ສຳນັກງານຄະນະກຳມະການປະຊາຊົນ ຊວນເທີ໋ຍເທື້ອງ
(ພາບ: http:tapchidoanhnghiep.unescovtt.com)
(vovworld) - ດ້ວຍທິດນຳ “ລະດົມກຳລັງພາຍໃນຢູ່ກັບທີ່, ລະດົມກຳລັງແຮງຂອງປະຊາຊົນ ເພື່ອຮັບໃຊ້ປະຊາຊົນ”, ພາຍຫຼັງ 3 ປີ ແຫ່ງການປະຕິບັດທົດລອງຮູບແບບກໍ່ສ້າງຊົນນະບົດໃໝ່ຢູ່ 6 ຕາແສງຄື: ເຕິນເຍຶດ (ເມືອງບິ່ງແຈ໋ງ), ທ້າຍມີ້, ເຕິນທົງໂຫ້ຍ (ເມືອງກູຈີ), ເຍິນດຶກ (ເມືອງຍ່າແບ່), ຫຼີເຍິນ (ເມືອງເກິ່ນເຢີ່), ຊວນເທີ໋ຍເທື້ອງ (ເມືອງຮອກມົນ) ນະຄອນໂຮ່ຈີມິນ. ບັນດາຄາດໝາຍກ່ຽວກັບການກໍ່ສ້າງຊົນນະບົດໃໝ່ຕາມມາດຖານຂອງຄະນະຊີ້ນຳສູນກາງກ່ຽວກັບການກໍ່ສ້າງຊົນນະບົດໃໝ່ໄດ້ສຳເລັດໂດຍພື້ນຖານແລ້ວ. ປະສິດທິຜົນຕົວຈິງດັ່ງກ່າວໄດ້ເຮັດໃຫ້ປະຊາຊົນມີຄວາມເຊື່ອໝັ້ນ ແລະ ເຫັນດີເຫັນພ້ອມສູງກັບແຜນນະໂຍບາຍດັ່ງກ່າວ.
ທ່ານຟ້າມວັນກ໋າວ, ອາຍຸ 72 ປີ, ຢູ່ບ້ານ 1, ຊວນເທີ໋ຍເທື້ອງ, ແມ່ນຜູ້ເຫັນປະຈັກຕາການປ່ຽນໃໝ່ຢູ່ເຂດນີ້ຜ່ານແຕ່ລະໄລຍະ. ເມື່ອຕາແສງປະຕິບັດການກໍ່ສ້າງຊົນນະບົດໃໝ່, ທ່ານແມ່ນໜຶ່ງໃນບັນດາຜູ້ທຳອິດໄດ້ສະຫງວນທີ່ດິນ 200 ຕາລາງແມັດ ເພື່ອປະກອບສ່ວນເປີດເສັ້ນທາງໃນໝູ່ບ້ານ, ຕາແສງໃຫ້ໃຫຍ່ໂຕ ແລະ ສວຍງາມກວ່າ. ບໍ່ພຽງແຕ່ຢູຊວນເທີ໋ຍເທື້ອງ ເທົ່ານັ້ນ, ຫາກຢູ່ 6 ຕາແສງທີ່ປະຕິບັດທົດລອງການກໍ່ສ້າງຊົນນະບົດໃໝ່ຂອງນະຄອນ ໄດ້ມີກວ່າ 7000 ຄອບຄົວປກອບທີ່ດິນກວ່າ 725 ຕາລາງແມັດ, ດ້ວຍມູນຄ່າກວ່າ 615 ຕຶ້ດົ່ງ ເພື່ອກໍ່ສ້າງບັນດາກິດຈະກຳວັດທະນະທຳ - ສັງຄົມ. ທ່ານຟ້າມວັນກ໋າວ, ໃຫ້ຮູ້ວ່າ:
“ໂຄງການກໍ່ສ້າງຊົນນະບົດໃໝ່ນີ້ ໂດຍລັດ ແລະ ປະຊາຊົນພ້ອມກັນເຮັດ. ສຳລັບຄອບຄົວຂ້າພະເຈົ້າ, ທັງສອງເສັ້ນທາງລ້ວນແຕ່ໄປຜ່ານເນື້ອທີ່ດິນຂອງຄອບຄົວ, ດັ່ງນັ້ນຂ້າພະເຈົ້າຈຶ່ງສະຫງວນທີ່ດິນຂອງຕົນເພື່ອປະກອບສ່ວນກໍ່ສ້າງເສັ້ນທາງໃຫ້ໃຫຍ່ໂຕ ແລະ ສວຍງາມກວ່າ. ປະຈຸບັນ ໂສມໜ້າຂອງຕາແສງໄດ້ມີການປ່ຽນແປງຫຼາຍຢ່າງແລ້ວ, ມີໄຟຟ້າ, ມີລະບົບຊົນລະປະທານ, ມີໂຮງຮຽນ, ປະຊາຊົນໃນໝູ່ບ້ານມີຄວາມຮັກແພງຊ່ວຍເຫຼືອເຊິງກັນ ແລະກັນ”.
.png)
ພາຍຫຼັງ 3 ປີ ແຫ່ງການກໍ່ສ້າງຊົນນະບົດໃໝ່, 6 ຕາແສງຂອງນະຄອນໂຮ່ຈີມິນ ສາມາດກໍ່ສ້າງໄດ້ເກືອບ 1000 ກິດຈະກຳ, ໃນນັ້ນມີປະມານ 240 ກິດຈະກຳຄົມມະນາຄົມ, 100 ກວ່າກິດຈະກຳຊົນລະປະທານ, ລົບລ້າງເຮືອນປະຖົມປະຖານໄດ້ 430 ຫຼັງ ດ້ວຍຍອດມູນຄ່າລົງທຶນເກືອບ 2000 ຕື້ດົ່ງ, ໃນນັ້ນ 34% ແມ່ນທຶນປະກອບຂອງປະຊາຊົນ. ມາຮອດປະຈຸບັນ, ຕາແສງ ເຕິນທົງໂຫ້ຍ ແລະ ທ໋າຍມີ້ ບັນລຸໄດ້ 19/19 ມາດຖານແລ້ວ, ສ່ວນ 4 ຕາແສງຍັງເຫຼືອບັນລຸໄດ້ 17/19 ມາດຖານ. ບັນດາມາດຖານສົ່ງເສີມການຫັນປ່ຽນໂຄງປະກອບກະສີກຳ ໄດ້ປະກອບສ່ວນເພີ່ມມູນຄ່າການຜະລິດໃນເນື້ອທີ່ດຽວກັນຂຶ້ນ 172%/ປີ ເມື່ອທຽບໃສ່ໄລຍະກ່ອນປະຕິບັດໂຄງການ, ເພີ່ມລາຍຮັບໃຫ້ແກ່ຊາວກະສີກອນຂຶ້ນແຕ່ 4 – 5 ລ້ານດົ່ງ/ເດືອນ.
ດ້ວຍມາດຖານ, ກໍ່ສ້າງຊົນນະບົດໃໝ່ ບໍ່ພຽງແຕ່ແມ່ນກໍ່ສ້າງບັນດາກິດຈະກຳພື້ນຖານໂຄງລ່າງເທົ່ານັ້ນ, ຫາກສຳຄັນກວ່າແມ່ນຕ້ອງຍົກສູງຊີວິດທາງດ້ານວັດທະນະທຳໃຫ້ປະຊາຊົນ ແລະ ສ້າງສະພາບແວດລ້ອມໃຫ້ສະອາດສວຍງາມກວ່າ. ຍ້ອນເຫດນັ້ນ, ຍາມໃດບັນດາຕາແສງກໍ່ເອົາໃຈໃສ່ເຖິງເລື່ອງຍູ້ແຮງການຜະລິດ, ຫັນປ່ຽນໂຄງປະກອບເສດຖະກິດດ້ວຍບັນດາມາດຕະການອັນລະອຽດ. ທ່ານນາງ ຫງວຽນທິຮ່ວາງແອງ, ປະທານຄະນະກຳມະການປະຊາຊົນຕາແສງ, ຫົວໜ້າຄະນະຄຸ້ມຄອງການກໍ່ສ້າງຊົນນະບົດໃໝ່ຕາແສງເຍິນດຶກ, ເມືອງຍ່າແບ່, ຖືວ່າ:
“ເພື່ອປະຕິບັດການກໍ່ສ້າງຊົນນະບົດໃໝ່ແບບຍືນຍົງ, ຕາແສງເຍິນດຶກ ຂົນຂວາຍປະຊາຊົນຮຽນຕົວໜັງສື, ຮຽນວິຊາຊີບ ແລະ ແກ້ໄຂວຽກເຮັດງານທຳ. ຖ້າຫາກປະຕິບັດການຫັນປ່ຽນ, ແຕ່ຜູ້ອອກແຮງງານບໍ່ໄດ້ຮັບການບຳລຸງສ້າງດ້ານວິຊາຊີບ ແລະ ມີວຽກເຮັດງານທຳ, ເຂົາເຈົ້າພຽງແຕ່ເຮັດວຽກງານທຳມະດາໄດ້ເທົ່ານັ້ນ ແລະ ລາຍຮັບກໍ່ຕ່ຳ, ຄືແນວນັ້ນແມ່ນບໍ່ທັນບັນລຸໄດ້ຈຸດໝາຍທີ່ໄດ້ວາງອອກ. ພວກຂ້າພະເຈົ້າໄດ້ຂົນຂວາຍທຸກແຫຼ່ງກຳລັງໃນສັງຄົມໜູນຊ່ວຍສິນເຊື່ອໃຫ້ນັກຮຽນທີ່ທຸກຍາກ ແລະ ປະຊາຊົນ ເພື່ອມີທຶນທຳການຜະລິດ”.
(ຕະຫຼາດຊວນເທີ໋ຍເທື້ອງ)
ຜ່ານ 3 ປີ ແຫ່ງການປະຕິການການກໍ່ສ້າງຊົນນະບົດໃໝ່, ສາມາດເຫັນໄດ້ວ່າ, ແຜນນະໂຍບາຍກໍ່ສ້າງຊົນນະບົດໃໝ່ ໄດ້ເປັນການປຸກລຸກ ແລະ ເສີມຂະຫຍາຍກຳລັງພາຍໃນຂອງປະຊາຊົນຢູ່ຕາແສງຕ່າງໆ. ນີ້ແມ່ນພື້ນຖານທີ່ສຳຄັນເພື່ອໃຫ້ນະຄອນໂຮ່ຈີມິນ ສືບຕໍ່ປະຕິບັດ, ຂະຫຍາຍຮູບແບບຊົນນະບົດໃໝ່ອອກສູ່ 50 ຕາແສງທີ່ຍັງເຫຼືອ ເພື່ອຮອດປີ 2015, ທັງ 56/56 ຕາແສງຂອງນະຄອນຈະບັນລຸໄດ້ 19 ມາດຖານຊົນນະບົດໃໝ່. ເພື່ອບັນລຸໄດ້ຈຸດໝາຍດັ່ງກ່າວ, ທາງນະຄອນສຸມໃສ່ພັດທະນາຊົນນະບົດຕົວເມືອງຢ່າງມີປະສິດທິຜົນ ແລະ ໝັ້ນຄົງ ໂດຍຜ່ານການປະຕິບັດສຳເລັດກົນໄກ, ນະໂຍບາຍດຶງດູດການລົງທຶນເຂົ້າຂົງເຂດຊົນນະບົດ, ໜູນຊ່ວຍຊາວກະສີກອນຮ່ວມສຳພັນທຳການຜະລິດ ແລະ ຈຳໜ່າຍຜະລິດຕະພັນກະເສດ. ພາຍຫຼັງ 3 ປີ ແຫ່ງການປະຕິບັດການກໍ່ສ້າງຊົນນະບົດໃໝ່ຢູ່ນະຄອນໂຮ່ຈີມິນ, ໂສມໜ້າຊົນນະບົດນັບມື້ນັບເຕີບໂຕ, ອັນໄດ້ສະແດງໃຫ້ເຫັນວ່າ ນີ້ແມ່ນແຜນນະໂຍບາຍທີ່ຖືກຕ້ອງ, ນຳມາເຊິ່ງຊີວິດທີດີງານກວ່າໃຫ້ແກ່ຊາວກະສີກອນ.