(vovworld) - ກ່ອນນີ້ລອງຮຽບ ແມ່ນຕາແສງທຸກຍາກກວ່າໝູ່ຂອງເມືອງຈ່າກູ໋, ແຂວງຈ່າວິງ. ປີ 2009, ອັດຕາສ່ວນຄອບຄົວທຸກຍາກຂອງຊາວເຜົ່າຂະແມໃນຕາແສງແມ່ນ 41%. ແຕ່ປະຈຸບັນ, ລອງຮຽບ ໄດ້ກາຍເປັນແບບຢ່າງໃນການລົບລ້າງຄວາມອຶດຫີວຫຼຸດຜ່ອນຄວາມທຸກຍາກ, ເມື່ອອັດຕາສ່ວນຄອບຄົວທີ່ທຸກຍາກຍັງເຫຼືອພຽງ 29% ເທົ່ານັ້ນ.
(ພາບປະກອບ)
ລອງຮຽບ ແມ່ນຕາແສງກະສີກຳ, ໃນນັ້ນຊາວຊົນເຜົ່າຂະແມກວມ 83% ຈຳນວນພົນລະເມືອງ, ນີ້ແມ່ນໜຶ່ງໃນບັນດາຕາແສງທີ່ມີຄອບຄົວທຸກຍາກກວມອັດຕາສູງສຸດໃນແຂວງຈ່າວິງ. ສາຍເຫດແມ່ນມີຫຼາຍ, ແຕ່ສິ່ງສຳຄັນແມ່ນບັນດາຄອບຄົວທຸກຍາກບໍ່ມີສະຕິບືນຕົວຂຶ້ນດ້ວຍຕົນເອງເພື່ອພັດທະນາເສດຖະກິດ, ປັບປຸງຊີວິດການເປັນຢູ່. ຕໍ່ໜ້າສະພາບການດັ່ງກ່າວ, ອຳນາດການປົກຄອງຕາແສງ ໄດ້ເອົາໃຈໃສ່ເປັນພິເສດເຖິງວຽກງານໂຄສະນາກ່ຽວກັບການລົບລ້າງຄວາມອຶດຫີວຫຼຸດຜ່ອນຄວາມທຸກຍາກ, ປຸກລຸກຈິດໃຈກຸ້ມຕົນເອງໃນການພັດທະນາເສດຖະກິດຄອບຄົວ. ອ້າຍ ແທກເລນ, ຊາວບ້ານຈ່າເສິດອາ, ໜຶ່ງໃນບັນດາຄອບຄົວໄດ້ຫຼຸດພົ້ນອອກຈາກຄວາມທຸກຍາກ, ໃຫ້ຮູ້ວ່າ, ຍ້ອນໄດ້ເຂົ້າຮ່ວມຊຸດອົບຮົມກ່ຽວກັບການປູກຝັງ, ອ້າຍຈຶ່ງນຳໃຊ້ທີ່ດິນທັງໝົດຢູ່ອ້ອມເຮືອນເພື່ອປູກໝາກແຕງ, ໝາກແຟງ, ໝາກໄສ່. ແຕ່ລະເດືອນສາມາດຫາເງິນຈາກການຂາຍພືດໄດ້ແຕ່ 5 – 7 ລ້ານດົ່ງ. ອ້າຍແທກເລນ, ໃຫ້ຮູ້ວ່າ:
“ການປູກພືດກໍ່ບໍ່ຍາກ, ເມື່ອເກັບກ່ຽວພືດແຕ່ລະເທື່ອກໍ່ຂາຍໄດ້ແຕ່ 10 – 12 ລ້ານດົ່ງ, ຫາກຳໄລໄດ້ກວ່າເຄິ່ງໜຶ່ງ. ລະດູການປູກຝັງແກ່ຍາວເປັນເວລາເກືອບ 2 ເດືອນ, ພິເສດແມ່ນ, ພໍ່ຄ້າຊາວຂາຍໄດ້ມາຊື້ພືດຢູ່ກັບເຮືອນ“.
(ພາບປະກອບ) ດ້ວຍທິດນຳ, ມອບ “ຄັນເບັດ“ ໃຫ້ຜູ້ທຸກຍາກ ເພື່ອໃຫ້ເຂົາເຈົ້າບືນຕົວຂຶ້ນດ້ວຍຕົນເອງ, ອຳນາດການປົກຄອງຕາແສງໄດ້ເອົາໃຈໃສ່ເປັນພິເສດເຖິງການເຜີຍແຜ່ບັນດາຮູບແບບປູກຝັງ, ລ້ຽງສັດ, ນຳໃຊ້ບັນດາມາດຕະການປູກຝັງ, ຫັນປ່ຽນຜົນລະປູກ, ສັດລ້ຽງທີ່ເໝາະສົມກັບເງື່ອນໄຂທຳມະຊາດຂອງທ້ອງຖີ່ນ ແລະ ສົ່ງເສີມປະຊາຊົນຮຳ່ຮຽນເອົາບົດຮຽນເຊິ່ງກັນ ແລະ ກັນໃນການພັດທະນາການຜະລິດ, ຍ້ອນເຫດນັ້ນ, ປະສິດທິຜົນການຜະລິດຈຶ່ງເພີ່ມຂຶ້ນໃນເນື້ອທີ່ຜະລິດດຽວກັນ. ປະຊາຊົນມີເງື່ອນໄຂພັດທະນາການຜະລິດເພື່ອບືນຕົວຂຶ້ນຫຼຸດພົ້ນອອກຈາກຄວາມທຸກຍາກ. ພາຍຫຼັງໄດ້ເຂົ້າຮ່ວມຊຸດອົບຮົມດ້ານເຕັກນິກ ແລະ ໄດ້ກູ້ຢືມທຶນດ້ວຍດອກເບ້ຍຕຳ່ 4 ລ້ານດົ່ງ, ອ້າຍ ກິມແທງ ໄດ້ເຊົ່າທີ່ດິນເພື່ອປູກພືດ. ຈາກຜູ້ບໍ່ມີທີ່ດິນ, ມາຮອດປະຈຸບັນອ້າຍຊື້ໄດ້ທີ່ດິນເພື່ອທຳການປູກຝັງແລ້ວ. ອ້າຍ ກິມແທງ ແບ່ງປັນວ່າ:
“ມີເງິນກູ້ຢືມແລ້ວຂ້າພະເຈົ້າດີໃຈຫຼາຍ ແລະ ພະຍາຍາມນຳໃຊ້ທຶນຄືແນວໃດໃຫ້ມີປະສິດທິຜົນ ແລະ ຂ້າພະເຈົ້າໄດ້ປູກໝາກແຕງ, ໝາກໂມເພື່ອສ້າງລາຍຮັບ. ຂ້າພະເຈົ້າຄິດວ່າຕົນເອງຕ້ອງເຮັດແນວໃດ ທັງຫາເງິນລ້ຽງຊີບໃຫ້ໄດ້, ທັງສົມກັບຄວາມເອົາໃຈໃສ່ຂອງອຳນາດການປົກຄອງທ້ອງຖີ່ນ “.
(ພາບປະກອບ) ເພື່ອໃຫ້ວຽກງານຫຼຸດຜ່ອນຄວາມທຸກຍາກບັນລຸປະສິດທິຜົນສູງ, ອຳນາດການປົກຄອງຕາແສງລອງຮຽບ ໄດ້ຜັນຂະຫຍາຍບັນດາລາຍການໜູນຊ່ວຍຂອງສູນກາງ. ໃນ 3 ປີມານີ້, ທາງຕາແສງໄດ້ຮັບເງິນລົງທຶນ 34 ຕື້ດົ່ງເພື່ອພັດທະນາພື້ນຖານໂຄງລ່າງ, ພັດທະນາການຜະລິດ. ຈຳນວນທຶນດັ່ງກ່າວ, ຕາແສງໄດ້ໃຊ້ເຂົ້າໃນການກໍ່ສ້າງໂຮງຮຽນ, ທາງຄົມມະນາຄົມຊົນນະບົດ, ສຸກສາລາ, ຕະຫຼາດ, ລະບົບຊົນລະປະທານ… ນອກນັ້ນທາງຕາແສງຍັງໃຊ້ເງິນ 4 ກວ່າຕື້ດົ່ງເພື່ອໜູນຊ່ວຍດ້ານເຮືອນຢູ່ໃຫ້ 470 ກວ່າຄອບຄົວທີ່ທຸກຍາກຕາມຂໍ້ຕົກລົງ 67 ຂອງນາຍົກລັດຖະມົນຕີອີກ. ສິ່ງດັ່ງກ່າວໄດ້ປະກອບສ່ວນຫຼຸດຜ່ອນອັດຕາຄອບຄົວທີ່ທຸກຍາກຂອງຕາແສງລົງ 7% ໃນສອງປີຜ່ານມາ. ທ່ານ ເລເຟືອກເວະ, ປະທານຄະນະກຳມະການປະຊາຊົນຕາແສງລອງຮຽບ, ເມືອງຈ່າກູ໋, ແບ່ງປັນວ່າ:
“ຕາມຂໍ້ຕົກລົງຂອງເມືອງ, ແຕ່ລະປີຫຼຸດອັດຕາຄອບຄົວທຸກຍາກລົງໃຫ້ໄດ້ 4%, ແຕ່ທ້ອງຖີ່ນສູ້ຊົນເພື່ອຫຼຸດຜ່ອນຄອບຄົວທີ່ທຸກຍາກລົງໃຫ້ໄດ້ແຕ່ 7-8%. ນັບແຕ່ຕົ້ນປີ, ອຳນາດການປົກຄອງໄດ້ແບ່ງງານໃຫ້ພະນັກງານລົງແນະນຳໃຫ້ບັນດາຄອບຄົວທຸກຍາກເຮັດເສດຖະກິດ, ກຳແໜ້ນສະພາບແກ້ໄຂວຽກເຮັດງານທຳ, ຮຽນວິຊາຊີບ, ກໍ່ຄືຄວາມຕ້ອງການທຶນຂອງປະຊາຊົນ ເພື່ອສ້າງເງື່ອນໄຂໃຫ້ເຂົາເຈົ້າພັດທະນາການຜະລິດ. ຍ້ອນເຫດນັ້ນຮອດທ້າຍປີ, ແຕ່ລະບ້ານສາມາດຫຼຸດຜ່ອນຈຳນວນຄອບຄົວທີ່ທຸກຍາກລົງແຕ່ 8-12 ຄອບຄົວ“.
ດ້ວຍບາດກ້າວຜັນຂະຫຍາຍການປະຕິບັດທີ່ເໝາະສົມ, ອຳນາດການປົກຄອງ ແລະ ປະຊາຊົນຕາແສງລອງຮຽບ ໄດ້ ແລະ ພວມເຮັດໃຫ້ໂສມໜ້າຊົນນະບົດຂອງເມືອງຈ່າກູ໋ ມີການປ່ຽນແປງເທື່ອລະກ້າວ. ແລະເລື່ອງກາຍເປັນຕາແສງຊົນນະບົດໃໝ່ຂອງຕາແສງໃນທ້າຍປີ 2015 ຈະປະກົດຜົນເປັນຈິງຢ່າງແນ່ນອນ.