(vovworld) - ກ່ອນນີ້ 10 ປີ, ແຂວງດັກລັກ ໄດ້ມີແຜນນະໂຍບາຍແຮກສ່ຽວລະຫວ່າງບັນດາອົງການ, ຫົວໜ່ວຍວິສາຫະກິດກັບບັນດາໝູ່ບ້ານຊົນເຜົ່າສ່ວນໜ້ອຍໃນແຂວງ, ເພື່ອແນໃສ່ຊຸກຍູ້ວຽກງານຫຼຸດຜ່ອນຄວາມອຶດຫີວ, ທຸກຍາກ, ຫຼ້າຫຼັງໃນແຂວງ. ແຜນນະໂຍບາຍດັ່ງກ່າວໄດ້ເສີມຂະຫຍາຍປະສິດທິຜົນ. ເມື່ອບັນດາຫົວໜ່ວຍແຮກສ່ຽວໄດ້ຮ່ວມແຮງຮ່ວມໃຈລົງທຶນກໍ່ສ້າງພື້ນຖານໂຄງລ່າງຊົນນະບົດ, ປະກອບສ່ວນຍູ້ໄວການພັດທະນາເສດຖະກິດສັງຄົມໃຫ້ໝັ້ນຄົງ, ຍົກສູງຊີວິດທາງດ້ານວັດຖຸ ແລະ ຈິດໃຈໃຫ້ປະຊາຊົນເທື່ອລະກ້າວ.
ແຜນນະໂຍບາຍແຮກສ່ຽວລະຫວ່າງໝູ່ບ້ານນຳກັນ ໄດ້ນຳມາເຊິ່ງປະສິດທິຜົນ
ດ້ານເສດຖະກິດ - ສັງຄົມໃຫ້ແຂວງດັກລັກ
ໄປຕາມຂົວແຂວນຂ້າມຫ້ວຍນຳ້ໃນຍາມນຳ້ແກ່ງ, ທ່ານ Ama Toan ເຈົ້າບ້ານລຽງ, ໃຫ້ຮູ້ວ່າ, ນັບແຕ່ປີ 2006 ມາຮອດປະຈຸບັນ, ຍ້ອນມີຂົວແຫ່ງນີ້, ເນື້ອທີ່ດິນທັງໝົດ 90 ເຮັກຕາຢູ່ຟາກຟູ້ນຫ້ວຍນ້ຳລ້ວນແຕ່ຖືກນຳເຂົ້າຜະລິດຢ່າງມີປະສິດທິຜົນ, ເຮັດໃຫ້ຊີວິດຂອງຊາວເຜົ່າຢູ່ບ້ານລຽງ ນັບມື້ນັບດີຂຶ້ນ. ຂົວແຫ່ງນີ້ໂດຍບໍລິສັດນຳ້ມັນເຊື້ອໄຟ ນາມໄຕງວຽນ, ເຊິ່ງແມ່ນຫົວໜ່ວຍແຮກສ່ຽວກັບບ້ານ ກໍ່ສ້າງ, ເພື່ອຊ່ວຍປະຊາຊົນໃນບ້ານໄປມາຢ່າງສະດວກສະບາຍ. ບໍ່ພຽງແຕ່ສ້າງຂົວເທົ່ານັ້ນ, ຫົວໜ່ວຍແຮກສ່ຽວຍັງຈັດສົ່ງກຳມະກອນມາກວດກາ, ບູລະນະກິດຈະກຳຂົວແຂວນ, ຢື້ຢາມຖາມຂ່າວ, ມອບຂອງຂວັນ, ໜູນຊ່ວຍແນວພັນປູກ ແລະ ສັດລ້ຽງເປັນປະຈຳ, ແນໃສ່ຊ່ວຍປະຊາຊົນພັດທະນາເສດຖະກິດ, ຮັບປະກັນຊີວິດເປັນປົກກະຕິ. ທ່ານ Ama Toan, ແບ່ງປັນວ່າ:
“ຫົວໜ່ວຍແຮກສ່ຽວຍາມໃດກໍ່ເອົາໃຈໃສ່ຊ່ວຍເຫຼືອນັບທັງທາງດ້ານວັດຖຸ ແລະ ຈິດໃຈໃຫ້ແກ່ປະຊາຊົນ, ເຮັດໃຫ້ປະຊາຊົນອຸ່ນອ່ຽນໃຈທຳການຜະລິດ, ບໍ່ຟັງຕາມຄຳຍູ້ແຍ່ແກ່ດຶງຂອງພວກບໍ່ດີ, ເຊື່ອໝັ້ນຕໍ່ພັກ, ລັດ. ດ້ວຍການຊ່ວຍເຫຼືອເປັນປະຈຳຂອງບັນດາຫົວໜ່ວຍແຮກສ່ຽວ, ພໍ່ແມ່ປະຊາຊົນໄດ້ພະຍາຍາມຮຳ່ຮຽນດ້ານວິທະຍາສາດ, ເຕັກນິກໃນການປູກຝັງ ແລະ ລ້ຽງສັດ, ອັນໄດ້ປະກອບສ່ວນຍົກສູງປະສິດທິຜົນໃນການຜະລິດກະສີກຳຂຶ້ນຕື່ມ“.
ພ້ອມກັບຕາແສງປະສົບກັບຄວາມຫຍຸ້ງຍາກເປັນພິເສດ ດັກເຟີຍ, ການປ່ຽນແປງຢູ່ບ້ານ ປາຍອາ ກໍ່ຍ້ອນມີການເຄື່ອນໄຫວແຮກສ່ຽວ. ທ່ານ ອີທັນລອງຕືງ, ພະນັກງານບ້ານໃຫ້ຮູ້ວ່າ. ໃນຊຸມປີຜ່ານມາ, ຍ້ອນມີການລົງທຶນເປັນປະຈຳຂອງລັດ, ການໜູນຊ່ວຍຂອງຫົວໜ່ວຍແຮກສ່ຽວແມ່ນບໍລິສັດຂາເຂົ້າຂາອອກ 2/9, ຊີວິດຂອງພໍ່ແມ່ປະຊາຊົນນັບມື້ນັບດີຂຶ້ນ. ບັນດາຄອບຄົວໃນບ້ານສ່ວນຫຼາຍໄດ້ມີລະດັບຄອງຊີບດີພໍສົມຄວນ:
“ບໍລິສັດໄດ້ຮ່ວມແຮງຮ່ວມໃຈພ້ອມກັບປະຊາຊົນ, ຂົນຂວາຍປະຊາຊົນເຮັດເສດຖະກິດຄືປູກກາເຟ, ເຂົ້ານາທາມ ແລະ ພືດຫຼາຍປະເພດ. ປະຈຸບັນ, ປະຊາຊົນໄດ້ມີຄວາມກ້າວໜ້າ, ຮັບປະກັນລົບລ້າງຄວາມອຶດຫີວຫຼຸດຜ່ອນຄວາມທຸກຍາກ, ຮັກສາຄວາມເປັນລະບຽບຮຽບຮ້ອຍ, ແລະ ຊ່ວຍຫຼາຍຄອບຄົວບືນຕົວຂຶ້ນເພື່ອສ້າງຄວາມຮັ່ງມີ“.
ການເຄື່ອນໄຫວແຮກສ່ຽວລະຫວ່າງບັນດາອົງການ, ຫົວໜ່ວຍໃນແຂວງກັບບ້ານຕ່າງໆ ບໍ່ພຽງແຕ່ຊ່ວຍປະຊາຊົນຍົກສູງຊີວິດທາງດ້ານຈິດໃຈເທົ່ານັ້ນ, ຫາກຍັງຊ່ວຍປະຊາຊົນໃນບ້ານກໍ່ສ້າງພື້ນຖານດ້ານວັດຖຸ, ຮູ້ນຳໃຊ້ເຕັກນິກທີ່ທັນສະໄໝໃນການຜະລິດກະສີກຳອີກດ້ວຍ. ເຮັດໃຫ້ສະມັດຕະພາບກາເຟເພີ່ມຂຶ້ນເກືອບທົບສອງເທົ່າເມື່ອທຽບໃສ່ກ່ອນນັ້ນ,ຈາກນັ້ນຊີວິດຂອງປະຊາຊົນໄດ້ຮັບການຍົກສູງຂຶ້ນຢ່າງຈະແຈ້ງ. ທ່ານ ອີປຽບເອນວນ, ເຈົ້າບ້ານ ແອອານາ, ໃຫ້ຮູ້ວ່າ:
“ບໍລິສັດໄດ້ໜູນຊ່ວຍປະຊາຊົນທຸກດ້ານຫຼາຍທີ່ສຸດຄື: ຟຸ່ນ, ລະບົບໄຟຟ້າ, ບັນດາກິດຈະກຳວັດທະນະທຳກິລາ... ນັບແຕ່ປີ 2004 ມາຮອດປະຈຸບັນ, ປະຊາຊົນພວກຂ້າພະເຈົ້າໄດ້ປ່ຽນແປງການພັດທະນາ, ຈຳນວນຄອບຄົວທຸກຍາກໄດ້ຫຼຸດລົງຫຼາຍພໍສົມຄວນ. ທາງບໍລິສັດໄດ້ສົມທົບກັບສະຖາບັນວິທະຍາສາດສົ່ງເສີມກະສີກຳ, ຈັດກອງປະຊຸມສຳມະນາດ້ານວິທະຍາສາດຫຼາຍຄັ້ງ, ຊ່ວຍປະຊາຊົນຖອດຖອນບົດຮຽນໃນການປູກກາເຟ, ຈາກນັ້ນຊີວິດຂອງປະຊາຊົນໃນບ້ານນັບມື້ນັບໄດ້ຮັບການພັດທະນາ“.
ປະຈຸບັນ, ຢູ່ດັກລັກ ມີ 176 ອົງການ, ວິສາຫະກິດຂັ້ນແຂວງ ແລະ ຂັ້ນສູນກາງ, ພ້ອມກັບເກືອບ 1300 ອົງການ, ຫົວໜ່ວຍຂັ້ນເມືອງ ໄດ້ແຮກສ່ຽວກັບ 607 ບ້ານ. ທ່ານ ຫງວຽນວັນຊື້, ຮອງຫົວໜ້າຄະນະຂົນຂວາຍປະຊາຊົນ ຄະນະພັກແຂວງດັກລັກ ຖືວ່າ,ຜົນງານນີ້ແມ່ນພື້ນຖານທີ່ສຳຄັນເພື່ອໃຫ້ດັກລັກ ນຳວຽກງານແຮກສ່ຽວກ້າວເຂົ້າສູ່ລວງເລິກ.
“ຍ້ອນບັນດາຫົວໜ່ວຍແຮກສ່ຽວໄດ້ມີຄວາມໃກ້ຊິດຕິດແທດ ແລະ ແນະນຳໃຫ້ປະຊາຊົນເປັນປະຈຳ, ດັ່ງນັ້ນການຫັນປ່ຽນຂອງບັນດາບ້ານຊົນເຜົ່າສ່ວນໜ້ອຍໃນແຂວງດັກລັກ ຈຶ່ງດຳເນີນໄປຢ່າງໄວ ແລະ ບັນລຸໄດ້ຜົນງານດີສົມຄວນ. ໃນໄລຍະຈະມາເຖິງ, ເນື້ອໃນວຽກງານແຮກສ່ຽວຈະຫັນໄປສູ່ໄລຍະໃໝ່, ໝາຍຄວາມວ່າຊ່ວຍປະຊາຊົນອອກແຮງງານທຳການຜະລິດ, ພັດທະນາເສດຖະກິດ, ເຮັດໃຫ້ປະຊາຊົນມີວິທີການປູກຝັງເປັນປົກກະຕິ. ພະຍາຍາມແຕ່ລະປີຕ້ອງຫຼຸດຜ່ອນຈຳນວນຄອບຄົວຊາວຊົນເຜົ່າສ່ວນໜ້ອຍທີ່ທຸກຍາກໃນແຂວງໃຫ້ລົງ 2%“.
ຜ່ານ 10 ປີ ແຫ່ງການເຄື່ອນໄຫວແຮກສ່ຽວໃນທົ່ວແຂວງ, ບັນດາອົງການ, ຫົວໜ່ວຍໃນແຂວງດັກລັກ ໄດ້ຊ່ວຍເຫຼືອບ້ານຕ່າງໆ 80 ຕື້ດົ່ງ, ກໍ່ສ້າງທາງຄົມມະນາຄົມ, ຕິດຕັ້ງສາຍໄຟຟ້າ, ກໍ່ສ້າງເຮືອນປະຊາຄົມ, ຫ້ອງຮຽນອະນຸບານ, ສະໜອງແນວພັນປູກ, ສັດລ້ຽງ. ໂດຍມີຄວາມໃກ້ຊິດຕິດແທດກັບບັນດາໝູ່ບ້ານຊົນເຜົ່າ, ບັນດາຫົວໜ່ວຍແຮກສ່ຽວໄດ້ປະກອບສ່ວນພໍສົມຄວນເຂົ້າໃນການຍູ້ໄວເສດຖະກິດສັງຄົມ, ຮັບປະກັນຄວາມປອດໄພ, ຄວາມເປັນລະບຽບຮຽບຮ້ອຍ ແລະ ເພີ່ມທະວີກຸ່ມກ້ອນມະຫາສາມັກຄີທົ່ວປວງຊົນ.