(ພາບປະກອບ)
ໃນເກືອບ 2 ປີຜ່ານມາ, ກຸ່ມບໍລິສັດໂທລະຄົມກອງທັບ Viettel ໄດ້ສະໜອງມາດຕະການ Agri.one ໃຫ້ຊາວກະສິກອນ, ພໍ່ຄ້າຊາວຂາຍເຂດທົ່ງພຽງແມ່ນຳ້ຂອງ. ນີ້ແມ່ນລະບົບຂໍ້ມູນຂ່າວເອເລກໂຕນິກ ເພື່ອແນໃສ່ໃຫ້ຄຳປຶກສາແກ່ຊາວກະສິກອນກ່ຽວກັບຂໍ້ມູນຂ່າວສັງລວມເຊັ່ນ: ການກູ້ຢືມທຶນ, ການເລືອກເຟັ້ນແນວພັນ, ການແນະນຳດ້ານເຕັກນິກລ້ຽງ, ປູກ, ຂ່າວກ່ຽວກັບດິນຟ້າອາກາດ, ບົດຮຽນໃນການຄວບຄູມພະຍາດໃຫ້ສັດລ້ຽງ ແລະ ໄມ້ປູກ… ປະຈຸບັນ, ໄດ້ມີລູກຄ້າ 1,2 ລ້ານຄົນນຳໃຊ້ Agri.one, ໃນນັ້ນສ່ວນຫຼາຍແມ່ນບັນດາການບໍລິການກ່ຽວກັບຂໍ້ມູນຂ່າວສຳລັບຕົ້ນເຂົ້າ, ກຸ້ງ, ປາ ແລະ ກາເຟ. ທ່ານບູ່ຍກວາງຮູຍ, ຜູ້ອຳນວຍການສູນພັດທະນາການບໍລິການໃໝ່, ພາກສ່ວນໄອທີ ແລະ ໂທລະຄົມໃຫ້ຮູ້ວ່າ, ໃນຕໍ່ໜ້າ Viettel ຈະເປີດກວ້າງການບໍລິການນີ້ອອກສູ່ 5 ແຂວງໃນເຂດ ໄຕງວຽນ, 6 ແຂວງທິດຕາເວັນອອກພາກໃຕ້ ແລະ ໃນອະນາຄົດຈະສະໜອງການບໍລິການໃຫ້ທົ່ວປະເທດ.
“ຖ້ານຳໃຊ້ໄອທີໃນຂົງເຂດກະສິກຳ ຈະຊ່ວຍເພີ່ມຈີດີພີຫຼາຍພໍສົມຄວນ. ແຕ່ຊາວກະສິກອນຢູ່ເຂດຊົນນະບົດ, ພິເສດແມ່ນຢູ່ເຂດຫ່າງໄກສອກຫຼີກ, ພັດບໍ່ຮູ້ຈັກເຖິງໄອທີເທື່ອ. ດັ່ງນັ້ນຂ້າພະເຈົ້າຄິດວ່າຄວນນຳເອົາໄອທີເຖິງຊາວກະສິກອນເພື່ອໃຫ້ເຂົາເຈົ້າທັງພັດທະນາເສດຖະກິດ, ສັງຄົມ, ທັງຊ່ວຍສ້າງຄວາມຮັ່ງມີໃຫ້ແກ່ຊາວກະສິກອນ“.
ຢູ່ຫວຽດນາມ, ກຸ່ມບໍລິສັດນຳ້ນົມ TH ໄດ້ລົງທຶນປະກອບລະບົບຄຸ້ມຄອງທີ່ມີຄຸນນະພາບສູງ ແລະ ຂັ້ນຕອນການຜະລິດຄົບວົງຈອນ, ຈາກການປູກຫຍ້າ, ປຸດສ້າງຄອກ, ຟາມ, ຕະຫຼອດຮອດການແຈກຢາຍຜະລິດຕະພັນເຖິງຜູ້ຊົມໃຊ້. ດັ່ງນັ້ນລະບົບຄອກຟ້າມ TH ຖືກຈັດເຂົ້າຄອມພິວເຕີ 100%. ຝູງງົວໄດ້ຮັບການເບິ່ງແຍງສຸຂະພາບດ້ວຍລະບົບຊີບທັນສະໄໝທີ່ຕິດຢູ່ຕີນ…
ບໍລິສັດຫຸ້ນສ່ວນໂທລະຄົມ FPT ໄດ້ຮ່ວມມືກັບກຸ່ມບໍລິສັດ Fujitsu ຂອງຍີ່ປຸ່ນ ເພື່ອກໍ່ສ້າງບັນດາເຂດກະສິກຳທີ່ເປັນແບບຢ່າງໃນການນຳໃຊ້ມາດຕະການຄຸ້ມຄອງກະສິກຳ Akisai ຢູ່ ຢາເລິມ - ຮ່າໂນ້ຍ ແລະ ເຂດອຸດສາຫະກຳສູງນະຄອນ ໂຮ່ຈິມີນ ໃນ 2 ປີ 2015-2016. ຕາມນັ້ນແລ້ວ, ບັນດາມາດຕະການ ໄອທີ ຈະໄດ້ຮັບການນຳໃຊ້ ເພື່ອແນໃສ່ເຮັດໃຫ້ວິວັດການປູກຕົ້ນໄມ້ແຕ່ລະແນວພັນ, ສະຖານທີ່ປູກຝັງ…ດີທີ່ສຸດ, ຊ່ວຍຮັກສາສະມັດຕະພາບເປັນປົກກະຕິ ແລະ ຍົກສູງຄຸນນະພາບຜະລິດຕະພັນອີກ. ຊາວກະສິກອນອັບເດັດບັນດາຂໍ້ມູນເພື່ອວາງແຜນບົວລະບັດຕົ້ນໄມ້ໃຫ້ເໝາະສົມກັບເງື່ອນໄຂງ້ວນດິນ. ທ່ານ ເຈືອງຢາບິ່ງ, ປະທານສະພາຄຸ້ມຄອງບໍລິສັດຫຸ້ນສ່ວນໂທລະຄົມ FPT, ໃຫ້ຮູ້ວ່າ:
“ກະສິກຳແບບສະຫຼາດແມ່ນບາດກ້າວບຸກທະລຸ, ເພື່ອເພີ່ມສະມັດຕະພາບແຮງງານໃຫ້ສູງຂຶ້ນທົບຫຼາຍເທົ່າ, ເຮັດໃຫ້ການພັດທະນາກະສິກຳຕິດພັນກັບບັນດາຂະແໜງເສດຖະກິດ, ສັງຄົມອື່ນໆ, ສ້າງມູນຄ່າເພີ່ມ ແລະ ອົງການໃໝ່ໃຫ້ກະສິກຳ. ສິ່ງດັ່ງກ່າວຊ່ວຍຍົກສູງທີ່ຕັ້ງຂອງຊາດ ເພື່ອໃຫ້ຫວຽດນາມ ສາມາດກາຍເປັນສາງອາຫານແບບສະຫຼາດ, ມີແຫຼ່ງຊັບພະຍາກອນມະນຸດ ແລະ ໂຄງລ່າງສະຫຼາດ, ແມ່ນສະຖານທີ່ທ່ອງທ່ຽວ ແລະ ແມ່ນທາງຄົມມະນາຄົມຂອງໂລກ“.
ຫວຽດນາມ ແມ່ນປະເທດກະສິກຳ ທີ່ມີພື້ນຖານໄອທີ ພັດທະນາ, ອັດຕາສ່ວນຊາວກະສິກອນນຳໃຊ້ໂທລະສັບມືຖື, ເຊື່ອມຕໍ່ອິນເຕີແນດສາຍກາບແມ່ນສູງພໍສົມຄວນ. ແຕ່ເລື່ອງນຳໃຊ້ໄອທີ ຂອງຊາວກະສິກອນຢູ່ເຂດຊົນນະບົດຍັງຈຳກັດຢູ່, ມີວິສາຫະກິດຫຼາຍແຫ່ງບໍ່ທັນເອົາໃຈໃສ່ເຖິງການລົງທຶນນຳໃຊ້ໄອທີ ໃນຂົງເຂດກະສິກຳ. ດັ່ງນັ້ນລັດຖະບານໄດ້ ແລະ ພວມກຳນົດທິດພັດທະນາມະຫາພາກ, ສົ່ງເສີມທົ່ວສັງຄົມດຶງດູດບັນດາວິສາຫະກິດເຂົ້າຮ່ວມ. ເລື່ອງນຳໃຊ້ໄອທີ ເຂົ້າໃນຂົງເຂດກະສິກຳ ບໍ່ພຽງແຕ່ສ້າງເງື່ອນໄຂໃຫ້ຂະແໜງໄອທີ ສືບຕໍ່ພັດທະນາເທົ່ານັ້ນ, ຫາກຍັງສ້າງກາລະໂອກາດຢ່າງໃຫຍ່ຫຼວງ ເພື່ອພັດທະນາພື້ນຖານກະສິກຳສະຫຼາດຢູ່ຫວຽດນາມ ອີກດ້ວຍ.