(vovworld) - ໂດຍຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່, ແຂວງກວາງນາມໄດ້ລົງທຶນເກືອບ 13.000 ຕື້ດົ່ງເພື່ອກໍ່ສ້າງພື້ນຖານໂຄງລ່າງ. ໃນການກໍ່ສ້າງຊົນນະບົດໃໝ່, ພ້ອມກັບການໜູນຊ່ວຍຂອງລັດ; ນັບພັນຄອບຄົວຊາວກະສີກອນໄດ້ບໍລິຈາກທີ່ດິນ, ປະກອບເຫື່ອແຮງເພື່ອກໍ່ສ້າງທາງຄົມມະນາຄົມລະຫວ່າງຕາແສງ, ບ້ານ…ຍ້ອນເຫດນັ້ນ, ໂສມໜ້າຊົນນະບົດຢູ່ແຂວງກວາງນາມຈຶ່ງນັບມື້ນັບພັດທະນາ.
ການກໍ່ສ້າງທາງເບຕົງໃນລາຍການກໍ່ສ້າງຊົນນະບົດໃໝ່
(ພາບປະກອບ) |
ຕາແສງດ້ຽນຈູງ, ເມືອງດ້ຽນບ່ານໄດ້ຮັບການເລືອກເຟັ້ນເປັນຕາແສງແບບຢ່າງໃນຂະບວນການກໍ່ສ້າງຊົນນະບົດໃໝ່. ໃນເບື້ອງຕົ້ນເເຫ່ງການຜັນຂະຫຍາຍຂະບວນການ, ຕາແສງດ້ຽນຈູງ ໄດ້ສຸມໃສ່ລະດົມແຫຼ່ງທຶນກໍ່ສ້າງຊົນນະບົດໃໝ່. ຕາມນັ້ນແລ້ວ, ຕາແສງໄດ້ຜັນຂະຫຍາຍການກໍ່ສ້າງທາງເບຕົງຢູ່ຕາມເຂດທົ່ງນາ, ກໍ່ສ້າງຄອງເໝືອງ, ຮັບປະກັນບັນດາມາດຖານກ່ຽວກັບທາງຄົມມະນາຄົມ, ຊົນລະປະທານ. ໃນການພັດທະນາກະສີກຳ, ຕາແສງດ້ຽນຈູງໄດ້ຮຽກຮ້ອງສະຫະກອນຕ່າງໆຮ່ວມສຳພັນກັບບັນດາວິສາຫະກິດເກັບຊື້, ຜະລິດປຸງແຕ່ງຜະລິດຕະພັນກະເສດ, ນຳມາເຊິ່ງປະສິດທິຜົນທາງດ້ານເສດຖະກິດ, ຮັບປະກັນຊີວິດການເປັນຢູ່ໃຫ້ແກ່ປະຊາຊົນ. ປະຈຸບັນ, ລາຍຮັບສະເລ່ຍໃສ່ຫົວຄົນຢູ່ຕາແສງແມ່ນ 22-24 ລ້ານດົ່ງ/ຄົນ/ປີ, ອັດຕາຄອບຄົວທຸກຍາກຫຼຸດລົງເຫຼືອພຽງ 3%. ຕາແສງດ້ຽນຈູງແມ່ນໜຶ່ງໃນບັນດາຕາແສງທຳອິດຂອງແຂວງກວາງນາມ ປະຕິບັດສຳເລັດ 19 ມາດຖານກໍ່ສ້າງຊົນນະບົດໃໝ່. ທ່ານ ດ່ວານເລື້ອງ, ຊາວຕາແສງຢູຍຈູງ, ເມືອງດ້ຽນບ່ານ, ຖືວ່າ:
“ການກໍ່ສ້າງຊົນນະບົດໃໝ່ມີຄວາມສະດວກຫຼາຍຢ່າງ. ກ່ອນນີ້ແມ່ນເຮັດນາແບບກະແຈກກະຈາຍ ແຕ່ປະຈຸບັນໄດ້ທ້ອນໂຮມໃນເນື້ອທີ່ໃຫຍ່ ມີຄວາມສະດວກໃນການເກັບກ່ຽວ. ໃນການກໍ່ສ້າງຊົນນະບົດໃໝ່, ຄອບຄົວຂ້າພະເຈົ້າໄດ້ປະກອບທີ່ດິນຫຼາຍພໍສົມຄວນເພື່ອການພັດທະນາລວມຂອງສັງຄົມ“.
ພ້ອມກັບປະຊາຊົນເມືອງດ້ຽນບ່ານ, ປະຊາຊົນບັນດາຕາແສງຢູຍຮ່ວາ, ຢູຍຈິງ, ຢູຍເຊີນ, ຢູຍເຟືອກ, ເມືອງຢູຍຊວຽນ. ກໍ່ໄດ້ຮ່ວມແຮງຮ່ວມໃຈກໍ່ສ້າງຊົນນະບົດໃໝ່. ມາຮອດປະຈຸບັນ, ຕາແສງເຫຼົ່ານັ້ນໄດ້ປະຕິບັດສຳເລັດ 17/19 ມາດຖານ. ທ່ານ ຫງວຽນວັນຈ໋ຽນ, ປະທານຄະນະກຳມະການປະຊາຊົນຕາແສງຢູຍຈິງ, ເມືອງຢູຍຊວຽນ, ແຂວງກວາງນາມ, ໃຫ້ຮູ້ວ່າ, ຍ້ອນໄດ້ຮັບຄວາມເຫັນດີເຫັນພ້ອມຈາກປະຊາຊົນ, ດັ່ງນັ້ນຕາແສງຢູຍຈິງ ຈຶ່ງບັນລຸໄດ້ຜົນງານຄືດັ່ງກ່າວ, ສ່ວນສອງມາດຖານທີ່ຍັງບໍ່ທັນສຳເລັດແມ່ນຊົນລະປະທານ ແລະ ຕະຫຼາດນັ້ນ, ທາງຕາແສງຈະພະຍາຍາມເພື່ອປະຕິບັດໃຫ້ສຳເລັດໃນທ້າຍປີນີ້:
“ດ້ວຍຄວາມມານະພະຍາຍາມຂອງທ້ອງຖີ່ນ, ຕາແສງຢູຍຈິງໃກ້ຈະບັນລຸໄດ້ທຸກມາດຖານກ່ຽວກັບການກໍ່ສ້າງຊົນນະບົດໃໝ່. ເພື່ອບັນລຸໄດ້ບັນດາມາດຖານທີ່ຍັງເຫຼືອ ແມ່ນຈຳເປັນຕ້ອງມີການລົງທຶນ, ລະດົມກຳລັງແຮງຂອງປະຊາຊົນ, ລັດມີແຕ່ຊ່ວຍເຫຼືອສ່ວນໜຶ່ງໃນການກໍ່ສ້າງລະບົບໄຟຟ້າເຍືອງທາງເທົ່ານັ້ນ. ປະຈຸບັນ, ບັນດາສາຍທາງຈາກຕາແສງໄປຍັງໝູ່ບ້ານ ລ້ວນແຕ່ມີໄຟຟ້າເຍືອງທາງ ແລະ ສະອາດຄືຢູ່ຖະໜົນສາຍໃຫຍ່ .“
ຜົນສຳເລັດໃນການກໍ່ສ້າງຊົນນະບົດໃໝ່ຢູ່ເມືອງຢູຍຊວຽນ ແມ່ນຕ້ອງເວົ້າເຖິງຮູບແບບທົ່ງນາຂະໜາດໃຫຍ່. ນັບແຕ່ມີແຜນນະໂຍບາຍຂອງລັດ, ເມືອງຢູຍຊວຽນ ໄດ້ປະຕິບັດວຽກງານສ້າງທົ່ງນາຂະໜາດໃຫຍ່, ຫັນປ່ຽນຜົນລະປູກ, ຕິດພັນກັບການລົງທຶນກໍ່ສ້າງພື້ນຖານໂຄງລ່າງ, ກໍ່ສ້າງທາງ ໃນເຂດທົ່ງນາ ແລະ ກໍ່ສ້າງຄອງເໝືອງ; ນຳໃຊ້ກົນຈັກກໍ່ຄືຄວາມກ້າວໜ້າທາງດ້ານວິທະຍາສາດ - ເຕັກນິກ ໃນການຜະລິດຢູ່ເຂດທົ່ງນາຂະໜາດໃຫຍ່. ຍ້ອນຜະລິດເຂົ້າຕາມຮູບແບບທົ່ງນາຂະໜາດໃຫຍ່, ຊາວກະສີກອນເມືອງຢູຍຊວຽນ ຈຶ່ງປະຢັດໄດ້ຄ່າແນວພັນ, ຄ່າເຮັດດິນ, ຫົດນຳ້… ປະຈຸບັນ, ມີທົ່ງນາຂະໜາດໃຫຍ່ຫຼາຍແຫ່ງຢູ່ຢູຍຊວຽນໄດ້ຫັນຜົນລະປູກຈາກການປູກເຂົ້າມາປູກໝາກເຜັດ, ໝາກໂມ, ໝາກຖົ່ວດິນ, ສາລີ… ສ້າງລາຍຮັບໄດ້ແຕ່ 150 – 250 ລ້ານດົ່ງ/ເຮັກຕາ. ທ່ານ ວັນບ໋ານຳ, ຫົວໜ້າໜ່ວຍງານກະສີກຳ ແລະ ພັດທະນາຊົນນະບົດເມືອງຢູຍຊວຽນ, ແຂວງກວາງນາມ, ໃຫ້ຮູ້ວ່າ:
“ໃນການກໍ່ສ້າງຊົນນະບົດໃໝ່ແມ່ນຕ້ອງປັບປຸງເຂດທົ່ງນາ, ລົງທຶນພື້ນຖານໂຄງລ່າງ ແລະ ກໍ່ສ້າງທົ່ງນາຂະໜາດໃຫຍ່, ນຳຄວາມກ້າວໜ້າດ້ານເຕັກນິກເຂົ້າການຫັນປ່ຽນຜົນລະປູກ ເພື່ອຍົກສູງມູນຄ່າການຜະລິດໃນເນື້ອທີ່ດຽວ ແລະ ກໍ່ສ້າງຕາມທິດຮ່ວມສຳພັນໃນການຜະລິດລະຫວ່າງວິສາຫະກິດກັບຊາວກະສີກອນ. ຜ່ານ 4 ປີແຫ່ງການກໍ່ສ້າງຊົນນະບົດໃໝ່. ໂສມໜ້າຊົນນະບົດໄດ້ມີການປ່ຽນແປງຢ່າງຈະແຈ້ງ ແລະ ພັດທະນາກວ່າກ່ອນນີ້“.
ແຂວງກວາງນາມສູ້ຊົນເຖິງທ້າຍປີຈະມີ 44 ຕາແສງບັນລຸມາດຖານຊົນນະບົດໃໝ່, ເພື່ອປະຕິບັດສຳເລັດຄາດໝາຍດັ່ງກ່າວ, ທາງທ້ອງຖີ່ນສືບຕໍ່ຍູ້ແຮງວຽກງານ ໂຄສະນາ, ສ້າງຄວາມເຫັນດີເຫັນພ້ອມໃນໝູ່ປະຊາຊົນ; ພ້ອມທັງຂົນຂວາຍປະຊາຊົນປະກອບກຳລັງເຫ່ືອແຮງພ້ອມກັນກໍ່ສ້າງຊີວິດໃນເຂດຊົນນະບົດໃຫ້ນັບມື້ນັບຮັ່ງມີ, ເຂັ້ມແຂງກວ່າ.