮອງເລຂາຄະນະພັກຕາແສງລອງຮຶງ, ໃຫ້ຮູ້ວ່າ:
“ກ່ຽວກັບ ການກໍ່ສ້າງຊົນນະບົດໃໝ່ ແມ່ນຕ້ອງເຮັດແນວໃດເພື່ອປັບປຸງຊີວິດ ທັງດ້ານວັດຖຸ, ຈິດໃຈ ຂອງປະຊາຊົນ ໃຫ້ນັບມື້ນັບດີຂຶ້ນ. ສິ່ງດັ່ງກ່າວແມ່ນກ່ຽວຂ້ອງເຖິງການພັດທະນາເສດຖະກິດ, ຄວາມຊິນເຄີຍໃນການຜະລິດ ແລະ ຄວາມຮັບຮູ້ຂອງປະຊາຊົນ. ແຕ່ຜ່ານຜົນໄດ້ຮັບສະແດງໃຫ້ເຫັນວ່າປະຊາຊົນໄດ້ມີຄວາມເຫັນດີເຫັນພ້ອມຕໍ່ໂຄງການກໍ່ສ້າງຊົນນະບົດໃໝ່“.
ປະຈຸບັນ, ລອງຮຶງ ໄດ້ມີການປ່ຽນແປງຫຼາຍຢ່າງ ດ້ວຍທາງປູຢາງ, ທາງເບຕົງທີ່ຮາບພຽງ, ບັນດາເຮືອນທີ່ໄດ້ຮັບການກໍ່ສ້າງໃໝ່, ບັນດາກິດຈະກຳສະຫວັດດີການ, ຊີວິດສັງຄົມ ແລະ ຊີວິດຂອງປະຊາຊົນນັບມື້ນັບໄດ້ຮັບການພັດທະນາ. ເຖິງຢ່າງໃດກໍ່ຕາມ, ການນຳ ແລະ ປະຊາຊົນຕາແສງລອງຮຶງ ລ້ວນແຕ່ກຳນົດວ່າ: ນີ້ແມ່ນຜົນສຳເລັດໃນເບື້ອງຕົ້ນ, ໄລຍະຈະມາເຖິງ, ລອງຮຶງຈະສືບຕໍ່ສູ້ຊົນ ເພື່ອກໍ່ສ້າງຕາແສງໃຫ້ນັບມື້ນັບພັດທະນາ, ບໍ່ມີຄອບຄົວທຸກຍາກ, ອຶດຫີວ, ລາຍຮັບສະເລ່ຍໃສ່ຫົວຄົນໃນແຕ່ລະປີນັບມື້ນັບສູງ ແລະ ກາຍເປັນແບບຢ່າງເພື່ອໃຫ້ທ້ອງຖີ່ນຕ່າງໆຮຳ່ຮຽນຕາມ.