(vovworld) - ໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດ ໃໝ່ຢູ່ຫວຽດນາມໄດ້ປະຕິບັດມາເປັນເວລາ 1/3 ໄລຍະທີ່ໄດ້ກຳນົດ. ຕາມລາຍງານຂອງຄະນະຊີ້ນຳໂຄງການແລ້ວ, ຜົນງານໃຫຍ່ສຸດໃນ 3 ປີ (2011 – 2013), ນັ້ນແມ່ນຄວາມຮັບຮູ້ຂອງປະຊາຊົນ, ພິເສດແມ່ນປະຊາຊົນຢູ່ເຂດຫ່າງໄກສອກຫຼີກກ່ຽວກັບໂຄງການກໍ່ສ້າງຊົນນະບົດໃໝ່ໄດ້ມີການປ່ຽນແປງຢ່າງຕັ້ງໜ້າ. ມີບາງແຫ່ງຢູ່ເຂດພູດອຍ, ເຖິງວ່າຂາດທີ່ດິນທຳການຜະລິດກໍ່ຕາມ, ແຕ່ຫຼາຍຄອບຄົວໄດ້ສະຫງວນທີ່ດິນຂອງຕົນເພື່ອລົງທຶນກໍ່ສ້າງພື້ນຖານໂຄງລ່າງ, ເຮັດໃຫ້ໂສມໜ້າຊົນນະບົດສະອາດສວຍງາມກວ່າ.
ປະຊາຊົນສະຫງວນທີ່ດິນກໍ່ສ້າງທາງຄົມມະນາຄົມ
(ພາບອິນເຕີແນດ)
ອ້າຍ ດິງແກນ, ບ້ານເບີ່, ຕາແສງກົງເລີງເຄີງ, ເມືອງເກີບາງ, ແຂວງຢາລາຍ ແມ່ນໜຶ່ງໃນຈຳນວນ 50 ຄົນທີ່ໄດ້ຮັບໃບຍ້ອງຍໍທີ່ກອງປະຊຸມສະຫຼຸບ 3 ປີ ແຫ່ງການຜັນຂະຫຍາຍໂຄງການຈຸດໝາຍແຫ່ງຊາດກ່ຽວກັບການກໍ່ສ້າງຊົນນະບົດໃໝ່. ໂດຍແມ່ນເຈົ້າບ້ານ, ອ້າຍ ດິງແຄນ ທັງຂົນຂວາຍປະຊາຊົນຊາວຊົນເຜົ່າບານາໃນບ້ານປະກອບກຳລັງເຫື່ອແຮງ, ທັງເປັນເຈົ້າການສະຫງວນທີ່ດິນຂອງຄອບຄົວເພື່ອກໍ່ສ້າງທາງຄົມມະນາຄົມ.
“ເພື່ອພັດທະນາຊົນນະບົດໃໝ່, ສ້າງເງື່ອນໄຂໃຫ້ປະຊາຊົນພັດທະນາ, ກໍ່ສ້າງເສັ້ນທາງໄປມາ, ຂົນສົ່ງວັດຖຸອຸປະກອນ, ພິເສດແມ່ນຕົ້ນອ້ອຍເຖິງເຂດຜະລິດ. ປະຊາຊົນໄດ້ສະຫງວນທີ່ດິນ, ປະກອບກຳລັງເຫື່ອແຮງ ແລະ ບໍລິຈາກເງິນເພື່ອກໍ່ສ້າງຊົນນະບົດໃໝ່“.
ປະຊາຊົນຮ່ວມແຮງກໍ່ສ້າງທາງຄົມມະນາຄົມ
(ພາບອິນເຕີແນດ) ພໍ່ແມ່ປະຊາຊົນຢູ່ບ້ານເບີ່ ໄດ້ຂາຍຕົ້ນອ້ອຍໃຫ້ໂຮງງານຜະລິດນຳ້ຕານອານເຄ (ຢາເລິມ). ເມື່ອມີທາງຄົມມະນາຄົມ, ໂອໂຕສາມາດໄປຍັງສວນອ້ອຍໄດ້, ປະຊາຊົນບໍ່ຕ້ອງຂົນສົ່ງ, ລາຄາຂາຍອ້ອຍກໍ່ສູງກວ່າ, ພໍ່ຄ້າກໍ່ບໍ່ມີສາຍເຫດເພື່ອຫຼຸດລາຄາໄດ້:
“ປະຈຸບັນ, ຊົນນະບົດໄດ້ຮັບການພັດທະນາກວ່າກ່ອນນີ້ຫຼາຍ, ພິເສດແມ່ນພື້ນຖານໂຄງລ່າງ. ຊີວິດຂອງປະຊາຊົນກໍ່ໄດ້ດີກວ່າປີກ່ອນ. ລາຍຮັບຈາກການປູກອ້ອຍຄິດສະເລ່ຍໃສ່ຫົວຄົນແມ່ນ 19 ລ້ານດົ່ງ/ຄົນ“.
ເອື້ອຍ ໂລ່ທິລຽນ, ຊົນເຜົ່າໂບ໋ອີ ຢູ່ຕາແສງແທງບິ່ງ, ເມືອງເມື່ອງເຄືອງ, ແຂວງລາວກາຍ ໄດ້ສະຫງວນທີ່ດິນ 400 ຕາແມັດເພື່ອກໍ່ສ້າງທາງບ້ານ. ເມື່ອຖືກຖາມເອື້ອຍຮູ້ສຶກເສຍດາຍບໍ, ເອື້ອຍ ລຽນ ໄດ້ຕອບເລີຍວ່າ:
“ບໍເສຍດາຍດອກ, ມີທາງໄປຢ່າງສະດວກສະບາຍ ແລະ ສວຍງາມ, ຂ້າພະເຈົ້າດີໃຈຫຼາຍ. ບໍ່ພຽງແຕ່ຄອບຄົວຂ້າພະເຈົ້າໄປມາຢ່າງສະດວກສະບາຍເທົ່ານັ້ນ, ຫາກປະຊາຊົນໃນບ້ານກໍ່ມີຄວາມສະດວກເຊັ່ນດຽວກັນ“.
ປະຊາຊົນກໍ່ສ້າງທາງເບຕົງ
(ພາບອິນເຕີແນດ)
ຢູ່ແຂວງພູດອຍຄືຮ່າຢາງ, ມີຫຼາຍແຫ່ງຍັງຂາດທີ່ດິນທຳການຜະລິດຢູ່, ແຕ່ອ້າຍ ຫຼີຈ່ອຍກວຽນ, ຢູ່ບ້ານນຝີ່ນໂຮ່, ຕາແສງທົງງວຽນ, ເມືອງຮ່ວາງຊູຝີ່ ໄດ້ສະຫງວນທີ່ດິນ 500 ຕາແມັດ ຢູ່ໃຈກາງບ້ານເພື່ອກໍ່ສ້າງໂຮງຮຽນ. ທ່ານ ຫງວຽນມິງຕ໋ຽນ, ຮອງປະທານຄະນະກຳມະການປະຊາຊົນແຂວງຮ່າຢາງ ຢັ້ງຢືນວ່າ:
”ເມື່ອປະຊາຊົນຮູ້, ປະຊາຊົນປຶກສາຫາລື ແລະ ປະຊາຊົນເຮັດຈຶ່ງປະສົບຜົນສຳເລັດ, ສຳລັບແຂວງຂອງພວກຂ້າພະເຈົ້າ, ມີບາງຄອບຄົວໄດ້ສະຫງວນທີ່ດິນເຖິງ 1.150 ຕາແມັດ. ຖ້າຫາກຢູ່ແຂວງອື່ນນີ້ແມ່ນເລື່ອງທຳມະດາ ແຕ່ໃນແຂວງພູດອຍ, ຍັງຂາດທີ່ດິນທຳການຜະລິດຄືແຂວງພວກຂ້າພະເຈົ້າ, ນີ້ແມ່ນເລື່ອງທີ່ຍາກຫຼາຍ. ດັ່ງນັ້ນ ຂ້າພະເຈົ້າຄິດວ່າ, ເມື່ອປະຊາຊົນເຂົ້າໃຈແລະເຮັດ ດ້ວຍຄວາມສະໝັກໃຈ ຈະປະສົບຜົນສຳເລັດຢ່າງແນ່ນອນ”.
ເສັ້ນທາງເບຕົງໄດ້ຮັບການກໍ່ສ້າງດ້ວຍການຮ່ວມແຮງຮ່ວມໃຈຂອງປະຊາຊົນ
(ພາບອິນເຕີແນດ)
ໃນສະພາບຂາດທີ່ດິນທຳການຜະລິດນັ້ນ, ຄິດວ່າເລື່ອງຂົນຂວາຍປະຊາຊົນສະຫງວນທີ່ດິນຍາກທີ່ຈະປະກົດຜົນເປັນຈິງໄດ້, ແຕ່ບັນດາເສັ້ນທາງໃນບ້ານທີ່ນັບມື້ນັບສະອາດສວຍງາມນັ້ນ ໄດ້ເປັນການພິສູດໃຫ້ເຫັນກຳລັງແຮງແຫ່ງຄວາມເຫັນດີເຫັນພ້ອມ ແລະ ນຳ້ໃຈສາມັກຄີຂອງປະຊາຄົມ.